السلام عليكم
عندي شوية موضوعات ملهاش علاقة ببعض وكنت محتارة اكتب انهي موضوع
وبما اني رغاية وانا معترفة بكدة
هاكتب عن كل اللي في دماغي
...............
اكتشاف
اكتشفت حاجة عجيبة
اكتشفت ان الأم اللي عندها اطفال صغيرين
ماينفعش انها تبقى عيانة ـ مريضة يعني ـ
ماينفعش ترقد كام يوم في السرير
لان حال البيت هايقف
حتى لو عندها شغالة برضة حالة هايقف
دة كمان مش لو تعبت دة لو راحت تكشف عند الدكتور
مش مصداقني طيب هاحكي لكم
انا طلعلي كيس دهني صغير في عيني
وماكانش عندي وقت اني اروح للدكتور
فأنتهزت فرصة ان حماتي قاعدة معايا كام يوم وقلت اسيب العيال معاها
واروح اكشف على عيني
وفعلا سألت على ميعاد الدكتورة وخليت نفسي في الاخر على اساس اني اكون
اطمنت ان العيال خلصوا حل الواجب وبرضة علشان ماأتأخرش عليهم
وفضلت متابعة الدكتورة في التليفون لغاية لما الممرضة قالتلي خلاص كدة قدامك
تلات كشوفات يالا تعالي بسرعة علشان الدكتورة بتخلص وتمشي على طول
وعلشان انا حظي حلو لما وصلت المستشفى وحجزت التذكرة ونزلت عند الممرضة
المسؤلة عن عيادة العيون لقيتها بتقولي قدامك ست حالات
مع اني ماغبتش والمستشفى قريبة من البيت
مش هاحكي اية اللي حصل في المستشفى لانة مش موضوعنا
المهم اني غبت عن البيت حوالي ساعتين ونصف
ورجعت والمفروض اني مظبطة البيت والعيال قبل لما انزل
لقيت اية بقى
لقيت العيال لسة صاحين وميعاد نومهم فات
ولقيتهم عاوزين ياكلوا
انا : طيب ماقلتوش لستو لية ؟
هما : كدة
انا : طيب
اكلتهم ونيمتهم وسمعت ابو الدراويش بينادي عليا
ابو الدراويش : انا جعان
انا : حاضر بس انت وصلت بعد لما انا نزلت على طول
اية اللي سكتك كل دة ؟ وماقلتش لطنط لية تحط لك الأكل ؟
ابو الدراويش : انا كنت مستنيكي
انا : لا تعليق
........................................
رحلة الي الفرن
طبعا في ايام الدراسة كل يوم بنشتري عيش فينو
انا ببعت بنت نورة البوابة تشتري لنا العيش
ففي يوم قلت انزل انا اشترية واتمشى شوية
عديت على نورة وقلت اسألها علشان لو عاوزة اجيب لها معايا
قالتلي : انا هاجي معاكي
انا : يابنتي اهمدي انا كدة كدة هاروح وفري انتي مجهودك لحاجة تانية
نورة : انا هاتمشى معاكي لغاية الفرن
وصلنا الفرن
بكلم الولد اللي بيبيع وبقولة
وريني كدة العيش ابو ربع جنية شكلة اية ؟
لقيت رأس طلعت من ورا الولد وراح زاقق الولد من قدامي وقايلي
تشوفي شكلة .. شكلة نعمة من ربنا
انا بصوت واطي : مين دة يانورة
نورة بصوت اوطى : دة الحاج صاحب الفرن
انا بصوت مسموع : ايوة ياعم الحاج وهو انا لما اقول اشوف شكلة ابقى كفرت
بالنعمة انا قصدي اشوفة كبير والا صغير تخين والا رفيع كدة يعني
صاحب الفرن : يامدام شكارة الدقيق بمية تمانية وستين جنية
انا : انا ماقلتش حاجة غلي العيش زي ماانت عاوز بس في الأخر طلع لنا عيش طعمة
حلو ومش مفرول
صاحب الفرن بصوت عالي : احنا مش بنغلي حاجة الريس بتاعك هو اللي بيغلي
بصراحة انا حسيت ان الراجل شتمني لما قال الريس بتاعك
انا بصوت عالي شوية: انا ماليش ريس ..انا الريس بتاعي ربنا
وتدخلت نورة في الوقت المناسب وقالتلة : هات ياعم عشر ترغفة خلينا نمشي
.....................
حدوتة الجبارة
الجبارة : ماما بعد لما ميس دعاء مسحت البورد ميس رشا حكت لنا حدوتة سيد
انا : سيد مين انا اعرف حدوتة جلال والا الشاطر حسن انما سيد دي جديدة
الجبارة : ايوة ياماما حدوتة سيد محمد
انا : وكمان قالت اسم باباة دة يبقى قريبها بقى
طيب احكيلي قالتلكم اية ؟
الجبارة : هي اخدتنا على المسجد وحكت لنا الحدوتة بتاعة سيد محمد
وانا مش فاكرة ابقي روحي اسأليها انتي
انا : مسجد اشمعنى يعني
اةةةةةةةةةةةةة انتي تقصدي سيدنا محمد علية الصلاة والسلام
الجبارة : ايوة هو دة
....................
كفاية كدة انا رغيت كتير
اشوفكم على خير
هناك ٤٠ تعليقًا:
السلام عليكم
دي أول زيارة ليا عندك في المدونة
البوست دا جمييييييييل جدا
بالذات الحدوتة بتاعت الجبارة دي
دي باين عليها حتة سكر
بتقولك حدوتة سيد.. و أنا مش فاكراها ابقي روحي اسألي الميس
هههههههههههه
و الله عسل
بالنسبة لموضوع الفرن...لا تعليق
و ألف سلامة عليكي و علي عنيكي
بعد اذنك كده هاخدلي لفة في المدونة باين عليها جامدة
سلام
السلام عليكم ورحمة الله وبركاته
ههههههههههه
اما انت ياشاهي عليكي حكايات .. تفطس من الضحك ، الاول الف سلامه علي عنيكي ، عارفه التدوينه الجايه خليها حكاية المستشفي واللي حصل هناك
الولاد وباباهم معتبرين تيته ضيفه انت عاوزاهم يطلبوا منها اكل ولا شرب ، بالذمة دا اسمه كلام؟؟؟؟
وبعدين في حد يروح يقول للراجل في عينه كده انتعيشك مفرول وما بيتاكلش كويس انه ماعملش فيكي حاجه
اما بقي الجباره فدمها زي السكر ، هي مالها هي ماتروحي تسألي المس امهات آخر زمن صحيح ....هههههه
سلام يا قمر
يا نهار مش فايت
حدوتة سيد
البت دى طالعالى
عبقريه
على فكره أنا جعان و خايف أقولك تزعلى
هأموووت من الجوع و طول الإسبوع بأرمرم
يالله العمر واحد و الرب واحد
أنا هأقايس و أقولك
جعااااااان يا شوشو
السلااااااااام عليكم
ياعينى على المواضيع
اولا الف سلمة على عينيكى
ثانيا بقى موضوع الفرن ده يبين حال الناس واللى هيه فيه
والله دى بقت ازمة اوووووووووووى
اما الجبارة بقى فربنا يخليهالك
واضح بجد انهم زى السكر
بحب حواراتهم جدااااااا
وبعدين يعنى لازم تتعبيها
ماتبقى تسألى الميس
هههههههههههههههه
تحياتى ليكى
اول تعليق عندك بس مش اول زيارة
صباح الخير او مساء الخير
اقولك السلام عليكم وخلاص
ايه يا عم الكلام والرغى ده كله
انا صدعت
هههههه
اولا الف لابأس عليكى وربنا يعفى عنك
ثانيا انا كان عندى كيس دهنى فى عينى برده بلاش اقولك عملت ايه لا تخافى ولا حاجه
ولا اقولك هاقولك وخلاص هو الدكتور ادانى بنج موضعى وقلب الجفن مش عارف ازاى ونضف الكيس الدهنى ده ورجعلى جفنى تانى آآآآآآآآآآآه آآآآآآآآه
ما تخافيش حاجة بسيطة
ده للموضوع الاول
اما موضوع الفينو
فسلامى الحار لبنت نورا
فى بوابة اسمها نورا
طبعا البواب اسمه هيثم
:)
اما الجبارة
فانا باحيكى على قوة ملاحظتك لان هى لو كانت قعدت تقولى حكاية سيد محمد من هنا لبكرة الصبح ماكنتش هافهم
تحياتى ليكى
واوعى تنسى تسلميلى على بنت نورا
nigro
اهلا بيك في اول زيارة وان شاء الله مش هاتكون الأخيرة
الف سلامة
طهور ان شاء الله
بدأت احكى قصص الانبياء لبنتى
وبدأت الاسئلة
هو قابيل قتل أخوه له هو فى اخ يقتل ااخوة
هو اخت سيدنا موسى كان اسمها ايه
وسيدنا ابراهيم عاوز يدبح ابنه ليه
ربنا يكرمك ويخليكى لهم
تحياتى
ربنا يديكي الصحه :) فعلاً الأمهات دوول ربنا يديهم الصحه بجد ... لو تعبوا شويه البيت حاله يقف
الفرن بقى لا تعليق بجد
حدوتة الجباره :))) عسوله أوي بنتك بجد ربنا يخليهالك
ما هى الام احلى واحن حاجه فى البيت ربنا يخليكى ليهم الام دى عمود البيت ينفع تبنى بيت من غير جدار وعمود الام كده
الف سلامة علي عينيكي ياجميل
البيت من غير ست البيت بيبقي خرابة بس مين يقدر
تحياتي
كيس دهني؟؟؟
رحتي المستشفى؟؟؟
طب انا مش ابنك ولا ايه يا ماما شاهي
؟؟؟؟؟؟؟؟؟؟؟؟؟؟
طب انتي كويسه دلوقتي ولا ايه؟؟؟؟
ياريت الله يكرمك يا ماما شاهي تطمنيني عليكي .. ياريت
------
ربنا يارب يعفو عنك وعن كل مرضى المسلمين
سلاموووووووووووز
ايوة يا شاهى انا معاكى البيت فعلا حاله بيقف لو الست مش موجودةفيه
وحتى لو موجودة يبى لازم تعمل كل حاجة بنفسها
يعنى ماتفكرش ان ممكن حد يساعدها
وبعدين انا مش فاهمة هو صاحب الفرن كان مضايق ليه لما سالتيه عن العيش
بس عجبنى ردك عليه لما قلتيله انا الريس بتاعى ربنا
جدعة يا بت
اما حدوتة الجبارة معنديش تعليق عليها غير ربنا يخليهالك هى وباقى اخواتها
والف سلامة على عنيكى يا شاهى
سلام
اختك خيخة
آه صحيح الراجل يعمل ايه ولا ايه
الشكارة غلت بقت ب 185 ولا مش عارف كام
حرام عليكم بقى
أظن بعد كده بنت نورة البوابة تروح هى اللى تجيب
أنا عارف شكلك خايفه انك تمشى من قدام الفرن
وازاى يا ستى تسيبى جوزك جعان كده
بس
خلاص
nigro
انا كنت ناوية اكمل الرد على تعليقك واقولك الله يسلمك
بس اتخطفت
يعني حد ندة عليا فقمت وماعرفتش اقعد تاني
شكرا لمرورك
.....................
خمسة فضفضة
وعليكم السلاااااااااااااام ياست الدكتورة
الله يسلمك يارب
حاضر هابقى اخلي جزء من التدوينة الجاية عن اللي حصل معايا في المستشفى ان شاء الله
حرام عليكي يادكتورة بقى انا اللي امهات اخر زمن
طيب يعني انا اللي غلطانة والعيال هما اللي صح وبعدين تيتة بتاعتنا مش ضيفة ولا حاجة وانا بعاملها على انها صاحبة بيت في كل حاجة اشمعنى بقى في النقطة دي بتبقى ضيقة
منوراني دايما
تحياتي
.....................
الدرويش المرووش
جعان
حاضر
طيب
ومالة
هي فين السكينة؟؟؟؟؟؟؟؟؟؟ لألأ قصدي الحلة والاكل
تحياتي ياشقي
اخر العنقود
الله يسلمك
اما الفينو فأنا خلاص زهقت
انا بفكر اعملة في البيت بس هاشوف الطريقة واجرب وابقى اقول لكم
اما الجبارة فهي جبارة بصحيح
يعني هو انا مودياها الحضانة علشان انا اللي اتعلم
جيل اخر زمن
منورة حتى لو مش هاتعلقي
...................
علي
صباح النور ومساء النور وعليكم السلام
مااااااااااااشي بتخوفني ياعلي
عموما هو كيس دهني صغير وانا لسة بحط قطرة ومرهم والحمد لله صغر كتير عن الاول ولو ماخفش خالص هايبقى في العملية البسيطة دي
ولعلمك احنا جامدين اوييييييي
ياماما
هههههههههه ايوة البوابة اسمها نورا وبنتها اللي انت بتبعتلها السلام اسمها فرحة وبنتها التانية نانسي
اية رأيك؟
اما الجبارة فأنا مافهمتش هي تقصد اية غير بعد لما قالتلي ان الميس قالت لهم الحدوتة في المسجد
واهو اللي يعيش مع الجبارة ياما يشوف
..................
الطائر الحزين
الله يبارك فيك
هو صحيح قابيل قتل اخوة لية؟
ولية سيدنا ابراهيم كان عاوز يدبح ابنة؟
قولي بسرعة كان جوابك اية علشان انا كمان بتسأل اسئلة غريبة وساعات كتير مابيكونش عندي اجابة بس احنا ربنا بيسترها معانا كدة
تحياتي
رحاب مصطفى
ربنا يدينا الصحة جميعا
ايوة كدة علشان تعرفوا قيمة الامهات صحيح والله الواحدة مش بتعرف اد اية امها تعبت معاها غير لما بتخلف عيال يطلعوا عنيها والغريبة بقى اني بقول لأ انا ماكنتش كدة خالص انا كنت كويسة
تحياتي
..................
ابي
عندك كل الحق ايوة الام عمود البيت وعندي لقب تاني ابو الدراويش بيقولة عليا
شاويش البيت
ايوة دة انا
تحياتي
................
المفقوعة مرارتها
الف سلامة عليكي انتي من فقعة المرارة
مدونتك دمها خفيف جدا انا زرتها لكن لسة ماعلقتش
تحياتي
...................
سووو
ماتتخضش اوي كدة ياولدي انا كويسة مفيش حاجة دي حاجة بسيطة الحمد لله
ورحت المستشفى علشان انا مااعرفش عيادات خاصة في اكتوبر كل اللي اعرفة هي العيادات الخارجية بتاعة المستشفى هو صحيح كلمة مستشفى بتخض بس انا فعلا كويسة
تحياتي يابني وجمد قلبك شوية
..................
بنت خيخة واي كلام
والله يانونو انا مش فاهمة فعلا هو اية اللي زعلة
انا كنت عاوزة اشوف شكل العيش وبس
كان لازم ارد علية كدة ماهو انا حسيت انة بيشتمني مايقول الريس وخلاص لازم يعني يقول بتاعك وهو بتاعي انا لوحدي انا مش عارفة اية الناس دي
الله يسلمك ويكرمك
تحياتي
..................
عبدة محتاس
لأ ياعبدة انا مش خايفة امشي من قدام الفرن ورحت الفرن مرة تانية مع نورة برضة بس سألت في الاول اذا كان صاحب الفرن موجود والا لأ دة انا جادعة جدا
تحياتي
طبعا اللى عندها عيال
مينفعشى تبقى عيانه
وعلشان كده بدعى من الله ان اللى عندها عيال صغيرين
يكون ربنا فى عونها
والرجااااااااااااله كمان
عبد الراااااااااااااايق بيمسى فى اول رحلاته الى مدونتك
وسلامى للشنيور
عيب
عيب
عيب
ازاى تتجرأى وتتفشخرى وتروحى تقوليله ورينى العيش
كنك إتجنيتى ولا ايه
هات الشمروخ يا ولد
ثم أخرك تروحى تجيبى كيس شيبسى من السوبر ماركت مش عيش من الفرن وكمان فينو
فينو
فينو يا شاهى مش عيب
انا علمتك كده
فيه العيش المرحرح ده ابقى اسالى طنط عليه حلو متبقيش تأكلى العيال منه
يلا باى
شاااااااااااااااهى
انا جعانة
وش بيطلعلك لسانه
نيهاهاهاهايهاع
سلام
هبة
طيب انا جيت اعلق لمحت تعليق ابو الدراوييش
ربنا يحفظكم لبعض وبيقولك جعان
قومي بقى سيبي النت والكلام الفاضي ده وشوفي لقمه حضريها لجوزك
قال الريس بتاعك قال
اهو هو ده الريس بتاعك
سلااااااااااااااااااااام
asasy tab3an lamma mama tb2a msh mawgooda msh ben3ml ay 7aga fel beet wala benakol wala benshrab wala 7atta benenzel mn betna
rabena ykhalleeky lel3yal el 7elween dool w ykhally koll el mhmhat elly feldonia l 3yalha :D
أسلوبك زي العسل يا شاهي
بوست جامد وخصوصا حدوتة سيد
وحكاية الفرن ديه بقا ربنا يكون في عوننا من اللي بيحصل للواحد دلوقتي
حتي السؤال غلي هههههههه
وعلي العموم يا ستي الف الف سلامه عليكي وابقي طمنيني لان شكلي طلعلي انا كمان كيس دهني في عيني
علشان تعرفي ان في بيننا حاجات مشتركة
ربنا يستر بقا
تحياتي ليكي
الف سلامه عليكى يا قمر
وربنا يكون فى عون الست اللى عندها اطفال
حكم الايام دى الجته مبقتشى مستحمله
وانا كتبت عن الفرنه البلدى
اللى مش طالين منها العيش
ولكن نتجراء ونطلب نشوف العيش
ده عمل ارهابى
انا مش فاهم الدلع ده هيوصل لحد فين ؟؟؟ كيس دهني صغير ؟؟ ايه يعني ايه اللي حصل ؟؟؟ لازم يعني تروحي تتفسحي في المستشفى وتسيبي ولادك وجوزك وكمان حماتك، لأ ملكيش حق. وبعد كده الحاجات دي بتروح لوحدها لو اهملتيها شويه عاي يعني
سلام
صحيح الولاد متعبين ومش بيبطلوا طلبات طول ماهم قاعدين
بس بذمتك مش رخامتهم دى على قلبك بتكون زى العسل
ربنا يحفظهملك
ههههههههههههههه
سكر بنوتك الجباره دي
ربنا يخليهالك يا رب
------
كلمةماما الشهيره مافيش أم من حقها تتعب شويه عشان كل حاجه في البيت هتبوظ
ربنا يخليكي ليهم , كويس برده انهم ماطلبوش من جدتهم يعني كنتي هتشيلي جمايل وخلاص
بوست جميل كالعادة :))
والله كويس شويه الفضفضه دي
:)
ههههههههههههههههههههه
فعلا عندك حق .. ربنا يكون ف عون كل الأمهات و حتى اللى متجوزين و لسة ما أنجبوش
انا حاسة لو كنت مكانهم هيحصلى حاجة
ربنا يكون ف عون الجميع
بس عموما الأموممة نعمة من عند ربنا لو هنفديها بروحنا مش هتكفى
ربنا يخليهملك
و الف سلامة على عينيكى .. ان شاء الله سليمة
دى اول زيارة وا تمنى تعجبك موضوعاتى انا كمان
نحياتى
بصي ام لعيال وتعرف تعيا منتهى الاستحالة انسي
معاكي في الهوا سوا بس حالتي مستعصية شويتيتن العيال قريبة من بعض في السن
المصيبة بقى بتبقى في ابوهم لما مثلا مثلا تخرجي في مشوار تبع البيت مثلا وتتاخري شوية وتيجي ويقولك جعان طب ما الاكل عندك ما سخنتش ليه واكلت يقولك هو انتي قولتيلي
ولا اما يبقى يلبس غيار مثلا على ضهره الله ما قالبتوش ليه يقولك ما انتي جايباه كدة بس خليها في سرك حاجة تبسط وتفرس برضه يعني
ربنا يخليلك زوجك وولادك ويعينك عليهم يا رب
دمتي بحب
اختى الفاضلة
شاهى
هذه زيارتى الاولى لك وكم كانت سعادتى بما اطلعت عليه من موضوعات جعلها الله فى ميزان حسناتك والله رغى جميل علشان نفضفض ونستريح
-----------------------
اختى الفاضلة
انا من مؤسسى اتحاد المدونيين المصريين وادعوك للتواصل معنا من اجل اتحاد قوى يضم جميع مدونى مصر للعمل على تقنين حقوقنا وحماية المدونيين والرقى بعملية التدوين
فى انتظار تواصلك معنا على مدونة الاتحادhttp://egyptadwin.maktoobblog.com
------------------------
للعلم انا عملت هذه المدونة للتواصل مع مدونى موقع البلوج سبوت
فاتمنى مساعدتى للرقى بها
شكرا لكم مقدما
الف سلامه عليكى يارب
يحميكى ويحمى اولادك م كل شر
طبعا الام دى مفتاح البيت
صمام امان البيت م غيرها السفينه تغرق اصلا
وع راى المثل اللى ملهوش ام حالته تغم
ربنا يخليكى ليهم يارب
وعسل الجبااااااااره
سيد محمد اه ههههههههههه
ربنا يباركلك فيها هى واختها واخوهم وابو الدراويش يارب
حلو اوى المدونة بتاعتك وبرافو والله انك عندك وقت تكتبى
اول مره ازور مدونتك جميله جدا جدا ولذيذه وعجبتني فكره ان العيله كلها عامله مدونات عيله بلوجريه بجد يعني بالتوفيق
شاهى يا شاهى
انتى فين واخبارك ايه وفين البوست الجديد
البوست ده حمض خلاص وعايزين ناكل
صحيح هو انت عاملة اكل ايه
طيب ما تنسيش اخوكى بطبق كده ولا حاجة
:)
ويا ترى اخبار عينيكى ايه
طمينينا عليك يا جميل
تحياتى ودعواتى ليكى
اخوكى على حب
والله عندك حق الموضوع دا هيجنني
ساعة ما اتعب تبقى ماما هاتجنن عليه وعاوزاني اكشف واشوف فيه ايه..
وهيه لما تحس ان حاجه بتالمها ابقا هعمل ارجوز عشان تروح تكشف .. تقولي هابقه كويسه.. معرفش ايه
وتفضل تطنش لحد ما تخف
هيه بتبقه حاجات بسيطه بس برضه ببقه مستغرب ومضايق انها مش بتطمن على نفسها.
شكل الابوه و الامومه دي حاجه صعبه
ربنا يديم العزوبيه نعمه
:)
عبدة الرايق
الله يمسيك بالخير في اول رحلاتك وان شاء الله ماتكونش الاخيرة
ايوة افضل ادعي للأمهات كلها بالصحة شاطر
تحياتي
..................
دوبة
حبيبة قلبي شفتي اللي حصل عاجبك كدة
تصدقي حلوة فكرة العيش المرحرح دي اية رأيك انا هاخد الطريقة من نورة وابقى اعملة
بس هو هاينفع في السندوتشات؟
تحياتي ياشقية
.................
الشنكوتي الكبير
حاضر يابية اي خدمة تاني
انا زعلانة منك ياشنكوتي
بقى انا كل مادخل عند كامي الاقيك كاتب قصيدة في التعليقات
مش عارف ترزعني قصيدة حلوة كدة
صحيح كامي رقيقة وبتكتب كلام تحفة بس برضة اجبر بخاطري كدة مرة من نفسي هههههههه
والا اقولك انا هاشتكيك لبنات شبرا
.................
كفاية طيبة
طيب خلي الكلمتين دول في سرك لحسن حد من العيال يسمعك وخصوصا في حكاية المذاكرة
شكرا على الدعوة وعلى الزيارة
الأء
الله يكرمك ياالأء يارب
بصي ياسيتي
موضوع الكيس الدهني انا لحقتة في الاول يعني العلاج هايبقى كمادات دافية مع قطرة 6 مرات في اليوم ومرهم مرتين في اليوم والحمد لله جاب نتيجة كويسة
اما بقى الاهمال او لو مفيش نتيجة بالعلاج تبقى حقنة بنج بسيطة في العين وبعدين ينظف الكيس زي ماعلي قال في تعليقة وبالشفا ان شاء الله
انا كان نفسي يكون بيننا حاجات مشتركة غير المرض ههههههه
تحياتي
...............
فرنسا هانم
منورانييييييييي كتيررررررر
والله يابية ماكنت اعرف انة عمل ارهابي انا كنت فاكراة طلب عادي
الله يسلمك وعلى رأيك الجتة مابقتش مستحملة
تحياتي
...............
يحيى
انت بتهزر صح
انا عارفة
مش انت بتهزر
ايوة بتهزر
برافو عليا
عرفت لوحدي
شوفوا ياولاد يحيى بيهزر
انا كنت ناوية ارد رد تاني خلاص بس خلاص بقى ماانا عرفت انك بتهزر
سلام ياابو يوسف
...............
simple girl..simple dream
ايوة عسل اسود بس برضة عسل
تحياتي
................
rosa
الله يسكرك
صدقت مامتك ربنا يحفظها
لية كدة بس ياروزا يعني لو جدتهم حطط لهم الاكل تبقى جمايل المفروض ان احنا اهل ومفيش فرق بيننا مش عارفة العيال وابوهم مكبرين المواضيع لية؟
تحياتي
انا انسان
وانا كمان انسانة
يارب تكون الفضفضة عجبتك
تحياتي
..............
ايمان الطاهر
طيب اللي لسة ماانجبوش الله يكون في عونهم لية بقى؟
بعد الشر عنك مش هايحصلك حاجة ان شاءالله
ايوة فعلا الحمد لله على نعمة الأمومة
ان شاء الله مش هاتكون اخر زيارة واكيد هاروح ازور مدونتك
تحياتي
..................
nonoymm
زميلتي في الأمومة المعزبة
الله يعينك ويعين كل ام
تحياتي
.................
حسن توفيق
نورت يااستاذ حسن مدونتي المتواضعة
وانا على اتم استعداد للمساعدة اذا كان في استطاعتي ذلك
تحياتي
..................
د/ اجدع بنوتة
انتي فعلا بنوتة زي السكر ماشاء الله عليكي يادكتور
الله يسلمك واحب اقولك ان المفتاح خلاص قرب يبوظ يالا احجزيلي كشف عندك في السريع كدة
تحياتي
.............
gannah
ايوة ساعات بخطف كام ساعة وهما العيال في المدرسة علشان اعرف اكتب
تحياتي
................
حاسوباتية
انتي كمان مدونتك جميلة بس انا لسة ماخلصتهاش كلها انا لفت نظري اسمها جدا
تحياتي
................
علي
علي يا علي انا كويسة الحمد لله
ونزلت البوست الجديد
وهاسيبلك اكل على باب المدونة اوعى تنسى تأخدة علشان الجو اليومين دول حر
شكرا على السؤال ياعلي
تحياتي
................
دمعاتي
سبحان الله لة في ذلك حكم
الحمد لله الستات عندها قوة تحمل في المرض مش عند الرجالة
الكلام دة عن تجارب كتير
ربنا يدي لمامتك الصحة ولكل الأمهات
تحياتي
( سيد محمد ) هههههههههه
والله انتي حكاويكي مع العيال وخاصة الجبارة بتشوقني لخلفة العيال فعلا
ربنا يعينك وتربيهم احسن تربية
وعلى فكرة انا ضفتك في المدونة عندي وسميتك ( ام العيال )
hero
الله يبارك فيك
انا زرت مدونتك قبل لما اشوف تعليقك هنا واخدت بالي من ام العيال بس ماكنتش اعرف انة انا
شكرا كتيرررررررررررررر
تحياتي
بوست خفيف ولذيذ والمرادى عدت على خير وبتاع الفرن طلع طيب المرة الجاية ابعتى نورا وخليكى فى السليم انتى وراكى العيال جعانين وابوهم مكالش من انبارح
إرسال تعليق