يوم جميل من ايام رمضان
مشهد خارجي ليلي
كافي شوب كبير ـ بالبلدي قهوة ـ
في احدى شوارع القاهرة المشهورة
القهوة كانت بتتجدد والافتتاح بعد ثلاث ايام
صاحب القهوة رجل خير و محترم
صاحب القهوة : تعالى يا حاج علشان تشوف التشطيبات وتقول رأيك
الحاج : استنى شوية لما اخلص حجر الشيشة
صاحب القهوة : يا حاج تعالى هو الحجر هايطيرنبقى نجيب غيرة
الحاج : طيب انا جاي
ودخلوا سوا يتفرجوا وكان في بعض العمال بيشتغلوا
الحاج : مممم كويس هايل لأ شغل جميل ونضيف تمام
احد العمال : البيت اللي جنب القهوة دة هايقع دلوقتي
يالا يا واد انت وهو اخرجوا من القهوة بسرعة
ـ بجوار القهوة بيت قديم مكون من دورين والارضي ـ
صاحب القهوة : بيت اية اللي هايقع ؟ ! وهو حتى لو وقع اية اللي هايوقعة علينا
دة هايقع مدكوك على بعضة
الحاج : بس البيت مايل علينا قوي
اية صوت الطقطقة دة
اجري بسرعة بسرعة
طاخ طاخ طاخ
وقع البيت على القهوة
بس الحمد لله مفيش اصابات ولا خسائر في الارواح
طبعا تراب كثيف يملأ المكان
صاحب القهوة : كح كح الحاج فين ؟ فين الحاج ؟
الحاج : قلتلك استنى لما اشرب الحجر مستعجل قوي على اية؟
صاحب القهوة : كنا هانروح أونطة
الحاج : الحمد لله
حمد لله على سلامتك يا حاج وربنا يديك الصحة ويخليك لينا
ربنا يعوض عليك يا صاحب القهوة وقدر الله وماشاء فعل والحمد لله انك بخير
كانت معكم شاهي ابو العافية قناة الخميرة
هناك ٢٥ تعليقًا:
ده بجد ولا ايه ؟
:)
وايه قناة الخميرة دى
دى بدل الجزيرة يعنى :)
بس ملعوبة
يا لهوي يعني الراجل كان هيموت ويروح يقابل ربنا يقوله كنت بتعمل ايه يقوله كنت بفتح قهوه وسيبت الشيشه وقمت اتفرج على القهوه
ما علينا ربنا يسترها ونموت على الخير
اما بخصوص البيت اللي وقع تلاقيكي يا سوسه انتي اللي حطيتي المتفجرات جواه انتي والبنت دوبه
وطبعا استعنتم بخبراء المفرقعات يحي وابو الدراويش
ما علينا
سلاااااااااااااااااااااام
ابقي قدميلي معاكي في قناة الخميره دي انا ممكن ابقى اعمل اعلانات سمنه هايله
بسكوت فرغلي حاجه كده فللي
ايه يا عم الخيال الجامد ده خميره صحيح
كل سنه و انت طيب
طيب ودلوقتى انا هعمل ايه
خلاص حد يدور لنا على قهوة تانية عشان نشيش
قلنا الافتتاح بعد 3 أيام وهيكون الشيشة ببلاش هناك
دلوقتى لسه هنستنى قهوة تفتح جديد بقى ولا ايه
يا أبو العافية ايه رأيك
لا حول ولا قوة الا بالله
المهم بقيت الخبر الراجل مفكرش يفتح قهوة تانية
اللهم لاتمتنا الا وانت راض عنا يارب
ربنا سترها وجت سليمه المره دي
مرسي علي اهتمامك وزيارتك ياريت
تزوريني وتقولي رايك في الجديد
سلاماااااااتي
شاهي
ازيك ايه الاخبار
وايه الاخبار اللي بتقليها عبر الاثير دي
انتي نويتي تغيري نشاطك
تحياتي
عايز اعرف الأشخاص الحقيقين في القصة دي ، يعني مين الحاج ومين العمال ؟ وانت ايه علاقتك بيهم ؟؟
فضول بقى
تحياتي
والله البت شاهى اللى انا اعرفها كانت طيبة وأميرة وفلة
بس خلاص الاعلانات كلت نفوخها وقررت تشتغل فى قناة الخميرة
واوقلها ياشاهى يهديكى يرضيكى ودى ابدا
يلا ادى او الانباء اللى جايلنا بيها فى رمضان - قهوة وشيشة وبيت بيقع وعم الحاج - هو قادر يتنفس لما هيشرب شيشة
ثم ايه يا شنكوتى انت هتخبص علينا ولا ايه وعملت جوزى خبير مفرقعات - هخليه ييجى يفرقعك بدل المترو مكان هيفرقعوه او اقولك هقولهم ان انت اللى معاك المفرقعات
يلا حصل خير ان شاء الله
معكم هبة دوبه من وراء أعالى البحار
ههههههههههههه
سلامووووووووووووز
هبة
الحمد لله ربنا سترها ..وبعدين تعالي هنا انتي بتقطعي علينا ولا ايه يعني لما انتي تشتغلي في قناة الخميرة انا اشتغل في ايه بقى اروح انا بقى قناة العجينة ... بقولك ايه ياريت تتوسطيلي في القناة دي وانا مستعدة اوافق وابقى مراسله ليهم في الشيشان
تحياتي
قناة الخميرة
هى قناة جديدة دى ولا ايه
والله الواحد من كتر القنوات
مبقاش يتفرج
على التلفزيون خالص
البوست ده ظريف جدا ودمه خفيف
لأ ووصف المكان فاضل الموسيقى التصويريه
ياريت تاخدنى مراسله فى قناه الخميره
كل سنه وانت طيبه ياشاهى
ايه ياشوشو مش تقوليلي انك نزلتي مراسلة جديدة فيقناة الخميرة وبعدين ما احنا كنا مقدمين مع بعض في القناة دي ازاي يخدوكي ومش يخدوني معاكي غريبة قوي دي
كل سنه وانت صايم رمضان كريم
فينك ياشاهي ايه الغيبة دي
شاهي يا مشغوله بالطبيخ والعيال ربنا معاكي يا ستي في العزومات والتحضير للعيد من تنضيف كحك وخلافه خلي البنت هبه تساعدك تلاقيها مهتعملش حاجه دي كسليه انا عارف
كل سنه وانتي طيبه
وعموما انا مش هابلغ عنك انتي انا هابلغ عن هبه بس
ويحي كمان علشان متقعدش في الحبس لوحدها اهو يونسوا بعض لحد الواد يوسف ما يكبر ويحلو كده ويبقى محامي كبير يطلعهم هو بقى
سلااااااااااااااااااااام
أهو لو كان فضل يكمل الحجر كان راح كمله هناك فوووووووق ونار من الأصلية مش بتاعتنا دي .. لا يعني هايرص حجر مالوش حل
البوست لذيذ
و بحبك وحشتينى
"مصر هية امى..نيلها هو دمى...شمسها فى سمارى ..دمها فى ملامحى...حتى لون قمحى ..لون نيلك يا مصر...مصر ...مصر" دى كانت كلمات الاغنية التى تغنت بها المطربة عفاف راضى من زمان قوى و اتربينا عليها...اتربينا على ان مصر هية امى...غنيناها فى المدرسة فى الابتدائى فى حفلات المدرسة و قولنا مصر هية امى ..و انا بدورى بقولك يا سيد عمر افندى...من هنا و رايح (مصر هية امك) و لازم تفهم ده كويس.
باقى المقال
و بحبك وحشتينى
على عمر افندى
www.omarafandy.com
بكرة العيد
كل سنة وانت أطيب واروع
عزيزتى
كل سنه وانتى طيبه
معظم البلد بيوتها عاوزه تترميم
احنا عايسين بس بستر ربنا
عيد سعيد عليكى وعلى اسرتك
سلام
كل سنة وانتي طيبة ياشاهي
عيد سعيد
تحياتي
ياجماعة محد يقول حاجة
شوشو كلب سنة وانتي طيبة وحشاني قوي انتي فين تليفونك مش بيرد ليه
كل سنة وانتى طيبة ياشاهى
حقيقي بعتزر بشدة اني مش هارد على تعليقاتكم
كل سنة وانتم طيبين
اسعدتني تعليقاتكم وربنا يسعدكم وشكرا ليكم
ايه يا شاهي يعني لاعارفة القيكي على التليفون ولا بتزوروني على المدونة اعمل فيكي ايه اعيط انا يعني اعععععععععععععععربنا يسمحك
إرسال تعليق