السلام عليكم
المدرسة بتاعة الأولاد بتحرص على اجتماعات اولياء الأمور
سواء مع المدرسين او مع صاحب المدرسة والأدارة
الأجتماع مع المدرسين سهل كل واحد بيسأل عن ابنة وخلاص
اما الأجتماع مع صاحب المدرسة بيبقى صعب عليا شوية
لانة بالنسبة لي عبارة عن قاعدة بيترفع فيها ضغطي
وببقى عاوزة اقوم اخنق بعض اولياء الأمور
فكرت كتير اني ماأحضرش الاجتماعات دي بس ماقدرتش
لانة لازم يكون في تواصل بيني وبين المدرسة
المفروض الأجتماع دة بنقول فية على بعض ايجابيات المدرسة
وبنتكلم على السلبيات كمان والراجل صاحب المدرسة بيقعد
يكتب الملاحظات وفعلا بيحل المشاكل دي بعد كدة
يعني مثلا
طلبنا منة ادخال حصص للقراّن غير حصص الدين
وفعلا عمل كدة
وعمل كمان بريك مخصوص للصلاة
المفروض بقى في الأجتماع نقولة شكرا
ابدا مفيش حد نطق
اسمعوا بعض اراء اولياء الامور اللي مش لاقيين حاجة يقولوها
الأولاد مش بيتكلموا مع بعض بالأنجليزي
انا مش حاسة ان ابني في مدرسة لغات
نعم ياابلة الله يرحم والدك وانتي عاوزة تحسي ازاي ان ابنك في مدرسة لغات
طيب دة انا لقيت الشينيور بيقول قبل لما ياكل
ويذ ذا نيم اوف الله
بهدلتة قلتلة اسمها بسم الله الرحمن الرحيم
بقى يبقى احنا ربنا مدينا نعمة لغة القراّن ونروح نعوج لسانا
احنا الحمد لله بنفهم عربي وبنتكلم عربي
واحدة تانية
ياريت لما تختار المدرسين تختارهم خريجي مدارس لغات
طيب ماهو الراجل فعلا بيعمل كدة وبيعمل مقابلة جامدة مع اي مدرس جديد
والدليل ان كل المدرسين كويسين جدا في المدرسة
واحدة كمان
الميس بتاعة الفرنسي مشيت من المدرسة وبنتي اتأثرت نفسيا جدا
انتو ازاي تعملوا كدة
والله الميس مامشيتش فاجأة هي مهدت للعيال وقالتلهم انا عندي ظروف
وهاسيب المدرسة والعيال فعلا كانوا متعلقين بيها بس سلموا عليها
واتعودا على الميس الجديدة
لما قلت الكلمتين دول بصولي حتة بصة وكأني جاسوسة
وعلى فكرة هما دول الكلمتين اللي نطقت بيهم بس
وفضلت كاتمة باقي الكلام في قلبي
اخر واحدة بقى مصيبة
ازاي الميس تقول للأولاد يابقر هو دة لفظ يتقال في مدرسة
يالهوي دة انا ساعات بقول للعيال اكتر من كدة
دي بقر دي شوية عليهم
يعني انا مثلا لو ابني جية وقالي الميس قالتلي يابقرة
اول حاجة هاقولها لة انت عملت اية علشان الميس تقولك كدة؟
ماهو اكيد عمل حاجة
اصلها مش مجنونة علشان تشتم وخلاص
انا مش عارفة الناس دي بتفكر ازاي
دة كان ناقص يقولوا لصاحب المدرسة
انا بنتي كحت والميس ماقالتلهاش اسم الله عليكي
ازاي الناس دي مش بتفكر في انهم كدة بيضروا اولادهم
العيال فعلا لما هايكبروا شوية مش هايحترموا المدرسين
وهايبقوا حاسين انهم داخلين المدرسة بفلوسهم ومش هايهمهم حد
ماينفعش اني كل شوية اشتكي من المدرس على اسباب تافهة
معلش انا اتكلمت كتير بس اصلي متغاظة على الاخر
اشوفكم على خير
