الثلاثاء، ٨ يوليو ٢٠٠٨

طبق رز بلبن

السلام عليكم
انتو عارفين ان ابو الدراويش غالبا بيبقى اجازة
يوم الجمعة ويوم السبت
قوم اية لقيتة بيقولي
ابو الدراويش : تيجي نروح السينيما
انا : اة طبعا تيجي ونسيب العيال مع ماما وطنط
ابو الدراويش: ويهونوا عليكي؟
انا: ايوة يهونوا وبعدين احنا لسة مخرجنهم يومين ورا بعض
ابو الدراويش: طيب اتصلي بالتليفون وشوفي في افلام اية
واسألي على المواعيد
انا : حاضر . تيجي نروح سينيما دريم لاند علشان عندهم فيشار بالكراميل
ابو الدراويش: بقولك اية اتصلي وشوفي المواعيد وشوفي عاوزة تروحي سينيما اية وفيلم اية وانا هاروح ارميكي هناك واخلص
انننننننننن أننننننننن تش
اكيد فهمتوا انا عملت ازاي بعد الكلمتين الحلوين دول
ابو الدراويش زوجي حبيبي قدم لي
طبق رز بلبن بجوز الهند والمكسرات
وبعدين رشلي شوية تراب فوق الوش
هو دة كان احساسي وقتها
وطبعا ماأكلتهوش
يعني ماروحناش السينيما
بس ملحوقة اكيد هانزوغ من العيال ونروح في يوم تاني
وهي يعني السينيما هاتروح فين
والا يعني الفيشار هايخلص
معلش انا مركزة شوية على موضوع الفيشار اصلي بحبة جدا
فكرتوني انا عندي شوية ذرة لما اقوم اعملهم فيشار
اشوفكم على خير

هناك ٣٠ تعليقًا:

kochia يقول...

كنتي شلتي شوية التراب
واكلتي طبق الرز واللبن
والمرة الجاية لما تبقي تيجي تبقي تيجي

يللا معلش
خيرها في غيرها

تحياتي

Doba يقول...

حد يضيع خروجة زى دى
روحى وخليه بدل ميجيب الفشار يجيب
فشار
وآيس كريم
ورز بلبن من نوع مفتخر
ودرة مشوى
وترمس

وكل اللى نفسك فيه
ولما ترجعى البيت
ابقى اعملى مقموصة
يقوم هو اللى يقول
اأأأأن أأأأأان تشششش

بس خلاص
---------
أبو الدراوييش
والله ليك الجنة يا أخويا
عاوز تفسحها وترفه عنها ودى جاية تقولك عاوزة اشى فشار بالكرامليل قال
أدى آخرة الفرجة عالتلافزيون
----
احنا بنحب نهدى النفوس انتى عارفة
نيهاهاهاهاهاع
===
اه يا عينى
بلاش ضرب

Yahia يقول...

يعني يا ستي انا مش هغلطك ولا هغلطه بس عايز اقولك ان بتكبير الدماغ الدنيا بتمشي وبعدين بلاش كنتي ضيعتي فرصه كويسه والله غيرها في غرها

سلام

mohra يقول...

هم الرجاله كده
ماحدش بياخد على الدبش اللى بيقولوه
المهم انه هايوديكى السينما

صيدلانيه طالعه نازله يقول...

يعنى اول مره ازورك و تسيبينى و تروحى تعملى فشار
انتى باين عليكى مدمنه سينما زيى
بس انا بروح بالولاد عشان طنط مش بتقدر عليهم
عااااااااااااا
و عشقى الاول للفشار اللى من السينما
و مش بيعجبنى غيره
جايز عشان غالى مش عارفه و بخلص بتاعى و افضل اخد من العيال و يزعقوا لى ويفضحونى و انا و لا كأن

ali يقول...

شاهى يا شاهى
ازيك وعاملة ايه؟
يعنى اسيبك كل ده ارجع حوار مش لذيذ كده مع ابو الدراويش
طيب كنتى احكى الجزء الاول بس
او كنتى احكى لحد سينيما ايه وفيلم ايه
وبس وبلاش الكلمة الاخيرة دى
على العموم حصل خير تتعوض المرة الجاية فى فيلم تانى
وبرده يا اختى العزيزة طبق ارز باللبن ابو تراب ده احسن ممافيش
ولا ايه
على فكرة لو عايزه تدخلى فيلم ادخلى الفيلم بتاع الوحش ده أحمد عز (معلش حقد طبقى هههههه)
ربنا يسعدك
تحياتى ليكى
على حب

Empress appy يقول...

معلش يا شاهى متزعلش احنا نعمل ضده مظاهرة ونطالب بحق الاستقلال ههههههههههههه
برضه ابو الدراويش ونتحمله

Rehab Mostafa يقول...

طيب سبيلي شوية فيشار علشان أنا بحبه أويي برضه.. بالهنا والشفا :)
والسينيما تتعوض مره تانيه ان شاء الله وربنا يخليكم كلكم لبعض


أشكرك بجد بجد بجد على سؤالك عليا :) ربنا يكرمك يارب

blue-wave يقول...

اولا المدونه دى بجد بحبها علشان نفس استايل مدونتى:))
عارفه صعب اوى حد يقدملك حاجه حلوة وفى اخر لحظه يرش عليها تراب من على الوش

فاتيما يقول...

شاهى يا قمراية
يعنى قبل ما أرد على البوست دا
روحت قريت شوية فى مدونة جوزك
لقيت بوست عن فيلم أحمد آدم و اللى حصل يوميها
قوم إيه ؟؟
فهمت اللى فيها
الراجل حصله عقدة نفساوية من دخول السينما يا شاهى خلاص
و مهما كان الفيلم حلو خلاص هوه فقد الثقة و بقى عدنه عقدة سيماوية خلاص
يعنى المشكلة مش فيكى
المشكلة فى السيما
و يا ستى كنتى روحتى و خلاص مع العيال
أهو نص العمى و لا العمى كله
بس إنتى أصلاً شكلك من النوع العاطفى البحت اللى كل شىء عنده مرتبط بمعنى و لازم يكون بذكرى تتمنى تكون كويسة
يعنى يا تروحوا السينما و يبقى يوم جميل
يتعقدوا و خلاص
لأن مرواحك السينما لوحدك مع العيال هيحسسك بإنك ناقصاك حاجة و يجيلك شعور بالشجن العميق
أنا اللى بحلل نفسياً أهو و شكلى إنا اللى عندى عقدة باين
هشوفك بكرة يا شاهى ؟؟؟
يا ريت تيجى
إن شاء الله تيجى
سلام يا حبيبتى

3abdo me7tas يقول...

الف شكر على الناس اللى فاكرانى
انا جيت اسلم بس من آخر بلاد المسلمين

truelove يقول...

مامتي يا مامتي وحشاني قوي يارب تكوني بخير انا بقى بحب الفيشار بالشيكة ما انتي عارفة ان الشيكو ده الي موديني لوراء بس نعمل ايه بقى ربنا يهدينا ويقدرنا ونبطل ادمانه وحشاني كتييييييييييييييير وسلامي للولاد يامامتي مووووووووووواه

المـــفـــــــقــــــــوعـــــة مــرارتـهــا يقول...

انا جوزي بيعملها فيا كتييييييييير
يتصل من برة يقولي البسي انتي والعيال عشان نخرج واول مايدخل البيت يريح
لدرجة اني بقيت مابصدقوش ولما يقولي اجهزي عشان نخرج اقول له لما تيجي نبقي نتكلم
علي راي المثل عشمتني بالحلق خرمت انا وداني وعورت نفسي وحطيت ديتول علي الجرح

سبهللة يقول...

يا حبيبتى اللى بتجوز وتخلف مش من حقها تفكر اصلا فى الترفيه زى بقية الناس
وبعدين انتى هاتنهبى
مش كفاية عليك الذرة اللى فى البيت كمان عايزة تاكليه برة؟؟
ايه الدلع؟؟
تحياتى ليكى

د. إيمان مكاوي يقول...

كنت تعملي نافسك مش سامعه وتروحي السنيما ..الرجاله أحسن حاجه معاهم إنك تفوتي ..
أنا لسه مقرأتش كل تدويناتك بس حسيت إنك زي العسل ..ربنا يبارك لك في أولادك زي العسل ما شاء الله
تحياتي

فاتيما يقول...

شاهى
قلبى كلنى عليكى
قولت آجى اطمن
و ارمى التماسى
أزيك يا حبيبتى
يا رب تكونى دايما بخير
تحياتى للكتاكيت الصغننة
و لأبوهم كمان

غير معرف يقول...

هما الرجاله كدا

عمرهم ما يكملو حاجه حلو للاخر

لازم يقلوبوها


يلا حصل خير

بنهدى النفوس بس

تحياتى

بنوته مصرية يقول...

يا سلام علي الستات مش بيعجبهم العجب
يعني الراجل قال هيخرجكك تقومي تقولي له فشار وحمص وترمس

يا ستي اخرجي انتي بس وابقي دبسية وحطية قدام الامر الواقع
هههههههههههههههههههه


معلشي يا قمر

احنا لينا الجنه ههههههههههه

وحشتيني اتمناه اشوفك في يوم التبرع بلدم

تحياتي

رودي

د/اجدع بنوته يقول...

بالهنا والشفا الفشار

ميس يو ياشاهى

يارب تكونى بخير انتى والكتاكيت وبابا

الكتاكيت

كلام على بلاطة يقول...

اعمل حسابى فى الفشار
تحياتى

ali يقول...

السلام عليكم
ازيك يا شاهى وعاملة ايه
ايه الحكاية مختفية ليه وفين البوست الجديد
وفين ردك على التعليقات
انا سمعت انك رحت التبرع بالدم ربنا يتقبل منك ان شاء الله
احنا مستنين البوست الجديد
على فكرة انا نجحت السنة دى
يالا بقى تعالى قوليلى الف مبروك وكل الكلام الحلو ده
فى انتظارك
على حب

Ehab يقول...

نزلي البوست اللي دوبه كتبته عنك
دي اوامر عليا ولازم تنفذ

متشكرين على الخروب كان جميل قوي جزاكي الله خير عنا جميعا

ملحوظه انا متأكد ان ده كان دوم
متضحكيش عليا

سلاااااااااااااااااااااام
اخوكي ايهاب

TAFATEFO يقول...

أنا اللي نفسي أعرفه .. انتوا ساكنين فين .. علشان أطبعلك كتاباتك وأوزعها في الحي اللي انتوا ساكنين فيه

شراني أنا

فاتيما يقول...

شاهى يا رقيقة
أزيك
وحشتينا
قوى
قوى
قوى
سلمى على محمود الجميل

shahy يقول...

ازيكم كلكم عاملين اية؟
حقيقي حقيقي وحشتوني جدا
اسمحولي ابدأ الرد على علي واقولة الف مبروك النجاح وعقبال كل سنة
واسمحولي كمان ارد على الغالية فاتيما
واقولها انا بخير الحمد لله وانتي واحشاني خالص خالص وشكرا كتير كتير على سؤالك الدائم عليا

shahy يقول...

kochia

حاضر المرة الجاية هابقى اجي على طول بس مش هاعرف اشيل التراب ومش هاقدر اكلة بترابة

تحياتي

..................

دوووووووبة

حبيبتي لأ حبيبتي اية مش حبيبتي ولا حاجة بقى هو اللي لية الجنة ياهانم امال اقول على يحيى اية اللي مستحملك لغاية دلوقتي ايوة دة هايبقى في الفردوس الاعلى بأذن الله

هههههههههههههه

غلاسة بغلاسة وانتي اللي بدأتي

امووووووة

........................

يحيى

هو انت والمودام عليا والا اية؟
وكمان عاوز تغلطني طيب دة انا لسة قايلة في حقك كلمتين حلوين
عاوز تغلط ابو الدراويش عادي براحتك لكن انا مش ممكن ابدا

والله المدونة بتنور بتعليقك

معاك حق في حكاية تكبير الدماغ بس انا لو كبرت دماغي اكتر من كدة هايبقى شكلي وحش قوي

تحياتي

shahy يقول...

مهرة

ايوة يافندم وداني السينيما بس بعد اسبوع مش في نفس اليوم


تحياتي

................

صيدلانية طالعة نازلة


ههههههههههههههه

انتي كأنك بتتكلمي عني

ربنا يخلي اولادك وزوجك والفيشار

تحياتي


..................

shahy يقول...

علي

فين ياسيدي الكلام الوحش دة؟

لأ مفيش احسن وانا اية اللي يخليني اكل رز بلبن بترابة
وكمان انا مش بحب الرز بلبن اصلا غير لما بتكون ماما هي اللي عملاة ويكون مش مسكر اوي ههههههههه

انا فعلا دخلت فيلم احمد عز وصحيح قعدت اعيط بس الفيلم كان حلو

سيبك من كل دة

الف مليون مبروك النجاح

تحياتي

...................

ابي


مظاهرة مرة واحدة
لية كدة الطيب احسن

وحشتيني ياسكرة ويارب اشوفك قريب في اكتوبر

تحياتي

.....................


رحاب مصطفى


تحت امرك كل الفيشار يا رحاب تعالي وانا اعمل فيشار كتير كتير ونقفل علينا الباب وناكلة كلة لوحدنا

العفو بجد بجد بجد وانتي مش محتاجة تشكريني خالص

ربنا يحفظك ويكرمك

تحياتي

...................

BLUE-WAVE


ايوة يادكتور صعب اوي وشكلك مجرب بس واضح انك مجرب في حاجة اكبر من الرز بلبن
ههههههههه قصدي السينيما

تحياتي

shahy يقول...

فاتيما


ماشاء الله عليكي داكتورة ياناس اية كل التحليل النفسي دة

اقولك على حاجة سر
كلامك كلة صح

يالا افتحي عيادة واوعدك اكون اول زبونة قصدي مريضة

تحياتي

...............

عبدة محتاس

بتتريق حضرتك
ماشي

غصب عني والله يامحمد انا مش بقعد قدام الكمبيوتر خالص

عموما ربنا يوفقك في شغلك وترجع مصر بألف سلامة

تحياتي

.....................

truelove

يابنتي ياحبيبتي المهم الصحة سيبك من اي حاجة تانية وكلي فيشار براحتك واللي مش عاجبة على كدة.... يستحمل بقى

وانتي كمان بتوحشيني وكنت مبسوطة خالص لما كلمتيني في التليفون وياريت تتكرر

تحياتي

..................

المفقوعة مرارتها

ههههههههههههه
ابقي خلي بالك علشان ماتتعوريش تاني

كلنا في الهوا سوا

تحياتي

....................

سبهللة

انتي شكلك جاسوسة
اية الكلام الغريب دة؟ لية مش من حقي هوانا مش بني ادمة والا اية؟

تصدقي اة

عاعاعاعاعاعا

تحياتي

...................

ايما ام البنين

نورتي يا ام البنين

انا بفوت كتير اوي لدرجة انا انا نفسي بقيت مفوتة على الاخر هههههههههه

تحياتي

...................

فاتيما

سلامة قلبك
ربنا مايحرمنيش من سؤالك عليا ابدا

انا بخير الحمد لله

shahy يقول...

همس

حلوة الهمسة بتاعة تهدية النفوس دي

تحياتي

.................

بنوتة مصرية

اول مرة تزوريني وطبعا منورة

لو كنتي بتاكلي فيشار وترمس وحمص ماكنتيش اغمن عليكي يوم التبرع هههههههههه

تحياتي

................

د/ اجدع بنوتة

انا اللي مفتقداكي بشدة ومحرومة من دخول مدونتك التحفة
الحقيقة اني محرومة من كل المدونات
امتى الدراسة تيجي علشان اقدر افترس الكمبيوتر
انتي عارفة انا برد على التعليقات وكل دقيقة حد من العيال يدخل يقولي: خلاص ياماما خلصتي
او يطلب اي طلب علشان اقوم وخلاص
ياساتر مفيش حرية

تحياتي ياام دماغ متكلفة
الجملة دي مدح اوعي تفتكريها حاجة تانية
......................

كلام على بلاطة

حاضر بس انا مؤنث مش مذكر

تحياتي
................

علي

انا روحت علشان اقولك الف مبروك مالقتش في مدونة اروح فين بقى؟

عموما مليون مبروك مش الف بس وعقبال لما اقولك مبروك على الشغل كمان

تحياتي

................

الشنكوتي الكبير

ههههههههه
والله كان خروب
انا فكرت اعمل دوم بس الدوم بيوطي الضغط يعني ماكانش ينفع خالص
الخروب افيد في الظروف دي
وليك عليا اني اعملك خروب ودوم مع بعض علشان تعرف الفرق بينهم

اما بوست دوبة بعينك
دة ليا انا لوحدي
ههههههههههههه

.....................

تفاتيفو

هههههههههههه
ساكنين في 6 اكتوبر الجميلة
ولية عاوز تعمل فينا كدة؟
خلي الطابق مستور
خليك طيب هههههههههههه

تحياتي

....................

فاتيما

الله يسلمك ويسلم قلبك
الدعوة دي كنت بدعيها لكامي على طول وهي كانت بتحبها جدا

ربنا يخليكي ياطمطم
محمود بيسلم عليكي كتير

تحياتي