الاثنين، ٤ أبريل ٢٠١١

انغام

السلام عليكم

دي كلمات اغية لأنغام اسمها والله حلوه
عجبتني ويارب تعجبكم
.........

لو جه في بالنا نحلم بجنه قوة ايمانا هي السلام

والدين معامله ورساله كامله يعني الحكايه مفيهاش كلام

غنّي وحب وصلي جماعه لقلبك ساعه وربك ساعه

والدنيا حلوه واللهي حلوه مش ضاحكه علينا وخدّاعه

ماتقولش خلصت وذنوبي كترت ماتعيش فكره جاي العذاب

صاحب الجلاله الله تعالى من الاستحاله ينسى اللي تاب

ربنا ماخلقناش نتألم عادي بنغلط وبنتعلم

والدنيا حلوه واللهي حلوه اوعى تسيب نفسك وتسلّم

لو حد هننا او جرح طالنا نفتح ببانّا مانردهاش

جايز نجاحنا يكسر جروحنا ونحب روحنا مانظلمهاش

نملا حياتنا حب وفرحه ونكتر اعمالنا الصالحه

والدنيا حلوه واللهي حلوه مش ايام بتعدي ورايحه
........
اشوفكم على خير

الأحد، ١ أغسطس ٢٠١٠

كلام رقيق

السلام عليكم
بأختصار شديد
عيد ميلاد اولادي كان اول الشهر اللي فات
مش هحكي عن تفاصيل اليوم ولا حاجة
انا بس عاوزة احكي عن ارق هدية جتلي في اليوم دة
ايوة صحيح ان الهدايا كلها كانت للأولاد
الا الهدية دي كانت ليا انا
الهدية عبارة عن كلمتين عجبوني اوي
وهما
احمد الله ان زوجي محمد
وقد رزقت منه بمحمود
وجعل اموري سهلة
و وهبني سهيلة
وجعل لي ملك ترافقني في الجنة
ولي اخوة بمثابة الأصدقاء
احمد ولوما وموني
وامي نور عيوني
ورغم كوني شهيرة
اتواضع للجميع
فالخير لا يضيع
............
صقفة كبيرة وشكر كتير لكاتبة الكلمات
حقيقي اسعدتيني

الجمعة، ٥ مارس ٢٠١٠

عواجيز الفرح

السلام عليكم
طبعا كلكم عارفين مين هما عواجيز الفرح
واللي مش عارف اقولة
عواجيز الفرح دول الستات العواجيز اللي بيبقوا قاعدين مش عاجبهم
حاجة ولا حد وطول ماهما قاعدين بينتقدوا ويتريقوا على معظم خلق الله

بالرغم من اني مقتنعة ان الشباب شباب القلب
ومش فارقة معايا اذا كان عمري 34 والأ 35
والا حتى لما يبقى 65 - اذا كان ليا عمر ان شاء الله-
الا اني بدأت اقتنع اني بقيت من عواجيز الفرح
لية بقى....؟
انا بتقابل مع صحباتي في مكان قريب من الجامعة
وما ادراكم ما الجامعة الخاصة
الناس بقت مش هي الناس
طول عمري عارفة ان الشباب- بنات واولاد - في سن المراهقة
بيقلدوا اي موضة تطلع وخلاص من غير مايبصوا عليها
مناسبة لعاداتنا وتقاليدنا والا لأ
دول كمان من غير مايبصوا على نفسهم في المرايا ويشوفوا شكلهم
حلو والا وحش واذا كانوا شايفين نفسهم حلوين
يبقوا محتاجين نظارات
دة انا شوفت واحد عامل شعرة كحكة كبيرة ولولا انة مربي خط كدة
تحت مناخيرة تقريبا شنب
كنت بصمت بالعشرة انة بنت
المشكلة بقى انة مابقاش الشكل بس هو اللي كتر كلامي علية
لأ دي التصرفات كمان بقت غريبة جدا
يعني مش طبيعي ان يكون في ولدين قاعدين جنب بعض
ولزقين قوي وكأنهم حضنين بعض

وبرضة مش طبيعي لما يكونوا بنتين قاعدين نفس القاعدة
وكمان واحدة ماسكة ايد التانية
دة على اساس انها خايفة تهرب منها ؟
والا دة من كتر حبها فيها ؟
دة على كدة يبقى انا وصحباتي مابنطقش بعض
كل واحدة بتبقى قاعدة بينها وبين التانية متر
طبعا بنسلم على بعض ونحضن بعض كمان
بس دة وقت اللقاء وخلاص انما اللزقة دي غريبة شوية

انا حاسة اني مابقتش ام الشنيور
ولا ام محمود
انا كدة بقيت ام جلامبو
طول ماانا قاعدة عيني رايحة وجاية على الأشكال الغريبة
وبقت هواية بقى اننا نتقابل جنب الجامعة علشان نتفرج

ربنا يرحمنا ويسامحنا
قولوا امين
اشوفكم على خير

الأربعاء، ٢٠ يناير ٢٠١٠

الي كل اللي يعرفوني

السلام عليكم

الي كل اللي يعرفوني
احب اقولكم اني انسانة عادية
زي باقي الناس كلها
ممكن جدا ابقى مضايقة وزعلانة
لدرجة الأنهيار عادي بتحصل
والمفاجأة بقى
اني ممكن اتعب يعني اكون مريضة
اة والله
ماهو انا من بني البشر برضة
مش علشان بستحمل شويتين
يبقى خلاص مش بتألم
انا برضة بحس

ياريت لما تلاقوني كدة
تسيبوني انهار شوية
تدوني فرصتي في الانهيار
مش عاوزة اشوف نظرات الأستغراب
النظرات دي بتخليني اسكت
واجمد من تاني
علشان افضل في عنيكم القوية

كلمة اخيرة لخيخة
ممكن تسلفيني
شوية خيخنة من عندك

بحبكم كلكم
اشوفكم على خير

السبت، ٢٨ نوفمبر ٢٠٠٩

بعد سنة ونص

بعد سنة ونص دي اول مرة اشوفك فيها
بعد سنة ونص انت زي ماانت
بعد سنة ونص انا زي ماانا
وكأني لسة سيباك امبارح
كان نفسي اشوف في عينك نظرة اشتياق
كان نفسي احس ان في حاجة اتغيرت
ايوة في حاجة اتغيرت
عارف اية؟
لاول مرة قلبي مايدقش من خوفة منك
انا بس كنت محرجة شوية لانك ماردتش عليا السلام
انت طول عمرك بتقول:انا مفيش حد بيوحشني
وبتبقى فرحان اوي بقوتك دي
بس دي مش قوة دي قسوة
انت عارف
ناس كتير بتقولي كلمية في التليفون
واعملي اللي عليكي
علشان ربنا مايزعلش منك
طيب يعني انتو عاوزني اضحك على ربنا؟
عاوزني اتكلم مكالمة باردة مالهاش اي طعم
عاوزني اطمن علية واقولة عاوز حاجة
طيب وبعدين؟؟
انا هبقى بقول كلام من ورا قلبي
وهو كمان هيبقى حاسس انة كلام تقضية واجب وخلاص
طيب لو طلب مني حاجة
اعمل انا اية ساعتها؟
لو قالي تعالي زوريني في بيتي
هقولة اية؟
اقولة لأ مش هينفع تعالى نتقابل برة
والا اقولة ماينفعش ازورك في وجود مراتك التانية
والا اقولة البيت دة مش هينفع ادخلة تاني
نفسي اللي جوايا يتغير وهو كمان اللي جواة يتغير
ويبين دة
مش ضعف خالص اني اكون واحشاك
مش ضعف ابدا انك تكون نفسك تشوفني او تكلمني
بعد سنة ونص من الفراق
ماكنتش احب ان المقابلة تكون كدة
بعد سنة ونص مش عارفة اعمل اية
مش عارفة اقول اية
يارب
انت وحدك اللي عارف
انت وحدك اللي شايف
انت وحدك اللي بتقف جنبي
الهمني الصح
قولي اعمل اية
اسمع كلامهم وانا مش عاوزة كدة
والا استنى يمكن يتغير وقلبة يحن
وساعتها اكيد انا كمان هبقى احن من احن حد في الدنيا
وهيبقى هو دة الطبيعي
يارب
يارب
يارب

الأربعاء، ٢٨ أكتوبر ٢٠٠٩

ابو العريس

السلام عليكم
ندخل في الموضوع على طول
اخويا اتجووووووووووووووووووز
من كام يوم كدة وبالتحديد يوم 23 اكتوبر
اتجوز احمد اخويا
مش هاتكلم على الفرح وحلاوتة
ولا عن احمد وجمالة
هاتكلم عن الأحساس نفسة
الأحساس بالفرحة
الأحساس بفرحة الناس اللي كانت موجودة
الناس اللي كانت جاية فعلا وهي فرحانة لينا اوي
مش جاية علشان تتفرج علينا
مش جاية علشان ينتقدونا
اد اية حاجة حلوة اوي لما تحس ان الناس فعلا جاية فرحنالك من قلبها
اما انا فكنت ابو العريس
ايوة ابو العريس
اللي كان خايف على ابنة جدا
ومش عاوز حد يجي جنبة ولا يطلب منة حاجة
وكنت مظبطة كل حاجة والحمد لله
نادرا لما بشوف فرح بيكونوا كل الناس فية مبسوطة وراضية
بجد بجد فرحنا كان ..............
مش عارفة اجيب كلمة تعبر عن اللي عاوزة اقولة
ومن هنا من مدونتي حبيبتي
احب اشكر كل الناس اللي كانت موجودة معانا
كل الناس اللي شوفت في عنيها فرحة حقيقية من القلب
اما الشكر الكبير اوي اوي اوي هايكون ل
بت خيخة و دوبة
بت خيخة اول واحدة جت بعدي على طول
وبالرغم من انها كانت لابسة كعب عالي
ورجلها كانت بتتقطع
الأ انها صممت تفضل واقفة معايا نستقبل الناس
مع انها ماتعرفش حد خالص غير ماما واخواتي
بت ياخيخة
كلام الشكر اللي في الدنيا كلة مش هايكفيني علشان اقولهولك
اما دوبة
فكانت راجعة من المستشفى كانت بتشوف عمر
ابنها اللي عندة اربع ايام و كان محجوز في الحضّانة
ومع ان ولادتها كانت قيصري
وبالرغم من الالم النفسي والجسدي
الأ انها نورتني في الفرح
انتو متخيلين
يعني اية تعدي عليا علشان تباركلي وتسلم على العريس
صديقتي دوبة
اسعدتي قلبي اوي
.........
عذرا ابو العريس
اخذت مكانك وقمت بمهامك
الي ان تستفيق وتدرك ان لك اولاد
......................
اشوفكم على خير

الثلاثاء، ٢٠ أكتوبر ٢٠٠٩

رسالة

السلام عليكم
البوست دة منقول من مدونة كفاية طيبة
وانا اتأثرت بية جدا جدا واستأذنت اني انقلة عندي
.......................
رســـالـة
بابا ...!!
ممكن اقولك حاجة ومش تزعل منى
ها ؟
اقول والا هتزعل ؟
طيب انا هقول وخلاص بقى
بابا هو انت بتحبني ؟
طبعا هتقول ايوة..بس انت متأكد ؟؟
انت بتحبني بجد يعني؟؟
زي بابا منة والا بتحبني ازاى؟
بابا.. هو انت ليه مش بتطبطب عليّا زي بابا مريم؟
بابا.. هو انت شايفني اجمل بنوتة فى الدنيا ؟زي بابا ريهام
والا انت مش عارفنى اصلاً؟
بابا ..هو انا ليه مش بحس انى مطمنة وانا معاك؟
هو انا ليه مش بحس بأمان زي خلود لما تبقي مع باباها
بابا..انت ليه مش بتملّس على شعرى وتضحكلى زي اى بابا بيحب بنته؟
بابا..هو انت ليه مش بتمسك ايديّا واحنا بنعدي الشارع؟
بابا..هو انت مكسوف منّى ؟؟
والا مش بتحبني ومش عايز تزعلنى وتقولى كدة ؟
بابا..هو انا ليه لما أحب اتكلم مع حد وافضفضله مش انت اول واحد بييجي على بالى؟
نفسي تبقي انت اول واحد ييجي على تفكيري لما احب اتكلم
بس مش انت هو العيب منّى ولا منك ؟؟
بابا..هو انت ليه مش بتاخدنى فى حضنك لما أعيط ؟
ولا بتيجي تغطيني قبل مانام وتبوسنى على راسي ؟
عارف يا بابا
ساعات ببصلك وانت قاعد بكلمك فى سرّى بقولك :
انا بحبك اوى يا بابا .. هو انت مش بتحبني زي ما بحبك ؟
بابا.. هو انت ليه مش بتيجي تفرحنى من برّة وتدخل البيت
وتقولى انا جبتلك حاجة ليكي انتى بس عشان انتى بنوتّى حبيبتى
بابا..هو انت مش بتدلعنى ليه ؟
ايوة انت بتدلع اسمي بس مش بتدلعنى انا
ليه مش بشوف فى عينيك انك عايز تعرف اخبارى بجد
ليه بشوفك دايماً بتفكر فى نفسك بس
ليه مش بتبصلى بنظرة حنينة زي بابا بنت خالتى
عارف يا بابا
عمو جوز خالتى ده لما قعدت معاه شوية قولتله :
ياااا ...نفسي فى بابا زيك يا عمو
ساعتها عمو عينيه دمّعت
عشان اتأثر بكلامى
وانا عينيَا دمعت بردو
بس مش عشان اتأثرت لا عشان زعلت انى بقول عليك كدة
زعلت انك مش مديني اللى انا محتاجاله اوى منك
وزعلت انك ممكن تزعل لو سمعت كلامى ده
عارف يا بابا
انا مش قادرة اكمل معاك كلام
عشان انت مش هتسمعني ولا هتفهمنى
شكلك مش عارف يا بابا
اشوفكم على خير

الأربعاء، ١٣ مايو ٢٠٠٩

رساله بس مش حب

السلام عليكم
معلش انا بقالي كتير غايبة ومش برد على التعليقات
ومش بتابع مدوناتكم
انا مش عارفة سبب محدد اقدر اقولة
بس هي الظروف اللي ملغبطة على بعض كدة ومش مستقرة
ويمكن كمان التقويم مخليني مش طايقة نفسي
مش عارفة بس ان شاء الله مش هاغييب كتير كدة تاني
ندخل بقى في الموضوع
في مكالمة تليفونية طويييييييييلة مع احدى صديقات الجامعة
كان بقالي كتير ماكلمتهاش
لقيت البنت ياعيني مكبوتة وهاتطق من جنابها
ولما سألتها مالك؟ قالتلي:
في كلمتين واقفين في زوري وهايكتموا على نفسي
وعاوزة اقولهم لجوزي بس مش هاقدر
انا : اتكلمي طيب في اية؟
الكلمتين عبارة عن رسالة عاوزة تبعتهالة
واليكم محتويات الرسالة
هاي حبيبي. ازيك
ممكن من فضلك لما ترجع من الشغل وتقلع هدومك
تبقى تعلقهم على الشماعة الكبيرة
وبلاش ترميهم في جميع انحاء الشقة
علشان انا مش الخدامة اللي جبهالك باباك اللي هاتفضل تلم هدومك
من كل مكان انا مش بقولك تعلقهم في الدولاب لا سمح الله
انا بس عاوزاهم في مكان واحد
وياريت لما احضرلك الأكل تبقى تفتكر وتسألني
"انتي اكلتي والا لسة؟"
لأني مش الطباخة اللي جبتهالك مامتك اللي هاتحط لك الغدا وتدخل تاكل في المطبخ
وتعالى هنا بقى.... يعني اية ابقى قاعدة بتفرج على التليفزيون
وتدخل انت بمنتهى البساطة وتاخد الريموت من جنبي وتغير القناة!
من غير ماتكلف خاطرك وتسألني او تستأذن
هو حد فهمك ان التليفزيون دة ورث ليك والأ حاجة؟
هو مش احنا مجهزين البيت مع بعض؟!
والأ علشان انت اللي جايب الشقة يبقى خلاص دة حقك الرسمي؟!
اما بقى العيال فدول شرك بيني وبينك
يعني ليك فيهم زي اللي ليا
مش لما يعملوا حاجة غلط يبقوا ولادي وماعرفتش اربيهم
ولما يبقوا كويسين يبقوا ولادك وتربيتك
لا ياحبيبي هما اولادنا احنا الأتنين سواء حلوين او وحشين
في حاجة كمان
اذا كنت فاهم ان صوت تجشؤك يشبة لصوت عبد الحليم
او ام كلثوم علشان تفضل تسمعهولي كل شوية
فأحب اقولك انة صوت مقرف ويوجع البطن
خلاص كدة انا خلصت اللي عندي
تيك كير يا بيبي
...............
انا نقلت لكم الرسالة بناء على طلبها
وقالتلي: قولي للرجالة
يخلوا بالهم من الحاجات الصغيرة دي علشان بتفرق معانا جامد
..................
اشوفكم على خير

الأربعاء، ٢٥ فبراير ٢٠٠٩

عجبي عليك يا زمان

السلام عليكم
سبحان الله مفيش حاجة بتفضل على حالها ابدا
مين كان يصدق؟
مين كان يصدق اني بعد العمر دة كلة يحصل معايا كدة؟!
بعد مابقى عندي 33 سنة وكام شهر يجرى لي اللي جرى
ولا كأني بنوتة عندها 13 سنة
إهئ إهئ إهئ
هقولكم ومش عاوزة تريقة ولا ضحك
دكتور الأسنان ركب لي تقويم..!
ايوة هو الحديد اللي بيبقى على الأسنان
عاعاعاعاعاعاعا
انا مش زعلانة علشان شكلي اتغير
ولا علشان بقي اللي اتشلفط
ولا علشان بطن خدي اللي اتخرشم من الحديد
اللي مزعلني اني مش عارفة اكل
اصل انا كنت بحب الأكل الناشف
يعني مثلا كان لازم احمص العيش قبل لما اكلة علشان يبقى مقرمش
وكنت بحب اكل من اخر حلة الرز اللي هما الحبة المقرمشين
دلوقتي غصب عني باكل الأكل طري على الأخر..يع
غير كدة بقيت مش عارفة اقطم
ايوة بجد مش بعرف اقطم اي حاجة حتى لو كانت طرية
وبقعد اقطع الأكل زي العيال الصغيرين بأيدي الاول
دة غير بقى نظرات اولادي ليا
الشنيور: واضح جدا انة قرفان مني ومن شكلي
بيفضل باصص عليا بنظرات غريبة تقريبا كلها قرف
اصلة انف اوي
الرايقة:بتبص عليا بأستغراب وبعدين تبتسم ابتسامة رقيقة
وانا مش عارفة كدة يعني انا صعبانة عليها والأ فرحانة فيا؟
اما الجبارة:كل شوية تقولي: ياماما ممكن المس الحديد
وبعدين سألتني سؤال
- هو دة عقاب؟
انا: لأ اسمة تقويم
الجبارة: ايوة يعني الدكتور حطة علشان يعاقبك علشان
ماكونتيش بتروحي لدكتور السنان وانتي صغيرة؟
انا:يالهوي اية يابنتي التفكير دة؟
هو حطة علشان عندي ناب ازرق ..
يوة ناب لبني وكان المفروض ابدلة وانا صغيرة يعني يقع
ويطلعلي واحد جديد كبير فلما الناب اللبني ماوقعش
طلع الكبير وراة فلازم اشيل اللبني الصغير وبما اني عديت
ال30 سنة فكان لازم اركب التقويم علشان يرجع الناب الكبير في مكانة
ومايبقاش معوج وتوتة توتة خلصت الحدوتة
الجبارة: يعني انا لما اكبر زيك هاركب حديد زية؟
انا : لأ انا هاخلي بالي وانتي هاتيجي معايا عند الدكتور علشان يتابع اسنانك
الجبارة: ماشي بس من غير حقنة
انا : ان شاء الله
..........
مميزات التقويم
زي ماقعدت ارغي على عيوب التقويم
كان لازم برضة اقول على المميزات اللي اكتشفتها:
1 - حمزة اللي عندة 7شهور واللي هو ابن دعاء صحبتي
بقى يضحكلي بمجرد ما ابتسم
وبقيت مش محتاجة لمجهود علشان الاعبة واضحكة
2 - بقيت على الموضة
اقولكم ازاي
وانا قاعدة تحت ايد الدكتور وهو بيركب التقويم وبيكلم الممرضة
وبيقولها: اية رأيك نعملها لون اية؟
قالتلة : شوف انت يادكتور حسب الموضة
فقالي: تحبي لون اية؟
قلتلة: فوشيا - انا طبعا بهزر لاني كنت فاكراة بيهزر -
قالي: موجود كلة موجود
وراح مطلعلي كيس حاجات بلاستيك مليانة الوان كتير
قلتلة : انت بتتكلم بجد والأ بتهزر
قالي : ايوة بجد دة في بنات في الجامعة بيجوا يعملوا التقويم
وهما مش محتاجينة علشان يبقوا على الموضة
ويبقى لون التقويم ماشي مع العدسات او لبسهم وكدة
قلتلة : بجد.. طيب واية اللون الموضة دلوقتي
قالي : تحبي اعملك كل واحدة لون؟
انا: ياسلام وابقى عاملة زي البلياتشو
الدكتور: خلاص هاعملك لونين بس انتي لابسة ازرق
ادي لون تختاري التاني اية؟
انا : احمر اصل جوزي اهلاوي- واهو يبقى هبل في هبل-في سري طبعا
.....
3- التقويم هايقوي عندي اللغة العربية وهاينمي ذكائي
لأني بحاول اتجنب الكلمات اللي فيها حرف الفاء
وبدور على كلمات بنفس المعنى وبدون حرف الفاء
لان نطقة بعد التقويم بقى عار على الأخر
وفي الأخر احب اقولكم
سبحان مغير الأحوال من حال الي حال تاني خالص
اشوفكم على خير

الخميس، ١٢ فبراير ٢٠٠٩

ارحموا من في الأرض

السلام عليكم
عاوزة اسأل كام سؤال وياريت الاقي إجابة تريحني
لية الواحد لما بيكون في نعمة كبيرة مش بيحس بيها غير لما تضيع منة؟
لية الواحد وهو زعلان من حد مش بيشوف غير عيوبة وبينسى خالص كل صفاتة الحلوة؟
لية في ناس لما بتعرف نقطة ضعف الانسان اللي قدامها بتحاول تستغلها
وبتفضل تدوس علية لغاية لما يجيب اخرة ويقول جاي؟
الي كل إمرأة انانية
والي كل رجل اناني
والي كل ظالمة وظالم
اهدي لكم كلمات هذة الاغنية
ومعلش مش عاوزة حد يقولي اية القسوة دي
لان في فعلا ناس ماتستاهلش غير كدة
ومحدش يسألني برضة مين اللي بيغني الأغنية دي علشان انا مش عارفة
....................
اشوف فيك يوم
على اللي انت عملتة فيا.. لما انت غدرت بيا
واللي بترضاة عليا..بكرة انا هارضاه عليك
اشوف فيك يوم
والاقيك تعبان بجرحك..وبتشكي علشان اسامحك
تشكيلي وانا افضل اضحك.. وافرح من قلبي فيك
اشوف فيك يوم
كلامك تاني مش هيفيدك..محدش ضربك على ايدك
علشان تنسى حب زمان
هتمشي بس مش قلقان..هتيجي وابقى فيك شمتان
هتتعب ولسة كمان
اشوف فيك يوم
ياللي صغرت في عنيا..لو يوم قربت ليا
لما تسلم عليا..يومها انا هاكسف ايديك
اشوف فيك يوم
وتشوفني بعيش لوحدي..وانت بتموت في بعدي
وتلاقي الدنيا بعدي..متقفلة في عنيك
............
خلصت كلمات الأغنية
اللهم اهدي كل ظالم وانصر كل مظلوم
اشوفكم على خير

الثلاثاء، ٣ فبراير ٢٠٠٩

ايها الرجال......انتبهوا

السلام عليكم
احب اشكر كل واحد و واحدة علقوا على بوست نورة صحبتي
واحب اطمنكم واقولكم ان ربنا هداها وعقلت والحمد للة
وهي كمان بتشكركم كلكم
........................
اسمحولي ادخل في الموضوع على طول وبدون مقدمات
الحلفان بالطلاق
هو دة الموضوع اللي غايظني وعاوزة اتكلم فية
انا كنت فاهمة ان الحلفان بالطلاق بيبقى منتشر في طبقة معينة من الناس
واللي هي الناس اللي مش متعلمة وبس
لكني صدمت لما لقيت ناس متعلمة ومثقفة وبتحلف بالطلاق عادي جدا
يعني مثلا واحدة قريبتي مدرسة فرنسي وزوجها مدرس انجليزي
كنت بسألها على حاجة كدة وقالتلي : لأ ماروحتش
اصل جوزي حلف عليا يمين طلاق اني ماروحش!
انا : نعم جوزك اللي هو جوزك اللي انا اعرفة؟!
هي : ايوة
وغيرة وغيرة وغيرة
اليومين دول الموضوع دة كتير اوي من حواليا
اللي غايب بقى عن السادة الرجال بتوع الحلفان دول
ان الست ممكن في وقت تعند ومايبقاش فارق معاها
وبيبقى صعبان عليها نفسها وان ازاي زوجها ممكن يضحي
ببيتة واسرتة مقابل حاجة هايفة
فيدخل الشيطان
وهو يعند وهي تعند ويتهد البيت ويفرح الشيطان
ونرجع نجري ونعيط ونقول اسألوا الشيوخ
اصل انا كنت متنرفز
اصل انا ماكنتش اقصد
اصل انا كنت بهدد
اللي اعرفة ان الحلفان بالطلاق بيتهزلة عرش ربنا - والله اعلم -
ياريت ياريت نحاول نمسك نفسنا شوية
ومانعودش نفسنا على الحلفان دة
عاوز تخوف مراتك والأ تهددها في مليون طريقة غير كدة
ربنا يهدينا جميعا
اشوفكم على خير

الخميس، ١٥ يناير ٢٠٠٩

نورة صحبتي

السلام عليكم
انا مش هاحكي حاجة المرة دي عن اولادي
انا هاتكلم عن نورة صحبتي
نورة صحبتي من ثانوي ودخلنا نفس الكلية
نورة صحبتي اتجوزت بعدي بأربع سنين تقريبا
نورة صحبتي عندها ولدين زي القمر
ياسر زوج نورة صحبتي راجل محترم جدا
بيحب مراتة وبيتة واولادة
نورة صحبتي مش مدونة بس بتقرا لبعض المدونين
نورة صحبتي عاوزة تطلق من زوجها
نورة صحبتي زهقت من انها زوجة
نورة صحبتي بقت عميا
عميا عن كل النعم اللي ربنا اكرمها بيها
عميا عن انها تفتكر حاجة حلوة لزوجها
عميا عن المصيبة اللي هاتقع على دماغها
لما اولادها يسألوها :هو بابا مشي لية؟
هوبابا مش بقى ينام معانا في البيت لية؟
هو بابا زعلان منك لية؟
هو يعني اية طلاق؟
هو احنا هانجيب اب غيرة؟
طيب هو ماينفعش نجيب بابا تاني؟
يمكن مايزعلكيش تاني!
احنا بنحب بابا دة وعاوزينة
نورة صحبتي اتجننت
نورة صحبتي صعبانة عليا
حد يقول حاجة لنورة صحبتي
يارب يارب اهدي نورة صحبتي
يارب ماتخليش نورة صحبتي تبقى مطلقة
يارب انا بحبها اوي ومش عاوزاها تطلق

الأربعاء، ١٧ ديسمبر ٢٠٠٨

ماما وحشة

السلااااااام عليكم
انا عارفة اني طولت الغيبة شوية بس اديني اهو خرجت من المفرمة
علشان اكتب البوست وبعدين هارجع ادخلها تاني بمزاجي مش غصب عني ولا حاجة
...........................
من كام يوم كنت بتمشى في الطرقة بتاعة الشقة
وببص بعيني على الحيطة لقيت مكتوب
ماما وحشة
يانهار غامق ماما دي اللي هي انا
وبنظرة المحقق كرومبو عرفت ان دة خط الرايقة بنتي اللي في تانية ابتدائي
مش هاكدب عليكو واقول اني مازعلتش لأ انا زعلت بس قعدت افكر
هي لية كتبت كدة؟
وبعدين قعدت اكلم نفسي كالعادة ولقيتني بقول: ماهي البنت عندها حق
انا تقريبا معظم كلامي معاهم اوامر من نوع
اغسلي ايدك. ادخلي الحمام. يالا نحل الواجب .كفاية لعب
ميعاد النوم........ وهكذا
انا صحيح بستمع لكلامهم وحكايتهم لكن في حاجة ناقصة وانا مش عارفة اية هي
المهم قررت اني اقعد اتغدا معاهم اصل انا كنت بتغدا قبليهم او بعديهم
على اساس اني اكون متفرغة لطلباتهم وهما بياكلوا
ودار بيننا حوار مالهوش اي علاقة بموضوع اني وحشة
انا اصلا بكتب البوست علشان احكي الحوار اللي دار بيننا
وياريت ماحدش يسألني اية لزمة الكلام اللي فوق دة؟
انا كنت عاوزة اوضح الصورة كاملة وخلاص
محمود : هو اسم مرتجي دة مسيحي والا مسلم؟
انا : الاتنين عادي
الرايقة : لأ دة مسيحي بس وعندة دقة على ايدة
هما المسيحين بيعبدوا الشمس؟
انا : لأ بيعبدوا ربنا .الكفار هما اللي بيعبدوا الشمس
انا في سري: يارب الحديث يخلص لحد كدة
محمود : اية ياماما ازاي يعني بيعبدوا ربنا زي مااحنا بنعبدة
انا : هو مش زينا بالظبط - يادي النيلة اقولة اية -
بص هما مش مؤمنين بسيدنا محمد هما عندهم سيدنا عيسى وبس
محمود : يعني مش بيصلوا؟
انا : بيصلوا ويصوموا وعندهم عيد بس غيرنا
الرايقة : بس القراّن بتاعهم مش اسمة قراّن اسمة حاجة تانية
انا : اسمة انجيل
الرايقة : ايوة صح هو دة
محمود : انتي عارفة اية الفرق كمان بينا وبينهم؟
انا: اية؟
محمود : المية بتاعتهم اسمها صني واحنا المية بتاعتنا اسمها زمزم
هو قال كدة وانا انفجرت من الضحك وبعد لما قدرت امسك نفسي شوية قلتلة
انا : مفيش حاجة اسمها المية بتاعتهم احنا كلنا بنشرب من النيل
ومية زمزم دي اللي في السعودية بتاعة بئر زمزم
افتكر قصة سيدنا ابراهيم واسماعيل
خلص الحديث لغاية كدة ودخلنا في قصص الانبياء وحمدت ربنا
اشوفكم على خير

الأحد، ١٠ أغسطس ٢٠٠٨

انا عاوزة حقي

السلام عليكم
سؤال محيرني شوية وعاوزة اجابة
بس كل واحد يجاوب بصراحة وانا مش هازعل
هو انا علشان أم يبقى في حقوق بتسقط من حقوقي؟
يعني في حاجات كانت بتبقى من حقي وبعدين خلاص مش من حقي؟
طيب السؤال بطريقة تاني
هو انا علشان أم يبقى مش من حقي اني ادخل الحمام واقفل بالترباس؟
مش عاوزة ضحك انا بتكلم بجد
اصل انا بدخل الحمام من هنا والبيت كلة بيبقى في حالة غريبة
اول واحد اكيد بيبقى الشينيور
تك تك تك
الشنيور: ماما انتي جوة
انا : ايوة في حاجة
الشنيور: فين البندقية بتاعتي؟
انا : مش عارفة دوّر عليها
الشنيور: ممكن تدوري عليها انتي؟
انا: لأ مش ممكن
تك تك تك
الشنيور: ماما ماشوفتيش السيف
انا: لأ ماشوفتش
الشنيور: طيب انا هاروح اللعب كمبيوتر لغاية لما تلاقيهم
وعلشان اخلص من زنة بسيبة يلعب
تك تك تك
الرايقة: ماما انا هاروح اشرب
انا: يانهار ازرق هو انا قافلة على المية ماتروحي
الرايقة: حاضر
تك تك تك
الرايقة: ماما انا شربت
انا: امشي يابت من هنا.... اية العيال دي؟!
الجبارة بقى مش بتخبط دي بتحاول تفتح الباب على طول
اصلها مؤدبة اوي
الجبارة: ماما انتي قافلة بالترباس
انا: ايوة دة بعد اذنك يعني ماشي
الجبارة: لأ مش ماشي افتحي
انا : لأ مش هاينفع قولي عاوزة اية وخلصيني
الجبارة: عاوزة ادخل معاكي
انا : لأ
الجبارة: مشمعنى (اشمعنى) انتي بتدخلي معايا؟
انا: انا بدخل معاكي علشان اساعدك واعلمك تعتمدي على نفسك
الجبارة: وانا كمان هاساعدك
انا : شكرا ساعدي نفسك انا امي كانت بتساعدني واتعلمت خلاص
الجبارة: على فكرة بقى انتي نوتية
(نوتية دي المؤنث بتاع نوتي ـ هي بتقول على الاولاد نوتي والبنات نوتية)
انا: شكرا يامؤدبة
الجبارة: اهو انتي اللي مؤدبة
حتى ابو الدراويش
يا شااااااااااااهي
انتي فين؟
انا : انا في الحماااااااااااااام
ابو الدراويش: بتعملي اية ؟ هو دة وقتة ؟ يالا تعالي الفيلم بدأ
تخيلوا بقى كل الحوارات دي وانا جوة وهما برة
يعني تقريبا العمارة كلها بتعرف اني في الحمام
نرجع بقى للسؤال
تفتكروا كل دة بيحصلي علشان بقفل بالترباس؟
والا هو مبدأ دخولي الحمام هو اللي مرفوض؟
لو طلع ان دة حقي مش هاتنازل عنة ابد
وهافضل اناضل في سبيل هذا الحق
والله الموفق
والسلام عليكم ورحمة الله وبركاتة
ههههههههههه
اشوفكم على خير

الثلاثاء، ٨ يوليو ٢٠٠٨

طبق رز بلبن

السلام عليكم
انتو عارفين ان ابو الدراويش غالبا بيبقى اجازة
يوم الجمعة ويوم السبت
قوم اية لقيتة بيقولي
ابو الدراويش : تيجي نروح السينيما
انا : اة طبعا تيجي ونسيب العيال مع ماما وطنط
ابو الدراويش: ويهونوا عليكي؟
انا: ايوة يهونوا وبعدين احنا لسة مخرجنهم يومين ورا بعض
ابو الدراويش: طيب اتصلي بالتليفون وشوفي في افلام اية
واسألي على المواعيد
انا : حاضر . تيجي نروح سينيما دريم لاند علشان عندهم فيشار بالكراميل
ابو الدراويش: بقولك اية اتصلي وشوفي المواعيد وشوفي عاوزة تروحي سينيما اية وفيلم اية وانا هاروح ارميكي هناك واخلص
انننننننننن أننننننننن تش
اكيد فهمتوا انا عملت ازاي بعد الكلمتين الحلوين دول
ابو الدراويش زوجي حبيبي قدم لي
طبق رز بلبن بجوز الهند والمكسرات
وبعدين رشلي شوية تراب فوق الوش
هو دة كان احساسي وقتها
وطبعا ماأكلتهوش
يعني ماروحناش السينيما
بس ملحوقة اكيد هانزوغ من العيال ونروح في يوم تاني
وهي يعني السينيما هاتروح فين
والا يعني الفيشار هايخلص
معلش انا مركزة شوية على موضوع الفيشار اصلي بحبة جدا
فكرتوني انا عندي شوية ذرة لما اقوم اعملهم فيشار
اشوفكم على خير

السبت، ٢١ يونيو ٢٠٠٨

ناس تغيظ

السلام عليكم
في الأول أحب اقول للناس اللي ضغطها بيرتفع بسرعة
مفيش داعي تقروا البوست
...................
ترن ترن ترن
دة جرس التليفون بيرن الساعة اتنين ونصف فجرا
كنا كلنا نايمين
جريت بسرعة على التليفون قبل ماحد يقلق
انا: السلام عليكم ايوة
صوت حريمي: اية دة ؟ هو انتوا نايمين؟
انا : ايوة ياخالتوا نايمين
عرفت انة صوت خالتي
خالتي: هو انتي مين؟ شاهي ؟
انا : ايوة انا شاهي ازيك ياخالتوا عاملة اية؟
ـ انا في سري ـ
يادي الخيبة هو انتي مش عارفة انتي طالبة مين
خالتي: اة الحمد لله هي مامتك عندك؟
انا : ايوة ياخالتو في حاجة؟
خالتي: هي نايمة والأ صاحية؟
انا: لأ هي نايمة في حاجة؟
ـ في سري تاني ـ
ابوس ايدك انطقي
خالتي: ايوة في
انا : ياخالتو قولي في اية؟
خالتي: اصلي كنت عاوزة اقولها ان خالها مات
انا : البقاء لله خالها مين؟
هي : خالها فلان يالا صحيها وقولي لها
انا : لأ ياخالتو انا مش هاقدر اصحيها علشان مش عاوزة اخضها
احنا كدة كدة بنقوم نصلي الفجر هابقى اقولها في الفجر ان شاء الله
هي: طيب ماتنسيش علشان احنا هانروح بكرة
انا: حاضر بقولك اية هو بيتة في نفس العنوان بتاع زمان
هي: ايوة نفس بيتة امال هايروح فين هو هو العنوان
انا : ماشي ياخالتو هو كان عيان والا حاجة
هي : لا ابدا دة كان زي الفل بس هو من ساعة ماعزل في الشقة الجديدة
وهو اتدهول خالص
ـ انا في سري برضة ـ
يالهوي انتي مش قلتي ان عنوانة زي ماهو يبقى عزل ازاي بقى
انا : طيب ياخالتو انا هابلغها تصبحي على خير
وطبعا صحينا صلينا الفجر وماقلتش لماما حاجة
ودخلنا نمنا تاني واستنيت لما النهار طلع وفطرنا وقولتلها
...............................
انا : انا جبت لأولادك جبنة اسطنبولي مخصوص علشان عارفة
انهم بيحبوها
منال: اه بس دي ناشفة خالص وحادقة اوي
انا : خلاص انا هابعت اجيب نوع تاني يكون فية ملح اقل
وبعت فعلا جبت نوع تاني وعلى العشاء دار هذا الحوار
انا : اية الاخبار ؟ عجبتهم الجبنة؟
منال: هم اكلوها بس هي مالهاش طعم دلعة اوي
انا : خلاص اكليهم من الجبنة الرومي
منال: ايوة اكلوها بس بتلسع في اللسان مش حلوة
انا: خلاص يبقى مفيش غير الجبنة الدوبل كريم
انا شخصيا بحبها جدا
وبعد وجبة كمان
منال: الجبنة معقولة ماكانتش عجباهم بس انا حطيط عليها طماطم
علشان يرضو ياكلوها
الحوارات دي كانت بيني وبين سلفتي ـ زوجة اخو زوجي ـ
لما عزمتها تقعد معايا كام يوم هي واولادها
انا حبيت اعرفها اني بقدرها هي واولادها وبجيب لهم الحاجات
اللي بيحبوها بس هي استطاعت وبجدارة انها ترفعلي الضغط
وانا كمان غلطانة يعني لازم اسأل اية رأيهم في الجبنة
ماكنت اسكت وخلاص والا كان بلاش جبنة اساسا
يالا حصل خير ان شاء الله
اشوفكم على خير

الأربعاء، ٤ يونيو ٢٠٠٨

الست دي امي

السلام عليكم
انا لما اقول اني هاتكلم عن امي
يبقى اسمع تصفيق حاد
والفين سلام وتحية
كل واحد مامتة غالية علية اوي
وبيقول عليها احسن ام في الدنيا
ماشي ماقلناش حاجة
بس امي بقى من نوع خاص
نوع مش انقرض لأ دة مش موجود اصلا
مش هاقدر احكي التفاصيل علشان مش هاينفع
بس كل اللي اقدر اقولة انها ست جادعة جدا
واستحملت حاجات كتير جدا جدا جدا
علشان تحافظ على بيتها وتطلعنا اخوات كويسين مع بعض
وبنحب بعض جدا الحمد لله
زمان واحنا صغيرين كانت لما بتعمل حاجة حلوة
يعني بسبوسة اوكيك
كان لازم تبعت جزء منها للجيران
وكانت بتقول ان عيب لما الواحد يعمل حاجة ليها ريحة قوية
والجيران تشم الريحة دي ومايدوقوش منها
ومش الحلويات بس دة انا فاكرة كمان الكشري
والقرنبيط وتقريبا البصارة
المهم في الموضوع انها قاعدة معايا دلوقتي
يعني منوراني ومخلية بيتي جنة بحق وحقيقي
دة غير الدلع اللي مدلعهوني
مش عاوزة نق الله يخليكم
انتو عارفين البنات مش بتعرف قيمة مامتها غير لما بتتجوز
وتخلف ويطلع عنيها
اما بعض الاولاد للأسف مش بيعرفوا قيمة الأم غير بعد وفاتها
بجد انا مش عارفة اقول اية لأمي
بس حسيت اني لازم اكتب بوست عنها
يالا كلكم ادعو لها بالصحة
وبأنها تفرح ببنتها وابنها اللي لسة ماأتجوزوش
ربنا يخليكي ليا ياأمي
اشوفكم على خير

الاثنين، ١٢ مايو ٢٠٠٨

رحلة الي باب البحر

السلام عليكم
في الاول هاقولكم باب البحر دي تبقى فين وبعدين احكي حكاية الرحلة
باب البحر دة اسم شارع متفرع من ميدان رمسيس
يعني قريب من الفجالة وباب الشعرية
ودي كل معلوماتي عنة واللي عاوز تفاصيل اكتر
يقدر يسأل الاستاذ احمد ـ يوميات عيل مصري ـ
ابو الدراويش وانا لينا بعض الاقارب اللي ساكنين هناك
وفي يوم من الايام اللي هي بعد الأوبن داي بتاع المدرسة
فكرت فكرة خبيثة اني اخد العيال واوديهم هناك لسببين
الاول : زيارة الاقارب وصلة الرحم
والتاني : انهم يشوفوا عيشة تانية وعالم تاني
ويحمدوا ربنا على النعم اللي هما فيه
وسألتهم
اية رأيكم ياولاد نروح باب البحر
طبعا رحبوا بالفكرة لان ابو الدراويش كان مسافر وانا كنت قاعدة على قلبهم
وماخرجتهمش
وكنت ناوية اني اخدهم في المواصلات بس بصراحة صعبوا عليا
وكان الجو حر فكلمت عربية مكيفة واخدتنا من باب البيت
وقلت خلي المواصلات باليل اهو يكون الجو بقى احسن
وصلنا ميدان رمسيس وقلت للسواق اننا هاننزل في الفجالة
ونزلنا فعلا ووقفت في الشارع وحاولت افتكر امشي ازاي ومافتكرتش
مشيت خطوتين وانا بحاول اني مابينش حاجة للعيال وقربت من محل من بتوع
السيراميك اللي هناك وقبل لما اسأل الراجل لقيتة بيقولي: انتي عاوزة تروحي فين؟
قلتلة ووصفلي وشكرتة ومشيت
وصلنا للشارع والحمد لله
انا : خلي بالك يامحمود من العربيات والعجل والفزبة
محمود : يعني اية؟
انا : هو اية اللي يعني اية بقولك خلي بالك علشان العربيات
محمود : ياماما الشارع دة صغير مفيش فية عربيات
ـ طبعا احنا كنا دخلنا في الشوارع والحارات اللي متفرعة من الشارع الرئيسي ـ
انا : لأ العربيات بتدخل هنا والموتوسيكلات والفزبات
محمود : يعني اية فزبة
انا : يوة
ولسة بفكر علشان اقولة يعني اية لقيت فزبة معدية
قلتلة : اهي هي دي الفزبة خلاص
والعيال كانوا ماشين يتفرجوا على كل حاجة كأنهم سواح وعشرين سؤال
من كل واحد فيهم غير بقى اني كل خطوتين الاقي حاجة مسكت في رجلي
وكانت هاتقلبني على بوزي كام مرة
ببص كدة لقيتها الجبارة كل لما تشوف قطة
تقف وتمسك في رجلي
انا : اية يابنتي في اية دي قطة عادي هو انتي اول مرة تشوفي قطة
الجبارة : لأ دي مش قطة دي كبيرة اوي
انا : معلش هي القطط كبيرة هنا مش مسلوعة زي قطط اكتوبر
وبعدين دخلنا حارة وكان في اتنين ستات بيكلموا بعض
كل واحدة قاعدة قدام بيتها وبتتكلم مع التانية وطبعا انا مش عارفة
هما كانوا بيقولوا اية واول لما عدينا بينهم راحت واحدة قايلة
يقطع العيال وخلفتهم بلا نيلة
انا مسكت نفسي من الضحك بالعافية من منظر الشنيور لما سمع الكلام دة
ولقيتة باصص لي بنظرة كلها رعب وغضب في نفس الوقت وبيقولي
هي الست دي شتمتنا لية ياماما هو احنا عملنا لها حاجة
انا: لأ ياحبيبي هي مش بتتكلم عننا خالص
الجبارة : ماما الحقي طنط دي قاعدة جنب الغزالة ومش خايفة منها
انا : يافضحتي ياني غزالة دي معزة مش عارفة المعزة
رحلة العودة
انا قلت بقى خلاص احنا قعدنا اليوم كلة والعيال اخدو على الجو الشعبي
يبقى نرجع في الميكروباص
وفعلا توجهنا الي موقف احمد حلمي علشان نركب عربيات اكتوبر
وعلشان يبقى الدرس كامل قعدنا في الكنبة اللي ورا لوحدنا
السواق : يامدام كدة تلات انفار
انا : ايوة عارفة
الشنيور: هو بيزعق لية؟
انا : هو مش بيزعق هو صوتة كدة وياريت تقعد تتفرج على الطريق وماتتكلمش كتير
ومشي الميكروباص والرايقة والجبارة ناموا واخدوا راحتهم على الاخر وكأنهم على السرير
وبعد شوية بدأ الشنيور في الزن
الشنيور : اية دة ياماما انا مش عارف انام واية اللي تحت رجلي دة
انا : مش لازم تنام انت خلاص بقيت كبير وبعدين اللي تحت رجلك دة
الكاوتش بتاع العربية العجل يعني
الشنيور: شيلية ماليش دعوة انا مش عارف احط رجلي منة
انا : طيب اسكت خالص مش انت اللي قلت عاوز تقعد جنب الشباك استحمل بقى
الشنيور: ماليش دعوة انا عاوز اقوم من المكان دة
انا : بص ياواد انت انا مابحبش الدلع انا لو كانت ايدي فاضية كنت ضربتك وخلصت
الراجل اللي قاعد قدامنا : في اية بس ياحبيبي بتعيط لية تيجي تقعد مكاني
بصيت للواد حتة بصة وقلت للراجل شكرا هو دلوقتي هايبقى كويس
الراجل راح قايل لمحمود: انت باين عليك باباك عندة عربية هههههه
وطبعا الشنيور مارضش علية
بس انا احرجت خالص وقلت للراجل ايوة
وفضلت مكتومة طول الطريق وكل لما الشنيور يتكلم ماردش علية
وصلنا البيت وصحيت الجبارة علشان ننزل واول لما فاقت ولقت نفسها في البيت
قالتلي: ياماما انتي كذابة وضحكتي علينا
انا : لية؟
الجبارة: علشان مفيش بحر وانا كنت عاوزة انزل البحر
انا : ادخلي نامي وبكرة ابقى افهمك
الحمد لله خلص اليوم وخلصت انا كمان
اشوفكم على خير
ملحوظة للناس اللي ماتعرفنيش
محمود هو الشنيور اللي هو ابني
الرايقة والجبارة بناتي برضة