كلنا عارفين ان اليوم 24 ساعة وفي ايام بتبقى 48 ساعة
ودة طبعا حسب الاحداث اللي في اليوم
انا بقى هاتكلم عن ساعة واحدة في يومي
ساعة واحدة باليوم كلة
الساعة الثالثة عصرا
دة الوقت اللي بيرجعوا فية اطفالي الثلاثة من المدرسة
اول لما بفتح لهم باب الشقة بلاقي ماسورة كلام ضربت في وشي
كل انسان عندة أذنين لكن بيسمع شخص واحد
انا بيبقى مطلوب مني اني اسمع تلاتة في وقت واحد
في اول الدراسة كنت زي اي ام عادية بقف للاولاد في البلكونة
لكن لقيت ان الماسورة بتضرب وهما تحت وانا فوق ويبدا الكلام
ماما انا خلصت السندوتشات
طيب اطلعوا وبعدين نتكلم
ماما بصي الميس قالتلي اني شاطرة
طيب اطلعوا وبعدين نتكلم
ماما انتي عاملة اكل اية؟
اطلعووووووووووووووو
وكنت بشوف اللي رايح يضحك واللي جاي يضرب كف على كف
وكانت فضايح
قلت بلاش من وقفة البلكونة خالص
بس الصدمة بتكون كبيرة عليا لاني في الاول بحاول اهدي الوضع وافهمهم ان واحد
واحد يتكلم وطبعا بنبدأ بالجبارة ومع انها بتتكلم اول واحدة والمفروض انها تكون خلصت
كل اللي عندها الا انها لازم تتكلم تاني وتقاطع اخواتها وهما بيفضوا اللي عندهم
اسمعوا نوعية كلام الجبارة
ـ انا عندي قراّن جديد
ـ قولي ياحبيبتي
ـ قل هو الله احد لم يلد ولم يولد
ـ استني مش كدة فين الله الصمد
ـ مفيش هو كدة
اقولك حاجة كمان
ـ قولي
ـ قال رسول الله علية وسلم....... اية ياماما بعدها اية؟
ـ مش عارفة طيب قولي اي كلمة وانا افكرك بالباقي
ـ كدة طيب انا غلطانة اني قلتلك السلام عليكم اول لما جيت
وتغضب شوية ولما تلاقيني بكلم حد تاني تيجي وتكمل كلام
ـ ماما عبداللة جية النهاردة
ـ طيب كويس ولعبتي معاة
ـ انا عاوزة سكاكين وانا رايحة الحضانة
ـ سكاكين لية؟
ـ علشان اضرب عبد اللة
ـ يانهارك مش فايت هاتضربية بالسكاكين لية يامفترية
ـ اصل انا مارضتش اديلة ملبس وهو ضربني
ـ ماقلتيش للميس لية؟
ـ كدة انا عاوزة اضربة بقى
...........................................
الرايقة
خلي بالكم بين كل كلمة وكلمة فترة هدوء وروقان
ـ ماما الميس عاوزة..........م
ـ ايوة
ـ ميس العربي عاوزة.............م
ـ عاوزة اية؟
ـ ميس منى بتاعة العربي عاوزة.........م
ـ يابنتي انطقي
ـ عاوزة وسيلة
ـ حاضر خليها تكتبلي هي عاوزة اية بالضبط وانا هاعملة على طول
ـ عاوزة وسيلة علشان اخد درجة النشاط
مع تغير في نبرة الصوت وامتلاء العيون بالدموع
ـ انتي بتعيطي لية ماانا قلت حاضر يالا روحي اقلعي علشان تاكلي
ـ انا جعانة
ـ طيب روحي اقلعي الاول
ـ بس انا جعانة
ـ روحييييييييييي اقلعييييييييييييييييييي
.......................................
الشينيور
اة والف اة من الشينيور
اولا هو بيجي دايما متنرفز وشايط
ـ خير يا حبيبي
ـ بصي المشرفة الزفتة دي لازم تتغير
ـ عيب لما تقول على مشرفة الباص زفتة
ايوة زفتة علشان ماشافتش مريم وهي بتضربني
ـ وانت ماقلتلهاش لية؟
ـ ماانا ضربتها
ـ ياحبيبي كنت قلت للمشرفة الاول وكنت شوفت هي هاتعمل اية
ـ بصي لعبنا ماتش في البريك وجبت جون
ـ شاطر يعني غلبتم
ـ لأ اتغلبنا خمسة اتنين
ـ مش مهم المهم انكم كنتم مبسوطين
ـ مبسوطين اية بصي عمر كان واقف هنا وانا كنت هنا قام زقني والحكم ماحسبش فاول
وبعدين اقعد اسمع للوصف التفصيلي للمبارة واشوف جابوا جونين ازاي
ودخل فيهم خمسة ازاي
دة غير النكت الطويلة البايخة اللي لازم اضحك بعد لما تخلص
والا هايصب عليا غضبة
انا مش هاقول لكم غير واحدة بس
مفيش داعي اكون السبب في اصابة حد بالضغط
ودي اقصر نكتة قالهالي
اصابة رجل ياباني بفلة طائشة
خلاص خلصت اية وحشة
....................................
بعد كل دة بحط لهم الغدا وادخل المطبخ حبيبي واقفل على نفسي
واحاول اهديني شوية علشان اقدر اكمل باقي اليوم
ودة كان وصف مختصر جدا للساعة الثالثة عصرا
ملحوظة مهمة جدا جدا
مش عاوزة حد يقولي الاطفال نعمة واحمدي ربنا
لان كل دة انا عارفاة وانا مش قصدي اني اشتكي انا بفضفض وخلاص
واخيرا
الحمد لله على كل نعم ربنا عليا
اللهم ديمها عليا واحفظها من الزوال
هناك ٥٦ تعليقًا:
ههههههههههههههههههه
ههههههههههههههه
ههههههههههههه
ههههههههه
مش ممكن انا وقعت من الضحك
حرام عليكى والله
العيال زى العسل
دول مسللين جدا
اعمليلهم هما فى البيت مباراة
مين اللى يقلع الاول ويخلص اكل الاول وهكذا
يمكن يرحموكى شوية
او قوليلهم هنقول كل الكلام واللى حصل بعد الغدا بعد الاعصار اللى بيحصلك ده
انا حسيتك عمالة تلفى فى دواير
يا عينى يا شاهى
هتمشى وتقولى انا حسحس وحسحس انا كمان شوية
قلبى معاكى والله
بس البنت ملك جبارة حقيقى
وانا كمان مش هقولك سلامو عليكو وانا ماشية - يلا باى
ماماااااااا
ماامااا
ماماااااااااااااا
انا بس قلت محرمكيش من الدوشة حتى عالمدونات
سلامووووووووووووووز
هبة
عزيزتى
الاطفال نعمة واحمدى ربنا
عارفهلو جولكك يوم ومعملوش كده هتقلقى وتفكرى ان فيه حاجه غلط
وكمان انتى عاوزهم يكلموكى فى ايه غير دنيتهم مش دى دنيتهمولكل مرحلة دنيا هتعشيها معاهم اهم شئ كل كلامهم ما تخدهوش بعدم اهتمام لانهم فى مرحلة استيعاب معلومات وفهم ومظنش حد هيعرف يفهمهم اكتر منك
وخدى بالك احسن البنت تاخد سكينه معاها خوفيها منها
بوست جميل واسلوبك ممتع
وحوار لذيذ بينك وبينهم بجد
اصل انا شيفه بنظرة المتفرج
زى لو واحد اتزحلق ممكن تلاقى اللى بيضحك عليه ومش حاسس بالوجع اللى بيحس بيه من وقعته
معلش بقه انى مش حاسس بوجع قلبك منهم
بس برضوا احلا وجع بجد
ربنا يخليهم يارب ويفرحوكى دنيا واخره
تحياتى يا افندم
سلام
ههههههههههههههههههههههههه عسل واللهي العظيم تصدقي احلى ساعة عصاري والله قعدت اضحكك كتيييييييير دي عيال سكر خصوصا الشنيور اصلي حبيتو من اول نظرة لما كان عايز يدب شاشة الكمبيوتر في دماغي لما كنت عندك انا اصلي حسيت بالشرار بيطلع من عنيه هههههههههه
ربنا يخليهوملك يارب ويحفظك ليهم
بس تصدقي انتي ام بمعني الكلمة انا لما اتجوز واحلف عيال كده احتمال اطقشهم في بعض واللي هيتكلم وينطق حرف واحد لما يجي من المدرسة هذنبهم واخليهم يرفعو ايديهم في الحيط ....
تحياتي بجد بوست جميل اوي
ماااااااااااااااااااما احمد كلمني النهاردة مااااااااما وقالي ....مااااااااااامااااااا شوفيلي حل معااااااااااه يالا يا امي بكامل مش انا تبعهم ولا ايه انتي الي جبتيه لنفسك وبعدين نسيتي تذكري الساعة الي بتصل بيكي فيها وتقعدي تحليلي كل المشاكل بس اعملك ايه بقى انتي الي اتبنتيني ولازم تجيبي سيرة الساعة الي بكلمك فيها واعملك دوشة في دماغك وقلبان معلش يا مامتي
اتخيل ابنتك جدا
تلك الطفلة المدللة
ترتدى مريول البراءة
و تتأبط فراخ النهار
تذهب الى المدرسة
هكذا فرعاء شامخة
كوعد إلهى يهز الكون
ثم تعود لتقص عليكى ما كان
فتحارين
هل تستمعين لقصصها فى وجد
ام تتباركين فقط
بنبرة صوتها
..
ثم انه لا تحاولى خداعنا فتوهمينا انك لا تعشقين الساعة الثالثة عصرا
دونا عن كل الساعات
تحياتى
بصراحه حكاية جميلة ومسلية جداً واحسن حاجة حستها اني الحمد لله عندي ولد واحد بس وبرده الحمد لله ان في امه ممكن تسمعه شوية . ربنا يخليلك ولادك دول نعمه برده هههههههههههههههههههههه.
تحياتي
علي فكره الولاد دول مش نعمه خالص ولا حاجه. يلا يا ستي ما تزعليش
وممكن كمان الساعه 3 العصر ده نلغيهالك والساعه 4 تيجي بعد 2 علطول. بس منرجعش نعيط عااااااااااااا ونقول مليش دعوه انا عايزا الساعه 3 تاني.
ها نلغي هنلغي بنلغي ولا اقلك فكري كده تاني وردي عليا.
السلام عليكم
الاخت الجميلة شاهى بعد ما ضحكت جدا من الحوار الذى يدور بينك وبين اولادك زعلت اوى اوى من كلام الختام اللى قلتى فيه - محدش يقولى ان الاولاد نعمة انا عارفه الكلام ده -انا عارف انت متقصيدش حاجة بس بلاش تقولى كده قولى الحمدلله الف مرة ومرة لان فى حوارك لو قراتيه هتلاقى اكثر من 20 نعمة بس فى حوارك الجميل ويا ريت لو يكون فيه جزء تانى ان شاء يكون الثالثة فجرا وما تزعليش منى انا كمان بافضفض معاكى
على حب
بسم الله ما شاء الله ........
دول ممتعين ربنا يحميهم ويخليهم .... هههههههههههههههههههههههههههههه
وحضرتك تفضفي زي منت عايزه عشان نستمتع بالقصص دي ..
وصفك ليهم ما شاء الله كاني شايفهم بالظبط وهمه بيتكلموا ....
واختيار الاسماء الجبار والرايقة وصديقي القديم الشنيور الرائع
دمت بكل ود..
خالص تحياتي
والله مدونتك بتخليني فى حالة من فظيعة من الضحك :D
فعلا الكلام ده بيحصل لغاية دلوقتى مع مامتى من اخواتى الصغيرين ...
تعبير ماسورة كلام واتفتحت ده منطبق تماما على اللى بيحصل فعلا
ربنا يخليهم ليكي يارب :)
جوزيهم واخلصي من دوشتهم
يا جميله فكرتينى بالدوشه
أنا عندى الموضوع مأفور شويه من سيبان شنط فى الشارع و ألى زعلان ومش راضى يطلع اصلا من الشارع وعايزحد ينزل يصلحو
ناهيك عن أشتباكات الكوماندوز مع بعضها وما ينتج عنها من اصابات
يلا ربنا معنا ومايحرمن منهم
ربنا يباركلك فيهم يارب ويباركلهم فيكي وتفرحي بيهم وبولادهم وبولاد ولادهم
-------
ايه ده يا هوبا .. انتي خدتي كلمة سلامووووز بتاعتي لييه
انا اشجب
واستنكر
وادين
شاهده على كده يا ماما شاهي؟؟؟
سلاموووووووووووووووووووزات
دوبة
بتضحكي عليا ياام يوسف
طيب ماشي
انا هاقعد ادعي ان ربنا يرزقك بطفلين تاني وساعتها هايكونوا اولادي كبروا وانا اللي هاقعد اضحك
لما نشوف هاتعملي اية؟
مبارة اية هما بيدوني فرصة اعمل حاجة
دة انا ببقى مشغولة في فض المنازعات
مفيش ياامي صوتي مش بيطلع في وسط اصواتهم وخصوصا الشينيور معندهوش رحمة
ميرسي يا جميلة وابقي ادعيلي
......................
احساس برضة حي
اية يا حسام انا مش قلت محدش يقولي الاطفال نعمة واحمدي ربنا هو مفيش سمعان للكلام هو هايبقى العيال وانت كمان لأ لأ لأ كدة كتير
يتكلموا ياسيدي في دنيتهم زي ماهم عاوزين بس براحة عليا شوية وانا بسمع كل واحد وبرد على اسئلتهم
بس انت عارف اول طلعة بتبقى صعبة يعني الهجوم اول لما بيشوفوا وشي بيبقى صدمة
لا تخاف تم التعامل مع موضوع السكينة وانتهى خلاص
حلوة قوي الدعوة بتاعة يفرحوكي دنيا واخرة
امين يارب
...................
ايامنا الحلوة
والنبي يابنت ياشيرين انتي اللي عسل
هههههههههه ماشاء الله فهمتي الشينيور من اول نظرة
تطقشي مين في بعض ياحلوة
دة انتي مش بعيد تشيليهم على دماغك من فوق وماتوديهمش مدرسة اصلا من كتر خوفك عليهم
دة انتي حونينة بس انتي اللي مش واخدة بالك
سلام يابرنسيسة
قلوب حائرة
بنتي الكبيرة
مين قال انك بتعملي اي دوشة
انتي خلاص كبرتي وبقيتي شطورة خالص
بس انا زعلانة منك
ايوة
مش المفروض تساعديني شوية في تربية اخواتك والا انتي بنتي بالاسم وخلاص
......................
rain man
الكلام دة كبير قوي
مفيش خداع ولا حاجة انا ماقلتش اني بكرة الساعة الثالثة عصرا
انا قلت انها ساعة باليوم كلة وبمنتهى الصراحة انا فعلا بعشق الساعة المتعبة دي
تحياتي واشكرك على كلماتك الحلوة
.....................
يحيى
يارب يرزقك ببنتين كمان علشان تبقوا زينا ونقعد انا وام يوسف نجري ورا عربية الرش في الشوارع هههههههههه
ونسيب العيال ليكم انت وابو الدراويش وابو ورونا هاتعملوا معاهم اية؟
فعلا حكايات مسلية جدا وخصوصا لما تسمعهم منهم مباشرة
تحياتي وسلامي ليوسف واختي
realman
انا مش زعلانة بس ماكنتش عاوزة حد يفهمني غلط ويفتكر اني بشتكي وانة مش عاجبني
لا ياعم ماتلغيش حاجة سيب اليوم كدة كويس
شكرا
.....................
علي
وعليكم السلام
ياعلي انا كان قصدي اني عارفة انهم نعمة وبحمد ربنا عليهم انا مكنتش عاوزة حد يفهمني غلط ويفهم انتي بشتكي
انا كنت باحكي وبس لكن مفيش فايدة برضة في ناس فهمت غلط
اولادي دول هما كل حياتي
ان شاء الله يكون في جزء تاني
وانا مش ممكن ازعل منك
فضفض وانكلم براحتك
صحيح هي المدونة بتاعتك راحت فين؟
انا زعلت لما دخلت ومالقتش حاجة
ياريت تعمل المدونة تاني
سلام يا اخي الصغير
.........................
اسامة
ربنا يخليك وعقبالك
الحمد لله انك فهمتني صح وانا هاحاول اجمع شوية احاديث من اللي بيدوروا بيننا واكتبهم بأذن الله
شكرا لوجودك
....................
كفاية طيبة
الحمد لله مش انا لوحدي
بوسي لي مامتك وقولي لها معلش كلنا في الهوا سوا
وربنا يخلي لك اخواتك وعقبال مانفرح فيكي قصدي بيكي
تحياتي
...................
ابو امك
ايدي على كتفك
تفتكر في حد هايرضى يربيهم وبعدين يتجوزهم
تحياتي
.....................
في القلب
اوشة
على كدة بقى انا احمد ربنا قوي قوي
هههههههه حلوة اشتباكات الكوماندوز دي
ربنا يستر
.........................
سووووو
سو ياسو
ربنا يخليك يافندم ونفرح بيك قريب ان شاء الله
انا عارفة انك شايف ان دة مستحيل بس مسيرة هايحصل قول امين
لأ بقى الحق يتقال سلاموز دي بتاعة يوسف ابن دوبة مش بتاعتك ولا بتاعتها
ماما انت بتقول ماما كدة يبقى انا خلفتك وانا عندي سنتين هههههههه
ولا يهمك عادي
سلاموز بالعند فيك
معلش يا شاهي ربنا يقويكي
انا لما عيل صغير يقعد يرغي جنب ودني ببقى عايز اهبده بكيس المخده علشان يخرس شويه
لأن عندي ابن خالي بيتكلم سبعتلاف كلمه في الدقيقه
بس لما بكون فاضي ليهم
بحب قوي اقعد اتكلم معاهم كتير وافضل اناقشهم في حاجات ملعبكه
والجميل ان عمر الطفل ما بيقولك مش فاهم قصدك ايه تلاقيه على طول ربط كلمه من ملامك بحاجه في دماغه ويبتدي يتكلم عنها
وبيطلع منهم ردود وتعليقات عسل
ويا سلام بقى لما تاخدهم الجلاله ويحسوا انهم مهمين قوي
ويديكي رأيه الحكيم
بس اعتقد ده بيعود الطفل من صغره يكون ليه رأي ويتعلم يتناقش ويكون عنده جرأه للحوار
وصدقيني احنا محتاجين ده في اولادنا جدا
بكره لما تقعدي تشوفي ولادك كل واحد بيتكلم في مجاله بثقه وحكمه جميله هتفخري قوي انك اول من علمهم فن المناقشه
وهيفضلوا طول عمرهم متعودين يجوا لماما يحكوا معاها
ربنا يحفظهملك
سلااااااااااااااااام
انشاء الله البنت هبه يوسف شكله غلباوي زيها وهيطلع عينها بص اصبري لما يكبر شويه كده ويروح المدرسه
سلااااااااااااااااااااااام
ده ايه مهرجان القراءة للجميع اللى عندك ده
لو منك كنت خلصت من التلاتة برصاصة واحده وريحت نفسى
انا جاية اهدى النفوس
سلام
الاطفال نعمه من الله واحمدى ربنا
انا بقى بغيظك واقول اللى انتى قولتى مش عايزه حد يقوله
ولا اقولك
الست فعلا عندها طاقه جباره للتعامل مع الاطفال
وده مش موجود فى عشر رجاله على بعض
شفتى بقى
الست الواحده بعشره
يارب يديمها عليكى نعمة ويحفظها من الزوال يارب
ويسعدك بنجاحهم وزواجهم ويمتعك بالأحفاد
اللى برضو هاتكتبى عنهم ان شاء الله هنا وتديهم اسماء حركية تناسب الزمن اللى هايكونوا فيه.
بوست رائع.. مش بقولك .. انا لما بحس انى عاوزة احكى مع حد او حد يحكى معايا باجى على طول عندك هنا.
ربنا يسعدك بيهم يارب.
كاميليا
علمك علمك علمك يا ماما شاهي
والكلام ده بجد مش هزار والله
كلامك وسردك للمواقف اللي بتحصل من ولادك ربنا يخليهوملك .. خلى الدموع نزلت من عيني بجد والله لما افتكرت انا واخواتي كنا ازاي معفرتين امي الله يرحمها وهي كانت مستحمله ده ومبسوطه بيه
ربنا يباركلهم فيكي ويباركلك فيهم .. وتفرحي بيهم وبولادهم وبولاد ولادهم
انما مش هتفرحي في ابدا
ملحوظه
هم في الحقيقه ملحوظتين
اول واحده .. كلمة ماما شاهي دي مش تكبير لسنك قد ماهو تكبير لمقامك كأم .. والام مهما كان سنها قد ايه .. كفايه انها خلفت وربت .. وفوق كل ده .. انتي انسانه جديره بالاحترام والتقدير
تاني ملحوظه بقى .. يوسف ابن هوبا عنده قد ايه؟؟
انا بقول سلاموز دي من وانا عندي اتناشر سنه .. وبعدين هي هوبا اصلا بترخم علي ومسمياني كعبول اكمني تخين ومكلبظ .. واقرع .. وبنضاره .. وماليش دعوه بقى انا عايز المصاصه بتاعتي
سلاموووووووز
وش واحد بيطلع لسانه لهوبا
تحياتي
الله يكون في عونك...لكن اسمحي لي ان اقول
ان هذا يعد ظاهرة صحية و يعني ان اطفالك يشعروا بالامان معك...و ياريت
تشجعيهم دايما ان يخرجوا ما بداخلهم لان هذا يخلق و يشجع علي بناء نوع من الثقة بينك و بين أطفالك..وهذا في رأيي مهم جدا و خاصة لفترة ما بعد الطفولة...
أعلم ان الامر مرهق لك...لكن أرجوك حافظي علي هذا الحوار و الثقة لانها ستريحك مستقبلا.
بارك الله فيك و فيهم.
تحياتي
ربنا يخليكي ليهم ويخليهم ليكي
ده الواجب اليومي في كل البيوت
شكرا على الزيارة الجميلة للتدوينة الآخيرة
بجد ربنا يخليهم ليكى ويتربو فى عزك اى نعم انا لو مكانك كنت رميتهم من البلكونه لانى بطبعى عصبى اساسا بس ربنا يخليهم ليكى ويخليكى ليهم
الشنكوتي الكبير
شفت يا ايهاب العيال بتعمل فيا اية
تهبد مين ياباشا دول بعون الله يقطعوك
فعلا العيال بيطلع منهم ردود تحفة وخصوصا الجبارة وان شاء الله هابقى اعمل بوست مخصوص عن الحوارات اللي بتدور بيني وبينهم
وعقبالك كدة انت وغادة ان شاء الله
اما بقى دوبة هتشوف بس لما ربنا يرزقها بنونو كمان
......................
قطة الصحراء
حرام عليكي ياشيخة
رصاصة واحدة ماتكفيش التلاتة ههههههههه
انا محتاجة تلاتة زي الراجل اللي مش فاكرة اسمة ابو تلاتة بتاع مسلسل ونيس
هما مجنني صحيح بس مش لدرجة الرصاص
...................
فرنسا هانم
ايوة والله صدقتي
بس عشرة شوية قولي عشرين تلاتين يالا هو حد هايعد ورانا
الف شكر ياست فرنسا على تشريفك
.....................
كاميليا
العزيزة كاميليا
ربنا يسمع منك يارب ويسعدك ويفرح قلبك
نورتيني يارقيقة المشاعر
......................
سوووووووو
على اد مافرحت بكلامك على اد مازعلت انك دمعت بس هاقولك على حاجة
الست اللي تستحمل سوووووو و سبع قطط تأكد انها في الجنة بغير حساب
الملحوظة الاولى بتاعتك دي اسعدتني جدا جدا جدا
ودة شرف ليا حقيقي لما تقولي ياماما ياسلام هايبقى التلاتة بتوعي وهبة قلوب حائرة وسوووووو بتاع القطط بس يكون في علمك انا مش بحب القطط لو كلاب اوكي
اخر حاجة
انا بشكر ايهاب الشنكوتي علشان هو اللي قال لنا على مدونتك
في حاجة كمان
تخين ومكلبظ واقرع وبنظارة
معقول كل دول ممكن يجتمعوا في شخص واحد ياحرام
تحياتي يافقري
الربان
سيدي الربان
اشكرك على النصائح الغالية وهذا ماتعودت علية من حضرتك
ربنا يقدرني ويصبرني لان الموضوع عاوز صبر كتيرررررررررر والله المستعان
........................
يوميات عيل مصري
احمد باشا اهلا وسهلا بيك
ربنا يخليك
والتدوينة الاخيرة بتاعتك جميلة جدا بس ياخسارة انت ماسيبتهاش كتير حقيقي كان نفسي اقراها تاني لان طريقتك في تربية اولادك ماشاء الله تحفة ويارب اقدر اتعلم منها حاجة
يارب ترجع لبلدك وزوجتك واولادك بألف سلامة
على فكرة انا سألت بابا على شارع بورسعيد وقالي انة قريب من باب الشعرية اصل انا ابويا من باب البحر يعني جيران تقريبا صح
تحياتي
..................
رئيس جمهورية نفسي
حضرة الريس عصبي لية بس ما الدنيا حلوة اهية
الاطفال دول حاجة جميلة قوي واكيد مش هاتكون عصبي قوي مع اولادك
تحياتي يافخامة الرئيس
اولا قبل ما ابتدى اى كلام
اتفضلى يا سيتى كوزين البطاطا اهم الى عملتيلى عليهم مندبة
وجبت كمان شوية اقلام رصاص للكتكايت من محلات تعالى بص باتنين ونص
ثانيا بقى انت قاعدة فى اكتوبر ومتقوليش ما انا كمان مرزية فى اكتوبر ده على كدة احنا جيران
ثالثا قريت البوست ده بس ولسه هاروح اقرا باقى البوستات واللى شدنى انى اقرا باقى البوستات حكاويكى عن الجبارة والرايقة والشنيور وخصوصا الرايقة دى ضحكتنى موووووووووووت
وانا معاكى ان ياريت محدش يجى يقولنا احنا اللى عندهم عيال ان العيال نعمة لاننا اكيد عارفين
بس اللى هما مش عارفينه ان العيال ساعات بتبقى نعمة وساعات تانيةبتيقى رخمة وبيطلعوا الواحد من شعوره
ربنا يخليهوملك يارب يا شاهى وانا هاروح اهه اقرا باقى المدونة
ومتنسيش البطاطا انا حطهالك على باب البلوج علشان محدش ياخدها من الجيران
سلام
اختك خيخة
اه صحيح ايميلى اهه
h_nona2000@yahoo.com
ابعتيلى على الايميل انتى ساكنة فين بالظبط فى اكتوبر وبتروحى النادى ولا لا
ممكن نبقى نتقابل هناك ونعمل قاعدة وننم على عيالنا
سلام يا جميل
اختك خيخة
جبت المدونة من اولها لاخرها
بصى ياستى
اولا ايمان بكرى تبقى معرفة شخصية للاسرة الكريمة علشان جوزها يبقى صاحب خالى اوى وكانوا زمان بيجوا عندنا فى بيت ماما طبعا وماما من وقت للتانى بتتصل بيها فى المناسبات والافلام دى
ثانيا ربنا يخليلك ابو الدراويش والبغبغنات التلاتة
ثالثا البوست بتاع اخيرا عرفت اصوت
خلتينى افتكرت موقف هابقى اعمله بوست ومش هاحكيلك عليه علشان تبقى تقريه فى مدونتى
رابعا البوست بتاع ربع يوم من ايام عمرى
خلتينى ازعل انى ماكنتش معاكم
خامسا كل سنة وانتى طيبة علشان عيد جوازك وعيد ميلادك
سادسا انا مبسوطة جدا علشان عرفت واحدة زيك
سابعا مدونتك كلها جامدة موووووت
ثامنا وعلشان مدونتك جامدة مووووت انا قلت اخلى كوزين البطاطا يبقوا كيلو بطاطا بحاله يلا انشالله ماعن حد حوش
تاسعا معنديش حاجة تانية اقولها غير انى والله سعيدة جدا جدا جدا
عاشرا سلام من اختك خيخة
والدك من باب البحر!!!!!!!!!!!!!!!!
طيب خدي المفاجأة دي .. مراتي من باب البحر
ولما عزلنا بعد موت ابويا سكنة في احد الشوارع الممتدة لباب البحر
بس انا خايف تقوليلي .. إنكم أصلا من الواحات الداخلة
ممكن أروح فيها
يوميات عيل مصري
ههههههه
احنا مش من الواحات ولاحاجة
بابا من شارع باب البحر نفسةواعرف كمان بعض اسماء الحارات اللي هناك وعلى فكرة انا كنت هناك قريب
المودام بقى منين بالضبط؟
بس تصدق فرحت لما عرفت انها من باب البحر مش عارفة لية بس حسيت ان احنا معارف وليا الشرف طبعا
تحياتي يا احمد باشا
بنت خيخة واي كلام
انا مانستكيش بس هانزل اشوف البواب عاوز اية وارجع ارد على تعليقك
سلام مؤقت
ربنا يخليكي
ماهو مش هينفع على الملأ أجيب التفاصيل دي
بس انتم باب البحر من ناحية رمسيس ولا باب الشعرية
يوميات عيل مصري
احنا ياسيدي في النصف
بعد وسيلي بتاع العيش الفينو الجميل بشوية من ناحية رمسيس
اقول لك على حاجة
الغى الباص
وروحى هاتيهم من المدرسة
وارجعوا مشى كمان
كل حاجة هتخلص فى السكة ويا دار ما دخلك الساعه 3 تانى
لانها هتبقى اربعة علشان فرق الوقت من المشى والباص وممكن يكون الساعه 2 لانه ساعات يكون المشى اسرع من الاتوبيس
سبحان الله
اوعي تطلعي بنت خال زوجتي ولا حاجة
خلاص .. بقى .. بعد كده القرايب ليهم خصم على زيارة المدونة
زوجتي من نفس المكان
قبل درب الملاح
كفاية كده يا حاجة شاهي .. لأحسن الناس يجيبوا اصلنا وفصلنا
على مش مهم.. حياتي اونلاين
شرفينا .. عان تشوفي الوقف المهبب اللي انا فيه
ربنا يخليهملك يارب وصدقيني من غير دوشتهم دي مش هتقدري تعيشي ربنا يباركلك فيهم والرايقة دي زيي وانا صغيرة اووي كنت كدة وعلي طول رايقة وبعيط وحساسة ابقي بوسيهالي
بنت خيخة واي كلام
تعبة نفسك وشايلة البطاطا لحد عندي
متشكرين جدا بس لعلمك يعني اللي كانوا في الفرن تلاتة كيلو مش كوزين
..........
واية لزمتها الاقلام بس دي ضربتني بيه هو انتي غاوية اذية
انا مش هاقبل الاقلام دي لان الجبارة بتستخدمها استخدام اخر
...........
كويس قوي ان انتي كمان في اكتوبر اخيرا لقيت حد من الاخوة المدونين في اكتوبر
دة يابنتي كل لما اقول لحد اني من سكان اكتوبر يقولي واية اللي وداكي الصحرا دي
.........
ههههههههه حلوة قوي
ان العيال ساعات بتبقى نعمة
وساعات تانيةبتيقى رخمة
اكتشفتي الاكتشاف دة ازاي مع انك عندك شريف بس
ربنا يخليهولك وتجبيلة نونو كمان علشان يلعب معاة
...........
ماشية معاكي تعرفي ايمان بكري شخصيا
طيب انا هاقعد انق عليكي شوية
.........
وانتي كمان ربنا يخليلك هاني وشريف
انا شفت البوست بتاعك وعرفت ان خيبتنا واحدة ومش بنعرف نصوت
معلش ياسيتي ملحوقة لما يكون في ميعاد تاني هابقى اقولك وتبقي معانا ان شاء الله
ياسلام على الكرم كيلو مرة واحدة شكرا شكرا
ربنا يسعدك كمان وكمان يانوران
الطائر الحزين
طيب واللهي دي فكرة حلوة
اروح اجيبهم وهما هايخلصوا كل الكلام في الشارع دة غير انهم هايرجعوا مهدودين من المشوار ومش بعيد يفقدوا النطق لمدة كام ساعة كدة هههههههههههه
فكرة تحفة
تسلم يااستاذ
...........
مشمش
ربنا يخليكي يارايقة نمرة واحد
وياترى اية اخبار الروقان والعياط والاحساس لما كبرتي؟
طمنيني علشان ابقى عارفة
سعيدة بزيارتك
يوميات عيل مصري
واو ضرب الملاح
على كدة تعرف درب الخف ودرب التركماني
انا اعرف ناس هناك
انا هاروح هناك وهنادي يااااااااوفاء ياااااااأم سلمى وفداء
لغاية لما اعرف هما فين بالضبط وابقى اسلملك عليهم
مش عاوزني اقولهم حاجة
سلامات يا بلديات
شاهي
أول مرة حد يقول على درب الملاح
WOW
بس حلوة
طبعا اعرف درب الخف ودرب التركماني
فاكرة في البوست اللي اتشال لما قلت لأولادي بيت جدة امكم القديم المتهالك اللي بيجمعكم كل خميس .. ده حضرتك في الحارة اللي بتوصل من درب اخف لدرب التركماني
دي مش حماتي ولا مراتي
ده بيت الله يرحمها جدة مراتي
بالمناسبة البوست لو مش عندك انا بعته لخيخة على الايميل خليه تبعتهولك
أو حضرتك ادخلي على البروفايل بتاعي هتلاقي الميل بتاعي ابعتيلي ميل ابعتلك عليه
دمتي لأخيكي
أحمد
يوميات عيل مصري
انا قلت على ضرب الملاح واو لاني طلعت عرفاها
انا مستنية خيخة هانم تدخل على الشات علشان اعرف اكلمها واخد منها البوست دة اذا كانت عرفت تعملة داون لود
وللأسف ولجهلي انا مش لاقية الميل بتاعك على البروفيل عاعاعاعاعا
ممكن تقولي اية حكاية البرنامج بتاعك اللي كان على الجزيرة ونبقى متشكرين من حضرتك
بصي يا ستي
لما تدخلي الصفحة الرئيسية بتاعتي فيه حاجة اسمها البروفايل
VIEW MY COMPELETE PROFILE
جنب الصورة الصغيرة بتاعتي
اضغطي عليها هيودييكي صفحة البروفايل بتاعتي اللي فيها العمر، والكتب اللي بأقرأها وكده
هتلارقي على الشمال مكتوب ميل
دوسي علهيا يطلع الميل عندك
فيه برنامج على الجزيرة الصبح يوميا اسمه حديث الصباح
كل مرة بيجيبوا حد شكل
وبما إن اخوكي ، فاكرينه ياماهناك فأحياناً باكون أنا الضيف على اعتبار إني خبير في التنمية البشرية
حاجة كده زي برنامج الساعة 3 العصر بتاعك
وغالبا البرنامج بيكون على الهوا
بس امبارح كان مسجلين معاا حلقة قديمة
أنا اصلا ما عنديش تلفزيون
ابقى شغال في الجزيرة، وكمان اروح البيت اتفرج على تلفزيون
ولما كان عندي
كنت انا والعيال متفقين، نتفرج على
MBC4 وده اتفاق بدون اتفاق
يعني دكتور فيل
اوبرا وينفري
والحاجات اللي ليها قيمة دي
ولما مش الولاد، اديت التلفيزيون هدية لولاد الجيران عشان يلعبوا بلاي ستشن براحتهم
اصل أخوكي فقر وعنطزة .. امي طول عمرها تقو علي كده
بس أنا في غاية الانبساط
ساعات باعمل دورات في التخطيط استراتيجي للمؤسسات (نوع من الشيبسي الحراق)
وبيكون حاضر معايا احيانا وزراء او في نفس المناصب وبعد ما أخلص، تاني يوم أكون قاعد على قهوة في البلد اللي أنا فيها، بأشرب شاي على قهوة بلدي معفنة .. بس مبسوط
في اغسطس اللي فات
كنت ف استنابول .. سبت الوفد اللي معايا، ونزلت لفيت في الحواري بتاع
استنابول، ونفضت للي معايا
مش باقولك
احنا كنا بنقول ايه؟
آه الحلقة .. فكك بلا دوشة
بلا حلقة بلا نيلة
والنبي يا شاهي مش اسمها
ضرب الملاح
اسمها
درب الملاح
الدرب يعني الطريق
وعى فكرة خليني ابقى احكيلك على تاريخ باب البحر
لو عرفتي هتكوني فخورة أن باباكي من هناك
تعرفي إن باعمل مع بعض اناس دلوقتي موسوعة عن القاهرة، وتاريخها وحواريها وشوارعها
شوفيلك شغلانة غيري بقى
انا مش فاضي
درب الملاح
درب الملاح
معلش دي كانت غلطة مطبعية وبعدين انا كتبت درب الخف ودرب التركماني صح يعني عديها بقى
ربنا يخليهملك
دول لطاف جدا، انا شخصيا بتمنى يكون ليا كمية من الاطفال ، لانى بحبهم جدا
البلوج ممتاز
تحياتى
أنا أول مره أجي هنا
وشدني كل اللي انتي كاتباه بجد المدونه حلوه أويي
بالنسبه للبوست ده :D:D:D
ربنا يخليهملك بجد ويعينيك :D
ايه يا شاهى دول مسليين جداً ربنا يخلهملك مش احسن من فيلم عربى
ههههههههههههههههه
والله يا شاهى سكر ربنا يخليهم ويبارك فيهم يارب
انا بحب العيال الشقيه جدا خصوصا الشقاوه من النوع ده
مدونتك جميله وشكرا على تعليقك عندى اللى خلانى اعرف مدونتك الحلوه دى انا بقالى ساعه بمر من بوست للتانى واضحك
ربنا يفرحك بيهم دايما يارب
amro
ربنا يخليك ويرزقك بالأطفال اللي انت عاوزهم
هما فعلا ممتعين بس لما تقعد معاهم ساعتين والا تلاتة لكن طول اليوم اعتقد ان المتعة بتقل شوية
شكرا على الزيارة واتمنى اشوفك تاني
........................
rehab mostafa
اهلا بيكي ويا رب ماتكونش المرة الاخيرة
ايوة ادعيلي ان ربنا يعيني ويقويني
شكرا
...............
mohamed
ايوة يا محمد فعلا مسليين ابقى تعالى خدهم شوية علشان تتسلى
وبعدين انا مش بتفرج على افلام عربي في التلفاز انا بتفرج على اجنبي بس ودة طبعا بعد مابيكونوا نامو وغالبا بيبقى فيلم واحد او نصف فيلم حسب حالتي الصحية
تحياتي
..............
لماضة
الدكتورة لماضة بحالها هنا
واللهي يالمضة انتي اللي سكر
ربنا يكون في عون السيد الوالد هههههههه اصلك طلعتي شقية يالمضة
انا كنت سعيدة جدا وانا بقرا في المدونة بتاعتك كل المواضيع عجبتني وعجبتني كمان خفة دمك ولماضتك
شكرا يا قمر
السلام عليكم ورحمة الله وبركاته
ههههههههه
ربنا يخليهملك ويباركلك فيهم
معلش استحملي واهو كلها كام سنهوتقولي فييييين ايام الساعه 3 العصر
نحياتي
خمسة فضفضة
وعليكم السلام
اعتبر دة وعد
يعني بعد كام سنة هاقول كدة
طيب لو ماقولتش
عموما هانشوف
تحياتي وسعيدة بزيارتك
يا لهوى دا انا آخر واحد بس معلش انتى عارفه الظروف بقى
ربنا يخليهم ليكي يا رب
اختى قالتلى اكتبلك كلمة وحشة
عارفة ليه؟
عشان انتى صحتيها من النوم
ايوة انا كنت بقرأ البوست بتاعك وهى نايمة معايا فى الاودة
وبعدين بجد اندمجت وفطست من الضحك وقعدت اكركر اوى
فهى صحيت وزعقتلى
عاجبك كدة
بس بجد بجد
الاطفال فعلا احباب الله
واللى انت بتشتكى منه دة انا بتمناه وبحلم بيه
رنا يخليهملك ويرزقنى انا كمان بالذرية الصالحة
امين
إرسال تعليق