انا قلت اعترف بنفسي احسن
الفضيحة دي مش وانا صغيرة
لأ
دي وانا كبيرة
هي مش فضيحة قوي
هي خيبة قوية
المهم قبل العيد كنا في حالة طوارئ علشان امتحانات الشهر
في يوم كنت بذاكر للرايقة لقيت الشينيور داخل عليا ومتنرفز كالعادة
الشينيور: يووووووة اية دة انا مش فاهم حاجة
انا : خير في اية
هو: مش فاهم حاجة في
long divison
انا: لونج اية ياحبيبي
هو: ديفيجن يا ماما
انا في سري
يانهار اسود يطلع اية اللونج ديفيجن دة
طيب اللونج سهلة وعارفينها انما اية الديفيجن دة
ادي اخرة المدارس اللغات
انا قلت من الاول مالها المدارس العربي
ندخل مدارس خاصة برضة بس عربي ياناس
انا كنت في مدرسة عربي والنبي عربي
طيب اقولة اية استنى لما اشوف في القاموس شكلي هايبقى وحش
وفي وسط ماانا بكلم نفسي لقيت صوت خرم وداني
يامامااااااااااا
اية يابني
الشينيور: بصي شوفي هما اللي غلطانين في المسألة دي والا اية
انا : وريني اية دة .......... دي القسمة المطولة
هو : يعني اية؟
انا : هههههههه يعني اللونج ديفيجن ياحبيبي
ـ صحيح كل واحد وعلامة ـ
بصيت في المسألة وانا عمالة اضحك وحلتها وقلتلة لأ هما مش غلطانين
الفضيحة بقى والخيبة القوية مش في اني ماكنتش اعرف يعني اية لونج ديفيجن
لأ التقيل لسة جاي
الشينيور: قوليلي يا ماما حليتيها ازاي ؟
انا : بص ياسيدي .................
وسكت
هو : ايوة ياماما
انا : استنى كدة
يالهوي مش فاكرة حاجة هواحنا كنا بنضرب وبعدين نطرح
يانهار ازرق افهمة ازاي وانا مش فاكرة انا صحيح حلتها بس كدة نظري من غير خطوات
اعمل اية ياربي في المصيبة دي
طيب اسألة هي الميس قالتلكم اية ؟ يمكن افتكر
لأ مش هاينفع دة عصبي ومش هافهم منة حاجة
ومش معقول اقولة مش فاكرة الخطوات هاتبقى فضيحة وكفاية فضحتي معاه
في الفرنساوي
اصل انا قلتلة بصراحة انا ما أخدتش فرنساوي غير وانا في ثانوي ونسيتة كلة تقريبا
ومن ساعة ماعرف وهو بيذلني ولما الرايقة تسألني على حاجة في الفرنسي
يرد بسرعة ويقولها : اسأليني انا اصل ماما مش بتعرف فرنسي
الواد بيعايرني عيني عينك
طب اعمل اية؟
هو : ياماماااااااااااااا
انا : يا حبيبي اصبر شوية
اعمل اية؟ اسأل مين ؟ عاوزة حد اسألة ويستر عليا
ايوة مفيش غيرة
انا : الو ايوة يابابا ازيك عامل اية والنبي يا بابا الحقني واستر عليا يستر عليك ربنا
بابا : في اية ؟ هو انتي هاتشحتي
انا : لأ ابدا الواد مش فاهم القسمة المطولة وانا مش فاكرة بتتحل ازاي علشان افهمة
والحمد لله قالي على الطريقة من غير مايهزقني
وفهمت الشينيور وجاب الدرجة النهائية في الامتحان
وعدى الموقف على خير
واللي عندة كلمة حلوة يقولها واللي ماعندهوش يقول برضة
وماتنتظروش فضايح تاني خلاص
هناك ٤٤ تعليقًا:
أهم حاجه اني أول تعليق :)
بس ماعنديش كلمه حلوه أقولها :D:D
ياخسارة فلوس باباكي وبابايا وبابا كل الناس
لأ لأ لأ بس أكيد العيب مش فيكي أكيد :)
بصي بجد بجد بجد بقى الرياضه فعلاً بتتنسي بسهوله أوي لو مافيش ممارسه ... الرياضه بالذات والحاجات اللي جنبها دي زي الفيزياء مثلاً يعني ماتقلقيش مش فضيحه ولا حاجه ... اذا كان باباكي لسه فاكر ربنا يديله الصحه الناس بتوع زمان دول أصلاً ماشاء الله عليهم مافيش مقارنه بينا وبينهم
السلام عليكم ورحمة الله وبركاته
هههههههههههههه
ياشماتة طنط ظاظا فينا
ينفع كده انا مش مصدق عينيا
انا مش عارف اقول ايه بس مش عارفه اللونج ديفيجين
ينفع كده
دى العيال لسه صغيرة امال لما يكبروا شوية دلوقتى امال لو كان سألك فى حاجة عن الانتومى كنت هتعملى يه
ملحوظة:
انا مكنتش اعرف يعنى ايه ديفيجن لحد ما قرأت البوست
ثانيا انا معرفش يعنى ايه انتومى
D:
السلام عليكم
إزيكو يا ناس يا اللى فوق
بقى انتى بتقولى عن دى فضيحة يا خراشى
امال انا دلوقتى اعمل ايه
لما قريت القسمة المطولة قولت يا لهوى مطولة مين وبتاع ايه انا كنت بحب الرياضة جدا جدا جدا بس نسيت القسمة دى ازاى
طيب اقولك هى مش عارف ايه تقعد تقسم على 2 او 3 تقريبا وأضعافه ولا ايه
على العموم يا أستاذ محمود يا ريت لو عندك سؤال فى الأحياء أو الكمياء أو الحيوانات الأليفة أو المفترسة انا موجود
عالم بحار اى كائن حى لا تخجل يا ولدى انا موجود هنا وسيبك من ماما اللى مبتعرفش فرنساوى
هههههههه بجد والله مش بتعرفى فرنساوى
ياااااااااه
ولا انا والله
;(
لإاقدر أقول وانا كمان بس عرفت أحوش فى الآخر ولقطت حاجات من الكلية
ربنا يخليهوملك يا رب
آه صحيح نسيت
مش اللونج دفيجين ده مشروب تبع شركة كوكاكولا
هههههههههههههههه
انا عارفاها
دة اسم فيلم اجنبي جديد
تصدقي ان شايلة هم اليوم دة
بس الفرق اني كنت مدرسة لغات
بس وحياة توتي
ما فاكرة منها ولا كلمة
انتي كل اللي عليكي تذاكري معاهم وخلاص
وعامة هستر عليكي
عشان ربنا يسترها عليا يوميها
اولا انا معاكى فعلا ان التعليم اليومين دول بقى بخاصية الالغاز غير قابله للحل وفعلا ساعات بحس انهم بيفرحوا باحساس الاطفال والكبار بالعجز امام اختراعات علميه لااساس لها من الصحه وكما قال الشاعر
هما اللى اتعلموا خدوا ايه
واخيرا اتمنى انك تزورى مدونتى لانى حديث العهد بهذا العالم
ولا خساره ولا حاجه
طيب ما انا خلصت كلية طبن بجلالة قدرها
ولحد دلوقتي معرفش القسمه المطوله
لا اتعلنتها ولا نسيتها
كبري يا ست شاهي
المهم يكون حد في البيت عارفها وخلاص
كلام حلو اهو
أي خدمه
كل سنه وانت طيبه
كنتى إسألى خالتو جليله عملت إيه مع العيال
;o) ;o)
خالتو جليلة
أنا عايز أعرف خالتو جليلة عملت إيه مع العيال مليش دعوه انا عايز اعرف
طيب قول انت يا ابو الدراويش
غريبة قوي فين تعليق البنت دوبا ؟؟ المهم .... نرجع لموضوع القسمه المطوله .... ههههههههههههه .... بصراحة موقف لا تحسدي عليه، بس برده لما نعلم ونعرف ولدنا ان احنا مش علماء ومش عارفين كل حاجة اون الدنيا بتتغير وان السؤال محرمش يبقى كويس عشان هم كمان يتعلموا وما يفتوش في كل حاجة ومن قال لا اعلم فقد افتى ، وساعتها نسأل اللي ممكن يعرفنا. تحياتي والله يكون في عونك.
سلام
انا جيت اهوا بشكل جديد ومعايا فيتامين كله حديد
قال لونج ديفيشن قال
محلول منع الجفاف ده
انا من موقعى هذا بقولك وبنبه عليكى ان خلى بالك لانك هتكونى المرجع الل هرجعله لما يوسف يدخل المدرسة
ظبطى بقى لنحتاس كلنا
يا شماتة طنط جليلة فيننا
طنط جليلة مين يا عم الحاج ؟؟ ممكن نتعرف يمكن نستفيد
تحياتى
كمون سفا
سفا بيا ميرسى
ده دوا كحة اوعى تجيبيه للعيال ليكحو
سلامنتوز
هبة
و الله أنا مهندس و مش فاكر شرحها
أنا أعرف أحلها بس الخطوات و شرحها حتحتاج وقت عبال ما الواحد يفتكر
أما الحساب بالإنجليزي فدرسناه في الكلية مع اني كنت مدارس حكومية عربي طول عمري
عموماً لما الواحد بيتخرج بينسى اللي اتعلمه كله و بيركز في الشغل
ربنا يعينك على أسئلتهم
:)
هههههههههههههههه
ههههههههههههههه
طيب والله انتى اشطر منى
انا كنت بحسب لونج ديفيشن دى انشطار ذرى ولا حاجه وقلت ده سمع الاخبار وجاى يستفسر
الحمدلله ان الواحد نفد بجلده من التعليم
فلتحيا الدروس الخصوصيه فى المواقف اللى زى دى
شوفى يا ستى
http://www.moe.edu.kw/hagybat%20almalem2/edu/mathmatic/mathh.html
ابقى ادخلى هنا
هتلاقى شرح الطريقة
ركزى فى الشرح وليس الارقام علشان الارقام ساعات بتكون مقلوبة
دعواتك
قريبتنا شاهي
كل سنة وانت طيبة انت والعم الدرويش
ورجاء انك ما تشرحيش حاجة للعيال تاني
وتعالى انت ووفاء اقعدوا جنب بعض .. وكونوا رابطة سموها
أمهات ضد اللونج ديفيجن
كل سنة وانت والقمامير بخير وسلامة
انا مش هاقول حاجة لانى كنت زيك فى مدارس خاصة عربى
وعلشان كدة انا كنت عمالة اتابع معاكى علشان اعرف هى اللونج ديفيجين دى تطلع ايه
لان لونج وسهلة انا قلت هى حاجة طويلة
اتاريها القسمة المطولة
بس انا كنت فاكراها انهم لاغوها
اتاريها لسة موجودة
يارب يارب يارب
يلغوها لما شريف يدخل المدرسة
مش ناقصة فضايح
والنبى يا شاهى كنت عايزة اعرف انتى مدخلة عيالك مدرسة ايه
علشان المفروض شريف يدخل السنة الجاية المدرسة ولحد دلوقتى انا محتارة
فياريت تنصحينى بمدرسة كويسة
وماتخافيش هاشوفك برضه بربع جنيه
ربنا يكون فى عونك
ويارب تفرحى بعيالك ويكونوا من الناجحين دايما يارب
سلام
اختك خيخة
هههههههه
كنت أتمنى انى اكون معاكى انتى والشينيور فى الحوار ده
هو إنتى لسة شوفتى حاجة؟
اللى جاى أجمل ..
ابشرى ياصديقتى الحبيبة ..
الرياضة الحديثة قادمة إليكى فى الطريق
خدلك ساتر ياجميل
ههههههههه
ربنا معاكى ياقلبى
بموووت فيكى
كاميليا
السلام عليكم
عارفه ياشاهى انا كنت مش مبسوطه شويه
ولما دخلت وشفت مشكله اللونج ديفشين
قلت انا الحمد لله عندى شورت ديفيشن
حقيقى ضحكتينى ياشاهى ربنا يخليكى انت والاولاد وباباهموالامامير وجدو اللى حل المشكله وتيتا اللى اشتكتيهاللأخصائيه
بوست تحفه
تحيااااتى
ههههههههههههههه
لونج ديفيجن
هههههههههههههههههه
فكرتيني ببنت اخويا لما باباها وماتها سابوها معايا وراحو للدكتور
لقيت البنت ام نص لسان واللي ساعتها ماكانتش كملت اربع سنين بتقولي عمو عمو انا عايزه بوب كورن
؟؟؟؟؟؟
ايه البتاع ده؟؟؟
هي البت بتسكر عيني عينك في السن ده؟؟؟؟
وانا طبعا مش فاهم وعمال اقولها حاضر وبتاع لغاية ما كنا انا وهي بنتفرج على فيلم فيه بوب كرون .. واللي اكتشفت فيما بعد انه هو ذات نفسياته اللي احنا كنا بنطلق عليه اعتباطا .. فيشار
والحمدلله .. نزلت وجبت كيس دره من اللي بيتعمل فيشار وحطيت حله عالنار ونقطتين زيت وفضيت شويه من الكيس
بس ماغطتش الحله
وحصلت انفجارات ولا انفجارات دهب
والحله اتحرقت
والمطبخ اتبهدل
وفين وفين رحت قلتلها تعالي اجبلك شيبسي من الماركت اللي تحت
واحنا تحت بقى .. لقيت في اكياس بوب كورن جاهز .. الكيس بربع جنيه ولا التعب ولا البهدله
لكن برضه جبتلها شيبسي
وجبت لنفسي باكو معسل
وكيس بوب كورن
كل سنه وانتي طيبه
ليكي وحشه والله
سلاموووووووووووز
قلت لك زمان
ذاكرى
وبلاش تنطى من على السور
تقوليلى
المنهج كله فى دماغى
فين المنهج وفين دماغك ؟؟؟؟
shahy
يا عزيزتى كلنا كنا بنفهم زمان فى الرياضة
بس انتى عارفة عوامل التعرية والسن والعوامل الاجتماعية والدراسية للجامعة بتخلى مخك انضف من الصينى بعد تصنيعه
انا كت فى مدارس لغات
مش من كتير يعنى
من تلات سنين
ووالله مش فاكرة القسمة المطولة ديه كانت فى انهى سنة
تصدقى ممكن تكون ملغية على ايامنا
بلا جع دماغ
لما يسالك بعد كده قوليلى تعالى نتفرج على ال ام بى سى 3
والله بتجيب حاجات اجمد من اللونج ديفيجن ده
تحياتى وتقديرى لكى ولاطفالك
بجد بوست جامد جدا
والمدونة كلها رائعة
ومدونة بعلك وبنيك
رائعتين ايضا
يارب تقبلينى ضيفة للمدونة
التعليم المجاني الله يخرب بيته
هو اللي طلع ناس مش عارفة الفرق بين القسمة المطولة..وقسمة والشبراويشي
هو ده المنطق ولا مش هو يا بتاعة المدارس يا متعلمة
القسمه المطوله القسمه المطوله
ازاي دي صحيح ؟؟
بجد بجد
أسلوبك مالوش حل
لذيذ جدا
هههههههههههه
الشنيور دا صديقي بس الحمد لله طلع شاطر في الرياضيات
وفكرني بموقف فضيحه مع اخويا في الرياضيات بردو في مرة قال ايه بذكراه رياضيات وفضل يحسبه قلته غلط استغرب قال غلط ليه قلت بص كده وقال ايه يعني انا اللي فاهم قالي قول قلتله منتاش شايف الصفر لقيته وقع على نفسه من الضحك قالي الصفر على الشمال .. فبهت بس رحت في الضحك ولحد الان زي الفرنساوي كده فاكرهالي ونضحك....
موضوعاتك جميله بجد وفيها روح محببه الى نفسي..
دمت بكل ود..
خالص تحياتي
أععععععععععععع مامتي والله بنتك الي المفروض كانت على وش مناقشة الماجيستر ماتعرف البتاعة ده مش تزعلة نفسك وادي بكريتك خيبانة ومنيلة بستين نيلة اهي عادي يامامتي كلنا في الهوا سوى دونت وري شكلي هروح اذاكر عنجليزي من تاني
rehb mostafa
طيب يا استاذة امارس الرياضة دي ازاي؟ انا بحب المشي ينفع ههههههه
ماهو دة اللي مجنني ازاي ابويا يبقى فاكر وانا لأ
صحيح الدهن في العتاقي زي مابيقولوا
شرفتي يا رحاب
.....................
خمسة فضفضة
وعليكم السلاااااااااام
طنط ظاظا مين؟
اخرس
طيب
هههههه
بتضحكي عليا ماشي ماشي ماشي
تلاتة ماشي
..................
علي
ياعم خضتني
انا قلت صورتي اتهزت قدام اخويا الصغير
بس الحمد لله طلعت زي حالاتي مش عارف اللونج ديفيجن ههههههه
اشكرني بقى علشان عرفتهولك
واية الانتومي دة كمان هو انا ناقصة
يالا روح ذاكر وكفاية قاعدة قدام الكمبيوتر
.................
عبدة محتاس
وعليكم السلام يا ناس ياللي تحت
الحمد لله مش انا لوحدي ياسلام اد اية انا مبسوطة
مشروب اية يافقري فكرتني انا نفسي في الكوكاكولا هاقوم اطلب واحدة قبل لما العيال يرجعوا
اصل الكولا من الممنوعات عندنا في البيت
يا قمر أنتى ملكيش حل
ههههههههههههه
كل سنه وهمامنورين عليكى حياتك ومشردينك على المدونه
يا بنتي كنتي كلمتيني علىطول
اولا
تجيبي الحبه التخان تقسميهم كذا حته وبعدين تاخدي اول حته من الشمال تقسميها على الحته اللي على الدراع بتاع القسمه
قوم تلاقي فاضل حته للغداء بتاع بكره تقومي حاطاها معاهم واهو العيال بتاكل اي حاجه وتقومي ترجعي تقسمي الحته التانيه على الحته اللي على الدراع الشمال اللي قلت ليكي عليه في الأول وبعدين تشوفي فايض حاجه ولا لأ
ولو فايض والمسأله مظبووطه هيبقى اللي فاضل مضاعف الحته اللي على الشمال
او هيفيض حته مكسوره ربع رغيف او نص رغيف
دي تحطيها في التلاجه ومش هيجرالها حاجه
وعموما اوعي تفكري انك تتصلي بيا في المسائل دي
ولا في الفرنساوي
انا تعليمي يوغوسلافي
سلاااااااااااااام
ههههههههههههههه
فيه حد ميعرفش اللونج ديفيجن
؟؟؟؟؟
ههههههههه
بجد كلامك ظريف جدا
و ربنا يبارك لك فى الشنيور و اخته
ربنا يكرمك
د.حمـــــاس
شاهي . شاهي؟!؟
انا قلت يمكن قرايب
بس مبروك على, عقبال ما يتخرج ان اشاءالله و برده ميستغناش عنك
هههههههههههههه ياشكلك اللي مش ولابد ياشوشو العيال ولادك يقولوا عليكي ايه
بس تعرفي ياشوشو انا تقريبا جالي زهيمر لاني مش فاكرة اي شئ من الكلام ده ولا عارفة القسمة المطولة دي بتتحل ازاي مع اني كنت شطورة في الرياضة
يلا معلش حكم السن بقى ههههه
تحياتي
سمراء النيل
برافو عليكي
صح اسم فيلم اجنبي هههههه
ماتشيليش هم ولا حاجة
انتي كنتي في مدرسة لغات يبقى اكيد هاتفتكري وانتي بتذاكري مع الاولاد ان شاء الله وربنا يكرمك انتي وطارق ويرزقكم بالذرية الصالحة
................
صالح سعيد
اهلا بك في عالم التدوين
ماتفكرنيش الله يخليك بالعقد والكلاكيع اللي في المناهج وعموما هابقى احكي عنها في بوست تاني ان شاء الله
..................
دكتور حر
الله يخليك على الكلمتين الحلوين دول
يتردلك في الافراح ان شاء الله
بس انت اكيد اخدت القسمة المطولة دي في ابتدائي والا مش مهم المهم انك دكتور وحر
الدرويش المرووش
سألت وعرفت واحب اقولك هي كانت بتعمل اية
خالتو جليلة كانت بتقفل عليها وتقعد تذاكر مع اولادها وماكانش ليها دعوة بأي حاجة تاني في البيت وعمو عبد اللة زوجها ـ الله يرحمة ـ هو اللي كان بيعمل الأكل ويخبط عليها علشان تخرج تاكل وهو اللي كان بيشتري كل صغيرة وكبيرة في البيت
خالتو جليلة كانت بتسيب المواعين في المطبخ لغاية لما مايلاقوش حاجة نظيفة ياكلوا او يشربوا فيها وبعدين تبقى تفكر اذا كانت تغسل المواعين والا تخلي حد يغسلها لها
وكفاية كدة بقى
انا قصدي اقولك ان مفيش حد كامل
يعني احمد ربنا على النعمة اللي انت فيها اللي هي انا طبعا ههههههه
تحياتي يازوجي الغالي
..................
عبدة محتاس
اعتقد اني وضحت خالتو جليلة كانت بتعمل اية ومش هاقدر اقولك هي مين
ايه يا أخت شاهى
فين بوستاتك الجامدة
مش العيال خلصوا امتحانات
عايزين بوست جامد كده
وبعد ايه اللى انت كاتباه فوق ده
ده نظام الكلام ليكى يا جارة
:)
تحياتى ليكى ولك افراد الاسرة
على حب
لونج ديفيجن؟
افتكرتو موديل جديد من المصاصة بتاعت الاطفال
اتاريه طلع نوع جديد من الرياضيات
الله يرحمك يا ابن سينا
ياتما نعيش و نشوف
عام سعيد عليكم
shahy azaiek wish u r fine to7faaa aslwbik da wallahi ana fi posts kitir fatitni bs mal7o2a hatsala 3lihom wa7da wa7da
كويس جدا مبروك تخطي عقبة القسمة المطولة
عقبال الـ
complex numbers
اللى معناها بالعربي : الأعداد المركبة
علشان لما الشنيور يتكلم تكوني عارفة من الأول معناها
كل سنة وانتى طيبة
والسلام عليكم ورحمة الله وبركاته
يحيى
الله يكرمك يا اخ يحيى
فعلا لازم الاولاد يعرفوا ان احنا مش بنعرف في كل حاجة بس انا لما سألت بابا كنت عاوزة حد ينقذني من الموقف وماكنتش بفكر في حكاية انهم يتعلموا ان مش عيب لما الواحد يسأل بس انا هابقى اخد بالي من الحكاية دي بعد كدة
شكرا على كلامك وتعليق دوبة وراك على طول
.............
دوبة
يابنت بلاش تقولي الأعلان دة ليقولوا عليكي كبيرة ابقي قولي انك سمعتية مني والا من ماما يعني ماكانش على ايامك خالص
لا تقلقي يا جميلة انا خلاص عرفت كل حاجة ابقي ابعتيلي يوسف وانا هاظبطهولك
انتي بتضحكي عليا وبتقولي ان كمون سفا دوا كحة ماشي يادوبة ربنا يسامحك انا عارفة انها شتيمة وهاقول ليحيى عليكي
...................
مهندس مصري
اهلا وسهلا خطوة عزيزة يا حضرة المهندس
الحمد للة يعني مش انا لوحدي اللي نسيت الخطوات
اهو اديني بتعلم من جديد
تحياتي
..................
لماضة
ياحبيبتي انا برفض الدروس الخصوصية
عارفة لية؟
لان انا مدخلاهم مدرسة غالية شوية ويوم ماافكر ادي دروس هاكون نقلت العيال مدارس حكومية
طبعا ابو الدراويش مش موافق على كلامي دة بس لغاية دلوقتي المواضيع ماشية كويس والحمد لله
الطائر الحزين
دايما تعليقاتك مفيدة
بارك الله لنا فيك اقصد في حضرتك
..............
يوميات عيل مصري
قريبي وجاري واخوياابو فداء
اجدع عيل مصري
واللهي فكرة حلوة
نظم انت بس مع ام فداءوانا هاكون اول واحدة اشارك في الرابطة دي
تحياتي وسلامي للعائلة
......................
بنت خيخة واي كلام
ماانا قلت زيك برضة اللونج دي سهلة
المشكلة كانت في الديفيجن
عمرهم ماهايلغوها ياهانم
يالا حضري نفسك من دلوقت وذاكري كويس
اما بخصوص المدرسة
هابقى اخدك لفة على المدارس وطبعا انا هارشحلك مدرسة اولادي بس لما تلفي على كام مدرسة في الاول
.................
كاميليا
وانا كمان كنت اتمنى انك تكوني موجودة علشان تنقذيني
عاعاعاعاعاعاعا
الله يبشرك بالخير يارقيقة
كلمات
وعليكم السلام
ربنا يسعدك يااميرة هانم
ههههه ايةالشورت ديفيجن دة كمان وبعدين بتقلبي عليا المواجع وبتفكريني بالشكوى بتاعة اللأخصائية ماشي ماشي
هاسلملك عليهم كلهم
..................
سوووووو
شفت مامتك بيحصلها اية ياسوووو
هههههههه
هههههههههه
ههههههه
بوب كورن ههههههه
وماغطتش الحلة ههههههه
يادي الفضيحة بس دي غلطتي علشان ماعلمتكش ازاي تدخل المطبخ وتعمل الاكل والبوب كورن
واول حاجة هاعلمهالك
ازاي تخرط البصل وتفصص الثوم
وابقى ادعيلي
..................
فرنسا هانم
ولية الفضايح دي
هو انتي مش عارفة ان بابا وماما بيدخلوا على المدونة
دلوقتي يعرفوا اني كنت بازوغ
...................
اية
اللونج ديفيجن في رابعة ابتدائي
طمنتيني على نفسي يعني كتر خير الدنيا اني لسة فاكرة اسمي ههههه
تحياتي يا اية ومرحبا بيكي في مفيش حاجة
ابو امك
الحمد لله انا اعرف قسمة والشبراويشي كويس جدا
مش عارفة لية حاسة ان ابو امك دي شتيمة هههههههه
انا كنت في مدرسة خاصة لغاية ستة ابتدائي واعدادي وثانوي في مدرسة حكومة
تحياتي
.................
المهاجر
هو يا استاذ
.................
محمد صبحي 84
لأ دة موضوع شرحة يطول
هابقى اديك رقم تليفون بابا وهو يشرحة لك
............
درش
الله يكرمك
شكرا جدا
...........
اسامة
هههههههه
الحال من بعضة
ربنا يديم الود والمحبة
ودمت بكل ود
.............
مين دة؟
اية اللغة الغريبة دي؟
يعني ياربي هالقيها من اللونج ديفيجن والا من الفرنساوي والا من مين بس
................
بيبو
كدة يبقى هاتضربي علقة سخنة
.................
في القلب
اوشة
وانتي طيبة
انتي فرحانة ان العيال مشرديني طيب يااوشة انا زعلانة
سلام ياقمر
.................
الشنكوتي الكبير
الله ينور عليك
كدة انت نورت المحكمة
كويس انك لسة فاكر الطريقة
بس شرحك رائع
بارك الله فيك ياعمنا
إرسال تعليق