اشمعنى لما الشبشب صغر عليا اديتة لمحمد ابن طنط نورة
انا : هو الشبشب زي النضارة وبعدين مفيش حاجة اسمها النضارة صغرت
هي : ماليش دعوة انا اخدتها خلاص خلي بابا يجبلك واحدة تانية
............................
اكتشفت اني لما بكون عاوزة اعلم اولادي حاجة كويسة
بعلمهم بضمير زيادة عن اللزوم لدرجة ان الحاجة الكويسة دي بتتقلب بعد كدة
لحاجات مش كويسة خالص
؟؟؟؟؟؟؟؟؟؟؟؟؟؟
لما كان الشينيور صغير شوية وكانت الرايقة لسة مشروع والجبارة كانت في علم الغيب
كنت بحاول اعلمة انة يقول السلام عليكم وهو داخل اي مكان
حتى واحنا داخلين الشقة واحنا عارفين ان مفيش حد فيها
ولما كان بيسألني انتي بتسلمي على مين ؟
كنت بقولة على الملائكة اللي في الشقة
وفضلت على كدة لغاية لما لقيتة داخل الحمام وبيقول
السلام عليكم يا بي بي
بس قعدت افهم فية ياحبيبي كلة الا الحمام
وهو ابدا انتي قلتي لازم نسلم في اي مكان
........................................
حكاية كمان حصلت مع الرايقة من كام يوم
الرايقة : ماما جارتي اللي تحت قالتلي ماتلعبيش مع فرحة بنت طنط نورة
علشان هي واختها ولاد بوابين
انا : تعالي هنا واية يعني ولاد بوابين وهما البوابين دول مش بني ادمين زينا
هي : ايوة ياماما
انا : هي مش طنط نورة دي اللي بتطلع تنضف معايا الشقة كل يوم
هي : ايوة ياماما
انا : مش هي اللي بتشيل اللعب بتاعتكم وتروق الدنيا وتشيل كمان الزبالة
اللي احنا بنعملها
وفرحة دي مش هي اللي بتجيب العيش الفينو اللي بعمل لكم بية السندوتشات
وانتي بتكوني نايمة في الدفا وهي اللي بتروح تشترية بدالك او بدال اخوكي
هي : ايوة ياماما
انا : يبقى الناس دي كويسة وبتساعدنا ولازم نحترمهم ونقدر التعب اللي بيتعبوة علشانا
هي : حاضر ياماما انا هالعب معاهم ومش هاسمع كلام جارتي
انا : ايوة كدة شطورة
وفات يوم واحد ياحضرات ولقيت الرايقة جاية ومبتسمة على الاخر
الرايقة : ماما يا ماما انا لقيت طنط نورة بتغسل سجادة قلتلها اساعدك ياطنط
بس هي مارضيتش مش انا كدة شاطرة ؟
طيب انا اعمل اية ؟ اعتزل عملية التربية كلها وخلاص
.....................
شكر لابد منة لدوبة علشان ساعدتني في تنزيل صور الجبارة
اشوفكم على خير
