يا خسارة فلوسك يا بابا

انا قلت اعترف بنفسي احسن

الفضيحة دي مش وانا صغيرة

لأ

دي وانا كبيرة

هي مش فضيحة قوي

هي خيبة قوية

المهم قبل العيد كنا في حالة طوارئ علشان امتحانات الشهر

في يوم كنت بذاكر للرايقة لقيت الشينيور داخل عليا ومتنرفز كالعادة

الشينيور: يووووووة اية دة انا مش فاهم حاجة

انا : خير في اية

هو: مش فاهم حاجة في

long divison

انا: لونج اية ياحبيبي

هو: ديفيجن يا ماما

انا في سري

يانهار اسود يطلع اية اللونج ديفيجن دة

طيب اللونج سهلة وعارفينها انما اية الديفيجن دة

ادي اخرة المدارس اللغات

انا قلت من الاول مالها المدارس العربي

ندخل مدارس خاصة برضة بس عربي ياناس

انا كنت في مدرسة عربي والنبي عربي

طيب اقولة اية استنى لما اشوف في القاموس شكلي هايبقى وحش

وفي وسط ماانا بكلم نفسي لقيت صوت خرم وداني

يامامااااااااااا

اية يابني

الشينيور: بصي شوفي هما اللي غلطانين في المسألة دي والا اية

انا : وريني اية دة .......... دي القسمة المطولة

هو : يعني اية؟

انا : هههههههه يعني اللونج ديفيجن ياحبيبي

ـ صحيح كل واحد وعلامة ـ

بصيت في المسألة وانا عمالة اضحك وحلتها وقلتلة لأ هما مش غلطانين

الفضيحة بقى والخيبة القوية مش في اني ماكنتش اعرف يعني اية لونج ديفيجن

لأ التقيل لسة جاي

الشينيور: قوليلي يا ماما حليتيها ازاي ؟

انا : بص ياسيدي .................

وسكت

هو : ايوة ياماما

انا : استنى كدة

يالهوي مش فاكرة حاجة هواحنا كنا بنضرب وبعدين نطرح

يانهار ازرق افهمة ازاي وانا مش فاكرة انا صحيح حلتها بس كدة نظري من غير خطوات

اعمل اية ياربي في المصيبة دي

طيب اسألة هي الميس قالتلكم اية ؟ يمكن افتكر

لأ مش هاينفع دة عصبي ومش هافهم منة حاجة

ومش معقول اقولة مش فاكرة الخطوات هاتبقى فضيحة وكفاية فضحتي معاه

في الفرنساوي

اصل انا قلتلة بصراحة انا ما أخدتش فرنساوي غير وانا في ثانوي ونسيتة كلة تقريبا

ومن ساعة ماعرف وهو بيذلني ولما الرايقة تسألني على حاجة في الفرنسي

يرد بسرعة ويقولها : اسأليني انا اصل ماما مش بتعرف فرنسي

الواد بيعايرني عيني عينك

طب اعمل اية؟

هو : ياماماااااااااااااا

انا : يا حبيبي اصبر شوية

اعمل اية؟ اسأل مين ؟ عاوزة حد اسألة ويستر عليا

ايوة مفيش غيرة

انا : الو ايوة يابابا ازيك عامل اية والنبي يا بابا الحقني واستر عليا يستر عليك ربنا

بابا : في اية ؟ هو انتي هاتشحتي

انا : لأ ابدا الواد مش فاهم القسمة المطولة وانا مش فاكرة بتتحل ازاي علشان افهمة

والحمد لله قالي على الطريقة من غير مايهزقني

وفهمت الشينيور وجاب الدرجة النهائية في الامتحان

وعدى الموقف على خير

واللي عندة كلمة حلوة يقولها واللي ماعندهوش يقول برضة

وماتنتظروش فضايح تاني خلاص

كل عيد وانتم بخير

صباح الخير

و

مساء الخير

كل سنة وانتم طيبين وبصحة وسعادة

شكرا لكم كلكم نفر نفر على سؤالكم عني

انا وابو الدراويش والأطفال كويسين الحمد لله

بس هي شوية مسئوليات ومشغوليات

الا يعني البت مهمة اوي ماعلينا

انا كنت ناوية اكتب عن فضيحة تانية ليا

بس لقيت انة مش وقتة دلوقتي وبعدين قلت تلاقيكم هاتبقوا

مشغولين في العيد بأكل الفتة واللحمة

يارب يكون عيد سعيد عليكم وعلينا بأذن الله

اسيبكم بقى علشان رايحة عند ماما مع اول ضوء للصبح

بجد بجد بجد

شكرا من كل قلبي

ظهر الحق

كنت بتكلم مع مامي (يعني ماما بس بالأنجليزي) في التليفون

وسألتني هو انتي ماكتبتيش حاجة جديدة؟

اصلها متبعاني بس سماعي وبابا هو اللي بيتابع عن طريق القراية

ماما بتعرف تقرا برضة بس لسة هاتروح تجيب النضارة وتلبسها

انا بختصر وبقرالها

المهم قلتلها ايوة كتبت حاجة كدة عن العيال

قالتلي طيب اقري

بصراحة انا كنت خايفة لحسن تزعقلي وتقولي لية بتقولي على العيال كدة

فقلتلها يعني ياماما كتبت عن دوشتهم

شخطت فيا نصف شخطة وقالتلي طيب اقري

وانتو عارفين انا مش بخاف بس قلت معلش بقى اهي امي برضة ومفيش داعي ازعلها

وقعدت اقرا بكل شجاعة وخلصت وهي بتضحك وبعدين قالتلي اقري التعليقات

انا: ماخلاص يا حاجة بقى

ماما: اقرييييييييي

انا: طيب قرينا

ماما: بتقولي حاجة

انا: ابدا بقول هاقرا اهو

انا خلصت قراية من هنا ولقيت صاروخ طاير عبر اسلاك الهاتف واترزع في وشي

ماما:الحمد لله ربنا مابيسيبش حق حد

يمهل ولا يهمل

انا:اية يامة في اية هو مين مات

ماما: مفيش بس اللي كنتي بتعملية فيا اتعمل فيكي والطاق طاقين

امال انا اعمل اية اللي خلفت اربعة بس انتي كنتي اكتر واحدة رغاية فيهم

كنتي فظيعة ماكنتيش بتسيبي حاجة مش بتحكي عنها وتفضلي تلفي ورايا في

الشقة كلها لغاية لما تخلصي كل اللي عندك ماكنتيش بتفصلي

انا: اية ياماما الكلام دة انا كنت كدة دة انا كنت هادية خالص وكل المدرسين بيحبوني

ماما: لية مش فاكرة لما روحتي اشتكيتيني للأخصائية الأجتماعية

انا : ياخبر ابيض ياأمي انتي لسة فاكرة دة انا كنت في ابتدائي

ماما: وهي دي حاجة تتنسي

انا :معلش والنبي يا ماما عيلة وغلطت وبعدين ماانتي كنتي بتزعقيلي ومش بترضي تسمعي

ماما: كنت ساعات بسمع بس انتي كنتي فظيعة وبعدين دة سبب تروحي تشتكيني علشانة

انا: اية دة ياماما هو احنا هانتعاتب بعد الموضوع بعشرين سنة وبعدين ماانتي مارضيتيش تروحي المدرسة لما جالك الاستدعاء

ماما: خلاص لا عتاب ولا حاجة انتي برضة كنتي صغيرة والمسامح كريم واهو ربنا بياخد حقي

انا : خلاص ياحاجة حقك عليا

ماما: خلاص بس لازم تكتبي الحكاية عندك في المدونة علشان اصحابك بتوع النت يعرفوا انتي كنتي بتعملي فيا اية مش تكتبي عن العيال الغلبانة وتطلعي نفسك ضحية

انا : حاضر ياماما هاقولهم

ماما :لأ مش تقوليلهم اكتبي بوست

انا: طيب لية الفضايح ماانا هاقولهم على الماسنجر

ماما: لأ يا فالحة انتي مش بتكلميهم كلهم انا عاوزة كل اللي يدخل عندك يقرا الحكاية

انا: حاضر

وجاء هذا البوست بناء على طلب الست انوش دة اسم الدلع طبعا

الساعة الثالثة عصرا

كلنا عارفين ان اليوم 24 ساعة وفي ايام بتبقى 48 ساعة

ودة طبعا حسب الاحداث اللي في اليوم

انا بقى هاتكلم عن ساعة واحدة في يومي

ساعة واحدة باليوم كلة

الساعة الثالثة عصرا

دة الوقت اللي بيرجعوا فية اطفالي الثلاثة من المدرسة

اول لما بفتح لهم باب الشقة بلاقي ماسورة كلام ضربت في وشي

كل انسان عندة أذنين لكن بيسمع شخص واحد

انا بيبقى مطلوب مني اني اسمع تلاتة في وقت واحد

في اول الدراسة كنت زي اي ام عادية بقف للاولاد في البلكونة

لكن لقيت ان الماسورة بتضرب وهما تحت وانا فوق ويبدا الكلام

ماما انا خلصت السندوتشات

طيب اطلعوا وبعدين نتكلم

ماما بصي الميس قالتلي اني شاطرة

طيب اطلعوا وبعدين نتكلم

ماما انتي عاملة اكل اية؟

اطلعووووووووووووووو

وكنت بشوف اللي رايح يضحك واللي جاي يضرب كف على كف

وكانت فضايح

قلت بلاش من وقفة البلكونة خالص

بس الصدمة بتكون كبيرة عليا لاني في الاول بحاول اهدي الوضع وافهمهم ان واحد

واحد يتكلم وطبعا بنبدأ بالجبارة ومع انها بتتكلم اول واحدة والمفروض انها تكون خلصت

كل اللي عندها الا انها لازم تتكلم تاني وتقاطع اخواتها وهما بيفضوا اللي عندهم

اسمعوا نوعية كلام الجبارة

ـ انا عندي قراّن جديد

ـ قولي ياحبيبتي

ـ قل هو الله احد لم يلد ولم يولد

ـ استني مش كدة فين الله الصمد

ـ مفيش هو كدة

اقولك حاجة كمان

ـ قولي

ـ قال رسول الله علية وسلم....... اية ياماما بعدها اية؟

ـ مش عارفة طيب قولي اي كلمة وانا افكرك بالباقي

ـ كدة طيب انا غلطانة اني قلتلك السلام عليكم اول لما جيت

وتغضب شوية ولما تلاقيني بكلم حد تاني تيجي وتكمل كلام

ـ ماما عبداللة جية النهاردة

ـ طيب كويس ولعبتي معاة

ـ انا عاوزة سكاكين وانا رايحة الحضانة

ـ سكاكين لية؟

ـ علشان اضرب عبد اللة

ـ يانهارك مش فايت هاتضربية بالسكاكين لية يامفترية

ـ اصل انا مارضتش اديلة ملبس وهو ضربني

ـ ماقلتيش للميس لية؟

ـ كدة انا عاوزة اضربة بقى

...........................................

الرايقة

خلي بالكم بين كل كلمة وكلمة فترة هدوء وروقان

ـ ماما الميس عاوزة..........م

ـ ايوة

ـ ميس العربي عاوزة.............م

ـ عاوزة اية؟

ـ ميس منى بتاعة العربي عاوزة.........م

ـ يابنتي انطقي

ـ عاوزة وسيلة

ـ حاضر خليها تكتبلي هي عاوزة اية بالضبط وانا هاعملة على طول

ـ عاوزة وسيلة علشان اخد درجة النشاط

مع تغير في نبرة الصوت وامتلاء العيون بالدموع

ـ انتي بتعيطي لية ماانا قلت حاضر يالا روحي اقلعي علشان تاكلي

ـ انا جعانة

ـ طيب روحي اقلعي الاول

ـ بس انا جعانة

ـ روحييييييييييي اقلعييييييييييييييييييي

.......................................

الشينيور

اة والف اة من الشينيور

اولا هو بيجي دايما متنرفز وشايط

ـ خير يا حبيبي

ـ بصي المشرفة الزفتة دي لازم تتغير

ـ عيب لما تقول على مشرفة الباص زفتة

ايوة زفتة علشان ماشافتش مريم وهي بتضربني

ـ وانت ماقلتلهاش لية؟

ـ ماانا ضربتها

ـ ياحبيبي كنت قلت للمشرفة الاول وكنت شوفت هي هاتعمل اية

ـ بصي لعبنا ماتش في البريك وجبت جون

ـ شاطر يعني غلبتم

ـ لأ اتغلبنا خمسة اتنين

ـ مش مهم المهم انكم كنتم مبسوطين

ـ مبسوطين اية بصي عمر كان واقف هنا وانا كنت هنا قام زقني والحكم ماحسبش فاول

وبعدين اقعد اسمع للوصف التفصيلي للمبارة واشوف جابوا جونين ازاي

ودخل فيهم خمسة ازاي

دة غير النكت الطويلة البايخة اللي لازم اضحك بعد لما تخلص

والا هايصب عليا غضبة

انا مش هاقول لكم غير واحدة بس

مفيش داعي اكون السبب في اصابة حد بالضغط

ودي اقصر نكتة قالهالي

اصابة رجل ياباني بفلة طائشة

خلاص خلصت اية وحشة

....................................

بعد كل دة بحط لهم الغدا وادخل المطبخ حبيبي واقفل على نفسي

واحاول اهديني شوية علشان اقدر اكمل باقي اليوم

ودة كان وصف مختصر جدا للساعة الثالثة عصرا

ملحوظة مهمة جدا جدا

مش عاوزة حد يقولي الاطفال نعمة واحمدي ربنا

لان كل دة انا عارفاة وانا مش قصدي اني اشتكي انا بفضفض وخلاص

واخيرا

الحمد لله على كل نعم ربنا عليا

اللهم ديمها عليا واحفظها من الزوال

قليل البخت

طبعا كلكم عارفين المثل دة

قليل البخت يلاقي العظم في الكرشة

اذ فجأة اكتشفت ان المثل دة بينطبق عليا

ف اية؟

هاقول اهو

انا عارفة ان حظي وحش مع الجوافة

ايوة الجوافة

يعني خلال ال32 سنة اللي عشتهم لغاية دلوقت

كان نادرا جدا لما تطلعلي جوفاية مسكرة

وقالولي اختاري الجوافة الصغيرة والمدورة والبيضاء

ومفيش فايدة كلة زي بعضة

دة غير الدود اللي بيحبني قوي

مهما اجيب جوافة غالية او مش في الموسم بتاعها

لازم الاقي الدود صديقي موجود

والفكهاني يقولي : مش ممكن يا مدام دة مفيش حد اشتكى منها خالص

كدة خلاص عرفت حظي مع الجوافة وبقيت اشتري نصف كيلو بس

واعملة عصير ودة طبعا بعد الكشف علية

............

المانجو

دي بقى ام الدود كلة

بس عرفت انة مش بيكون موجود فيها الا في نهاية الموسم

ومبقتش اشتريها في نهاية الموسم

بس برضة لو طلعلي دود في المانجو يبقى عادي وامر طبيعي

لكن لما اشتري خساية كابوتشي ام اتنين جنية والاقي فيها

دودة كبير وتخينة يبقى هو دة اللي مش طبيعي

امال لو كنت جبت خس بلدي كان هايطلعلي فية اية؟ ثعبان

المهم انا بصراحة اتخضيت لما شفتها في الاول وبعدين

ندهت على العيال قلت افرجهم عليها واسيبهم يلعبوا معاها شوية

لقيتهم خايفين منها ومارضيوش ياكلوا من الخساية مع اني رميت الجزء اللي كان فية الدودة

اخر حاجة بجد عمري في حياتي ما شوفت كدة

اكيد كلكم عارفين الكاكا

واللي مش عارفين اقولهم

هي حاجة كدة شبة الطماطم اللي مش حمرا قوي

ياجماعة

انا طلعلي دودة في الكاكا

حقيقي انا عمري ماسمعت ولاشفت ان الكاكا بيبقى فيها دود

انا لما شفتها قلت مش ممكن اكيد انا مش شايفة كويس

وبعد فحص دقيق طلعت فعلا دودة وصاحية كمان

علشان كدة انا

قليلة البخت ودايما بلاقي العظم في الكرشة

عندي اضافة صغنونة

البت ام يوسف الشهيرة بدوبة

هزقتني وقالتلي يييييع انتي مقرفة

بس انا مصممة على موقفي لان كل دة بيحصل معايا فعلا

وانا من موقعي هذا احب ان اشكر دوبة على رأيها الصريح

..........................

في حاجة تانية ملهاش علاقة بالبوست

هاقولكم عليها بس مش عاوزة حسد ولا قر ولا نق اوكي

ابو الدراويش عملي مفاجأة لذيذة

ادخلوا على الموقع دة وانزلوا اخر الصفحة وشوفوا في اية

ويا سلام لو دوستم بالماوس على الكلام

هذا هو الموقع

http://www.filbalad.com/

ربع يوم من عمري

عاوزة اتكلم عن ربع يوم من عمري

ربع يوم حسيت فية بمشاعر كتير قوي قوي مش عارفة هاقدر اوصفها ازاي بس هاحاول

قامت المدعوة هبة قلوب حائرة بترتيب مقابلة بيننا وجابت معها شخصيتين رائعتين

اية العك دة هو الكلام غامض كدة لية ؟ هي فزورة

معلش اعزروني

المقابلة اللي بيننا اقصد بيها

دوبة وابنها الرقيق يوسف وشيرين ايامنا الحلوة

وهبة قلوب حائرة والعبد لله شاهي

اما عن الشخصيتين فهما

اوشة مكان في القلب ومها سكوت هنصوت

هتكلم في الاول عن اوشة

انسانة عسولة قوي ومرحة جدا وطول ماانت قاعد معاها متحسش انك غريب عنها

حقيقي انا كنت مستمتعة جدا بكلامها وهزارها

مها

بنوتة زي السكر وعليها افكار جامدة موت ولها شخصية متألقة ومحبوبة

وبعدين دي برج العقرب زيي تبقى ليست قوة واحدة ولا اثنين بل ثلاث قوات فعّالة

شيرين

كتكوتة هادية خالص بتفكرني بالرايقة بنتي

شيرين غاوية تصوير ماسابتش حاجة ماصورتهاش شكلها ناوية تفتح معرض

هبه

دي بقى انا بحس بجد اني امها هو انا كدة ابقى كبرت نفسي شوية

بس هو دة احساسي وانا بتكلم معاها

دوبة

الجميلة دي بقى انا بحس انها اختي بجد

يعني لما نزلت علشان اقابلها مكنتش حاسة اني رايحة اقابل حد غريب

حتى لما طلعنا البيت كنت حاسة فعلا انها اختي وواقفة معايا علشان نستقبل الضيوف

ولقتني باخد رأيها في كل حاجة حتى الكبيات اللي هاقدم فيها الشاي والنسكافية

انا عندي اختين وربنا رزقني بأخت تالتة هي صحيح مش عاوزة تقولي يا أبلة

بس مش مهم أهي برضة اختي

يارب اكون قدرت اوصل مشاعري ليهم

ويارب تدوم المحبة بيننا

ويارب نتقابل تاني كتيييييييييييير

لان فعلا الوقت مرّ بسرعة جدا جدا

ايوة صحيح علشان اكون صادقة في كل كلامي

في حاجة زعلتني في المقابلة دي

وهي اني نسيت اقدم لهم حمص الشام اللي كنت عملاة

معلش بقى مرة تانية

بحبكم أوي

مناسبة سعيدة

في الاول حتما ولابد اني اعتذرعن عدم ردي على تعليقاتكم في البوست اللي فات

ودة لاني كنت مشغولة خالص

وان شاء الله هاتكون اول واخر مرة ماردش فيها

ادخل بقى في الموضوع

بعد اسبوع من النهاردة عندي مناسبة سعيدة

بعد اسبوع يعني يوم 24 اكتوبر

دة يوم زواجي يعني عيد زواجي

لا ومش اي عيد دة العاشر

اييييييييوة العاشر

عشر سنين من عمري فاتوا كدة بسرعة ازاي انا مش عارفة

مش هاقول حلوين والا وحشين لان دوام الحال من المحال

طبعا كان فيهم حاجات وحشة وحاجات كتير حلوة

المهم اني بحاول اكون مستمتعة وراضية بكل حاجة

طبعا دلوقت كلكم مفتحين عنيكم على الاخر ومستنين اني اقول

كلمتين حلوين لأبو الدراويش

بعينكم مش هايحصل

انا كنت طالبة منكم طلب

ياريت كل واحد عندة اقتراح حلو للمناسبة دي يقولة

مع مراعاة اننا هنكون في اخر الشهر

ومش عاوزة تريقة عاوزة افكار جديدة وحلوة

اة نسيت اقول حاجة

ياريت كل البنات اللي لسة ماأتجوزوش مايغلطوش غلطتي

ياساتر على نيتكم الوحشة

انا قصدي مايغلطوش غلطتي في تحديد ميعاد الجواز

اصل انا عيد ميلادي بعد عيد جوازي بيومين بس

يعني طبعا ابو الدراويش بيضحك عليا وبيجيب هدية واحدة

يعني لو كان في مدة بينهم كان زمانة جاب هديتين

كل عيد جواز وانت طيب يا زوجي العزيز

وعقبال 70 عيد جواز

اية كتير

مش كتير ولا حاجة اديك شايف العشر سنين فاتوا بسرعة ازاي

سهلين خالص زي شكة الدبوس

حدث بالفعل

يوم جميل من ايام رمضان

مشهد خارجي ليلي

كافي شوب كبير ـ بالبلدي قهوة ـ

في احدى شوارع القاهرة المشهورة

القهوة كانت بتتجدد والافتتاح بعد ثلاث ايام

صاحب القهوة رجل خير و محترم

صاحب القهوة : تعالى يا حاج علشان تشوف التشطيبات وتقول رأيك

الحاج : استنى شوية لما اخلص حجر الشيشة

صاحب القهوة : يا حاج تعالى هو الحجر هايطيرنبقى نجيب غيرة

الحاج : طيب انا جاي

ودخلوا سوا يتفرجوا وكان في بعض العمال بيشتغلوا

الحاج : مممم كويس هايل لأ شغل جميل ونضيف تمام

احد العمال : البيت اللي جنب القهوة دة هايقع دلوقتي

يالا يا واد انت وهو اخرجوا من القهوة بسرعة

ـ بجوار القهوة بيت قديم مكون من دورين والارضي ـ

صاحب القهوة : بيت اية اللي هايقع ؟ ! وهو حتى لو وقع اية اللي هايوقعة علينا

دة هايقع مدكوك على بعضة

الحاج : بس البيت مايل علينا قوي

اية صوت الطقطقة دة

اجري بسرعة بسرعة

طاخ طاخ طاخ

وقع البيت على القهوة

بس الحمد لله مفيش اصابات ولا خسائر في الارواح

طبعا تراب كثيف يملأ المكان

صاحب القهوة : كح كح الحاج فين ؟ فين الحاج ؟

الحاج : قلتلك استنى لما اشرب الحجر مستعجل قوي على اية؟

صاحب القهوة : كنا هانروح أونطة

الحاج : الحمد لله

حمد لله على سلامتك يا حاج وربنا يديك الصحة ويخليك لينا

ربنا يعوض عليك يا صاحب القهوة وقدر الله وماشاء فعل والحمد لله انك بخير

كانت معكم شاهي ابو العافية قناة الخميرة

اخيرا عرفت اصوت

السلام عليكم

ازيكم كلكم

رمضان كريم

انا كنت ناوية مدخلش المدونات في رمضان بس بصراحة مقدرتش

هاقول لكم على حاجة حصلت لي في شهر يوليو اللي فات

وفي الاخر هابقى اقول انا لية حكيت الحكاية دي

اكتشفت اخيرا اني بعرف اصوت

ايوة اصوت مش في الانتخابات لا سمح الله لأ

الصويت اللي هو الصوت الحياني

اصل انا كنت زعلانة قوي اني مش بعرف اصوت

وفي اوقات كنت ببقى محتاجة اني اصوت ولكني كنت بفشل

زي مثلا اثناء ولادة الرايقة يا سلام

رايقة بتتولد تخيلوا كمية العذاب

ولما قلت للدكتورة خلصوني بقى

قالت: لما تصوتي الاول

دة اية الذل دة

المهم احكي لكم ازاي عرفت اصوت

العيال كانوا بيلعبوا في الجنينة وبعدين سمعت الشينيور بيعيط

والشينيور ابني ماشاء الله علية صوت اوبرالي قوي جدا

ببص من البلكونة علشان اشوفة يمكن وقع والا حد ضربة

لقيت اية ؟ خير اللهم اجعلة خير

الواد نصف وشة وايدة الاتنين غرقانين دم ـ بدون مبالغة ـ

وحولية حوالي 20 طفل مش عارفة جم منين وهو واقف مش بيتحرك

وعمال يعيط ويقول الحقني يا مؤمن ـ مؤمن دة ابن اختي ـ

طبعا هاتقولوا ....رحتي مصوتة.........لأ

قلتلة اطلع

وطلع ومعاة ال20 طفل انا لقيت الشقة اتملت عيال

وهو من اول لما طلع وهو بيقول

مش انا يا ماما دي الجبارة هي اللي ضربتني

مش انا يا ماما دي الجبارة هي اللي ضربتني

وانا اقولة : طيب اسكت عاوزة اشوف التعويرة فين ؟

ـ في الغالب لو شفت جرح بقدر اعرف اذا كان هايحتاج خياطة والا لأ ـ

والواد مفيش مش بيسكت ومعلق على مش انا يا ماما ..............ولقيت

نفسي بقولة : اسسسسسسسسككككتتتتت بصرخة قوية

ودة كان اول صوت ليا

وبعد الصوت الحياني لقيت الشقة فاضية حتى اولادي التانين ومؤمن

نزلوا وسابوني تقريبا خافوا مني

المهم ان الحمد لله الجرح طلع بسيط والدم الكتير دة علشان الولد

كان بيلعب وجسمة ساخن ولما هدينا عرفت منة ان الجبارة حدفت على دماغة

طوبة وطبعا مش قدرت اعمل لها حاجة لانها كانت مخضوضة

وبصراحة انا كمان كنت خلصت وجالي هبوط

الغريب بقى ان مفيش حد من الجيران عبرني ولا سأل انتي بتصوتي لية

ولا في باب شقة اتفتح بعد الهيصة دي

مع ان باب شقتي كان مفتوح لما صوت

هو دة السبب اللي خلاني احكي الحكاية الطويلة دي

راحت فين العلاقات الحلوة بين الجيران ؟

انا مش قصدي التداخل الزائد

انا قصدي الوسط

يعني لو كان في جيران من بتوع زمان كنت ممكن اسيب معاهم العيال

واخد الشينيور على المستشفى

مش عارفة يمكن الناس بقت مشغولة زيادة والا خايفة من بعض

حقيقي نفسي الجيران ترجع زي زمان

شكر وتقدير

السلام عليكم

بما ان معظم الناس فهمت البوست اللي فات غلط

واولهم الدرويش المرووش زوجي العزيز

قررت اني اكتب بوست تاني

واللي شجعني على كدة الحديث التالي اللي دار بيني وبين

ابو الدراويش لما كان لسة جاي من الشغل

انا : عامل اية ياحبيبي

هو :الحمد لله

انا : كيف كان يومك ؟ ـ شوفتوا اللغة العربية !لغتنا الجميلة ـ

هو :كويس الحمد لله والناس مبسوطين وبيشكروا فيا

انا : طبعا يا حبيبي اصل انت مفيش حد يعرفك وما يشكرش فيك ابدا

ـ على فكرة دي الحقيقة انا مش بجاملة هو فعلاانسان محبوب جدا ـ

هو : ايوة في

انا : ومين دة بقى ان شاء الله ؟

هو : انتي

ان ان اااااان دي موسيقى تصويرية

انا : يا نهار ملون انا بذمتك انا مش بشكر فيك

طيب ليك عليا ياسيدي ارزعك بوست كلة شكر

وبناء على ذلك قررت اني اكتب لكم

انا بحب الدرويش وبشكرة جدا على الحاجات الحلوة اللي بيعملها علشاني

واشكرة كمان علشان بيفتكرني في كل مرة بيسافر فيها وبيجيب لي

الشيكولاتة البيضاء اللي بحبها

هما صحيح العيال بيشاركوني فيها بس انا بخبي اللي بقدرعلية

وربنا يسامحني بقى اصلهم بياكلوا الشيكولاتة التانية عادي

وانا مش باكل غير البيضاء

يوة خرجنا عن موضوع الشكر

لأ بجد يا جماعة انا هازعل قوي لو كان دة احساسة فعلا

بس هو اكيد كان بيهزر صح

وبعدين شكري لة بيبقى في تصرفاتي يعني اهتمامي بية

حرصي على انة يكون دايما مرتاح ....يعني وحاجات تاني كتير قوي

مش لازم اقعد اقولة ياسبعي يا مستتني يا مهنيني والكلام دة

والا انتم رأيكم اية ؟

اختلافات

هو : بيحب ينام بدري

هي : بتحب السهر

...............

هو : اكيد بيصحى بدري قوي

هي : بتصحى بدري برضة بس مش قوي

......................

هو : بيصحى من النوم فايق و رايق على الأخر

هي : بتصحى مضروبة 100 .....مفيش داعي

......................

هو : بيحب يفطر بدري جدا

هي : مش بتفطر اصلا

.................

هو : بيحب الاكل بدون ملح

هي : بتموت في الحادق

....................

هو : بيحب قاعدة البيت

هي : بتحب الخروج والانطلاق

....................

هو : بيحب الهدوء

هي : بتحب الهيصة

.......................

هو : بيحب الكورة والنادي الاهلي بجنون

هي : بتحب الاهلي علشان خاطرة

.....................

هو : بيحب الحلويات جدا

هي : مش بتحبها قوي

...................

هو : عنيد وعصبي وكسلان

هي :؟؟؟؟ بتحب هو

......................

حاجات بسيطة وهايفة بس في الاخر برضة

اختلافات

احضرونا يا مدونين

انتم عارفين انا بحب ادخل في الموضوع على طول

الموضوع بقى

انا خلاص دماغي وقفت عن التفكير في الاكل

ـ الاكل بس ـ

وحاسة اني خلصت الاكلات اللي في الدنيا

حاجة مملة قوي انك تقعدي تفكري في الاكل

ومين بيحب اية ومين مش بيحب اية

ـ طبعا الكلام دة للسيدات فقط والرجالة خالعين اديهم ـ

المهم كنت بكلم البنوتة شيرين ايامنا الحلوة وقالت لي اعملي بامية

عملت البامية وتقدروا تقولوا انها كانت كويسة

وجة ميعاد الغدا وحطيت البامية لأبو الدراويش ولقيتة بيقولي

فين البتنجان المخلل؟

انا : مفيش بتنجان فيّ ليمون و زيتون

هو : يعني هو فيّ حد يعمل بامية من غير بتنجان مخلل

انا: معلهش المرة الجاية هاعمل مع البامية بتنجان حاضر

بيني وبينكم المرة الجاية اللي هاعمل فيها بامية مش هاعمل بتنجان برضة

لية بقى ؟ اقول لكم

في مرة من المرات طلب مني ابو الدراويش بتنجان مخلل

عملت البتنجان ...قالي

لأ مش هو دة البتنجان المخلل بيبقى مسلوق

اتاري هما عند ماماتة بيعملوا المخلل مسلوق

احنا بقى عند ماما بنعملة مقلي

ومن هنا ظهر الاختلاف

خلاص مفيش مشكلة اتصلت بطنط وسألتها بتعمل ازاي البتنجان مسلوق

علشان ابقى اعملة زيها بالضبط

وفعلا عملتة ولقيتة بيقول

لأ يعني مش اوي طعمة غير اللي ماما بتعملة

وفي مرة كانت طنط عندنا وقعد يقول لها اعملي بتنجان مخلل وخلي شاهي

تشوفك بتعملية ازاي علشان تتعلم منك

ـ اوكي بيجامل ماماتة هاعديها ـ دة طبعا في سري

وقفت مع طنط في المطبخ ولقيتها عملت زي ما انا عملت بالضبط لا حاجة

زادت ولا حاجة نقصت

وبعد فترة عملت اعادة للتجربة ولقيت الكلام نفس اللي فات

من وقتها اتفقت مع نفسي اني ما ادخلش البتنجان المخلل بيتنا تاني

سواء مقلي او مسلوق

ـ لان بصراحة حتى المقلي مش بيطلع زي اللي امي بتعملة ـ

واكتفيت بأني اكل البتنجان عند ماما

وهو لما طنط تيجي تبقى تعمل لة المسلوق

مش كدة احسن.........والا انا غلطانة ؟

اما صحيح دي بقت حاجة بتنجان خالص

اخيرا..........جالي تاج

السلام عليكم بصراحة انا كان نفسي قوي حد يعبرني ويبعتلي تاج

وقد تحققت امنيتي وجالي تلاتة مرة واحدة اول واحد من الصديق

http://3abdo-me7tas عبدة محتاس

والتاني من الرقيقة هبة بتاعة قلوب حائرة http://kloob-truelove/

والتالت من عند الجميلة دوبة اللي وزعتة على الحبايب كلهم http://www-doba/

شوفوا بقى دي اول مرة احط لينكات يعني معرفش كدة صح والا غلط

كان نفسي احط صورة تاج بس ما باليد حيلة اختكم خيبة في الحاجات دي فممكن تتخيلوا

ان في صور تاج جميل بيلمع

بسم الله نبدا الاجابة

......................

اسم مدونتك؟

مفيش حاجة

لماذا اخترته.. وماهي نيتك من وراء اختياره؟

اخترتة لاني ماكانش عندي حاجة اكتبها

انا عملت مدونة علشان اعرف ابعت تعليقات لطهقانة

نية اية دة اسم وكمان الشاعرة ايمان البكري عندها

شعر بيعجبني اسمة مفيش حاجة

هل فكرت في إغلاق مدونتك؟ والسبب؟

لغاية دلوقت لسة

صورتك في المدونة ورمزيتها ؟؟

كان على عيني

انا مش بعرف انزل صوربس لو اتعلمت هانزل صورة

لوردة بلدي جميلة وتكون لونها ابيض او روز

لما دخلت عالم التدوين من الاساس؟

ابو الدراويش خلاني قريت بعض المواضيع في المدونات

وانا عجبتني قوي الحكاية دي وبقيت مرتبطة بيها

جمله قيلت لك فى وصف مدونتك؟

مفيش جملة محددة

كل الكلام اللي اتكتب لحد دلوقت جميل

التعليقات بالنسبه لك ,اهميتها؟

طبعا حاجة مهمة جدا

وكسبت منها صداقات جميلة

احلى بوست كتبته ...ضع اللينك , ثم اذكر لماذا؟

اية الكلام دة

انا كل اللي بكتبة فلة

بس احلى واحد تقدروا تقولوا

رحلة سعيدة

ومعرفش احط اللينك بتاعة

لماذا لاني كنت عايشة مشاعر جميلة في الوقت دة

مع ابو الدراويش اوعوا مخكم يروح لبعيد

أفضل بوست قرأته؟ وضع لينكه؟

لأ كتير هاقول اية والا اية

أفضل مدونة قرأتها؟

برضة كتير وممكن تقولوا كل المدونات اللي بعلق عندهم

حد قل ادبه فى التعليق إيه رد فعلك؟

قل ادبة ازاي يعني؟

شتم مثلا

هامسح التعليق بمنتهى البساطة

بس اكيد هاكون زعلت

أسوأ مدونة؟

معرفش

ما قابلتهاش

أسوأ بوست أسوأ مدون؟

برضة ما قابلتهوش

هيحصل ايه لإيميلك لما تموتى ؟؟

انا عارفة بقى انا هاكون خلاص في عالم تاني

بس اعتقد انة هايتلغي

اديتى الباسوورد لحد قبل كده؟

لأ لية

كانت إيه طبيعة علاقتك بيه؟

هو مين دة

انتم هاتجيبولي مصيبة

اسمك ؟

لية الاحراج دة

شاهي

حلو كدة لدواعي امنية

اسم مشهور ببيه وسط اصحابك؟

شاهي وشوشو

وحاليا

ام الشينيور

عمرك؟؟

في اكتوبر هابقى

32 سنة

برجك ؟؟

احترس

برج العقرب

دراستك؟؟ مجالك؟؟

انا من الشعب

ودخلت كلية الشعب

تجارة عين شمس

شخصيتك نوعها إيه؟

دي حاجة صعبة خالص مش عارفة اقول اية

بس ممكن اقول اني خيبة قوية

السفر بالنسبة لك؟

لو فسحة يبقى جميل

لكن لو اقامة هايبقى صعب عليا قوي

بس لو مضطرين يبقى خلاص نستحمل

وقت فراغك بتعملى فيه إيه؟

بمارس سلطتي على الواد الشينيور واقومة من على الكمبيوتر

واقعد انا

او

كباية شاي خفيف بالنعناع واقعد في البلكونة اتفرج على مخاليق ربنا

واشوف العيال اللي بتلعب تحت

المود بتاعك؟

مش ثابت

حسب الاوضاع

الاكلة المفضلة؟

كل الاكل اللي بتعملة ماما

والبامية والملوخية

اما باقي انواع الطبيخ انا وهما مش اصحاب خالص

الصفات اللي أخدتها من بابا؟

اة عم الحاج

صبورـ مايسيبش فرصة فيها ضحك وتريقة

واهم حاجة الدكترة هو مش دكتور بس معلوماتة كبيرة في المجال دة

الصفات التي أخدتها من ماما ؟

الطيبة

بس انا اخدتها بعبط شوية

الكرم ـ المعاملة الحلوة للجيران والناس الغلابة

واهم حاجة احترام الزوج ووضعة في مكانة مخصوصة لوحدة

اكتر ست حاجات بكرهها؟

الكذب ـ النفاق ـ الخيانة

الاستغلال

القسوة

احساسي اني مظلومة وحقي ضايع

اكتر ست حاجات بحبها؟

ستة بس

كل حاجة ربنا وهبهالي في الدنيا

الحنية ـ الحنية ـ الحنية

الشغل بالنسبة لك؟

مش بشتغل

انت سعيد؟

مفيش سعادة مطلقة

بس الرضا بكل اللي ربنا قسمة هي دي قمة السعادة

وانا الحمد لله سعيدة

لو اجتمعت انت وحسني مبارك في غرفة واحده؟

لية سايب الناس الوحشة في البلد من غير عقاب؟

لو معاك مليون ونص جنيه......تعمل بيهم ايه؟

النصف هاساعد بية ناس كتير قوي محتاجة

اما المليون

هاجيب شقة لاخويا واجهزها

ومش عارفة اية تاني

بس اللي انا عرفاة كويس ان لما الفلوس بتزيد في حاجات تانية بتروح

وانا كدة مبسوطة الحمد لله

بتحب مصر؟

جدا

وياريت الناس ضميرها يصحى شوية علشان نقدر نقول

مصر ياامة يا بهية ياام طرحة وجلابية

وتفضل مصر ام الدنيا

بتحبى البنات؟

قوي قوي

طول عمري كان نفسي يبقى عندي بنتين و ولد

والحمد للة

مسلم؟

الحمد لله على نعمة الاسلام وكفى بها نعمة

مين اكتر شخصية ما تقدرش تستغنى عنها في حياتك؟وليه؟

مفيش

ودي نعمة كبيرة الحمد لله

ايه اكتر موقف محرج اتعرضت ليه في حياتك؟واتصرفت ازاي؟

بعد زواجي بستة اشهر تقريبا كنا في دولة اجنبية

وحضرنا حفلة تبع شغل ابو الدراويش

قوم اية واحد خواجة ساب الناس كلها وجية عاوز يرقص معايا

طب اقولة اية والنبي

اقولة مش بعرف ارقص

هايقول علينا جاهلة

اقولة يعني الراجل اللي زي القمر اللي قاعد معايا دة مش مالي عينك

هايقول علينا متخلفين

تدخل ابو الدراويش وقالة مش هاينفع اصلها حامل

طبعا الراجل قعد يضحك وافتكرة بيهزر بس الحمد لله مشي

ايه الأمنية اللي بتدعي ربنا دايما انه يحققها لك؟

نفسي قوي اني ادخل الجنة من غير حساب

اصل حكاية اني اقف قدام ربنا ويقولي انتي عملتي كذا وكذا

دي صعبة قوي

وكمان نفسي يبقى عندي خشوع حقيقي في الصلاة

وبعدين باقي الحاجات بتاعة الدنيا العادية

التاج امرره لمين ؟

لكل الناس اللي اعرفهم ومش عندهم تاج يجاوبوا علية

اخيرا خلصت دي حاجة متعبة قوي

يعلم الله اني جاوبت من غير كذب ولا تزويق

نسيت اقول حاجة

البنوتة شيرين بتاعة ايامنا الحلوة هي كمان بعتتلي تاج

شوية تخاريف

ورجعت تاني...........على رأي الرخمة ماريا
رجعت من عند ماما وهاقول لكم شوية حاجات حصلت معايا

البية البواب مشكورا اتصل بيا وكان فاكرني غضبانة عند امي
طيب لوكنت غضبانة بصحيح تفتكروا كان هايعمل اية؟
على العموم الراجل كان عاوز يخدم بس مفيش نصيب المرة دي

..............................

الواد الشينيور اللي عندة 9 سنوات شعرة طول وهو اصلا دماغة كبيرة
يعني لما شعرة بيطول بيبقى شبة البطيخة اللي لابسة باروكة وانا مش ممكن
اسيبة كدة ابدا فقلتلة
يالا يا حبيبي علشان تروح تحلق
الشينيور:لأ يا ماما انا مش عاوز احلق
انا: لية؟.............بمنتهى الهدوء
هو:انا عاوز اطول شعري
انا:ناااااعم..........بمنتهى الردح
هو: عاوز اطولة ذي دلبيارو ـ طبعا انا مش عارفة الاسم بينكتب ازاي
انا: ودة يطلع مين ان شاء الله
هو:دة لاعب كورة في ايطاليا
حاولت اتمالك اعصابي وقلت لة
مش مفروض اننا نقلد اي حد مش يمكن شكلك يبقى وحش وانت مطول شعرك
احنا نروح للحلاق وتقولة وتاخد رأية ولازم هو اللي يظبط الحكاية دي
والحمد للة ربنا هداة ونزل معايا بس بشرط اني اشتري لة جل لزوم النيو لوك الجديد

....................
البت الجبارة اللي عندها 3 سنوات شافت اخوها بعد الحلاقة وجالها هس هس في دماغها
الجبارة: انا عاوزة احلق شعري واعمل سبيكا واحط جل
انا: يا بنتي اسمة سبايكي ومفيش بنات بتحلق وتحط جل
وطبعا بما انها جبارة يعني رأيي مالهوش اي لازمة واللي هي عاوزاة لازم يمشي
وبعد مباحثات طويلة وفشل القمة اللي حاولت اعقدها معاها اخدتها ونزلت على الكوافير
وقصت شعرها ألاـ جارسون ومش عاوزة اقول لكم على شكلها دلوقت قمر 14

......................
لما باكون عند ماما بيكون في حرية شوية
مش معنى كدة ان ابو الدراويش حابسني لأ ـ خلي نيتكم حلوة
انا قصدي اني بأرمي العيال هناك وانزل ازور اصحابي...جيراني...قرايبي
والمجاملات العادية.....نجاح...جواز...زيارة مريض... الحاجات دي
المشاوير دي كلها يعني ركوب مواصلات قلت اسرع حاجة مترو الانفاق
لقيت الناس بتتفتش قبل الدخول وخصوصا اللي معاهم شنط
ومالة افتح الشنطة للأستاذ المحترم اللي بيفتش
شنطتي فيها محفظة ومناديل وموبايل ومفاتيح واكيد فلوس طيب حاجات عادية
الاقي الظريف بيقولي اية..........؟
افتحي المحفظة
انا : نعم وهي المحفظة هايكون فيها اية؟ ـ وفتحتها طبعا
الظريف: دي اجراءات امنية يا مدام اتفضلي
الراجل حسسني انة وزير الداخلية وانا مش واخدة بالي
اعوذ بالله هي الناس جرى لها اية؟
والغريب بقى اني لما نزلت في محطة انور السادات لقيتهم مش بيفتشوا اللي هايركب من هناك
يعني هي الاجراءات الامنية ماشية على سطر وسايبة سطر

.......................

كان يوم جميل من الايام اللي كانت حرّ موت وكان عندي ميعاد في التحرير
وطبعا قلت لنفسي بلا مترو بلا كلام فاضي انا هاروح اركب الاتوبيس المكيف من الموقف
ويارب بس يكون التكيف مش عطلان ـ متفائلة قوي
وفعلا رحت الموقف والاتوبيسات كانت موجودة بس الابواب مغلقة
سألت كمسري كان قاعد على المحطة
انا: لوسمحت فين الاتوبيس اللي بيروح التحرير؟
الكمسري: اي واحد من دول هايروح هناك
انا : طيب الباب مقفول هو هايطلع امتى؟
الكمسري: اسألي الناظر اللي قاعد في الكشك دة
انا : السلام عليكم هو الاتوبيس هايطلع امتى
الناظر: قريب ان شاء الله
انا: ايوة حضرتك يعني امتى؟
الناظر: ربنا يسهل.....لما السواق يجي
انا: يعني هو في ميعاد الاتوبيس هايطلع فية والسواق عارف كدة والا من غير مواعيد
طبعا الناظر اكبر من انة يرد عليا تاني فرد عليا واحد كان قاعد معاة
هاهاهاها ربع ساعة كدة يا مدام هاهاهاها مفيش مشكلةهاهاهاهاالعجل موجود
هاهاهاها بس فين السواق هاهاهاها فين السواق هاهاهاها
كان نفسي اقولة بتضحك على اية يا عبيط بس انا مؤدبة ومشيت وسيبتة وطبعا ركبت تاكسي

بس عاوزة اعرف بجد هو كان بيضحك فرحان يعني والا بيتريق عليا
اوعوا تقولوا بيتريق هو انا سألت على حاجة غريبة والا اية؟