السلام عليكم
سبحان الله مفيش حاجة بتفضل على حالها ابدا
مين كان يصدق؟
مين كان يصدق اني بعد العمر دة كلة يحصل معايا كدة؟!
بعد مابقى عندي 33 سنة وكام شهر يجرى لي اللي جرى
ولا كأني بنوتة عندها 13 سنة
إهئ إهئ إهئ
هقولكم ومش عاوزة تريقة ولا ضحك
دكتور الأسنان ركب لي تقويم..!
ايوة هو الحديد اللي بيبقى على الأسنان
عاعاعاعاعاعاعا
انا مش زعلانة علشان شكلي اتغير
ولا علشان بقي اللي اتشلفط
ولا علشان بطن خدي اللي اتخرشم من الحديد
اللي مزعلني اني مش عارفة اكل
اصل انا كنت بحب الأكل الناشف
يعني مثلا كان لازم احمص العيش قبل لما اكلة علشان يبقى مقرمش
وكنت بحب اكل من اخر حلة الرز اللي هما الحبة المقرمشين
دلوقتي غصب عني باكل الأكل طري على الأخر..يع
غير كدة بقيت مش عارفة اقطم
ايوة بجد مش بعرف اقطم اي حاجة حتى لو كانت طرية
وبقعد اقطع الأكل زي العيال الصغيرين بأيدي الاول
دة غير بقى نظرات اولادي ليا
الشنيور: واضح جدا انة قرفان مني ومن شكلي
بيفضل باصص عليا بنظرات غريبة تقريبا كلها قرف
اصلة انف اوي
الرايقة:بتبص عليا بأستغراب وبعدين تبتسم ابتسامة رقيقة
وانا مش عارفة كدة يعني انا صعبانة عليها والأ فرحانة فيا؟
اما الجبارة:كل شوية تقولي: ياماما ممكن المس الحديد
وبعدين سألتني سؤال
- هو دة عقاب؟
انا: لأ اسمة تقويم
الجبارة: ايوة يعني الدكتور حطة علشان يعاقبك علشان
ماكونتيش بتروحي لدكتور السنان وانتي صغيرة؟
انا:يالهوي اية يابنتي التفكير دة؟
هو حطة علشان عندي ناب ازرق ..
يوة ناب لبني وكان المفروض ابدلة وانا صغيرة يعني يقع
ويطلعلي واحد جديد كبير فلما الناب اللبني ماوقعش
طلع الكبير وراة فلازم اشيل اللبني الصغير وبما اني عديت
ال30 سنة فكان لازم اركب التقويم علشان يرجع الناب الكبير في مكانة
ومايبقاش معوج وتوتة توتة خلصت الحدوتة
الجبارة: يعني انا لما اكبر زيك هاركب حديد زية؟
انا : لأ انا هاخلي بالي وانتي هاتيجي معايا عند الدكتور علشان يتابع اسنانك
الجبارة: ماشي بس من غير حقنة
انا : ان شاء الله
..........
مميزات التقويم
زي ماقعدت ارغي على عيوب التقويم
كان لازم برضة اقول على المميزات اللي اكتشفتها:
1 - حمزة اللي عندة 7شهور واللي هو ابن دعاء صحبتي
بقى يضحكلي بمجرد ما ابتسم
وبقيت مش محتاجة لمجهود علشان الاعبة واضحكة
2 - بقيت على الموضة
اقولكم ازاي
وانا قاعدة تحت ايد الدكتور وهو بيركب التقويم وبيكلم الممرضة
وبيقولها: اية رأيك نعملها لون اية؟
قالتلة : شوف انت يادكتور حسب الموضة
فقالي: تحبي لون اية؟
قلتلة: فوشيا - انا طبعا بهزر لاني كنت فاكراة بيهزر -
قالي: موجود كلة موجود
وراح مطلعلي كيس حاجات بلاستيك مليانة الوان كتير
قلتلة : انت بتتكلم بجد والأ بتهزر
قالي : ايوة بجد دة في بنات في الجامعة بيجوا يعملوا التقويم
وهما مش محتاجينة علشان يبقوا على الموضة
ويبقى لون التقويم ماشي مع العدسات او لبسهم وكدة
قلتلة : بجد.. طيب واية اللون الموضة دلوقتي
قالي : تحبي اعملك كل واحدة لون؟
انا: ياسلام وابقى عاملة زي البلياتشو
الدكتور: خلاص هاعملك لونين بس انتي لابسة ازرق
ادي لون تختاري التاني اية؟
انا : احمر اصل جوزي اهلاوي- واهو يبقى هبل في هبل-في سري طبعا
.....
3- التقويم هايقوي عندي اللغة العربية وهاينمي ذكائي
لأني بحاول اتجنب الكلمات اللي فيها حرف الفاء
وبدور على كلمات بنفس المعنى وبدون حرف الفاء
لان نطقة بعد التقويم بقى عار على الأخر
وفي الأخر احب اقولكم
سبحان مغير الأحوال من حال الي حال تاني خالص
اشوفكم على خير
هناك ٢٠ تعليقًا:
يا عينى يا ضنايا يا بنتى
كل ده يجرالك ويحصلك
وبقيتى على الموضوه بالالوانات
يا الواناتك يا شاهى
لو سمحتى رجاء خااااااااااااص جدا
عضيلى البنت الجبارة دى لانها جبارة فعلا
وبوسيلى البنت المسهوكة حبيبتى ذات العيون الكحيلة
وطنشى حودة عشان صاحبى
يلا باى
=============
يلا قولى ورايا
فتح
فجر
فراولة
فوفو
مهفووووووووفة
D:
يارب تشيليه بسرعة عشان مش تفضلي متضايقة منه كدة
بس مميزات التقويم موتتنى بجد D:
ياااا
كنت عايزة ابقي اول تعليق
دوبا سبقتنى بجزء من الثانية
D:
الف سلامه عليكى يا قمر
الف سلامه عليكي
معلش هي السنان كده متعبه دايما
ربنا يعدي يومين التقويم دول بسرعه
وبعدين هو مفيد برده اللي يزعلك من الولاد قوليله هاعضك بالحديده
ولما تخلعيه قوليلهم اللي هيزعلني هاروح اجيبله الحديده
ههههههه
الف سلامه عليكي
الواحد ساعات بيحصله حاجه صغيره من زمان تخليه يضطر يتحمل علشانها حاجات كتير بعدين
سبحان الله
معلش ربنا يكرمكم بقى
سلااااااااااااااااااااااااااااام
اخوكي ايهاب
ههههههههههههههههههههههه
يا نوغة
ههههههههههههههههههههه
انا شوفته
بس ما شوفتش الالوان يا شاهي
يالهوي جالى عما الوان؟؟؟؟؟
يعنى مش بتعرفي تاكلى؟؟؟؟؟
بحسدك
اديني اسم الدكتور ده
اروح اعملى واحد يمكن يخليني اعمل رجيم اجباري
ههههههههههههههههه
بصي جاية من الحفلة مدغدغة وتعبانة بس جيت اعلق واشوف كاتبة ايه اصل الواد ايهاب الشنكوتي وهو معايا قالي ااقري البوست بتاع شاهي على فكرة انتي وحشاني قوي وانا زعلانة منك معنتيش بتسالي على بنتك
عزيزتى
يااااااه بالالوان دلوقتى
ولسه هنشوف ونسمع
تحياتى
سلام
هههههههههههههه
ايوة ماهو ده اللى ناقص وبعج كدة السنان هتتلون كمان
الف سلامة عليكى من التقويم
هههههههههه
هو بيوجع ؟
أول مره أعرف تقويم على الموضه ده :)) أحمر وأزرق طيب كويس أوي
ان شاء الله تشيليه قريب وتاكلي كل اللي نفسك فيه :)
أهى فتره و هاتفوت
فاكره لما لفينا كتير و فوتنا على كافتريا
فتافيت و فضلنا ناكل فته
و الوقت فات و كان فى الخريف
أففففففففففففففففففففف
كانت فتره فريده
لا حول ولا قوة إلا بالله ..... سبحان الله يعني الواحد يفضل يفكر ازاي يوفر في ظل الازمة الاقتصادية اوم ايه تيجي من عند ربنا ويخليكي متكليش .... ونعم بالله
سلام
ههههههههههههههههههه
هههههههههههههههههه
موتيني من الضحك وربي
بس هو متعب و مقرف جدا كنت حاطة واحد وانا صغنونة وكنت بكرهه موت مع ان التقويم كان بيتشال مش ثابت يعني
بس كان بيخنقني مووت وكنت بكره وكل شوية اشيله وماما تعقد تزعقلي ^ـ^
بس ايه حكاية التقويم بالالوان دا!!!
باين عليه توووحفة اللون الموف ههههههههههه
ربنا يعينك عليه
هههههههه
انا مبسوط انى جيت هنا:))
يااااااااااااااه
بقى اسيبكم كام شهر أرجع الاقى التقويم الهجرى ده
على العموم ربنا يعديها بالسلامة وتخلعى التقويم
انا عندى حل طالما انتى مش حابه التقويم
ما تخلى الناب اللى انتى عاملة التقويم عشانه وخلاص
انا عن نفسي شايل ضرسين منهم ضرس العقل
ههههههههههههه
اولا يظهر البوست قديم
لكن هعلق عليه
كفاية ان حمزة يضحك بجد ضحكة البيبهات دي جميلة اوي
و حلو تعليق الجبارة ده عقاب يا ماما ههههههههههههه
اما بالنسبة للناشف انا عندي 22 سنة و لسه حتي مكملتهمش بس مش بحب الحاجات دي و خصوصا الرز و العيش عشان بيوجعولي سناني
ماله الطري يعني وحش!؟!؟!؟!!
طيب كلتي حلاوة مولد :P:P:P
فينك يابنتى ؟
:(
وبتقوللي مفيش حاجة؟
دا التقويم بين حاجات
ربنا معاكي ... إلا الجبس ده بيقعد قد إيه؟؟؟؟؟؟؟
دا عقاب للشنيور
ربنا يكون في عونك يا ابني
الواحد مابيباقش مستحمل من غير تقويم
امال بقا لو بالتقويم
الله ؟ هو احنا في مدونة مين ..الشنيور ...
معلهش ...غلطة مطبعية
تحياتي يا شاهي
شركة مكافحة حشرات بالدمام
شركة تسليك مجاري بالدمام
شركة المثالية للتنظيف
شركة المثالية لتنظيف المنازل
شركة المثالية لتنظيف المنازل بالدمام
<a href="http://almomtazz.com/%D8%B4%D8%B1%D9%83%D8%A9-%D8%A7%D9%84%D9%85%D8%AB%D8%A7%D9%84%D9%8A%D8%A9-%D9%84%D9%84%D8%AA%D9%86%D8%B8%D9%8A%D9%81/
إرسال تعليق