السلام عليكم
في الأول أحب اقول للناس اللي ضغطها بيرتفع بسرعة
مفيش داعي تقروا البوست
...................
ترن ترن ترن
دة جرس التليفون بيرن الساعة اتنين ونصف فجرا
كنا كلنا نايمين
جريت بسرعة على التليفون قبل ماحد يقلق
انا: السلام عليكم ايوة
صوت حريمي: اية دة ؟ هو انتوا نايمين؟
انا : ايوة ياخالتوا نايمين
عرفت انة صوت خالتي
خالتي: هو انتي مين؟ شاهي ؟
انا : ايوة انا شاهي ازيك ياخالتوا عاملة اية؟
ـ انا في سري ـ
يادي الخيبة هو انتي مش عارفة انتي طالبة مين
خالتي: اة الحمد لله هي مامتك عندك؟
انا : ايوة ياخالتو في حاجة؟
خالتي: هي نايمة والأ صاحية؟
انا: لأ هي نايمة في حاجة؟
ـ في سري تاني ـ
ابوس ايدك انطقي
خالتي: ايوة في
انا : ياخالتو قولي في اية؟
خالتي: اصلي كنت عاوزة اقولها ان خالها مات
انا : البقاء لله خالها مين؟
هي : خالها فلان يالا صحيها وقولي لها
انا : لأ ياخالتو انا مش هاقدر اصحيها علشان مش عاوزة اخضها
احنا كدة كدة بنقوم نصلي الفجر هابقى اقولها في الفجر ان شاء الله
هي: طيب ماتنسيش علشان احنا هانروح بكرة
انا: حاضر بقولك اية هو بيتة في نفس العنوان بتاع زمان
هي: ايوة نفس بيتة امال هايروح فين هو هو العنوان
انا : ماشي ياخالتو هو كان عيان والا حاجة
هي : لا ابدا دة كان زي الفل بس هو من ساعة ماعزل في الشقة الجديدة
وهو اتدهول خالص
ـ انا في سري برضة ـ
يالهوي انتي مش قلتي ان عنوانة زي ماهو يبقى عزل ازاي بقى
انا : طيب ياخالتو انا هابلغها تصبحي على خير
وطبعا صحينا صلينا الفجر وماقلتش لماما حاجة
ودخلنا نمنا تاني واستنيت لما النهار طلع وفطرنا وقولتلها
...............................
انا : انا جبت لأولادك جبنة اسطنبولي مخصوص علشان عارفة
انهم بيحبوها
منال: اه بس دي ناشفة خالص وحادقة اوي
انا : خلاص انا هابعت اجيب نوع تاني يكون فية ملح اقل
وبعت فعلا جبت نوع تاني وعلى العشاء دار هذا الحوار
انا : اية الاخبار ؟ عجبتهم الجبنة؟
منال: هم اكلوها بس هي مالهاش طعم دلعة اوي
انا : خلاص اكليهم من الجبنة الرومي
منال: ايوة اكلوها بس بتلسع في اللسان مش حلوة
انا: خلاص يبقى مفيش غير الجبنة الدوبل كريم
انا شخصيا بحبها جدا
وبعد وجبة كمان
منال: الجبنة معقولة ماكانتش عجباهم بس انا حطيط عليها طماطم
علشان يرضو ياكلوها
الحوارات دي كانت بيني وبين سلفتي ـ زوجة اخو زوجي ـ
لما عزمتها تقعد معايا كام يوم هي واولادها
انا حبيت اعرفها اني بقدرها هي واولادها وبجيب لهم الحاجات
اللي بيحبوها بس هي استطاعت وبجدارة انها ترفعلي الضغط
وانا كمان غلطانة يعني لازم اسأل اية رأيهم في الجبنة
ماكنت اسكت وخلاص والا كان بلاش جبنة اساسا
يالا حصل خير ان شاء الله
اشوفكم على خير
هناك ٢٤ تعليقًا:
ولا تزعلي نفسك
خليكي فريش وكبري الجمجمة وروقي الدم
مافيش حد يستاهل
يعنى هى لما تحط طماطم على الجبنه ده هيقلل من تقديرك للى عملتيه او احساسك؟؟؟؟
خليكى انتى الكبيره و ما تزعليش نفسك
روقي دمك ... روحي كلي الجبنه انتي بالهنا والشفا
وكويس انك بلغتي مامتك في النهار وبعد ما فطرت علشان ماتخوضيهاش :)
شاهى يا قمر
أنا ضغطى بيوطى مش بيترفع فبالتالى قريت البوست بتمعن ...
و من خلال مقابلتى ليكى مرة وحيدة جميلة جدا أقدر أقول لسعادتك ببساطة إنك من النوع العاطفى بشكل خرافى
ولو حبيتى النسمة تطيرى معاها
قلبك و مشاعرك بتبقى طوع من امامك بإرادتك لأنك هتحسى بتقصير معنوى لو معملتيش كدا ...
إنتى حبوبة قوى
و إعملى اللى متعودة عليها إنسانياً
و بكرة اللى مقدرشى يقدر
و لا إن شالله ما قدر يا حبيبتى
كفاية تحطى راسك على المخدة بسلام من غير ضميرك و ثلبك يعكنن عليكى و يقولك إنتى قصرتى فى حاجة
تحياتى لكتاكيتك الضغننين
والله المرارة بتبقي مفقوعه خلقه الله يكون في عونك
السلام عليكم ورحمة الله وبركاته
ما تقهريش نفسك يا شوشو في ناس كده بيبقي عندها برود اعصاب ومش بتبقي حاسه باللي قدامها وهو بيغلي وضغطه وصل 570
هههههههههههه
ابقي خدي في الواسع و بلاش ياستي تسالي عن الجبنه
:))))))
سلام
كبرى الدى وعلى الجى واقلبيها دى جى ونيجى نغنيلك ههههههههههههههههه
ايوه معلش بقى انتي قلتي اللي طغطها بيعلي...ماجبتيش سيرة الفارسه
انا بقى اتفرست زياده؟؟؟
انا بقى مش فاهمه انتى عاملاهم 2 فى واحد
ايوه يعني بوستين فى بوست...موضوعين فى تعليقه واحده؟
طيب خال مامتك ده الله يرحمه الله يبشبش الطوبه اللي تحت راسه ده يجيله كام سنه ؟؟؟!!! اتخطف يعني فى عز شبابه و لا غيه ظروفه..؟!!!! ما علينا الله يرحمه
اما موضوع الجبنه البيضاء
و سلفتك..و اسطنبولي و دوبل كريم
انا بحبها براميلي ديه احسن واحده علشان كده منال مش عجبتها هيه و العيال
المره الجايه لما الجبنه مش تعجبك حطيها فى الكبه و معاها 2 طماطم و شوية زيت و كمون و فصين توم و ادعيلي
و لو مش عجبتك ارميها فى الزباله و بلاش تدعي عليا
سلام
انا اتفرست
وبيقولوا شهريار بيطهق ليه
اهى شهرزاده بتتطهق من الشهرزادات
موقفين بجد يرفعوا الضغط يجى عشرين خمسين كدا:)
معلش
شاهى
شاهى
شااااااااااهىىىىىىىى
ممكن تعزمينى انا وشريف نقعد عندك يومين فى البلكونة
و والله العظيم هاكل الجبنة ومش هافتح بقى خالص
هى سلفتك مابتقراش البلوج؟
طب مش خايفة جوزك يفتن عليكى عند اخوه
سلام
اختك خيخة
اه صحيح نسيت اعزى
الله يرحم خال والدتك
هع هع هع هع بجد يعنى
بس ميرسى على رفع الضغط...نشاطركم الكركدية
لزوم توطيته تانى :D
غلطانة
غلطانة
غلطانة
انتى الغلطانة يا شاهى
من فوقك لتحتك
من جنبك اليمين للشمال
من شعرك لأخمص قدميك
وتستاهلى
وش مطلع لسانه
عسل كعادتك .. اعمل الخير وارميه البحر ..
عرضك للحوار شيق جدا خصوصا مايدور فى سر كل واحد ..
هذه اخلاقك .. ومنها المجاملة .. وهذا هو الثمن ..
ربنا يبارك لك دائما .. ويحفظ لك هدوئك عشانا احنا كمان
يا ستى اعملى الخير وارميه البحر ..لكن ..انتى برضه سيبتى النقطه الاساسيه اللى بيتمركز حواليه البوست
فين العزا
والعاقبه عندكم فى المسرات
بوست جميل اوى ياشاهى احيكى علية وان شاء اللة مش هاتكون اخر مرة ازور فيها مدونتك
المفقوعة مرارتها
حاضر يامفقوعة هانم هاكبر على الاخر لاني مابعرفش اعمل حاجة غير كدة
تحياتي
....................
MOHRA
انا صحيح مش الكبيرة وهي اكبر مني بس الكبر مش بالسن وحقيقي انا مش زعلانة انا شكلي بهتم زيادة عن اللزوم
هاحاول اني اقلل الاهتمام دة شوية مع اني عارفة نتيجة المحاولة مقدما بس برضة هاحاول
نورتي
تحياتي
...................
رحاب مصطفى
ياحبيبتي انا مروقة دمي وربنا يخليكي ليا
مش دي الحاجات اللي تغير دمي هي بتحرقة بس ههههههههه
تحياتي
..................
فاتيما
حبيبتي جوهرة المدونين
والله يافاتيما انا مش مستنية من حد حاجة ولا حتى التقدير دة انا بس حبيت احسسها بترحيبي بيها وبأولادها في اي وقت بس تقريبا انا ماعرفتش اوصلها دة والا اية؟
سيبك انتي انا فرحانة بوجودك عندي في المدونة عقبال ماتنوريني في 6 اكتوبر
تحياتي
محمد حلمي مخلوف
سلامة مرارتك ياأستاذ
ربنا يستر علينا كلنا وعلى مرارتنا
ههههههههه
تحياتي
..................
خمسة فضفضة
وعليكم السلام ورحمة الله وبركاتة
عرفتي من فين اسم شوشو دة؟
وشي منك في الارض انا بقالي كتير مش بزور مدونتك ومقصرة على الاخر ووحشتني اوي على طول الحياة
تعرفي انا هاسيب باقي الرد على التعليقات واجي ازورك يالا حضريلي كباية شاي خفيف بالنعناع سكر خفيف برضة
حاضر هاخد في الواسع اهو
تحياتي
ابي
انا موافقة يالا تعالي واوعي ترجعي في كلامك
تحياتي
واحدة مفروسة
جارتي وحبيبتي وبرج العقرب زيي
خال ماما فعلا اتخطف وحتى لو كان شاب صغير اية الحكمة من اني اصحي ماما الساعة 2 ونصف مساء علشان اقولها يعني هاتعمل اية
اما عن الجبنة
انتي زي ماما بتحبها براميلي انا بحبها تكون طرية بتيقى اسهل في الاكل وفي السندوتشات
وصفتك جميلة وانا بعملها بس مش في الكبة انا بهرسها بالشوكة
لا تخافي حتى لو كانت وحشة مش هادعي عليكي
تحياتي
.....................
الطائر الحزين
استاذي الفاضل
دة في شهرزادات تطهق بلد بحالها
وفي كمان شهريارات يطهقوا
بقولك اية بلاش بقى السيرة اللي تطهق دي ماتقلبش علينا المواجع
تحياتي
blue_wave
ربنا يكرمك والله فيك الخير بتطيب خاطري وبتقولي معلش
دمت بكل ود
..............
بنت خيخة ومش اي كلام
يادي عقدة البلكونة
انا موافقة بس استني لما ابو الدراويش يسافر يومين والا حاجة وتعالي نوريني انتي وشريف بس يارب هاني يوافق
انا مش بعزم على فكرة انا بتكلم بجد
سلفتي مالهاش في الكمبيوتر اصلا وزوجي مش هايفتن لانة مش كثير الكلام
انا بس اللي رغاية وبتكلم كتير
هاستناكي ياخيخة اوعي تطلعي خيخة وماتجيش
تحياتي
بنت خيخة ومش اي كلام
ويرحم اموات المسلمين
................
safa7_karmooz
سفاح
ياماما
لية كدة؟
هههههههههههه
انا مش بحب الكركدية انا صلا ضغطي واطي بس لما باخد كام موقف من دول كل حاجة بتتظبط
تحياتي
................
دوبة
غلطانة دة انا وكمان بتطلعيلي لسانة
طيب يا أم يوسف طيييييييييييب
ليكي ابن يترد علية
سلام ياجميلة
..................
sherif
استاذ شريف
كلامك دة مش تعليق
دة شهادة هابروزها واعلقها
بارك الله لنا فيك
تحياتي
.......................
sasatifa
عملنا الخير
حاضر
مفيش عزا خلاص
انا اخدت ماما وعزينا اخوات الفقيد وخلصت على كدة
ربنا يرحمنا احياء واموات
اعتقد انا العاقبة عندكم في المسرات دي مش بتتقال في العزا هههههههههههه بس شغالة كويس برضة
تحياتي
.................
محمود حسن العدل
انا كمان اتمنى انها ماتكونش اخر مرة
في انتظارك دائما بأذن الله
إرسال تعليق