الاجازة جت

انتهى العام الدراسي والاجازة جت..اهئ اهئ
ايوة دة انا باعيط
انتو عارفين يعني اية الاجازة جت؟
يعني قنبلة هاتضرب في البيت وفي دماغي!!!!
صحيح الدراسة كان فيها صحيان بدري ومذاكرة
بس دة اهون من اللي بيحصل في الاجازة
نبدأ من الاول:
انا عندي ثلاث اطفال
الشينيور 9 سنوات *لما بيكون عاوز حاجة بيفضل يزن ويخرم دماغي *
الرايقة 6 سنوات *بطيئة وكسلانة شوية*
الجبارة 3 سنوات *قوية ومفترية*
تخيلوا يوم طويل عريض مع الشينيور والرايقة والجبارة ومش هاجيب سيرة
الزغلول الكبير(باباهم )منعا للمشاكل (اصلة ديمقراطي ذي حكومتنا)م
انا عارفة ان الاولاد دول نعمة وبأحمد ربنا عليها
وعارفة ان في ناس مش طايلة ظفر عيل وربنا يخليهم ليا
بس في الاخر انا انسانة من لحم ودم يعني بيجي عليا وقت بأكون مش طايقة نفسي حتى
ومن حقي اني اقعد شوية في هدوء وماحدش يطلب مني اي حاجة ولو ساعة في اليوم
ليا زوجة عمّ كانت عاملة يوم في الاسبوع لنفسها وبس
يعني تروح النادي وماتعملش اي حاجة لاي حد ولا حتى الاكل
كنت زمان بقول دة طمع يعني اية يوم لنفسها؟!بس دلوقت بقى ليا رأي تاني.
دة حتى القاعدة على الكمبيوتر
بخناقة مع الشينيور اللى عاوز يلعب
وزعيق مع الرايقة اللي الدور عليها في اللعب
وعياط من الجبارة اللي عاوزة تتفرج على سي دي عالم سمسم
لأ وكمان بيت الراحة اللي هو اسمة بيت الراحة مابيبقاش في راحة
لو دخلتة وقفلت الباب (عادي يعني كل الناس لازم تقفل الباب)م
تيجي الجبارة وتخبط
الجبارة:ماما افتحي انا عاوزة اعمل بي بيّ
انا:روحي الحمام التاني
الجبارة:لأ انا عاوزة اعمل في الحمام دة
وطبعا لو مافتحتش في اسرع وقت يبقى غرقنا والحمد لله
بقول اية
كفاية كدة اهو فضفضت شوية وخلاص

الزمالك هزم الاهلي

من شوية كدة كنت قاعدة باقرأ البوست بتاع برايد
وبعدين حسيت بهدوء غريب
مش معقول يكون الماتش شغال والدنيا ساكتة كدة
بيني وبينكم قلقت وقلت افتح التلفاز واشوف اية الاخبار؟
وكانت الفاجعة
يانهار مش ابيض الاهلي انهزم يا رجالة
انا زعلانة انا صحيح اهلاوية بس نص كم يعني
اللي زعلني وقلقني بجد ان البية جوزي ابو العيال يعني
اهلاوي اصيل وغاوي ليالي حمرا زي طهقان بالضبط
يعني مايعرفش يتفرج على الماتش لوحدة لازم يكون مع الاصدقاء
سواء الاهلاوية او اخونا الزملكاوية
وبما انة شمات درجة اولى يبقوا مش هايسيبوة
والخوف بقى من انة يجي يطلع كل دة عليا
ربنا يستر ويعدي الليلة دي على خير
اقولكم حاجة انا مش متفائلة
ادعولي بقى سلام

مساء البنبوني والشيكولاتة والكريم شانتية

مساء الخير عليكم جميعا

بمااني معنديش حاجة اكتبها (على الاقل دلوقتي) قررت اسمي البلوج مفيش حاجة

والاسم دة كمان لاني بحب الشاعرة ايمان البكري وهي لها شعر جميل بهذا الاسم

واحد ناصح طبعا هيقولي آمال عاملة البلوج و واجعة دمغنا لية؟

سؤال جميل

انا عملتة لاني مش عارفة ابعت اي تعليق للاستاذة طهقانة من غير مايكون عندي بلوج وكمان دة بناء على توجيهات الاستاذ طهقان

استنوني اكيد ربنا هيفتح عليا وهلاقي حاجة اكتبها

السلام عليكم