بعد سنة ونص دي اول مرة اشوفك فيها
بعد سنة ونص انت زي ماانت
بعد سنة ونص انا زي ماانا
وكأني لسة سيباك امبارح
كان نفسي اشوف في عينك نظرة اشتياق
كان نفسي احس ان في حاجة اتغيرت
ايوة في حاجة اتغيرت
عارف اية؟
لاول مرة قلبي مايدقش من خوفة منك
انا بس كنت محرجة شوية لانك ماردتش عليا السلام
انت طول عمرك بتقول:انا مفيش حد بيوحشني
وبتبقى فرحان اوي بقوتك دي
بس دي مش قوة دي قسوة
انت عارف
ناس كتير بتقولي كلمية في التليفون
واعملي اللي عليكي
علشان ربنا مايزعلش منك
طيب يعني انتو عاوزني اضحك على ربنا؟
عاوزني اتكلم مكالمة باردة مالهاش اي طعم
عاوزني اطمن علية واقولة عاوز حاجة
طيب وبعدين؟؟
انا هبقى بقول كلام من ورا قلبي
وهو كمان هيبقى حاسس انة كلام تقضية واجب وخلاص
طيب لو طلب مني حاجة
اعمل انا اية ساعتها؟
لو قالي تعالي زوريني في بيتي
هقولة اية؟
اقولة لأ مش هينفع تعالى نتقابل برة
والا اقولة ماينفعش ازورك في وجود مراتك التانية
والا اقولة البيت دة مش هينفع ادخلة تاني
نفسي اللي جوايا يتغير وهو كمان اللي جواة يتغير
ويبين دة
مش ضعف خالص اني اكون واحشاك
مش ضعف ابدا انك تكون نفسك تشوفني او تكلمني
بعد سنة ونص من الفراق
ماكنتش احب ان المقابلة تكون كدة
بعد سنة ونص مش عارفة اعمل اية
مش عارفة اقول اية
يارب
انت وحدك اللي عارف
انت وحدك اللي شايف
انت وحدك اللي بتقف جنبي
الهمني الصح
قولي اعمل اية
اسمع كلامهم وانا مش عاوزة كدة
والا استنى يمكن يتغير وقلبة يحن
وساعتها اكيد انا كمان هبقى احن من احن حد في الدنيا
وهيبقى هو دة الطبيعي
يارب
يارب
يارب
هناك ١٢ تعليقًا:
اقولك إيه يا شاهى ؟
الاول كل سنةو انتى العيال
بألف خير يا رب
و ابو الدراوريش كذلك بألف صحة و خير
ثانياً
بطلة قصتك ..هقولها اللى بقوله
لأى واحدة و واحد فى موقفها
علاقة الابوة و الامومةو الاخوة و متهيألى أى حاجة
أى علاقة بين طرفين
طرفين ..واحد إتنين
اتنين بيدوا و كمان ياخدوا من بعض
مينفعش
حد يدى علطول
و حد ياخد علطول
اللى بيدى هييجى عليه وقت
و يتعب و مشاعره تفلس
و اللى بياخد هييجى عليه وقت
و يبقى قلبه يقسى معتبراً العطاء دا حق مكتسب ...
الدنيا متنفعش تمشى كدا
إحنا بشر و ربنا خالقنا
و عارف ضعفنا
عشان كدا بيدعونا نكمل النقص دا
ما حيينا
لأنه عارف إننا عمرنا
ما هنقدر نكمله بسهولة
قوليلها تجرب تتصل
و تتكلم بس لما يقولها تعالى زورينى تقوله مش هينفع
انا عاوزة اشوفك برا
لو عاوز تريحنى ..ارضينى و نفذ طلبى
لو قال لأ
يبقى خلاص
اخر جملتين كتبتيهم صح
الحنية لازم لها مناخ عشان تظهر
و تتجلى و تفيض على اللى حواليكى
محدش بيقدر يخترعها
او يدوس على زرار و يطلعها فجأة
خلى صاحبة القصة
تعمل اللى قلبها يمليه عليها
الضغط يولد الإنفجار و لو ضغطت على روحها ..النتيجة هتكون سيئة
خليها فى حالة وسط
بين بين
خطوة من عندها
و خطوة من عنده
لو فضل واقف مكانه .. تقف
و لو خطى ناحيتها خطوة
انا واثقة انها هتخطى ناحيته عشرة
عشان هيا طيوبة خلقة
وربنا يحنن القلوب على بعضها
يا رب
وحشتينى و الله
يا بنتى إنتى قلب
و طالعله بنى آدمة
بوسة و حضوناااااات يا حبيبتى
اصل الحنيه بتبقي حاجة يا موجودهه يا مش موجوده في تركبيه الواحد
والحب بينا وبين الناس مش بالعافيه يا بحبك يا بكرهك والمعرفه كمان مش بالعافيه
المهم لما نيجي نعمل حاجه نعملها علشان احنا كده من جوانا لسه كويس ونظيف
كل سنه وانتي طيبه يا شاهي ويارب الكتاكيت يكونوا بخير
وعيد سعيد عليكم يارب يا ام الذوق كله:)
شاهي يا قمرة
انا كنت حقول كلام كتير
بس لاقيت فتيما قايلاه و زيادة
يعنى كلامها عين العقل
بجد طمطم شكلهاامنا بوسة ليكي و لطماطم
و خليكي يا شيخة فى العيد ده مشغولة فى الفتة و اللحمة
و كل سنة و انتى و ولادك و كل اللى بتحبيهم طيبين و بخير
شاهى وحشتنى
كل سنة وانتى طيبة يارب و بخير
بصى انا علاقة البنت بالاب لى مختلفة
مش بشوفها زى ما فاتيما بتقول
هات و خد
يمكن بشوفها ان اكيد الواحد و هو صغير اخد كتير من باباه و مامته
و جيه الوقت عليه انه يدى
و دايما افتكر و لا تقل لها اف و لا تنهرهما
الاب و الام بالذات
لازم مهما حصل
نحاول تانى معهم
انا لو فكرت ان لما اكبر حد من ولادى يستنى ياخد منى علشان يدينى انهار
ما انا اهو بادى من غير ما اخد
وقتهم بقى يدونى من غير مقابل
مش لازم زيارة البيت
بس الحنية بتتحس
من مجرد الكلام
لما بيكون ولادنا فيهم عيب بنفضل وراهم لحد ما نصلحه
و الناس الكبيرة بيكونوا زى الاطفال
لازم نكون معهم بالنا طويل
زى الاطفال بالظبط
طب يا داليا
ممكن اعلق على كلامك
خليكى معايا
طب ماذا لو
هذاالاب مداش تقريباً أى حاجة
و بنته صغيرةو لحد ما كبرت !!
كان أنانى
بما يكفى إنه يبص لحاله
و ميهتمش غير برغباته الخاصة
و أهمل واجبه قصاد البنت
و بالتبعية قصاد امها
و خلى التقصير يبقى مضاعف
و اتحول لعقدة و كلكيعة ؟!!!
محدش بيقول يعالج الحالة نفسياً ... مع إنه مسئول برضو لكن نعديها
وانا بتكلم على فكرة
من وجهة نظر ام
مش ابنة
عارفة قصدى أيه يا داليا
قصدى أنى جربت يعنى إيه الواحد يبقى عنده عيال
ومتعلقين فى روحه و قلبه
قبل فلوسه و واجبه الإجتماعى
و التعبير عن حبك لعيالك ممكن يحصل لو انتى عاوزه يوصل
قصدى ع الحنية اللى ملهاش دعوة
بأى حاجة
ممكن الأب دا
يكون فى بيت تانى
و عايش مع ناس تانين
بس الحب جواه يبقى لبنته
و محدش يشاركها فيه مهما حصل
لا ظروف
و لا زوجة تانية
و لا أى حاجة
و فى إيده يحسسها بذلك
و لو فى مكالمة تليفون حتى
و خصوصا بقى انها كبرت
و خلفت
و مبقتش عيلة
و مش هتحس مثلا
و تقدر
يا حبيبتى العلاقة
لازم تكون محسوسة
من الطرفين
قصدى مش هات و خد و بس
بس كمان مينفعش مشاعرى تفضل إيجابية
ناحية أى مخلوق و انا مش حاسة بحبه
لمجرد إن فيه روابط قانونية و رسمية بتربطنى بيه و تطلبى منه أبقى معاه عادى بينما انا عنده أقل من العادى
علاقتك بولادك يا داليا
لا جدال فيها
أنتى ام حقيقية
بتقومى بدورك المطلوب منك
عن طيب خاطر و بكل حب مش لأنه واجب
عشان كدا مش قادرة تتخيلى إن ممكن يكون فيه أب او ام مقصرين
مهما حصل منهم
تعرفى ليه حبى ناحية يوسف رهيب
مش لأنى ام و خلفته و خلصنا
لأ...لأن طول 8 سنين كان يوسف ف حضنى ألطف و اجمل و انقى ابن
و المشاعر اللى إدهالى بمنتهى التلقائية تكفينى ميت سنة قدام
و لما كلمنى آخر مرة
و قال حاجات المفروض تصدمنى
فى نفسى كأم ...
خدت المسألة بهدوء نوعا ما
لأنى عارفة انه مجرد طفل
و مضحوك عليه
و حتى لو كبر و بقى عند 30 سنة
و وقف يقولى فى وشى نفس الكلام
هزعل برضو بس هقدرالظروف
و هفتكر المشاعر الحلوة
اللى بيننا و اللى محدش فى الدنيا
و لا أى فراق و لا ظروف ممكن تغيرها ....
كنت بقول لشاهى
إن بطلة القصة معندهاش الشعور دا
شعور إن هذا الأب مقهور
و بعيد غصب عنه
لأنه لو عاوز يبين إنه بيحبها
و حريص على مشاعرها بجد
و لا اى شىء فى الدنيا هيمنعه
كون كبار السن بيرجعوا فى تصرفاتهم كالأطفال ..موافقاكى
بس فى حالات محددة مش طول الوقت
الكبار لا ينقصهم الحكمة
و القدرة على إظهارمشاعرهم برضو
أنا بهدى النفوس و لا ببوظ الدنيا شكلى ؟!!!
على كل بحاول أشرح موقفى دلوقتى
و بحبكما فى كل وقت
سلام
انا موافقة على كلام داليا جدا.. الام والاب العلاقة بيهم مختلفة عن العلاقة بباقي البشر .. حتى لو الاب دا زي ما فاتيما بتقول كان اناني ومبيديش حنية ولا اهتمام ولا رعاية طول عمره.. مش مهم.. هو اب وجابك الدنيا يبقى حقه عليكي البر بيه.. انا دايما بفتكر (ليس الواصل بالمكافئ) مش واصل الرحم هو اللي يود اللي يودوه ، واصل الرحم هو اللي يصل اللي بيقطعوه ، وحتى لو مشاعر الابنة دي ناحية ابوها مفيهاش حنية حقيقية مش مهم.. المهم يكون فيها طاعة حقيقية لله ، ودا لوحده هيخلي قلبها فيه (رفق) ..انا دايما لما ماما تزعلني ولا تيجي عليا ف حاجة وجوزي يقولي لازم تنقطعي عنها شوية عشان تفتقدك وتحس بغلطها ف حقك - دايما اقوله دي امي وهي ينفع تحاسبني وتعاقبني لكن انا مينفعش احاسبها او اعاقبها.. لها العتبى حتى ترضى ، والكلام دا على الاب برضه
أنا مش فاهم حاجة
مين اللي راح ومين اللي جه ؟ مين اللي اتجوز ؟
فاتيما
وانتي طيبة ياقلبي
الله على لسانك اللي بينقط عسل ابيض
ربنا يخليكي ليا ويحفظك ويريح قلبك
يارب
.................
اميرة على كوكب مهجور
وحشتيني يا اميرة واللهي
عندك الف حق الحنية يا موجودة يامش موجودة
وانتي طيبة وبخير ويارب تيجي اكتوبر في الأجازة علشان نتقابل تاني بأذن الله
تحياتي يا قمراية
...............
واحدة مفروسة
عندك حق كلام فاتيما جمع كل حاجة
...............
قوس قزح
ازيك يا داليا عاملة اية؟
بعد رد فاتيما انا مش لاقية كلام اقولة تاني
تحياتي ياسكرة
...............
بوبو
ماشي طيب فين حق الأبناء
ماهو الواحد قبل مايطالب باللي لة لازم يدي اللي علية الاول علشان حتى يبقى لة عين يطلب بيها حقة
الزعل وان حد يجي عليكي دي امرها سهل ومش محتاجة خصام وبعدين الزوج مالهوش دعوة خالص بالعلاقة بين الأب والأم
اذا كان عندة كلمة حلوة يقولها ولو ماعندوش يبقى يسكت احسن
عارفة المثل اللي بيقول انا ادعي على ابني واكرهه اللي يقول امين
اهو الاب والام كدة انا حرة معاهم واقول اللي عاوزة اقولة لكن حد تاني نو والف نو
تحياتي
بت خيخة واي كلام
واللهي انتي اللي كميلة وعسل وسكر
طيب فهمنا نفتح قلبنا لمين
اية لازمتها الشتيمة بقى؟ بس بما انك حسيتي انك عاوزة تشتمي وانتي عارفاني ضعيفة ومش هقدر ارفضلك طلب يبقى اشتمي ياسيتي ولا يهمك
بحبك يا اجدع خيخة
............
طهقان باشا
مش فاهم اية بس
دة كل حاجة واضحة اهو
واحدة بتتكلم على باباها
وبس خلاص
تحياتي الكتير لك يا استاذي الفاضل
مش قادر اقولك غير ربنا معاكى
ياشوشو مش يمكن لو كنتى دخلتى البيت كنتى لاقيتى تغير والنفوس اتصافت وياعنى مراته ليها حق اكتر منك فى البيت كننى جربتى واتكلتى على الله وربنا يهدى النفوس
إرسال تعليق