الأربعاء، ٢٨ أكتوبر ٢٠٠٩

ابو العريس

السلام عليكم
ندخل في الموضوع على طول
اخويا اتجووووووووووووووووووز
من كام يوم كدة وبالتحديد يوم 23 اكتوبر
اتجوز احمد اخويا
مش هاتكلم على الفرح وحلاوتة
ولا عن احمد وجمالة
هاتكلم عن الأحساس نفسة
الأحساس بالفرحة
الأحساس بفرحة الناس اللي كانت موجودة
الناس اللي كانت جاية فعلا وهي فرحانة لينا اوي
مش جاية علشان تتفرج علينا
مش جاية علشان ينتقدونا
اد اية حاجة حلوة اوي لما تحس ان الناس فعلا جاية فرحنالك من قلبها
اما انا فكنت ابو العريس
ايوة ابو العريس
اللي كان خايف على ابنة جدا
ومش عاوز حد يجي جنبة ولا يطلب منة حاجة
وكنت مظبطة كل حاجة والحمد لله
نادرا لما بشوف فرح بيكونوا كل الناس فية مبسوطة وراضية
بجد بجد فرحنا كان ..............
مش عارفة اجيب كلمة تعبر عن اللي عاوزة اقولة
ومن هنا من مدونتي حبيبتي
احب اشكر كل الناس اللي كانت موجودة معانا
كل الناس اللي شوفت في عنيها فرحة حقيقية من القلب
اما الشكر الكبير اوي اوي اوي هايكون ل
بت خيخة و دوبة
بت خيخة اول واحدة جت بعدي على طول
وبالرغم من انها كانت لابسة كعب عالي
ورجلها كانت بتتقطع
الأ انها صممت تفضل واقفة معايا نستقبل الناس
مع انها ماتعرفش حد خالص غير ماما واخواتي
بت ياخيخة
كلام الشكر اللي في الدنيا كلة مش هايكفيني علشان اقولهولك
اما دوبة
فكانت راجعة من المستشفى كانت بتشوف عمر
ابنها اللي عندة اربع ايام و كان محجوز في الحضّانة
ومع ان ولادتها كانت قيصري
وبالرغم من الالم النفسي والجسدي
الأ انها نورتني في الفرح
انتو متخيلين
يعني اية تعدي عليا علشان تباركلي وتسلم على العريس
صديقتي دوبة
اسعدتي قلبي اوي
.........
عذرا ابو العريس
اخذت مكانك وقمت بمهامك
الي ان تستفيق وتدرك ان لك اولاد
......................
اشوفكم على خير

هناك ١٧ تعليقًا:

الـسـيـدة نـون يقول...

:) :) :) :) :) :) :) :) :) :)

اليوم فعلا كان يجنن
وانتى كنتى زى القمر انتى واخواتك وماماتك

واحمد كان كميلة ومكسوف وصغنوني خالص

ربنا يحميه يارب


انتى ماكونتيش ابو العريس

ده انتى كنت ابو العريس وامه واخته
ولو كان معرفش كنتى هتكونى مراته

نيهاهاهاهاهاهاهاهاهاهاهاع



عقبال ما تشوفى ولادك يارب يا شهشوهة


الف الف الف الف الف مبروك



انتى ليه مش منزلة صورة لاحمد وايمان مع البوست؟

ولا اقولك بلاش تنزلى صور
خوفا من الحسد
وخوفا ان حد ابن حرام ياخدها يستخدمها فى اعمال مشبوهة


خلينا فى الامان احسن


مبروك يا ابو العريس

اختك خيخة

خواطر شابة يقول...

مبروك الفرح وعقبال البكاري ان شاء الله
البوست كان ماشي حلو ومشاعر فرحة وتفاؤل وود وهوب كرسي في الكلوب بهده العبارة
عذرا ابو العريس اخذت مكانك وقمت بمهامك الي ان تستفيق وتدرك ان لك اولاد......................
جملة قاسية جدا وادرك انك لم تكوني لتقوليها لولا انك احسستها فعلا
دعواتي لك ولاخيك بحياة طيبة مليئة بالسعادة ان شاء الله

دودو يقول...

مبروك يا شووشو يا جميل

وعقبال ولادك يا رب ما تفرحى بيهم
عارفه ان الواحد حاسس من كلامك بالفرحه اوى . اول مره اقرا كلام فرحان كده
ربنا يخليكى ليهم كلهم
وعلى راى خيخه انتى اكيد كل حاجه

والف الف الف مبروك
ودى زغروته معرفتش اعملها فى الفرح

لولولولولولولولولولولوى

أميرة علي كوكب مهجور يقول...

مبروك يا شاهي ربنا يفرحكم دايما و ربنا يسعده في حياته وعقبال لما نفرح بالكتاكيت التلاته :)

عبد من عباد الله يقول...

الف الف الف مبروك و ربنا يتمم بخير و يرزقه يا رب الزريه الصالحه ..

و يديم عليهم هدوء السر و راحه البال ، بس نصيحه بقى سبيه كده الاسبوع اللي جاي ده خالص و يا سلام لو الاسبوع اللي بعده يعني لو تقدري تنسيه كام شهر كده هههههههههه

لحسن انا حاسس انك مش حتسبيه في حاله بقى و لو خلف بقى حتمسكي عياله توريهم .............. كل حاجه حلوة إن شاء الله

الف مبروك ليكي و لاحمد اخويكي و ان شاء الله ربنا يكرمهم ويتمم جوازهم على خير ان شاء الله .

فاتيما يقول...

الف مبروووووووك يا شاهى
ربنا يبارك فيهم و يحلى كل أيامهم
عثبال العيااااااااال بقى
اديكى بتتدربى على التلات ليالى الكبار الجايين
البت خوخة لابسة كعب عالى ؟!!!
صورتوها و لا لأ عاوزة اشوف المنظر التاريخى دا
و دوبا ...ماذا يقال عن دوبا كاتر من انها حضن كبير ملوش آخر
بصراحة
انتوا التلاتة مثلث
الجدعنة و الدفا و الحنان
خوخة الجدعنة
و دوبا الدفا
و انتى الحنان يا شاهى
الف مبروك يا حبيبتى
بس آخر سطرين وجعوا قلبى
رغم كل البهجة

dreem يقول...

ألف مبروك شاهى ولو اننها جت متأخرة
ربنا يسعده ويخلف عليه بالذرية الصالحة .
أما بقى عن البت خيخة ودوبا فهقولك : رب أخ لك لم تلده امك .
ربنا يبعد عندكم النفوس المريضة ويديم بينكم المحبة
تحياتى

Asmaa mahaba يقول...

مبروك :) ربنا يجعل ايامك كلها فرح وسعاده ويرزقهم بزريه صالحه يا رب
اما عن خيخه فكعادتها دائمه جدعه ربنا يكرمها ويبارك فيها يا رب

Rehab Mostafa يقول...

الف مليون مبرووووووووك يا شاهي :) وعقبال ماتكوني ام العروسه وام العريس ان شاء الله:)

mohra يقول...

الف مبروك يا ابو العريس وعقبال باقى العيال ان شاء الله

momken يقول...

الف الف مبروك ياستى
عقبال ابنك فعلا وتكونى ام العريس

وربنا يهدى كل الاباء

ربنا يديم عليكم الفرح


تحياتى

طهقان يقول...

يا خراااششييي

واحد تاني !!
قصدي
ألف مبروووك


وانت يا شاهي يا اختي إزاي تسيبيه يعمل حاجة زي دي ؟

مش كنت نصحتيه؟
هي المشرحة ناقصة قتلا؟

مش كفاية جيش الطهقانين دا كلو ؟

على كل حال

باركيلهولي ... وقولي له
بكرة تندم يا جميل
وتقعد جنبينا
هاديلك عناون قهوة الطهقان كله . ونبقى نشوفك بقا
سلام

بسمه عبدالباسط يقول...

أول زيارة ليا الاقى فرح وكلام جميل كده

الف مبروك وربنا يتمم ليه بخير يارب

تصدقى لو أقولك أنى حاسة بنفس مشاعرك من ساعة ما أخويا خطب وعمالة أرتب كل حاجة لحد فرحه

مبروووووووووووك للمرة التانية

الـسـيـدة نـون يقول...

لو انا ابو الدراويش
مش هلاقى كلمات حلوة زى دى علشان اهديهالك يا شهشوهة



مين اللى يسهر جمبى الليل
مين اللى باله معايا طويل
مين اللى يسهر جمبى الليل
مين اللى باله معايا طويل
مين لما اتعب يسعدنى
ومعايا حمل الهم يشيل
مين هيا غير ست الستات
وياها بتصبح وابات
واجيب لمين غيرها واهادى
ام العيال العشرية
ياعم يا بتاع الطيب .. المسك ريحه ما يتعيب
ياعم يا بتاع الطيب .. المسك ريحه ما يتعيب
ادينى من العترة الطيب .. وأخد لمحبوبتى هدية
لأم العيال العشرية
ياعم يا بتاع المخمل .. ادينى نوع توب المحمل
ياعم يا بتاع المخمل .. ادينى نوع توب المحمل
علشان حبيبتى تتجمل .. ابيض بلون الصباحية
ابيض يا قلب العشرية
جايب معايا اللى في يدى .. وقدرت اجيبه من كدي
جايب معايا اللى في يدى .. وقدرت اجيبه من كدي
ولا تقوليش بس انا عندى وكفاية بتهلى عليا
اصلك اصيلة يا عشرية
ما يغلى يا ست الستات .. عليكى لولى ولا غويشات
ما يغلى يا ست الستات .. عليكى لولى ولا غويشات
واجيب لمين غيرك اهادى .. ام العيال العشرية
مين اللى يسهر جمبى الليل
مين اللى باله معايا طويل
مين اللى يسهر جمبى الليل
مين اللى باله معايا طويل
أم العيال العشرية
أم العيال العشرية
أم العيال العشرية


اى خدمة


اختك خيخة

غير معرف يقول...

nice blog

shahy يقول...

شكرا كتير كتير ليكم كلكم وعقبال اللي ماتجوزش
والمتجوز عقبال اولادة مش هقول عقبالة تاني هي مرة واحدة وخلاص كلة بيحرم


تحياتي

Unknown يقول...

والله انتى رايقة وفيقة وانتى عارفة انى بحبك من زمان ههههههههههه