السلام عليكم
البوست دة منقول من مدونة كفاية طيبة
وانا اتأثرت بية جدا جدا واستأذنت اني انقلة عندي
.......................
رســـالـة
بابا ...!!
ممكن اقولك حاجة ومش تزعل منى
ها ؟
اقول والا هتزعل ؟
طيب انا هقول وخلاص بقى
بابا هو انت بتحبني ؟
طبعا هتقول ايوة..بس انت متأكد ؟؟
انت بتحبني بجد يعني؟؟
زي بابا منة والا بتحبني ازاى؟
بابا.. هو انت ليه مش بتطبطب عليّا زي بابا مريم؟
بابا.. هو انت شايفني اجمل بنوتة فى الدنيا ؟زي بابا ريهام
والا انت مش عارفنى اصلاً؟
بابا ..هو انا ليه مش بحس انى مطمنة وانا معاك؟
هو انا ليه مش بحس بأمان زي خلود لما تبقي مع باباها
بابا..انت ليه مش بتملّس على شعرى وتضحكلى زي اى بابا بيحب بنته؟
بابا..هو انت ليه مش بتمسك ايديّا واحنا بنعدي الشارع؟
بابا..هو انت مكسوف منّى ؟؟
والا مش بتحبني ومش عايز تزعلنى وتقولى كدة ؟
بابا..هو انا ليه لما أحب اتكلم مع حد وافضفضله مش انت اول واحد بييجي على بالى؟
نفسي تبقي انت اول واحد ييجي على تفكيري لما احب اتكلم
بس مش انت هو العيب منّى ولا منك ؟؟
بابا..هو انت ليه مش بتاخدنى فى حضنك لما أعيط ؟
ولا بتيجي تغطيني قبل مانام وتبوسنى على راسي ؟
عارف يا بابا
ساعات ببصلك وانت قاعد بكلمك فى سرّى بقولك :
انا بحبك اوى يا بابا .. هو انت مش بتحبني زي ما بحبك ؟
بابا.. هو انت ليه مش بتيجي تفرحنى من برّة وتدخل البيت
وتقولى انا جبتلك حاجة ليكي انتى بس عشان انتى بنوتّى حبيبتى
بابا..هو انت مش بتدلعنى ليه ؟
ايوة انت بتدلع اسمي بس مش بتدلعنى انا
ليه مش بشوف فى عينيك انك عايز تعرف اخبارى بجد
ليه بشوفك دايماً بتفكر فى نفسك بس
ليه مش بتبصلى بنظرة حنينة زي بابا بنت خالتى
عارف يا بابا
عمو جوز خالتى ده لما قعدت معاه شوية قولتله :
ياااا ...نفسي فى بابا زيك يا عمو
ساعتها عمو عينيه دمّعت
عشان اتأثر بكلامى
وانا عينيَا دمعت بردو
بس مش عشان اتأثرت لا عشان زعلت انى بقول عليك كدة
زعلت انك مش مديني اللى انا محتاجاله اوى منك
وزعلت انك ممكن تزعل لو سمعت كلامى ده
عارف يا بابا
انا مش قادرة اكمل معاك كلام
عشان انت مش هتسمعني ولا هتفهمنى
شكلك مش عارف يا بابا
اشوفكم على خير
هناك ١٥ تعليقًا:
كان بيعمل كل الحاجات دى واكتر
وماكنتش عارفة ساعتها انى فى نعمة
كان بيسال ويدلع ويطبطب ويجيب شكولاتة ويتخض لما اتوجع ويحضن وينصح ويبرق عيونه لو لزم الامر
وكنت فاكرة ان ده عااااادى
وان كل الحاجات دى واكتر بيحصل عليها كل الاطفال من ابهاتهم
معرفتش ان انا فى نعمة الا لما اتجوزت
ومعرفتش ان انا فى نعمة الا لما سمعت كلام واحدة صاحبتى عن باباها
ومعرفتش ان انا فى نعمة الا لما مات
وساعتها عرفت اانى اتكسرت كسرة مافيش بعدها قومة
ربنا يرحم ابويا
وربنا يحنن قلوب كل الابهات على عيالها
سلام يا شهشوهة
اختك خيخة
يا قلبى ى ى ى ى
يا شاهى اللى اتوجع
انا كنت زى البنوتة دى
و انا صغيرة عل فكرة
و كانها بتتكلم بلسانى
بس عاوزة اقولها إن يمكن لما تكبر تشوف الحكاية بشكل تانى
تنسى الانانية و البعد و الجفا
و تشوف الحسنات و الحاجات الكويسة
عن خبرة بقولها
الكويس هوه اللى بيفصل فى الآخر
هدعى زى خوخة إن ربنا يحنن كل القلوب
و بحبك قوووووووى
آه
بوسيلى العياااااال
ليه كده بس يا شاهى
ليه قلبتى المواجع على الواحد
ياااه كان نفسى اوى اوى فى اب ياخدنى على حجره ويغنيلى وكنت نفسى اوى فى اب ارمى حمولى عليه وارمى حالى عليه
طول عمرى نفسى ولحد دلوقتى نفسى اوى فى اب يطبطب عليا
عارفه يا بت يا شوشو
انا احيانا كتير اوى بحسك انتى ونورا ابويا وامى
بس كده
دودو
انا عيطت و انا بقرا الرسالة
قلبي وجعني يا شيخة
بس تقولى ايه فى الاهالى اللى مش عارفه تحب عيالها
مش بس الابهات و الامهات كمان ساعات مش بتعرف تحب ولادها و تبين حبها ليهم
يا شاهي الناس كلها بقت مش عارفة تظهر حبها ربك يرحمنا برحمته
رسالة سهلة وبسيطة بس صعبة وعميقة اوى اوى
بجد هزتنى وخوفتنى انا والدى الله يرحمه كان حنون اوى صحيح مكنش بيبين حنيته غالبا لكن عمرى ما غاب احساسى بيها \
لكن البنت اللى بتتكلمى بصوتها او اللى نقلتى صوتها بمعنى ادق صوت عالى اوى وصعب
.........
كل تحياتى وتقديرى
.......
نورالدين محمود
ازيك يا شاهي يارب تكوني بخير
انا قلبي وجعني و عنيا دمعت ليه كده اقرب الناس مش بتحس بينا :(
بنت خيخة واي كلام
معلش ياخوخة طول ما الواحد عايش في نعمة غالبا مش بيحس بيها وبيفتكر ان هو دة الطبيعي
ربنا يرحمنا جميعا احياء واموات
سلام يا قلب شهشوهة
........................
فاتيما
ازيك ياطماطم وحشتيني اوووووووووووي
تقريبا اغلبنا هذة البنت وفي ناس اكتر شوية كمان
ايوة ياطمطم ادعي ادعي اوي وربنا يستجيب ان شاء الله
وسلامة قلبك الف بعد الشر عنة
حاضر هابوسلك العيال بوسات كتير
سلام ياقمر
..................
دودو
سوري يادودو بس يعني مش معقول اتنكد لوحدي مش انتو اصحابي وحبايبي يبقى لازم تشاركوني
تعالي في حضني يابنوتي الجميلة وانا هطبطب وادلع واعمل كل اللي عاوزاة بس لو عملتي حاجة غلط ممممممممممم مالكيش عندي غير.... والا اقولك بلاش
سلام ياقطة
واحدة مفروسة
نحن السابقون وانتم اللاحقون
معلش يامفروسة
مع ان سهل جدا ان الواحد يظهر الحب دة بس محدش عاوز يفكر ولا يتعب نفسة مع ان ممكن نظرة فيها حنية تكفي جدا
يوة كفاية كدة ربنا يحنن كل القلوب القاسية
وحشتينا العيال بيسألوا عليكي
.....................
نور الدين
هيييييه اول مرة تيجي مدونتي
الله يرحمة
مش عارفة لية دايما بحس ان الأبهات الحنينة بتموت بسرعة اكتر من الأبهات التانية
انا عارفة انها اعمار وبيد الله سبحانة وتعالى بس في مثل بيقول الموت بيختار
ومن خلال خبراتي الشنيعة الفظيعه اقدر اقول اة بيختار
تحياتي الكتيرة اوي
...................
اميرةعلى كوكب مهجور
انتي فين ؟ مش هاتيجي اكتوبر قريب والأ اية؟
تقريبا كدة اقرب الناس مابقتش تحس اصلا
ربنا يهديهم ويهدينا جميعا
كلامك أثر فيا أويي بجد
وحشني كلامك وبوستاتك يا شاهي ماتبقيش تغيبي أوي كده:)
إحساس وكينونة الأب ف حياتى ملهاش مكان ولما حد بيتكلم عن احساس الابوة قوى بالشكل ده بحس انى غريبة لانى مش قادرة اقدر فعلا فعلا الاحساس ده
والدى توفى من وانا عندى سنة ونص يعنى ملهوش مكان اصلا ف حياتى، بس اللى اعرفه انى اتربيت ف منطقتى على حس سمعته الطيبة بين الناس ولغاية مكبره والكل عارفنى بسبب والدى
كلمة بابا مش بعرف اقولها ولما قلتها قلتها لجوزى يمكن لاحساس بالامان او لا مش قادرة احدد بالظبط
كلامك ف البوست ده خلانى نفسى ولادى - اول مرة اقول ولادى - يكون لهم اب يحتويهم ويهتم بيهم ويقدر نعمة وجودهم وميلجأوش ف يومانهم يقولو كل ده
الاب الناكر لنعمة وجود أطفال ف الحياة الله يكون ف عونه لانه غلبان قوى لان ربنا اداله قلب من حجر ميقدرشى يحس ويقدر
اوقات لفقدان احساس معين بندى اللى قدامنا احساسنا المفقود وبنبث لاولادنا اللى احنا محسيناش بيه وبشكل ما دى نعمة اخرى من نعم ربنا علينا
الحمد لله ان ف النهاية بقى عندنا قلب زى قلبك يا شاهى وان فيه ام - انوش - تستاهل الجنة بخيرها كله للى عوضتكم بيه من احساس واللى زرعته ف قلوبكم من طيبة وحب لكل الناس
هبة
صباحو خير
أيه بس على الصبح
ما احنا ساكتين وراضيين
لازم تقلبي علينا المواجع
قطيعة تقطع النحنحة
تعالي يا وااااد لما اطبطب عليك شوية جاتكم البلاوي
تحياتي يا شاهي
رحاب مصطفى
ازيك يا رحاب عاملة اية؟
حاضر هحاول ماغبش كتير
تحياتي
....................
دوبة
مش عارفة اقولك اية
حلو اوي انك تقولي ليحيى يابابا وتبقي حساها بجد مش كلمة كدة وخلاص وانا عارفة ان يحيى يستاهل فعلا انك تقوليهالة وعارفة كمان انة اب رائع وهايعرف يتعامل مع اولادك كويس ويارب دايما تفضلي تقولي اولادي
يالا شدي حيلك بقى عاوزين نكملهم عشرة
ربنا يحفظهم
اما الكلمتين الحلوين اوي اللي قلتيهم عليا انا وماما
فليكي مني حضن كبير اوي وبوستين بس لما اشوفك بأذن الله
سلام
...................
طهقان
صباحو نووووووووور
اضحكك الله كما اضحكتني
ايوة كدة لازم تطبطب على الواد وتدلع البت وربنا يقدرك بس انت ركز شوية
صباحك فل ان شاء الله
تحياتي لأستاذي الكبير
انا داخلة اسلم لانى لقيت اسمك فى مدونة البت خيخة يا اوختشى وبعدين قعدت اقول هى ولا مش هى على وتيرة حقها ولا مش حقها وبعدين لقيتك كاتبة عن التقويم فقلت هى دى هههههههههه
عاملة ايه ووحشتينى وانا حبيتك وبتاكلى ولا لسة معصعصة كده ؟
تعالى اقعدى معايا شهر وانا اخليكى متختخة - وش بيغمز -
هبقى اقرا بقى واعلق فيما بعد
سلامو عليكو
إرسال تعليق