الجمعة، ٥ مارس ٢٠١٠

عواجيز الفرح

السلام عليكم
طبعا كلكم عارفين مين هما عواجيز الفرح
واللي مش عارف اقولة
عواجيز الفرح دول الستات العواجيز اللي بيبقوا قاعدين مش عاجبهم
حاجة ولا حد وطول ماهما قاعدين بينتقدوا ويتريقوا على معظم خلق الله

بالرغم من اني مقتنعة ان الشباب شباب القلب
ومش فارقة معايا اذا كان عمري 34 والأ 35
والا حتى لما يبقى 65 - اذا كان ليا عمر ان شاء الله-
الا اني بدأت اقتنع اني بقيت من عواجيز الفرح
لية بقى....؟
انا بتقابل مع صحباتي في مكان قريب من الجامعة
وما ادراكم ما الجامعة الخاصة
الناس بقت مش هي الناس
طول عمري عارفة ان الشباب- بنات واولاد - في سن المراهقة
بيقلدوا اي موضة تطلع وخلاص من غير مايبصوا عليها
مناسبة لعاداتنا وتقاليدنا والا لأ
دول كمان من غير مايبصوا على نفسهم في المرايا ويشوفوا شكلهم
حلو والا وحش واذا كانوا شايفين نفسهم حلوين
يبقوا محتاجين نظارات
دة انا شوفت واحد عامل شعرة كحكة كبيرة ولولا انة مربي خط كدة
تحت مناخيرة تقريبا شنب
كنت بصمت بالعشرة انة بنت
المشكلة بقى انة مابقاش الشكل بس هو اللي كتر كلامي علية
لأ دي التصرفات كمان بقت غريبة جدا
يعني مش طبيعي ان يكون في ولدين قاعدين جنب بعض
ولزقين قوي وكأنهم حضنين بعض

وبرضة مش طبيعي لما يكونوا بنتين قاعدين نفس القاعدة
وكمان واحدة ماسكة ايد التانية
دة على اساس انها خايفة تهرب منها ؟
والا دة من كتر حبها فيها ؟
دة على كدة يبقى انا وصحباتي مابنطقش بعض
كل واحدة بتبقى قاعدة بينها وبين التانية متر
طبعا بنسلم على بعض ونحضن بعض كمان
بس دة وقت اللقاء وخلاص انما اللزقة دي غريبة شوية

انا حاسة اني مابقتش ام الشنيور
ولا ام محمود
انا كدة بقيت ام جلامبو
طول ماانا قاعدة عيني رايحة وجاية على الأشكال الغريبة
وبقت هواية بقى اننا نتقابل جنب الجامعة علشان نتفرج

ربنا يرحمنا ويسامحنا
قولوا امين
اشوفكم على خير

هناك ٩ تعليقات:

Mafrousa يقول...

هههههههههههههههههههههههههههه
يا شاهي
شكلك بقيتي مفروسة زي هههههههههههه
بصي يا ستى
اغلب الاولاد اللى بتشوفيها فى الجامعات الخاصة بيكونوا مش مصرين
و بيطلعوا بتقاليع..قال ايه بيقلدوا الغرب
مع ان الغرب النضاف بيتبرى منهم ليوم القيامة
ما علينا
قوم يجوا الشباب المصري الخايب
ايون طبعا خايب
ما هو لما يدخل جامعه خاصة يبقى خايب حبتين و مش جاب مجموع تقريبا يعنى
قوم الشباب بتاعنا الخايب يقلدهم
قال ايه موضة...هبل بعيد عنك....الجمجمة بتاعتهم مافيهاش مخ
فيها معسل...تفاح على كانتلوب

اما بقا الحميمية اللى انتى بتشوفيها ديه....انا بسميها قلة ادب على شذوذ الصراحة
ما هيه الدنيا معكوكة يا بنتى على كبييييييييير

سيبك
اهم ما فى الموضوع
انك مش بقيتي ام جلامبو خالص
انتى بقيتي مفروسة زيي

فاتيما يقول...

ازيك يا شوشى

مين دى اللى ام جلامبو ؟؟

دنتى ام الحنية كلها

متفكة جدااااا مع فروستى حبيببتى
العيال بتوع الجامعات الخاصة دول صنف غريب من البشر (مش كلهم يعنى ) بس عندهم تقاليع عجب

انا بشتغل فى جامعة برضو و مبشوفش الحاجات دى عشان جامعة حكومية و روداها الغالب الأعم من طبقات المجتمع و لو حد عمل كدا هيكون شكله مستهجن حتى لو محدش لفت نظره بشكل مباشر

عموما لما بشوف مناظر كدا بقول شوباب بقى و الشوباب طيش خليهم يعيشوا ايامهم و بكرة يبقوا زينا

زينا ازى ؟؟
يعنى سن النضشج
و الروقان
و العقل
و الإتزان و ضبط الزوايا
مش تقوليلى جلامبو ؟؟


بوسيلى العيال
و كمان إحضنيلى روحك

غير معرف يقول...

اللى بتقول الغرب النضاف بيتبرى منهم ليوم القيامة

نفسى اعرف الغرب نضاف عننا فى اية اصل التعليق مستفز

همس الاحباب يقول...

اللهم امين
ربنا يصلح الاحوال
وبهدى ابنائنا وبناتنا ويصلح احوالهم
سعدت بلقاء حضرتك والشنيور
نشوفكم دائما على خير
تحياتى

الدرويش المرووش يقول...

الحمد لله

أنا كنت متأكد

مع إنى كنت شاكك

بجد أنا كنت مفكر إن أنا لوحدى اللى حاسس بالغربه و دماغى إتخرمت

و كنت بأقول يا واد إسكت
إحنا فى زمن غير الزمن
و إنت خلاص بقيت أبيض و إسود بالنسبة لجيل الدكتور تامر شعر الصدر و الباشمهندسه روبى أخر حاجه و أغانى العو و الهو و النو
ده غير موضة نشر الدواخل البوكسريه و الحجر المتقندل الساقط و التوكه للجميع و الحلق كمان
أه و الله الحلق أو القرط اللى بيتلبس ف الودان

أتاريكى يا شوشو رجعيه منقرضه زيى

الحمد لله

نقطة إتفاق جديده فيما (بينما) على رأى المعلم رضا الله يرحمه

كده فاضل بس نقطتين الخلاف اﻷزلى

أولا حول نظرية تفوق العرق اﻷليسى على كافة اﻷعراق اﻷخرى بما حباه الله به من فيض عاطفى غير محدود (ينبوع حنان) يعنى

ثانيا حول نظرية جواز مؤاكلة و مشاربة الزملكاويه

الـسـيـدة نـون يقول...

اخص عليكى يا شاهى
يعنى افتكرتى الواد ابو كحكة
ونسيتى البت ام شورت
صاحبة التقليعات والبرنيطات وحزام
نجاة الصغيرة

المشكلة مش فى كدة يا شاهى
المشكلة الاكبر هى عدم وجود
هوت وايت تشوكلت
فى جميع الفروع


سلام
اختك خيخة

الـسـيـدة نـون يقول...

ردا على ابو الدرويش

فى اخر فتوى صدرت من دار الافتاء
قال شيخنا الجليل وعالمنا المستنير
انه لا يجوز مؤاكلة ومشاربة الزملكاوية
ومن قام بفعل هذا دون معرفة مسبقة منه بملة الاخر
فلا حرج عليه ولا ذنب يقع فيه
اما من قام بالاكل والشرب والجواز من زملكاوى
فعليه دية اطعام ستة وعشرين فقير وصيام حد واربع
والطلاق من الزملكاوى


اما بالنسبة لما ورد فى تعليقك حول تفوق العرق الاليسى
فانا اتفق فيه معك
حيث ان ينبوع الحنان المشار اليه
غير متوفر الا فى هذا العرق الاليسى
ونسال الله عز وجل ان يهدينا
ايانا واياكم هذا الينبوع

ويكا يقول...

على فكره

هى فعلا غريبه ، انا بتكلم بجد مش بتريق ولا بستغرب

وما اظنكيش هتحبى تعرفى ليه القاعده دى.

بس بجد كترت خالص فى البلد للاسف

غير معرف يقول...

بشعرفيكى بالطيبة..طبيعية و نقية..و انك ام مصرية..معجونة بحنية صعب النهاردةتقابل حد تلقائى يكلمك بدون تكليف و يكون على قلبك كمان خفيف
حاسس انك شيلة مسئوليةشيلةهم الصغير و الكبير و بغياب بابا متأثرة كثير شاغلة نفسك و متشاغلة و عندك كام مية شغلة لكن الفكر شغال و فين هى راحة البال
اهم حاجة تتصالح مع نفسك و تتسامح و تشوف الحب فى عيون الناس اللى بيحبوك ساعتة تقول يارت عمرى يكون عمرين
لأ..يا ريت عمرى يكون اعمار
و اعيش مع اهلى و اصحابى و اخدهم بردة بلاحضان
يكفينى حضن ابو الدراويش و بوسة حلوة من الشنيور و قاعدة حلوة مع الريقة و بوسة حلوة من الجبارة بس بشرط تكون بحرارة