في الاول حتما ولابد اني اعتذرعن عدم ردي على تعليقاتكم في البوست اللي فات
ودة لاني كنت مشغولة خالص
وان شاء الله هاتكون اول واخر مرة ماردش فيها
ادخل بقى في الموضوع
بعد اسبوع من النهاردة عندي مناسبة سعيدة
بعد اسبوع يعني يوم 24 اكتوبر
دة يوم زواجي يعني عيد زواجي
لا ومش اي عيد دة العاشر
اييييييييوة العاشر
عشر سنين من عمري فاتوا كدة بسرعة ازاي انا مش عارفة
مش هاقول حلوين والا وحشين لان دوام الحال من المحال
طبعا كان فيهم حاجات وحشة وحاجات كتير حلوة
المهم اني بحاول اكون مستمتعة وراضية بكل حاجة
طبعا دلوقت كلكم مفتحين عنيكم على الاخر ومستنين اني اقول
كلمتين حلوين لأبو الدراويش
بعينكم مش هايحصل
انا كنت طالبة منكم طلب
ياريت كل واحد عندة اقتراح حلو للمناسبة دي يقولة
مع مراعاة اننا هنكون في اخر الشهر
ومش عاوزة تريقة عاوزة افكار جديدة وحلوة
اة نسيت اقول حاجة
ياريت كل البنات اللي لسة ماأتجوزوش مايغلطوش غلطتي
ياساتر على نيتكم الوحشة
انا قصدي مايغلطوش غلطتي في تحديد ميعاد الجواز
اصل انا عيد ميلادي بعد عيد جوازي بيومين بس
يعني طبعا ابو الدراويش بيضحك عليا وبيجيب هدية واحدة
يعني لو كان في مدة بينهم كان زمانة جاب هديتين
كل عيد جواز وانت طيب يا زوجي العزيز
وعقبال 70 عيد جواز
اية كتير
مش كتير ولا حاجة اديك شايف العشر سنين فاتوا بسرعة ازاي
سهلين خالص زي شكة الدبوس
هناك ٣٥ تعليقًا:
شوشو وحشتيني اوي كل سنة وانتي طيبة ياجميل وعيد جواز سعيد يارب عليكي انتي وزوجك ابو الدراويش
وبالنبسة لحكاية انك عايزة تعملي حاجة جديدة في عيد جوازك دي فكرة كويسة انك عايزة تجددي وتعملي حاجة تنبسطوا منها بس في اعتقادي اي حاجة هتكون كويسة وهتنبسطو منها طالما انتو الاثنين مع بعض عامة ياريت ترمي العيال عند ماماتك او ماماتو وتخرجو تسهرو بره البيت وتنبسطوا
تحياتي ياجميل
ياه الحمد الله انى لحقت مكان فى الاتوبيس ده
اولا ازيك يا شاهى وازى او الدراويش والعيال يا رب يكونو بخير باذن الله
كل سنه وانتى طيبة يا ستى بمناسبة الزواج السعيد انا عارف انها متأخرة 10 سنين بس يلا تتعوض بقى فى فرح الواد حوده هو صحيح مش بيكتب بوستات جديده ليه ولا المدارس واخده واقته كله
كل سنه وانتى طيبة بعيد جوازك يا شاهى وكل سنه وانت طيب يا أبو الدروايش
عقبالى كده يا رب لما اكتب البوست بتاع عيد جوازى انا كمان
وكل سنه وانتى طيبة يا شاهى بمناسبة عيد ميلادك اللى بعد عيد جوازك بيومين ويا ابو الدراويش ابقى هات لها هدية تانية يا عم اصلها صيحيتلك خلاص اهو فى البوست ده
انا بصراحة فرحان اوى اوى اوى اوى اوى المهاردة والله لوما قريت البوست ده فرحت أكتر
الحاجه اللى مفرحانى انى الحمد الله كتبت عقد جديد فى شركة عندنا فى المنصورة وإشتغلت بعد معاناه الحمد الله
فعشان كده انا فرحان وفرحت اكتر لما لقيت البوست ده كمان
المهم احنا خرجنا عن الموضوع
الأخت شاهى عايزة تفكيرة لتقضية عيد زواجها بسلام
انا بقول حفلة صغنونه كده انتى وأبو الدراويش مع حضور الهدايا من جنب أبو الدراويش للأخت شاهى وان شاء الله هيبقى يوم مش يتنسى ويا ريت كل واحد فيكم يقول اللى جواه سواء كان حلو او وحش بعد الشر يعنى للتانى عشان لو حد كاتم حاجه جواه ميتعبش ودى انا شايفها فرصة جميلة جدا
بس
بس يا ريت محدش فيكم ينسى منابى فى حته الجاتوه والحاجة الساقعة اهو انا قاعد مستننى اهو لما نشوف
وكل سنه وانتو طيبين وعقبال 71.5 مش 70 سنه يلا
بس
كفاية لانى تعبت
ومش عارف اكتب حاجه بصراحة
سلام
على فكرة انا لسه قارى تعليق ايامنا الحلوة وفكرة جميلة جدا
انتو ترمو العيال عند مامتك او مامتو وتسهرو بره بصراحة
بس برضه محدش ينسى حته الجاتوه بتاعتى والحاجى الساقعة ويا ريت تبقى كنز معلش
عزيزتى
كل سنه وانتى طيبه وعيد جواز سعيد زى كل السنة ان شاء الله
وانتى قولتى محستيش بيهم اصل السعاده بتمر زى البرق وده جمالها
اما الاقتراح انا مقدرش اقول لانى انا شايفه ان لو مش بترموا العيال كل شهر عند مامتك يبقا اقتراح ايامنا الحلوة ميه ميه
لو متعودين ترموهم كل مدة يبقا استنى اقتراح تانى كويس
ربنا يخليكم لبعض دنيا وأخره يارب
سلام
شوشو الغالية ربنا يكرمك يارب وعقبال عيد الجواز المئوي يارب اقتراحي انكم تشتركوا في عبادة صغنونة كده في اليوم ده ولو انه يصلي بيكي ركعتين نافلة كده لانه الاجتماع على طاعة الله من اهم اسباب دوام الحب والمودة في القلب بين الزوجين وان شاء الله يجي عليكم اليوم الي تكونوا في اليوم ده بتقضوا فريضة حج او عمرة يارب يديم عليكي السعادة ويجعلك قرة عين ليه ويجعله قرةة عين ليكي يارب ويحفظكم من كل شر
اولا كل سنه وانتى طيبه وعيد جواز سعيد وكل سنه وانتى طيبه وعقبال مليون سنه بمناسبه عيد ميلادك
ثانيا: بالنسبه لموضوع الاقتراح بما انى مش متجوز مش عارف ايه الى ممكن يتعمل بس ممكن خروجه لطيفه فى اى مكان بدون الاولاد او عشاء على اضواء الشموع حيكون لطيف بس قبل ده كله تصلو جماعه ركعتين شكر لله على ما وهبكم تحياتى
كل سنة وانتم طيبين
كل سنة وانتم اسعد واحب
كل سنة وانتم فى ظل الرحمن ومن عباده الصالحين
كل سنة وانتم سعداء بنجاح اولادكم
كل سنة وانتى طيبة ولزوجك بارة ولابنائك احسن ام
كل سنة وانتى اطيب واحلى واسعد واحدة يا شاهى وربنا يديم عليكى السعادة والمحبة
تحياتى
هبة
طبعاً في الاول كل سنه وانتم طييبن وبعد كده ايه حكاية رمي العيال دي !!! هم يعني منكدين عليكم حياتكم للدرجه دي ؟؟ ولا الحب والرومانسية والموده متنفعش بيهم ؟؟ حاجة غريبة والله. المهم أنا بضم صوتي للأخت قلوب حائرة واقترح الصلاة عشان دي في الاساس صلة بين العبد والرب وبالتالي لما تكونوا عاملين الصلة دي كويس مع بعض اكيد هتنعكس عليكم وبالنسبة للهدايا للأسف انا شايف انها لو هتعمل عبء مادي يبقى ملهاش لزمه من غير زعل كفاية الحب والموده والتواصل والتفاهم و ... يلا حصل خير ان شاء الله
تحياتي
الاول خروج الى أى مكان
وبعد العودة الى البيت
صلوا ركعتين لتشكروا نعمة الله
وياريت تعيدا يوم الزفاف مرة أخرى
بدلة وفستان
كل عام انت بخير
الف مبروك وعقبال 90 سنه كمان علشان تكملوا المائه
ربنا يسعدكم
لأنه يا فالحه اخر الشهر يبقى مش هيفع عزومه بره البيت وبالتالي ضوء الشموع وعشاء ظريف وكلمتين حلوين على كارت شيك كده بربع جنيه خليه من ابو نص جنيه مش مهم واكتبي عليهم اهداء صغنن كده
وبعدين اتكلموا في اي حاجه غير المسؤليه والمشاكل والحكايات اليوميه
وافتكري كنتي بتكلميه في ايه ايام الخطوبه وفكريه بيه ويا سلام لو عندك فيلم حلو كده بتحبوه انتم الأتنين مش شرط رومانسي المهم يعجبكم
وبعديها ابقي خديه واتمشوا على الكورنيش شويه
بس متاكليش حمص الشام علشان اي كلام ومش حلو
سلااااااااااااااااااااام
السلام عليكم
الاخت العزيزة انا ضيف جديد لمدونتك وعجبتنى قوى مدونتك كسيدة مصرية متزوجة وكل عيد زواج وانت فى سعادة وسرور
فى الحقيقة انا كان لى طلب ورجاء لو امكن يعنى والطلب هو انى اريدك ان تتكلمى عن موضوع مهم بالنسبة لبحث اعملة واريدك ان تسطفيضى فيه بخبرة 10 سنوات زواج
وهو موضوع الوحدة للزوجات واقصد احساس المراة المتزوجة بالوحدة والملل حتى بوجود الزوج والاولاد والحياة والمشاغل وحتى لو كانت بتعمل واكيد انت حسيت بيه ولو لفترة ولك الف شكر
ايامنا الحلوة
وانتي طيبة يا شيري وعقبال عندك بأذن الله
للأسف مش هاينفع ارمي العيال عند ماما علشان هايكون يوم الاربعاء واحنا دلوقت في ايام الدراسة وبعيد عنك العيال عندهم امتحانات طول الاسبوع
هي فكرة حلوة بس التوقيت وحش
شكرا يابرنسيسة
.................
عبدة محتاس
يااااااااااااة
بقالي كتييييييير مش بشوف تعليقك في الاول
احنا كلنا بخير والحمد لله
وانت طيب
حودة بقى ياسيدي بقى كسلان خالص من اول دخول المدارس وانا اصدرت فرمان انة مش هايقعد يلعب على الكمبيوتر غير ايام الخميس والجمعة فطبعا هو مش هايضيع الوقت في الكتابة وبيستغل كل دقيقة في اللعب
ايوة عقبالك ان شاء الله بس واضح انك مستعجل قوي
الف ميت مليون مبروك على الشغل وربنا يوفقك
فكرتك رائعة بس تفتكر ممكن تقلب بخناقة في الاخر....اديني هاجرب واشوف ولو قلبت بخناقة يبقى راحت عليك الحاجة الساقعة والجاتوة وهاتلاقيني قعدالك على باب مدونتك بالشومة الصعيدي ...تعرفها ؟
...............
احساس لسة حي
الاول مبروك المدونة الجديدة
وبعدين شكرا قوي قوي على الدعوة الحلوة دي
وانت طيب يا حسام
انا بصراحة كل لما بلاقي فرصة اني اسيب العيال عند ماما برميهم على طول بدون تردد يعني يوم او يومين ارتاح فيهم وهما كمان يرتاحوا مني شوية
تحياتي
قلوب حائرة
حبيبتي هبة
وانتي طيبة ياقمر وعقبالك كدة انتي واحمد وأجي اغلس عليكم ايوة ماهو انتي هاتكوني ساكنة قريب من ماما وكل لما اكون عند ماما هاطب عليكم اعتبرية تفتيش غلاسة اي حاجة بس المهم تبقي تديلي العنوان مظبوط
فكرتك هايلة وخصوصا ان احنا عملنا كدة فعلا يوم فرحنا
ربنا يخليكي ليا ومايحرمنيش من دعواتك الحلوة
.................
رئيس جمهورية نفسي
حضرة الريس بحالة عندنا اهلا وسهلا وانا اقول المدونة نورت لية بس انا مش شايفة موكب ولا حرس حضرتك جاي لوحدك
وانت طيب يا سيادة الريس وان شاء الله تتجوز ونيجي نبارك ونهني ونقدم الهدايا
حاضر هانصلي بأذن الله بس حكاية الخروج ممكن تبقى صعبة شوية
شكرا ياريس
...................
دوبة
وانتي طيبة يا جميلة
انا عارفة ان انتي عندك افكار كتير جديدة ومجنونة بس مش عاوزة تقوليها على الهواء مباشرة
تليفونات بقى
نفسي اطلب منك طلب بس تحققيهولي علشان خاطر المناسبتين الحلوين دول
انتي عارفة اني اكبر منك سننا واقدم منك في الزواج
خليكي حلوة بقى وقوليلي يا ابلة
خلاص اتفقنا
سلاموز
ايه يا ابلة /شاهى انت نسيتينى ولا ايه انا بتاع البحث و لا عشان مقدمتش اقتراح للمناسبة السعيدة دى
طيب خدى عندك يا ستى
اليوم ده لازم يكون مش عادى يعنى البيت يكون هادى هدوء مش عادى بعيد عن دوشة العيال وهما موجودين برضه والبيت يبقى هايل كل حاجة فى مكانها وعشاء رومانسى على ضوء الشموع وموسيقى هادئة ويا ريت اكل الذى يحبه ابو الدراويش
واهتمام غير عادى بالزوج ويا ريت لو هديه بسيطه مش مهم تكون غالية
ويا ريت بعد كل ده لوركعتين لشكر النعمة و لتحل البركة وشكرا
يحيى
يا استاذ يحيى العيال مش منكدين علينا حياتنا ولا حاجة بس مناسبة زي دي يبقى كفاية عليهم انهم يقولوا كل سنة وانتم طيبين وبعدين نقلبهم على طول
ربنا يخليك انت وام يوسف وتجيبوا ليوسف اخوات يلعب معاهم وساعتها نبقى نشوفكم هاتعملوا اية ؟
هدايا اية اللي هاتعمل عبء دة لو جابلي وردة هابقى طايرة من الفرح وبعدين مش تخليك كويس كدة وتشجعة على حكاية الهدايا والا علشان انتو رجالة زي بعض
انا معاك ان الحب والمودة مهمين بس برضة الهدايا بيبقى لها تأثير حلو والهدية مش بقيمتها وسيدنا النبي قال : تهادوا تحابوا
او كما قال صلى الله علية وسلم
صوتك مع اقتراح قلوب حائرة هايتنفذ بأذن الله
...................
الطائر الحزين
الاول والاخر البقاء لله وربنا يصبرك انت والوالدة واهل بيتكم اجمعين بأذن الله
مش قادرة اوصفلك شعوري لما شفت تعليقك وانت بتهنيني رغم الظروف اللي انت فيها
بارك الله فيك يا اخي
تقبل احترامي وتحياتي
.....................
الشنكوتي الكبير
الله يبارك فيك ياسيدي
هو انت دايما لسانك متبري منك كدة هي مين دي اللي فالحة طبعا فالحة علشان كدة قلت : مع مراعاة اننا هانكون في اخر الشهر
فكرة الفيلم دي جميلة بس بدل الفيلم هايبقى شريط الفرح علشان نقعد نبكي على الاطلال هههههه
اة لو كان تاني يوم اجازة كنت صممت على موضوع الكورنيش وياسلام لو مركب من ام اتنين جنية على رأي دوبة تبقى رحلة تحفة
حمص الشام مش اد كدة واضح انك مجربة
مع مين ياترى ؟؟؟؟؟
..............
غير معروف
السيد الاستاذ غير معرف
اهلا بيك ضيف جديد في مدونتي المتواضعة ودة شرف ليا طبعا بس ياريت لو اتشرف بأسمك وارجو التواصل الدائم
طلبك على عيني وراسي وان شاء الله هابقى اتكلم عن الموضوع دة بس كلامي هايبقى عن نفسي قصدي اني مقدرش اعمم حكاية الفراغ عند الزوجات لان كل واحدة وليها ظروفها وربنا يقدرني واقدر افيدك وربنا يوفقك في البحث بتاعك
تحياتي
غير معرف
انا منسيتكش ولا حاجة انا رديت اهو بس اصل الواد الشينيور قعد يلعب شوية وبعدين انا كملت الرد على التعليقات
ياريت اسم والا انت عجبك غير معروف
تحياتي
الف الف الف مبرووووووووووووووك
ويارب مش سبعين مية وسبعين عيد زواج...
وبالنسبة للفكيرة ولأني مش خاطب حتى عشان اعرف اعمل عيد خطوبة ههههههههههه فاقتراحي دعوة زي عيد ميلاد للاصحاب من الطرفين وبالمناسبة دي الهدايا تكتر ويكون يومس عيد عليكم بإذن الله
السلام عليكم
انا متشكر جدا على اهتمامك بموضوعى و ان شاء الله اكون زبون مستديم فى مدونتك وبالنسبة لاسمى فانا اسمى على و ممكن تقوللى يا على حب و شكرا
كل سنه و انتوا طيبين وعقبال 75 سنه مش 70
انا بقترح تفتكروا اول يوم شوفتوا بعض فيه فين و تروحوا تحتفلوا فيه
ربنا يديم الود والعشرة بينكو
وعقبال يارب عيد الزواج الـ 170 مش السبعين بس
دول هيعدوا هوا
كل سنة وانتى طيبة ويارب يديمها عليكم حب وسعادة
osama
الله يبارك فيك
وبكرة ان شاء الله تخطب وتتجوز بس كل شئ بأوان
يااااااة مية وسبعين سنة دة انا كدة هابقى حتشبسوت
فكيرتك جديدة واحنا عمرنا ماعزمنا حد في عيد جوازنا بس ممكن نجرب
شكرا
.................
علي
اخيرا افصحت عن اسمك
لا شكر على واجب يا استاذ
...............
spyfun
وانت طيب
اقتراحك زي السكر
انا اول مرة شوفتة كان على السلم عند ماما
احنانروح نقعد على السلم ويبقى هو دة التجديد هههههه
شكرا يا باشا وياريت تكتب حاجة جديدة في مدونتك والا انت خلاص مبقتش عاوز تجرب
احنا بس عاوزين نطمن عليك
سلام
.....................
desert cat
ربنا يخليكي وعقبالك بأذن الله
تفتكري 170 هايعدوا فعلا هوا
شكرا يا عسولة
...................
mohamed
وانت طيب يا محمد وشكرا على زيارتك
كل سنه وانتو طيبين ويارب تفرحو بولادكم وتجوزوهم وتجوزو ولادهم يارب
بالنسبه لاقتراحي فأنا بطبعي طاقق ودماغي لاسعه
يعني من ضمن لسعان دماغي اني كنت بافكر اني لو اتجوزت ..
ده لو يعني ..
ولو تفتح عمل الشيطان
واعوذ بالله من الشيطان
يبقى اعوذ بالله من الجواز
المهم .. كنت بافكر اني اقضي شهر العسل سفاري ..
اجيب عربيه فور باي فور واخد مراتي والايس بوكس وخيمه وشوايه ونقضيها كامبينج كل يوم في منطقه ..
وكل يومين تلاته نروح فندق ولا حاجه نقعدلنا يومين تانين ونطلع نكمل الرحله
وعشان مافيش بنت عاقله ولا مجنونه هتقبل بالوضع ده ..
يبقى هافضل عازب على طول
المهم .. ممكن اقترح عليكم مثلا انك تاخدو بعضكم في منطقة في طريق العين السخنه ..
بعد قرية بنت السلطان ..
في منطقه جبلية هناك بفيو عالبحر .. منظر تحففففففففففه
ومش هيكلف حاجه .. هو يادوبك العربيه والبنزين بتاعها وبطانيه وسي دي مان او كاسيت وشوية حناكيش لزوم الجو ..
يعني باتنين جنيه لب سوبر ..
فول سوداني ..
عايزين تبعزقو بقى ..
هاتو فسدق وكاجو وقزازة بيبس لتر .. ولعلمك ..
ولا في اي حد هناك خااااااااالص
يعني مكان مناسب ورومانسي جدا وغير مكلف بالمره
ومش بعيد والله .. هي ديتها ساعه من بعد بوابة العين السخنه القاهره .. يعني في ظرف ساعة ونص من بيتكم مثلا تكونو هناك ..
تقعدو قعدتكم والحياه لذيذه .. وترجعو عالبيت بالسلامه ان شاء الله
ملحوظه :
في واحد بتاع سمك وجمبري عالطريق مش فاكر اسمه الحقيقه ..
اكله حلو مووووز وسعره معقول قوي .. يعني طاجن رز بالجمبري وسمكة بوري مشوية سنجاري وبيبس بتلاتين جنيه ..
وسمك طازة واكل نضيف وقعدة المحل نفسها حلوه قوي قوي قوي
وكل سنه وانتي طيبه .. وبعوده الايام
شاهي
كل سنة وانتي طيبة وعيد جواز سعيد زي كل سنة فاتت وجاية انشاء الله راي انك انتي اللي تفكري من جواكي انتي عايزة ايه ونفسك في ايه اعتقد هاتبقي افضل واجمل
تحياتي
الاخت العزيزة شاهى
انا كتبت شوية كلام فى مدونتى المتواضعة جدا ويهمنى اعرف رايك تعالوا زورونا :)
على-حب
الاخ العجوز اللى عنده تلاتين سنة عندك افكار هايلة لتقضية عيد الجواز أرجو انك تكتبها فى بوست منفصل عشان نستفيد صحيح انا لسه مجوزتش بس برده المعلومات دى مش هتخسر بس مش عارف ليه حاسس انك صاحب محل السمك والجمبرى ومرضيتش تقول اسمه عشان التمويه
سلام
ياريت يامحمد ياخويا كنت انا بتاع السمك والجمبري
ده انا كنت امشي في الشارع منور من كتر الفوسفور
ونصيحتي ليك يابن الحلال لو الفكره عجبتك .. ماتفكرش في الجواز عشان مافيش بنت هتواااافق
لو لقيت بنت وافقت .. جوزني اختها ياعم
سلاموووووووووووووووووز
أنا الشينيور
مت أولى حاجة ونبى فاهما ولاد
بالبس الشتاء زهءان
كل سنة وانتى طيبة يا شاهى وعقبال 300 سنة جواز يارب
انا من رأيي تاخدوا الولاد وتطلعوا على نايل سيتي تقعدوا هناك :D
وده مراعاة لانكم اخر الشهر :D:D
بصي انا من رايي ان اى يوم حلو بين الاتنين بيبقي عيد :)
ربنا يسعدكم يارب دايما
تقبلي مرورى الاول بمدونتك الجميلة دي :)
soooo
يا اهلا بالدماغ العالية
واضح انك مش عاوز تتجوز خالص الا اذا لقيت واحدة مهيسة زييك
سفاري اية ياراجل حرام عليك يعني انت عاوز تأخد بنات الناس وتدوخهم معاك في الصحراء لأ وامتى في شهر العسل دة انت دماغك عالية قوي فعلا
واضح من وصفك للمكان انة مكان حلو وهادي بس قولي بقى تعرفة منينين يا لئيم
بس للأسف هنأجل اقتراحك شوية علشان لازم يكون تاني يوم اجازة
شكرا جدا على الاقتراح
نورتني ويارب مش تكون اخر مرة
..........................
سندباد
وانت طيب وعقبال مانقولها لك انت والعزيزة جهينة
تحياتي
.......................
علي
انا رحت فعلا
سلام
.....................
الشينيور
انا مش فاهمة حاجة يا محمود
وبعدين اية كل الغلطات دي
دة احنا لينا قاعدة كبيييييييرة مع بعض في العربي اتفقنا
..........................
كفاية طيبة
وانت طيب واجمل واسعد
بس اية حكاية كفاية طيبة دي ولية كفاية ؟ على العموم انا هاروح علشان اعرف
شرفت ونورت المدونة
تحياتي
تصحيح بسيط
كفاية طيبة طلعت بنوتة زي السكر وانا رديت في التعليق على انها ولد
اعتزر
جيت اسلم وارمي التماسي
تحياتي
شاهى الجميله
كل سنه وانت وابو الدارويش
طيبيين وسعداءوربنا
يديم المحبه والموده بينكم
معلش متأخره
تحياتى لك
شوشو يا غالية كل سنة وانتي بصحة وعقبال يارب العيد ميلاد المئوي ياغالية على قلبي يارب والله كنت فاكرة يومها بس الشغل كان طحني ياغالية يارب يهدي سرك ويكون كل ايامك اعياد
ده انا غلبان قوي وكتاب الله
وبعدين نقطة اني الاقي واحده مهييسه زيي دي مفروغ منها خلاص
مافيش اصلا
وغير كده لعلمك مش بهدله والله
ده في مكان في مرسي علم اسمه وادي الجمال
عباره عن مجموعة خيم مكيفه ومجهزة ومفروشه فرش بدوي او فرش حضري .. زي ماتحبي يعني
وبين كل خيمه والتانيه قد 200 متر .. وقدام كل خيمه في جملين او اتنين بيتش باجي .. على حسب اللي يعوز ده او ده
لا وايه .. كل خيمه فيها حمام بجاكوزي وفيه دش مركزي وفيه كمان ووكي توكي عشان لو حبيتي تطلبي اكل من الفندق ويبعتهولك على الخيمه بتاعتك
بذمتك دي فيها بهدله ولا بتاع؟؟؟
اما بالنسبه للمكان اللي اقترحته عليكي فده لما كنت باعمل سفاري وكده .. قبل ما اعجز دلوقتي
وكنت رايح انا واتنين صحابي
ولاد وكتاب الله
وكان يوم هايل هايل هايل
ونصيحه .. لو قدرتي تروحي دلوقتي او قريب روحي عشان سعر الاكل الجمبري والسبيط والسمك بقى برخص التراب في السويس .. وبالمره تجيبولي معاكم شروة سمك معتبره
سلامووووز
إرسال تعليق