السلااااااام عليكم
انا عارفة اني طولت الغيبة شوية بس اديني اهو خرجت من المفرمة
علشان اكتب البوست وبعدين هارجع ادخلها تاني بمزاجي مش غصب عني ولا حاجة
...........................
من كام يوم كنت بتمشى في الطرقة بتاعة الشقة
وببص بعيني على الحيطة لقيت مكتوب
ماما وحشة
يانهار غامق ماما دي اللي هي انا
وبنظرة المحقق كرومبو عرفت ان دة خط الرايقة بنتي اللي في تانية ابتدائي
مش هاكدب عليكو واقول اني مازعلتش لأ انا زعلت بس قعدت افكر
هي لية كتبت كدة؟
وبعدين قعدت اكلم نفسي كالعادة ولقيتني بقول: ماهي البنت عندها حق
انا تقريبا معظم كلامي معاهم اوامر من نوع
اغسلي ايدك. ادخلي الحمام. يالا نحل الواجب .كفاية لعب
ميعاد النوم........ وهكذا
انا صحيح بستمع لكلامهم وحكايتهم لكن في حاجة ناقصة وانا مش عارفة اية هي
المهم قررت اني اقعد اتغدا معاهم اصل انا كنت بتغدا قبليهم او بعديهم
على اساس اني اكون متفرغة لطلباتهم وهما بياكلوا
ودار بيننا حوار مالهوش اي علاقة بموضوع اني وحشة
انا اصلا بكتب البوست علشان احكي الحوار اللي دار بيننا
وياريت ماحدش يسألني اية لزمة الكلام اللي فوق دة؟
انا كنت عاوزة اوضح الصورة كاملة وخلاص
محمود : هو اسم مرتجي دة مسيحي والا مسلم؟
انا : الاتنين عادي
الرايقة : لأ دة مسيحي بس وعندة دقة على ايدة
هما المسيحين بيعبدوا الشمس؟
انا : لأ بيعبدوا ربنا .الكفار هما اللي بيعبدوا الشمس
انا في سري: يارب الحديث يخلص لحد كدة
محمود : اية ياماما ازاي يعني بيعبدوا ربنا زي مااحنا بنعبدة
انا : هو مش زينا بالظبط - يادي النيلة اقولة اية -
بص هما مش مؤمنين بسيدنا محمد هما عندهم سيدنا عيسى وبس
محمود : يعني مش بيصلوا؟
انا : بيصلوا ويصوموا وعندهم عيد بس غيرنا
الرايقة : بس القراّن بتاعهم مش اسمة قراّن اسمة حاجة تانية
انا : اسمة انجيل
الرايقة : ايوة صح هو دة
محمود : انتي عارفة اية الفرق كمان بينا وبينهم؟
انا: اية؟
محمود : المية بتاعتهم اسمها صني واحنا المية بتاعتنا اسمها زمزم
هو قال كدة وانا انفجرت من الضحك وبعد لما قدرت امسك نفسي شوية قلتلة
انا : مفيش حاجة اسمها المية بتاعتهم احنا كلنا بنشرب من النيل
ومية زمزم دي اللي في السعودية بتاعة بئر زمزم
افتكر قصة سيدنا ابراهيم واسماعيل
خلص الحديث لغاية كدة ودخلنا في قصص الانبياء وحمدت ربنا
اشوفكم على خير
هناك ١٩ تعليقًا:
ربنا يكون فى عونك والله
بس ماما شاهى مش وحشة ولا حاجة
انا اللى وحشة ياستى ولا تزعلى
بس كويس انك بتحاولى تبقى صاحبة ليهم وتتنقشى معاهم فى كل حاجة
ربنا يخليهوملك وياباركلك فيهم
يالهوى عليا نسيت حاجة مهمة
نسيت اقولك كل سنة وانتى طيبة عشان العيد
بس انتى اللى كنت مختفيه
يييييييييييييييييييي
نسيت حاجة اهم
نسيت اقول
هيه هيه هيه
اول تعليق
هيه هيه هيه
ابقى تعالى زورينى السكة مش بعيد خطوتين وتبقى عندى
looool بس بردة مستنى انا اعرف لية كتبت ماما وحشة وانتى عملتى زبهم بردة بدأتى بموضوع و سرحتى فى موضوع تانى
loool
ربنا يخليهم لك
بس إيه حكاية صنى دى
بجد فى حاجه اسمها كده
الرحلة العمريه دى صعب
لا ينفع تكذبى..ولا تقدرى تقولى الحقيقه
بدون ماتحاولى تعملى لها تظبيط على قد السن
بس اهم شئ ماما وحشه ليه؟
لازم تبحثى عن اصل الكلام ده
لانه زى كلام المعتقلات
كل عام انت بخير
فيه حاجات لازم تكون اجابتنا ها حازمة يعنى لازم نرسخ فى الذهن حاجات معينة يعنى مثلا حضرتك قلتى لها اللى بيعبدوا الشمس دول كفار فهى هتحصر الكفر فى عبادة الشمس فقط وهذا خطأ
=============
ولما تتزنقى اعملى زى ما بعمل هبحث واقرأ وارد عليكم
ربنا يعينك
بجد ربنا يكون فى عون كل ام واب ولادهم بيسالوهم اسئله محرجه .. بس اجاباتك ما شاء الله مش بتكلكع الدنيا وفى نفس الوقت مش بتكدب ومش بتزرع الكره فى القلوب
تحياتى ليكى
هنستهبل
طب انا مافهمتش كدة ليه برضه الرايقة قالت عليكى وحشة؟
وفين يا هانم باقى المواقف اللى قلتى هتحكى عليها
انتى جاية تحنسينا وتمشى
فين الموقف بتاع..........
والموقف بتاع ...........
يعنى افتن عليكى دلوقتى ولا اعمل ايه
فين يا بت المواقف اللى قعدتى تحكيلنا عليها
ارجو توضيح سبب
ان الرايقة قالت ماما وحشة
السلام عليكم
واضح ان كلكم عاوزين تعرفوا هي لية قالت عليا وحشة
انا ماسألتهاش انا قلت ادور على سبب مع نفسي في الاول وبعدين ابقى اسألها
وممكن تكون كتبت كدة في ساعة غضب وخلاص
مش عارفة
عموما انا هاسألها وهابقى اقول لكم
تحياتي لكم جميعا
ماما وحشة يالهوى
لا مش ممكن عيال اليومين دول ربنا يكون فى عون اهاليهم بجد الواحد بيسمع عجب العجاب
ربنا يخليها لكى وكل سنةوانتى طيبة
هههههههههههههههههه
اللى حيسألنى حقوله طبعا انتى مش وحشة بس
ده انتى شريرة كمان
و ش مطلعلك لسانه
انما الحوار كويس برضه مثمر
الله يكون فى عونك يا بنتى
كل سنة و انتم طيبين و بخير
و نشوفك على خير ان شاء الله
اخييييييييييييييرا
والله انتى سكرة وولادك ماشاء الله عليهم
ربنا يخليهوملك ويبارك لك فيهم
بجد المرة الجاية نفسي اشوفهم معاك
ربنا يعينك عليهم
ومش تغيبي كده كتير
صاحبى بنتك ولازم تعرفى هى كتبت الجملة دى امتى وليه
ربنا يقدرك ويعينك على تربيتهم
عجبتنى اجابتك
ربنا يكون فى عونك و يلهمك الردرد الصح دايما
كل سنه و انتى طيبه
يااا
اخيرا لقيت بوست جديد
كويس ان الموضوع دخل على الانبياء
ساعات الاطفال بيدخلوا فى مناطق صعب ان الواحد يخوض فيها
وحشتيني :)
مش عارفة ليه انا حسيت انى اتكلفت فى البوست ده - عاوزين وجبة دسمة من اللى متعودين عليها من ايديكى يا استاذة
بوسيلى الرايقة وهاتيلها هدية حلوة بما انها وصفت الحاجات الصح وبعبرت بمكنون صدرها بكل جرأة وصراحة
وش مطلع لسانه
وضحكة شوريرة
نيهاهاهاهاهع
جميلة طريقة تناولك للحوارات مع الاطفال وبجدبجد احنا بقينا بنقضى اوقات قليلة جدا مع اولادنا عاوزين نركز اكتر ونقضى وقت احلى واكبر
وحشتنا كتاباتك يا ماما يا وحشة
يلا باى
هبة
احنا لازم فعلا نسمع ولادنا لان احيانا بيبقي في دماغهم حاجات غريبة عمرنا ما بنتخيلها حتي كون احنا وحشين او حلوين احيانا بيبقي له اسباب غريبة وهصلت ان واحدة من تلميذاتي فجاة كتبت لي في الكتاب I hate you وادتني الكتاب ببساطة شديدة علشان كده لازم دايما نحاول يكون بينا وبينهم جسر اتمني لك السعادة مع اولادك
ربنا يخليهم ليكي
انا ليا رد تانى بس بعدين
البت المشمشية
لا مش وحشة خالص
طبعا ردي بعد الهنا بكام سنة لكن وانتي طيبة وبصحة وسعادة
تحياتي ياقطة
.........
اسامة اشرف
ايوة فعلا بدأت بموضوع ودخلت في موضوع تاني بس انا كنت عاوزة ابين الصورة كلها واكتب لية قعدت ارغي معاهم اكتر من كل مرة بنتكلم فيها
تحياتي
.............
ام البنات
اعتقد ان مافيش حاجة اسمها صني واعتقد برضة انة يقصد حاجة تانية انا مش فهماها برضة
لما سألتها انتي كتبتي كدة لية قالت: اصلك زعقتيلي
فقلتلها: وهو انا زعقت من غير سبب والا انتي كنتي عملتي حاجة غلط
قالت: مش فاكرة
شكرا لمرورك وسؤالك
تحياتي
إرسال تعليق