السلام عليكم
انا مش هاحكي حاجة المرة دي عن اولادي
انا هاتكلم عن نورة صحبتي
نورة صحبتي من ثانوي ودخلنا نفس الكلية
نورة صحبتي اتجوزت بعدي بأربع سنين تقريبا
نورة صحبتي عندها ولدين زي القمر
ياسر زوج نورة صحبتي راجل محترم جدا
بيحب مراتة وبيتة واولادة
نورة صحبتي مش مدونة بس بتقرا لبعض المدونين
نورة صحبتي عاوزة تطلق من زوجها
نورة صحبتي زهقت من انها زوجة
نورة صحبتي بقت عميا
عميا عن كل النعم اللي ربنا اكرمها بيها
عميا عن انها تفتكر حاجة حلوة لزوجها
عميا عن المصيبة اللي هاتقع على دماغها
لما اولادها يسألوها :هو بابا مشي لية؟
هوبابا مش بقى ينام معانا في البيت لية؟
هو بابا زعلان منك لية؟
هو يعني اية طلاق؟
هو احنا هانجيب اب غيرة؟
طيب هو ماينفعش نجيب بابا تاني؟
يمكن مايزعلكيش تاني!
احنا بنحب بابا دة وعاوزينة
نورة صحبتي اتجننت
نورة صحبتي صعبانة عليا
حد يقول حاجة لنورة صحبتي
يارب يارب اهدي نورة صحبتي
يارب ماتخليش نورة صحبتي تبقى مطلقة
يارب انا بحبها اوي ومش عاوزاها تطلق
هناك ١٢ تعليقًا:
شاهى
أزيك يا حبيبتى
و وحشتينى قوى
البوست دا وجع قلبى قوى
بصى لو نوره بتقرى التعليقات
أتمنى تسمعنى بقلبها
فأنا بتمنى لو تكون أسبابها لطلب الطلاق تستحق ما سيخلفه القرار من دمار ...
الحكاية أصلها بتبقى مستترة
و خسايرها تتابعية
مش بتبان من أولها
تجربة طلاقى كانت مريرة
و خدت وقت طويل قوى مررها زيادة
و رغم إن طليقى مكنش ينفع معاه أى شىء
لكن احلف بحياة يوسف أغلى من فى حياتى
إن لو كان فيه نسبة و لو خمسة فى المية إنى أقعد و اكمل حياتى عشان البيت ميخربشى ...
كنت قعدت
لكن البقاء كان معناه الخطر
و التخليص عليا حتة حتة
لحد ما مبقاش موجودة خالص
و بالتالى يوسف هيكون وحيد تماما فى الدنيا مع حد ميهموش مصلحته
ومكنش هيعيش الحياة اللى بتمناهله يعيشها
و اللى وجودى فيها بأى شكل ممكن يحققله جزء كبير منها
بأذن الله ...
صحبتك نوره أسبابها إيه؟؟
مش يمكن تكون منطقية و كبيرة
طب لو منطقية
ممكن علاجها ؟
طب الإنتظار لن يضر أحد
الإنفصال وارد يحل المشاكل أحيانا
بلاش طلاق و خليها
إنفصال أشبه بطلاق
يمكن الاحوال تنصلح
الوقت بيداوى ساعات
صعب اكلمها عن الولاد و حرمانهم من الإستقرار لأنها مش هتحس بدا إلا على أرض الواقع الفعلى
لما حد من العيال ييعى و تبقى عاوزة تخرج بيه فى إنصاص الليالى تروح بيه لدكتور
و متعرفش
لما يبقى وجود أبوهم ضرورى فى مناسباتهم الخاصة و الأعياد عشان حتى إحساسهم بعدم النقص مقارنة بغيرهم
و ميلقهوش
لما تيجوا صديقاتها يعزموها فى مناسبة و لا فرح و تتكسف تيجى لوحدها لأن كل واحدة مع جوزها و هيا منظرها مش هيبقى مناسب
و أنا لسه مجبتش سيرة الجيران
و الاقارب
و الأهل
و المجتمع كله
و لا حتى جيت جنب الفلوس
و الحاجة المادية و اللى لو متوفرة فعمرها ما هتغنى عن الوجود العاطفى
و الإحتياج النفسى
الحاجات دى متتقلش
لكن تتحس لما ييجى وقتها
و أتمنى مييجيش أبدا على صاحبتك و ولادها
لأن ساعتها صديقتك هتسأل روحها
طلب الطلاق كان يستحق التمن
دا كله و لا لأ ؟؟
لو كانت أسبابها حقيقة
يبقى مش هتندم
لكن بقى
لو الأسباب واهية
يبقى قلبى معاها
و ربنا يهدى الاحوال
بجد ماظنش انه اى حد يقدر ينصحها لانه مش عارف ظروفها غيرها هى ... جايز اقول تقعد عشان الطفلين بس برضه مانساش انه الطلاق احيانا بيكون رحمه من ربنا
انا مش بعلق على تدوينات لية كتير وبدل نورة صحبتك بتقرى بلوجات فاكيد منها البلوج بتاعك وطبعا حتشوف الموضوع والردود بتعته
قرار الطلاق محدش حيقدر يلومك عليه لو كان قرارك لوحدك وانتى حتتحملى تبعاته بشكل كامل بس حاليا فى اطراف تانى متعلقه بقرار الطلاق اولادك وتقريبا على حسب ما فهمت من كلام البوست تقريبا اطفال فى بدايه تكوين ادراكهم ووعيهم وهى المرحلة المطلوب وجود الاب والام اة احيانا وفى ظروف استثنائية بيختفى الاب لسفرة او للوفاة لا قدر الله بس ممكن يتواجه الابن بالحقيقه انه سافر علشانهم او اتوفى حسب ارادة المولى عز وجل بس فى حالات الطلاق حتفهميهم ازاى انكم انفصلتوا وحتقنعيهم ازاى باسبابك لطلب الانفصال افتقاد الاطفال للاب فى سن مبكر بياثر على توازنهم الانفعالى خاصة وانهم فى المدرسة حيسمعوا كلمة بابا من كل اصحابهم وهما مش بيقدرو يقولوها
كمان فى حاجه بالطلاق حتضاف على اعبائك كام اعباء تانى لانك حتكونى مطالبة تكونى اب ليهم وهما بيكبرو وده حيسبب ضغط على اعصابك اكتر
وواضح كمان انك عايزة تتطلقى وجوزك مش مقتنع بالفكرة وممكن تفكرى انك تلجى للمحاكم وكمحامى بنصحك بلاش لانك حتضيع سنتين من عمرك فى جنبات المحاكم على ما تنالى ورقة الطلاق دة على الاقل دة لو هو مطلبكيش فى بيت الطاعه وبعدين مشاكل النفقة ليكى وللاولاد والزيادة بتاعت النفقة كل سنه
حاولى تبعدى عن البيت وتاخدى وقتك تفكرى وتحطى اساله وتخيل لك المواقف اللى ممكن تشوفيها وانتى مطلقة فى الحياة ونظرة ولادك ليكى لما يقولوا ليكى ليه حرمتينا من بابا واحنا صغيرين وشوفى ايه السبب لطلبك الطلاق ثقى انك حتلاقيه بسيط وممكن بشوية هدوء اعصاب تتجاوزية على الاقل علشان خاطر اولادك اللى سعادتهم عندك لا تقدر باى شى فى الدنيا
بصي يا شاهي هانم
انا مش اعرف نورة صحبتك طبعاااا
بس ساعات الواحد بتجيله حالة ملل من روتين الحياة
بيبقى عاوز تغيير
و بيبقى عاوز التغيير ده من اقرب الناس ليه
و بعد الجواز الزوج هوه اقرب الناس
فلما الواحد يحس ان اقرب الناس ليه مش حاسس بيه اصلا
و مش بيحاول يساعدة فيما يمر بيه بيبقى صعب اوي
بس على فكرة الكلام ده من الطرفين
بس الست بتكون اكتر شوية لان بيكون احساسها عالى و بتتعامل بعواطفها اكتر
الراجل سهل انه يفتح باب الشقة و يقعد مع اصحابة حينسي
اما الست فحتقعد مع نفسها و مخها حيفضل شغال..و ده بيزود على فكرة
و بينى و بينك
الجواز لازم يقوم على تفاهم من كل الاطراف و احترام لكل الاطراف
علشان مش يتحول اللى خنقة
و الواحدة مننا لو اتخنقت..حتخلى بيتها و عيشتها جحيم
انا بقول ان الراجل عليه الخطوةالاولى
لانه لازم يتفهم ان الست بتمر بتغيرات هرمونية خلال الشهر و بيترتب عليها تغيرات مزاجية
و عدم اتزان
ان ماكنش الراجل يقدر يستوعب الفترة ديه
حتلاقى كل الخناقات بتقوم فى الفترات ديه
و عدم استيعاب اي من الاطراف للآخر بتطول
و مع التكرار تتوجد فجوه
و مع التكرار الفجوة بتبقى حفرة..و هاكذا
كلامي مش معناه انى موافقة على اللى بيحصل
لا خاالص
انا بقا رأي ان الست القوية هيه اللى تقدر تستوعب المواقف على قد ما تقدر علشان تهيء لنفسها الجو الهادى و المريح اللى بتنشدة
خصوصا ان كل الرجالة بدون اثتثناء اغلب وقتها خارج البيت
فذكاء المرأة هوه اللى حيخليها سعيدة
بذكاءها ممكن تحبب جوزها فيها حتى لو زهقت منه
لانه لو اتشد ليها تاني الزهق حيختفى و حتنسي
لو عاوزه مصلحة صحبتك
لازم جوزها كمان حد يتكلم معاه
لازم يعرف يتعامل مع متطلباتها
و لازم يكون فيه تنازلات من الطرفين
علشان المركب تمشي و الاطفال تتربى فى جو هادى مليان حب
كفايه العنف و الكره اللى الاطفال ختشوفه برة البيت
ما يبقاش البيت كمان
ربنا يهدي صحبتك و يهديلها جوزها و يخليلها ولادها و يقدرهم على حسن تربيتهم
فى زمن مايغلم بيه الا ربنا
تحياتي و سلميلي على نورة صحبتك
نورة صاحبتك دى عايزة ضرب الجزم
لا مؤاخذة يعنى لا تكون بتقرا وهتزعل وهتعمل معاكى مشكلة بسبب لسانى الطويل
نورة صاحبتك دى ماكنش ليها فى الجواز من أساسه
نورة صاحبتك دى محتاجة تقعد مع الست والدتك علشان تعقلها
ده ايه يا ختى البلاوى اللى بتتحدف علينا دى
والله خسارة فيها اسم نورة
امشى يا بت يا شاهى
انتى من الاحرار
قصدى انتى من اهل الجنة ان شاء الله
انتى والست والدتك والبت دودو
سلام
أختك خيخة
على فكرة حسيت بيكى وانتى بتقولى اوففففففففففف من صاحبتك اللى راكبة دماغها
حسيت بيكى وانتى صعبان عليكى صاحبتك
حسيت بيكى وانت خلاص جبتى اخرك منها
وده ان دل على شيئ فهو بيدل على انك اصيلة يا بت يا شاهى
وبنت اصيلة
سلام تانى
اختك خيخة
لعل لها اسباب وجيهه يمنعها الحياء من ذكرهاو ربما كما تقولين...
تكلمى معها ثانيه و تذكرى ان خير الناس اعذرهم للناس
و اخيرا تذكرى قول الله " انك لا تهدى من احببت و الله يهدى من يشاء"
ربنا يباركلك جزاء قلبك الخيٌر
ربنا يهديها
وبلاش تفكر فى نفسها وياريتتفكر فى ولادها وحياتها بعد كدة
طيب انا عندي حل مجربته بعد ماكنت حطلب الطلاق والا اموت نفسي
انهم يبعدوا عن بعض شهرين يعني يطلع برا البيت اوهي تطلع
ومايكلموا بعض ولا يشوفوا بعض وبعد ماتهدا النفوس يرجعوا لبعض بس بشرط
ودا الاهم يبقوا زي الاصحاب وبس يعني كل واحد بعيد عن التاني :)
يمكن شهرين او 3 احسن وبعدها ودا اجمل حاجه يعملوا شهر خطوبه
يعني حبايب من بعيد لبعيد
وبعدها تودي ولادها عند احد من قرايبها وتروح هيه وياه ان شاء الله اسبوع بس يقضوا اسبوع عسل وهي تشوف الفرق في نفسها وزوجها وبيتها وولادها
وربنا يصلح حالها
اميــــــــــــــــــــــــــــــن
ربنا يهديها ويبعدعنهاالشيطان
قولي لها دةاكتر حاجة بتفرح الشيطان انه بيت مسلم يتفكك لوفي مشكلة تتحل بالهدوء والنقاش
و الله كل بيت فيه من النكد و المشاكل و الخناق اللى يخلى اى واحده تجرى و تطفش و تجرى ناكشه شعرها بس الواحده العاقله بعد الخناق تبدأ تفكر ليه بيحصل كده و ازاى ميحصلش كده تانى و مين السبب فى الخناقه و لو هيا السبب مش باقول تتاسف لا يعنى تجر ناعم و تطاطى عشان المركب تمشى
و ما اعتقدش ان فيه ست بتحب ولادها و عايزه مصلحتهم حتفكر فى الطلاق الا اذا كانت فشلت فى كل طرق الاصلاح الاخرى
بس ياريت نورا تبص للقمرين اللى معاها و تفكر و تحاول و تيجى على نفسها شويتين عشان القمرين يفضلوا منورين حياتها و مايضلموش و تشيل ذنبهم طول العمر
الموضوع كبير وصعب وفيه كلام كتير
بس انا بدعى ان ربنا يهديها
لازم تفكرى فى الموضوع
عشان مش نرجع نندم
انا كنت هكتب تعليق بعد ما قرأت البوست ده بس لما قرأت التعليقات دي كلها لقيتها مغطيه كل حاجة ..... ربنا يعمل اللي فيه الخير. ومتنسيش ان الخضر قتل طفلين وده فعل غريب جدا بس حكمت ربنا كانت اكبر
سلام
إرسال تعليق