السلام عليكم
انا لما اقول اني هاتكلم عن امي
يبقى اسمع تصفيق حاد
والفين سلام وتحية
كل واحد مامتة غالية علية اوي
وبيقول عليها احسن ام في الدنيا
ماشي ماقلناش حاجة
بس امي بقى من نوع خاص
نوع مش انقرض لأ دة مش موجود اصلا
مش هاقدر احكي التفاصيل علشان مش هاينفع
بس كل اللي اقدر اقولة انها ست جادعة جدا
واستحملت حاجات كتير جدا جدا جدا
علشان تحافظ على بيتها وتطلعنا اخوات كويسين مع بعض
وبنحب بعض جدا الحمد لله
زمان واحنا صغيرين كانت لما بتعمل حاجة حلوة
يعني بسبوسة اوكيك
كان لازم تبعت جزء منها للجيران
وكانت بتقول ان عيب لما الواحد يعمل حاجة ليها ريحة قوية
والجيران تشم الريحة دي ومايدوقوش منها
ومش الحلويات بس دة انا فاكرة كمان الكشري
والقرنبيط وتقريبا البصارة
المهم في الموضوع انها قاعدة معايا دلوقتي
يعني منوراني ومخلية بيتي جنة بحق وحقيقي
دة غير الدلع اللي مدلعهوني
مش عاوزة نق الله يخليكم
انتو عارفين البنات مش بتعرف قيمة مامتها غير لما بتتجوز
وتخلف ويطلع عنيها
اما بعض الاولاد للأسف مش بيعرفوا قيمة الأم غير بعد وفاتها
بجد انا مش عارفة اقول اية لأمي
بس حسيت اني لازم اكتب بوست عنها
يالا كلكم ادعو لها بالصحة
وبأنها تفرح ببنتها وابنها اللي لسة ماأتجوزوش
ربنا يخليكي ليا ياأمي
اشوفكم على خير
هناك ٢٦ تعليقًا:
ربنا يديها الصحه يا رب وتبقى زيها كده
مفيش حته كيكه لاختك بقى ههههههههه على الدعوه دى
اه نسيت اقولك اديها بوسه فى جيبنها كبيرة قوى منى
طيب ممكن سندوتش مصقعه ههههههههههه على اول وتانى تعليق اكمل لعب ولا امشى
ياه باين عليكي عارفة نقطة ضعفي
اي بوست عن الام بيوقف الزمن في عيني
ربنا يخلليها ليكي ويخليكي ليها
وتفرحي بولادك يبروكي ويحبوكي زي ما بتحبيها
ربنا يخليهالك ويديم عليكى نعمة وجودها ونورها فبيتك وحياتك سلميلى عليها
وتقبلى تحياتى
أنا الشينيور
طيب يا أحلى ها هى أحلا أم ليكى أنا لأ لاه أنا أبنيك ؟ lol ؟؟؟؟؟؟؟ أنا مش أبو سلك أنا ميييييييييييييييييييين أولى
سلاميز lol
ربنا يخليهالك يارب... و يديها الصحه و يباركلها فيها
انا بحب جدا البنات اللى ليها علاقات خاصه مع امهاتها...ربنا يخليهالك و يديها الصحه و تفضل مدلعاك كده على طول
تحياتى ليها يا شاهى
وقوليلها تدعيلنا
وربنا يديها الصحة ويبارك فى عمرها
ويقدركم على انكم توفوا حقها
يارب يا شاهى تشوفى ولادك محترمين زيك كده وربنا يعوضلك مشاعرك ناحية والدتك ديه فى ولادك
ربنا يكرمو يكرمها يارب
ربنا يبارك لك فيها
ويجعلك بارة بها ويبرك اولادك مثلما تبريها
حماتى دى أحلى حما فى الدنيا
كفايه إنها جابت شاهى للدنيا
و بعدين عليها صنية فراخ محشيه
تنسيك إسمك و عنوان بيتكم
ربنا يخليها للك يا شاهى يا رب
بجد والله لما اكلمك واسمع صوتها الدافى بتفكرنى بالغاليه امى ربنا يرحمها ويحسن اليها
ربنا يديها الصحه والعافيه وتفضل منوره بيتك كده على طول وتفرح باخوكى
وامانه يا شاهى تخليها تدعيلى علشان ربنا يقومنى بالسلامه
وبجد بجد هى احلى حاجه فى الدنيا بوسى راسها ومضيعيش لحظه واحده فى بعدها عنك
سلملى عليها اوى اوى وبوسيلى راسها
ربنا يخليهالك ويمتعها بالصحة
انبسطت اني شفتك إمبارح
ربنا يخليهالك يا رب
يارب يخليكوا لبض ومتتحرموش من بعض ابدا
عاوز سندوتشين وحتة كيكه بقا علشان انا لسه ضيف جديد
هههههه
تحياتى
علاء
ربنا يكرمها فيكم أكتر و اكتر
و يخليها و يديها الصحة و السعادة
أنا سعدت بيكى قوى يا شاهى
و اتمنى مكونش رغيت كتير و صدعتك و نكدت عليكى بس إنتى طلعتى بسكوتاية يا بنتى و قلبك دا فراشة طايرة بياخدها النسيم و تطير معاه ...
ربنا يديم الود و المحبة
و يخليلك مامتك يا رب
تحياتى يا حبيبتى
ربنا يخليها ليكي ويخليكي ليها :) وربنا ان شاء الله يديها الصحه يارب
بجد الانسان من غير أمه ولا حاجه
الحمد لله
ربنا يديها الصحه يارب
ويخليها وتدلعكم كمان كمان
ويخليلك اولادك وجوزك ويباركلكم فيهم يارب
ربنا يخليهالك يارب يا شاهى
واكيد انتى طالعلها فى طيبة قلبها وحنيتها
ربنا يكرمك يارب
وتعرفى تربى ولادك زى ما انتى اتربيتى
ويطلعوا جيل كويس امتداد ليكى انتى ولوالدتك
اتمنى انى اشوفها واسعد بلقائها زى ما سعدت بسماع صوتها الحنين
تحياتى ليكى
اختك خيخة
ربنا يخليهالكوا يا رب وتملى عليكوا دنيتكوا
ويديها الصحة والعافية وتفرح بيكي وباخوكي وباولادك ان شاء الله
فعلا الام ددي اغلى حاجة في حياة البني آدم
ربنا يحرسها
تحياتي
السلام عليكم ورحمه الله وبركاته
آختى الكريمة
لما أراك لم تشاركى معنا فى حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم
إلى الأخت الفاضله ...
أوافقك الرأي تماما انه البنات تزداد أحسسها بوالدتها بعد الزواج والأولاد....بس يارب الولاد يكونو بيعرفو قيمتها قبل ماتموت لأني عندي ولدين...الله يعطي والدتك الصحه والعافيه ..أمين يارب...ويخليهالكم.ويفرحها بيكم أرجو أن تتقبلي مروري...
صيف سعيد لك وللجميع
ربنا يخليهالك
ويطولك في عمرها
ويخليلنا كل امهاتنا
عشان بجد الدنيا من غيرهم ولاتسوي اي حاجه
سسسسسسسسسسسسسسسسسسسسسسسسسسسس
تصفيق حاد اهو علشان خاطر أم شاهى وعلشان خاطر شاهى كمان
زى ما انتى قلتى كل واحد بيشوف امه احلى ام فى الدنيا بس من الواضح ان مامتك حنينة بزيادة شوية ربنا يخليهالك وانا متأكد ان الحنية والطيبة الموجودة عندك دى كلها من ست الحبايب
وكمان زى ما عمنا محمد هنيدى بيقول انت ممكن يكون ليك ست ابهات بس هى الام واحدة بس هههههههههه
تحياتى ليكى ولمامتك
على حب
اولا
انا اسفة جدا على التأخير في الرد
اصل من ساعه الاجازة وفي احتلال للكمبيوتر من التلات بغبغانات بتوعي
ثانيا
احب اشكر كل الناس الحلو اللي علقت على البوست واحب كمان اقولهم ان ماما قرأت كل التعليقات ودعيت لكل اللي قالها تدعيلة وربنا يستجيب ان شاء الله
واحب اقول كمان انها كانت سعيدة جدا بتعليقاتكم
ثالثا
اسمحولي ارد على تعليق فاتيما
انا سعدت بيكي اكتر والله وانتي ماصدعتنيش ولا اي حاجة
يارب ماكونش انا اللي نكدت عليكي واسفة جدا اني انفعلت بس والله غصب عني
وحقيق لو في فرصة اني اقابلك تاني مش هاتردد ابدا ابدا
ربنا يخليكي ويقويكي ويصبرك وربنا وحدة اللي يعلم اني حبيتك من قبل مااشوفك
تحياتي ليكم كلكم
ربنا يخليها لكم وتفرح باولادكم
إرسال تعليق