السلام عليكم
المدرسة بتاعة الأولاد بتحرص على اجتماعات اولياء الأمور
سواء مع المدرسين او مع صاحب المدرسة والأدارة
الأجتماع مع المدرسين سهل كل واحد بيسأل عن ابنة وخلاص
اما الأجتماع مع صاحب المدرسة بيبقى صعب عليا شوية
لانة بالنسبة لي عبارة عن قاعدة بيترفع فيها ضغطي
وببقى عاوزة اقوم اخنق بعض اولياء الأمور
فكرت كتير اني ماأحضرش الاجتماعات دي بس ماقدرتش
لانة لازم يكون في تواصل بيني وبين المدرسة
المفروض الأجتماع دة بنقول فية على بعض ايجابيات المدرسة
وبنتكلم على السلبيات كمان والراجل صاحب المدرسة بيقعد
يكتب الملاحظات وفعلا بيحل المشاكل دي بعد كدة
يعني مثلا
طلبنا منة ادخال حصص للقراّن غير حصص الدين
وفعلا عمل كدة
وعمل كمان بريك مخصوص للصلاة
المفروض بقى في الأجتماع نقولة شكرا
ابدا مفيش حد نطق
اسمعوا بعض اراء اولياء الامور اللي مش لاقيين حاجة يقولوها
الأولاد مش بيتكلموا مع بعض بالأنجليزي
انا مش حاسة ان ابني في مدرسة لغات
نعم ياابلة الله يرحم والدك وانتي عاوزة تحسي ازاي ان ابنك في مدرسة لغات
طيب دة انا لقيت الشينيور بيقول قبل لما ياكل
ويذ ذا نيم اوف الله
بهدلتة قلتلة اسمها بسم الله الرحمن الرحيم
بقى يبقى احنا ربنا مدينا نعمة لغة القراّن ونروح نعوج لسانا
احنا الحمد لله بنفهم عربي وبنتكلم عربي
واحدة تانية
ياريت لما تختار المدرسين تختارهم خريجي مدارس لغات
طيب ماهو الراجل فعلا بيعمل كدة وبيعمل مقابلة جامدة مع اي مدرس جديد
والدليل ان كل المدرسين كويسين جدا في المدرسة
واحدة كمان
الميس بتاعة الفرنسي مشيت من المدرسة وبنتي اتأثرت نفسيا جدا
انتو ازاي تعملوا كدة
والله الميس مامشيتش فاجأة هي مهدت للعيال وقالتلهم انا عندي ظروف
وهاسيب المدرسة والعيال فعلا كانوا متعلقين بيها بس سلموا عليها
واتعودا على الميس الجديدة
لما قلت الكلمتين دول بصولي حتة بصة وكأني جاسوسة
وعلى فكرة هما دول الكلمتين اللي نطقت بيهم بس
وفضلت كاتمة باقي الكلام في قلبي
اخر واحدة بقى مصيبة
ازاي الميس تقول للأولاد يابقر هو دة لفظ يتقال في مدرسة
يالهوي دة انا ساعات بقول للعيال اكتر من كدة
دي بقر دي شوية عليهم
يعني انا مثلا لو ابني جية وقالي الميس قالتلي يابقرة
اول حاجة هاقولها لة انت عملت اية علشان الميس تقولك كدة؟
ماهو اكيد عمل حاجة
اصلها مش مجنونة علشان تشتم وخلاص
انا مش عارفة الناس دي بتفكر ازاي
دة كان ناقص يقولوا لصاحب المدرسة
انا بنتي كحت والميس ماقالتلهاش اسم الله عليكي
ازاي الناس دي مش بتفكر في انهم كدة بيضروا اولادهم
العيال فعلا لما هايكبروا شوية مش هايحترموا المدرسين
وهايبقوا حاسين انهم داخلين المدرسة بفلوسهم ومش هايهمهم حد
ماينفعش اني كل شوية اشتكي من المدرس على اسباب تافهة
معلش انا اتكلمت كتير بس اصلي متغاظة على الاخر
اشوفكم على خير
هناك ٣٤ تعليقًا:
فى ساعة متأخر من الليل
وفور ان وصلتنى اخبار صدور
احدث بوست لشاهى
تسللت لاسجل اول تعليق
وبعدين اقرأ بقى براحتى
هوسسس
قبل ما حد يجيى
كاميليا
ا مش عارفة الناس دي بتفكر ازاي
دة كان ناقص يقولوا لصاحب المدرسة
انا بنتي كحت والميس ماقالتلهاش اسم الله عليكي
........
ههههههههه
وآنا كمان .. أكلت الساندويش والميس مش قالت لي بالهنا والشفا
طيب جميل خالص
ان مدير المدرسة بيستمع ويناقش ويحل المشكلات
ياريت كل مدارس مصر تبقي كده
اللغات يعنى
عارفه ، مش كل المدارس كلها، لسه طموحى مش يوصل لكده
بس فعلاً، اولياء الامور لازم يكونوا اكثر واقعية وموضوعية من كده لصالح اولادهم، يناقشوا حاجات تتعلق بالسلوك سواء بالسلب او الايجاب علشان يساعدوا فى تربية اولادهم تربية علمية اكاديمية سليمة
عجبتنى قوى البريك الخاص بالصلاة
وحصص تحفيظ القرأن
انا احييى مدير المدرسة دى بجد
تمنياتى بالنجاح
فى الدراسة طبعا
مش اجتماع اولياء الامور الصغرى
مع حبى واحترامى
لاجمل شاهى
وحشتينى يامامى شاهىى
شوفتوا ياناس فايدة التعليم اللى مش مجانى
ال اجتماع مع صاحب المدرسه ال
كله بفلوسكم طبعااااااااا
ربنا يقويكى يارب ع الاجتماعات اللى تفقع دى
طبعا اولياء الامور عندهم حق
يعنى هما بيدفعوا فلوس علشان اولادهم يتعلموا
يبقى لازم يحسيسوهم انهم فى مدرسه لغات
للاسف
ده نقص
ودول عالم محدثين نعمه
احسن حاجه عجبتنى ردك على الشنيور
لما سمى بالانجليزى
سبحان الله
كانك معايا هنا في الخليج وحضرتي اخر اجتماع
مع الادارة في مدرسة ولادي
طبعا هنا الدلع زياده حبتين تلاتة
بس المرض والتخلف واحد
وكان العرب كلهم مصابين بفيرس تقليد اعمى غريب
ربنا يستر علينا..زبجد حاجه تقلق
بفلوسى يا معلم
الارض كروية تدور حول نفسها
يعنى انا جايب لكم الواد علشان تقولوا له ان الارض كروية
عجبت لك يا زمن
نفس الفكر لكن مودرن
تحياتى
انا مش حاسة ان ابني في مدرسة لغات
تيوه يا شاهى يا حبيبتى ما هو لازم ابنها يتحول لون عنيه خضرا وشعره اصفر
ويسوق العربيه من الشمال
الله امال بتدخلوا ولادكم مدارس لغات ليه مش علشان تغيروا الجينات الوراثيه هههههههههههههه
بس والله مدرسه ايجابيه حلوة بتناقش وبتنفذ
حمد لله على السلامه وحشتينى
السلام عليكم ورحمة الله وبركاته
حمد الله علي السلامه
فكرتيني بمحمد صبحي في تخاريف لما كان قاعد يذل في البشر ومافيش علي لسانه الا كلمه واحده
بفنوسي يا كناب " بفلوسي يا كلاب "
دي ناس محدثة نعمة فعلاً
كويس انك ما اتهورتيش على حد فيهم
ايه ده
والمدير فضل ساكت؟
يعنى بجد مردش
مقلش اى حاجة
ياى يا ىيا شاهى
ازاى تدخلى الولاد مدرسة مش بيتكلموا فيها مع بعض بالانجليزى
وازاى ميس الفرنساوى تمشى
اياه
ياى
اللهم انى لا اسالك رد القضاء
ولكنى اسالك اللطف فيه
رينا يصبرك يا شاهى يا اختى
اكيد في نااااس كتتتير تفرس وتغيظ وتحرق الدم ولو كلمتي كل واحد لواحده تلاقيه عنده المنطق والحجه بتاعته ، وطبعا مفيش مانع ان ولادنا يكونوا كويسين بس برده الدلع الزياده غلط وهنندم عليه في يوم من الايام.
تحياتي
فى يوم يا اختشى يا شاهى لقيت الواد يوسف بيغنى مع نفسه كده فى لحظة تجلى وبيقول ايه
God is good, God is great, please God Bless our food.
قمت متصله بالحضانة ومقدمه بلاغ
ازاى ابنى يقول كده
قالولى بيتعلم انه يتكلم بالانجليزى وبيتعلم الترجمة كمان قلتلها مينفعنيش انا الكلام ده والمدرسة اللى بتقول كده الاجنبيه علموها تقول بالعربى
وان كلمة God كمان متنفعش لانها حرام ولو أصرت انها تقولها يبقى تقوله الله
المشكلة ان كل واحد بيدفعله حبة فلوس وبيفتكر انه كده عمل اللى عليه وربى ابنه وخلاص - ميعرفوش ان التربية بجد مش بالساهل ابدا وان دول أمانه وهنتحاسب عليها واننا المفروض نقوم سلوكهم وخاصة فى المراحل دى
موضوع مهم بجد
التربية
============
وحشتينى يا شريرة
سلام
هبة
تحياتي
التعامل مع الاولاد أحيانا بيكون مشكلة
لو كل أم وضعت نفسها مكان المعلمة او المدرسة لعذرتها...
الام التي تريد ان يتحدث ابنها او ابنتها باللغة الانجليزية...عليها هي اولا ان تتحدث باللغة الانجليزية في المنزل...فتتحاور و تتحدث مع ابنائها باللغة الانجليزية...
تحياتي و تقديري
شاهى
آسف انى جيت متأخر بس انتى عارفه الظروف
المهم
كلامك كويس وكل حاجه وانا بقول اننا اتعلمنا فى الدنيا من المواقف اللى بنشوفها والحاجات اللى بتحصل فى المدارس ليها تأثير علينا فيما بعد
بس انا اخالفك فى حاجه
حاجه صغنونه خالص
وهى حد يشتم ابنى او بنتى
حتى ولو لفظ صغير
محدش ليه حق انه يشتم ابنى او بنتى
ولو غلطو اكيد فيه حاجات ممكن تعاقبهم غير الشتيمة والضرب طبعا
مش عارف اقول ايه بس اكيد ليا تعليق تانى لانى مزوغ من الشغل نص ساعه ونازل تانى
;)
سلام
عند حق .. بس كون المدير يبلع الكلام و يسكت ... ده معناه انه بياخدمنكم كتير.. و الاهل يا حبيبتى اغلبهم اليومين دول سايبين اصلا عيالهم للداده.. ده كويس ان اللى عندك واخدين بالهم ان الاولاد مش بيتكلموا مع بعض انجليزى.. طيب هى امهم و لمواخذه ما بتكلمهمش هيه ليه لالنصيبه ماتكونش بتعرف .. بس ان جيتى للحق مش مفروض المدرسه تشتم.. لان كده الاولاد اصلا حتلاقيهم بيتعلموا يقولوا كده لبعض و لسانهم ياخد على كده... و ربنا يعينك على تربيتهم
اول يوم لي في المدرسه هنا في مصر وفي اول حصه لما مدرسة المجال الزراعي دخلت وكنت في مدرسه حكومي ولا خاصه ولا بتاع .. اول مادخلت لقيت الفصل كللو قام وقف وانا ماعرفش الحته دي وكنت في السعوديه الحاجه الوحيده اللي بنقف عشانها هي قراية القرآن .. احتراما وتبجيلا لكلام ربنا .. المهم انا ماوقفتش
تقوم المدرسه الغير محترمه تشتم تقول ايه
قوم اقف يا حيوان ياللي اهلك ماعرفوش يربوك الاحترام .. لقيتني مش فاهم في ايه .. ولقيتها راحت طارداني بره الفصل وطلبت استدعاء ولي امري
اول يوم كده وش
ودي كانت بدايتي مع التعليم المصري الحكومي
ومش عايز اقولك الباقي
عشان الرقابه هتشيل كل الشتايم اللي اتقالتلي من مدرسين محترمين .. او يفترض انهم محترمين بدليل انهم بيعلمونا
اه صحيح .. نسيت اقولك ان في مدرس شتمني بامي الله يرحمها زمان وانا في المدرسه عشان كان بيتلكك لي عشان كنت الوحيد في الفصل اللي مش بياخد دروس ولا مجموعات تقويه .. المدرس ده شفته من فتره .. رحت رايحلو ومسلم عليه بمنتهى الادب وقلتله حضرتك مش فاكرني .. انا كنت تلميذ عند حضرتك زمان في اعدادي في مدرسه كزا .. هو راح اتنفخ وافتكر اني هاسلم عليه واشكره وراح مبتسم قوي .. اول مالقيته ابتسم قلتله تصدق بالله يا استاذ .. قاللي لا اله الا الله .. قلتله انت راجل ابن تييييييييييييييت
راح متنح .. قلتله دي نفس الشتيمه اللي شتمتهاني زمان لما كان معاك سلطه علي وكنت انا تلميذ عندك ماقدرش ارد عليك .. دلوقتي انا مش تلميذ عندك .. وانت فعلا راجل ابن تييييييييييييت
فضل متنح وساكت .. رحت سايبه وماشي من قدامه
وعمار يا تعليم ياحكومي
سلامووووووووووووووز
انتي هتقوليلي علي اولياء الأمور واللي بيعملوه
اصل انا مجربه وربنا يصبرني
دانا في وليه امر تيجي تقولي انا ابني مشربش انهارده مايه كتير
" طيب وانا الي هاجي أشربه؟"
وواحده تانيه كانت زعلانه قوي لان ابنها لما بيجي يلعب هوا وصحابه في الفسحه دايما بيخلوه يلعب دور الحرامي؟؟؟؟
ولا تعليق
كاميليا
اية الداخلة الجامدة دي
خضتيني
مرتين ورا بعض انتي اول تعليق يادي الهنا يادي النور
حتى لو كنتي التعليق المية برضوا بحبك
.......................
كاميليا تاني
اما ميس وحشة بصحيح
ايوة بصحيح مستر جمعة صاحب المدرسة راجل كويس جدا ومحترم جدا
فعلا ياكامي بريك الصلاة جميل اوي وكانت فكرة رائعة واحنا بنحاول معاهم دلوقتي انهم ينزلوا المدرسين مع الطلاب اثناء الصلاة علشان نضمن ان مفيش حد يزوغ
تحياتي وقبلاتي يا ارق كامي
....................
د/ اجدع بنوتة
انتي كمان وحشتيني ومعلش على تقصيري انا فعلا مقصرة في زيارة مدونات كتير جدا
ربنا يسمع منك
تحياتي
..................
فرنسا هانم
ايوة فعلا دة نقص
تصدقي انا مرة لقيت ولية امر مش عاجبها انهم عاملين لون الترنج بتاع الالعاب رمادي في اخضر
وواقفة في وسط المدرسة وبتقول اية القرف دة هو دة منظر ترينج والا دة لون
وعادي جدا ومش هاقولك شكلها كان عامل ازاي ماعلينا
نورتيني
تحياتي
.................
خايف من الحقيقة
اعوذ بالله انا متخيلة الاجتماع في الخليج هايبقى عامل ازاي يا ستار يارب
ربنا يستر على مرارتك ومرارتي ومرارتنا كلنا
تحياتي
...................
الطائر الحزين
عندك الف حق
ربنا يرحمنا
تحياتي
اّبي
ايوة كدة فهمتيني ونورتيني
امال انا اولادي لسة مااتحولوش لية؟ اكيد العيب مني انا هههههههه
ايوة فعلا هي مدرسة جميلة
الله يسلمك انتي كمان وحشتيني كتير
..................
خمسة فضفضة
وعليكم السلام ورحمة الله وبركاتة
ههههههه امال لو حضرتي معايا بقى دة انتي كنتي هاتفتكري كل كوميديانات البلد
تحياتي
...............
مهندس مصري
ايوة فعلا محدثين نعمة
دة انا مسكت نفسي بالعافية وكان نفسي ارد على واحده واحده فيهم بس اكيد كانت هاتبقى النتيجة مش كويسة خالص
تحياتي
.................
اية
اهلا ياحبيبتي شوفتي اختك بيجرى لها اية
صاحب المدرسة قعد يكتب في اجندة كانت قدامة وفسر موقف الميس اللي مشيت
ههههههههههه ايوة ياي واخي عليا اخية اخية اخية
تحياتي
........................
يحيى
كلمتين وبس
اوجزت فأنجزت
مش هما بيقولوها كدة برضة
اه من الدلع الزيادة ربنا يستر
تحياتي
.............
دوبة
ايوة ياهبة جادعة والتربية دي عاعاعاعاعاعا
صعبة خالص خالص خالص
ربنا يقوينا
انا شريرة طيب هاعيطلك تاني عاعاعاعا
سلام ياجميلة
الربان
مفيش كلام بعد كلامك
وطبعا عندك الف حق
تحياتي
..............
عبدة محتاس
مفيش داعي للأسف عادي ماحصلش حاجة
اما بقى حكاية ان مفيش حد لة الحق انة يشتم ابنك او بنتك ... انسى ياعمرو
انا طبعا مش مع الشتيمة المستمرة بس الميس دي انسانة من لحم ودم زينا يعني لما مرة تشتم والا حاجة مفيش داعي نعلق لها المشنقة يعني مش لازم نروح نشتكي لصاحب المدرسة ممكن جدا اروح واشوف الميس واقولها انتي شتمتي ابني لية؟
ومفيش داعي اني اكبر الموضوع
صح والا اية؟
تحياتي
.............
واحدة مفروسة
انا رديت على موضوع الشتيمة فوق عند عبدة محتاس
وشكلي كدة هابقى واحدة مفروسة زيك قريب لو فضلت احضر الاجتماعات دي هههههه
تحياتي
...............
سوووو
انا كمان كنت في مدرسة حكومة بس كانت محترمة وماكانش في شتيمة ولا ضرب
احنا بقى عكس السعودية والحاجة الوحيدة اللي بنقعد لها هي قراية القراّن كان لازم نقعد ونربع ادينا
اقولك على حاجة
انت ولد جدع
والمدرس دة حسبي الله ونعم الوكيل
انا اختي مدرسة في مدرسة حكومي في منطقة متوسطة ومش عاوزة احكي لك على المهازل اللي بتحصل خلي الطابق مستور
سلام يابني
.....................
الاّء
هههههههههه
ههههههههههه
هههههههه
معلش مش قادرة امسك نفسي
لازم كل شوية تقولي للعيال قوموا اشربوا ياحبايبي علشان صحتكم
وتسيبي الحصة والدرس والمنهج وتقعدي تأكليهم وتشربيهم
اما الاولاد المجرمين اللي بيخلوا الولد حرامي لازم يتعلقوا على باب المدرسة علشان يكونوا عبرة للباقي
ربنا يصبرك ويعينك
تحياتي
انا الحقيقة مش عارف اقول ايه لأني اتعلمت في مدارس حكومة وياما اضربت وياما اتشتمت ولما كنت بروح اشتكي لبابا كان بيزعقلي ويقلي اكيد انت غلطت
فاتعودت بعد كده اني معنتش اشتكيله واهو الواحد خلص ودخلنا طب وبقينا رجالة وكنا بنحترم المدرسين
بس اهو كل حاجة باظت اشمعنى دي يعني اللي مش هتبوظ
معلش يا جميل جيت متأخر بس الدنيا واقفة خالص وانا واقف مستنى الاتوبيس وكل واحد اقوله رايح عند شاهى يقولى لا فى الاخر لقت الاتوبيس ابو جنيه وبريزة رحت مضحى بالبريزة وجيت
بالنسبة للبوست
هى حاجة تخنق بصراحة وباحيكى على صبرك لان انا كان زمان بالكرسى اللى انا قاعد عليه وقمت ولا بلاش الطيب احسن
بس بجد استهبال اولياء امور عايزين الدبح بس حلو اوى الاجتماع ده بالرغم من ملاحظتك دى الواحد برده يقعد مع المدرسين ويطمن على عياله واخبارهم واحوالهم وكده
ربنا يخليهملك كلهم الاربعة
اخبار عينيكى ايه ابقى طمنينا عليكى
تحياتى ليكى
على حب
أنا كنت جاى أهدى الموضوع بس
هيرو
انا كمان اتعلمت في مدارس حكومية بس ماكانش فيها ضرب يمكن علشان كانت مدارس بنات فقط
لما ابني بيشتكي من المدرس بقولة احكي اللي حصل كلة علشان اعرف انت عملت اية لان مش معقول المستر هايزعقلك من غير سبب وبقعد اسمع واحاول افهمة ان هو اللي غلط وبرضة مش بيقتنع في الاخر هههههههه اصل الشنيور ابني صعب اوي
تحياتي
...................
علي
مش معقول ضحيت بالبريزة اد كدة انا غالية ياسلام والله فيك الخير
ازيك ياعلي واية اخبارك؟ وعملت اية في الترم الأول؟
ايوة طبعا فكرة الاجتماع دي ممتازة بس عقول بعض اولياء الأمور هي اللي تجنن
تحياتي الكتير ياعلي وخلي بالك القفل اللي على مدونتك قرب يصدي
.....................
عبدة محتاس
انت تاني
موضوع اية اللي جاي تهدية؟
كلة تمام وميت فل واربعتاشر
تحياتي
اهو ده بقى اللةب يضايقنى فعلا
ان كل ولى امر او ولية امر عايزة المدرس يبقى دادة لبنتها
ويا سلام لو الولد راح قال فى البيت المدرس ضربنى يجى والده تانى يوم المدرسة يعمل فضيحة للمدرس وانت مش عارف ده يبقى ابن مين وكانه الحاكم بامره
هو التعليم باظ فى البلد من شوية
تحياتى
السلام عليكم انا اول مرة اجى مدونتك يا شاهى بس بجد كلامك فى محله كده الاولاد هيطلعوا مدلعين وبعدين مش تزعلى منى اغلبيه اولياء الامور اللى بيدخلوا اولادهم مدارس لغات بيحسسوا فعلا الاولاد انهم اشتروا المدرسه بالمدرسين بالصاحب المدرسه كمان وكله بفلوسنا بس بجد كلامك فى الجون واتمنى نكون اصحاب اختك حنين القلب
ده انا لو مكانك هتشل
يجوا يشوفوا مدارس الحكومة
ربنا يكون ف عونك :)
السلام عليكم ....
أعجبتني مدونتك جدااااا..وقرأتها كلها...أتمنى أن تتقبلي مروري....
والله كلامك كله مظبوط
بس انا مش معاكى فى انك تتقبلى ان المدرسة تشتم الولاد
احنا مش بنودى عيالنا مدرارس علشان يتشتموا فيها
مامتي وحشاني قوي وبحبك قوي وليكي حق فعلا في كل الي بتقوليه احنا بنتعلم لغة علشان تعنا على ظروف الحياة مش علشان نستعرض بيها على الناس ونتباهى بيه حلو اننا نطبقها بس في ادق امورنا بلا خيبة ووويبة والاخر نقول العيل شخصيته مهزوزة ليه ومتنيل بستين نيلة وعنده ازدواج وبتاع ده علشان في اهالي ربنا يحفظنا بيربوا الاطفال على كتير من المظاهر ولما للاسف بيواجه المجتمع بكل الي فيه بتبقى شخصيته مش قادرة على المواجهة وسلامي ليكي قوووووووووي ياروح قلبي ووحشاني ومحتاجة لدعائك قوي وحاسة انك مش عنتي بتتوسي بيا في الدعاء سلام يااحلى أأأأأأأأأأأأأأأأم
شاهي ربنا يحفظ ولادك ويبارك فيهم
ضحكتيني قوي بتعليقك على موضو عالبقر ده سمعت من واحد عن طفل صغير كان راكب جنب ابوه في العربيه وبعدين عدت جنبهم اعلانات اللبن اللي على طبيعته دي بتاعة البقرتين الفقريين دول المهم كان فيه من اعلانتهم واحد البقره بتسأل دول ايه تقولها دول جواميس احنا بقر
فتقعد تغني احنا بقر هييه هييه
المه الواد شاف الأعلان على الحيطه صرخ لأبوه
بابا بابا الحق احنا بقر يا بابا احنا بقر يا بابا
ابوه يقوله مين يا واد اللي بقر بس اقعد ساكت والواد مصر برده احنا بقر يا بابا
بس ابوه خد باله من الأعلان وفهم
ربنا يحفظ ولادك اهو عادي يعني لما تقولهم يا بقر هههههههههههههه
-------------
اما عن اولياء الأمور عندك خدي بالك شعبنا الجميل مبيعرفش يخرس لو مش فاهم لازم يتفذلك باي تعليق وكأنه هو اللي هيصلح الكون بتعليقه الساذج ده غير ان ناس كتير بتبقى ملسوعه قوي من اللي بيدفعوه للمدرسه فبيكون عايز يحس ان ولاده بيدرسوا في فندق مش مدرسه
نظام بفلوسي يا كلاب
وفي الأخر العيال بتطلع زي اهلها منتهى التكبر والجحود وبتيجي على دماغ اهاليهم في الأخر وهم اللي بيدوقوا طعم التكبر والجحود ده من ابنائهم لما هم يكبروا
عموما ربنا يهدي الجميع
سلااااااااااااااااااااااااااام
هييييييييييييييه
ابنى هيدلع هييه
ابنى هيدلع هييييييييييييه
فكرينى يا شاهى لما شريف يدخل المدرسة ابقى اعمل الشويتين بتوع اولياء الامور
واقولهم ابنى كح ومحدش قاله اسم الله
ههههههههههههههههههههههه
تحياتى ليكى يا سكرة
قطة الصحراء
فعلا هو دة اللي بيحصل
دة انا شفت ولية امر ماسكة البنت مشرفة الباص ومبهدلاها والبنت تقولها انا ماضربتش ابنك والأم مصممة لأ انتي ضربتية انا ابني مابيكدبش
طيب ياسيتي اديها فرصة تقولك على اللي حصل
مفيش ماعندهاش رحمة ياساتر
تحياتي ياقطة
.................
حنين القلب
وعليكم السلام ورحمة الله وبركاتة
اهلا بيكي ياحنين في اي وقت
واتكلمي براحتك انا مش هازعل لان فعلا اغلبية اولياء الأمور كدة زي ماانتي بتقولي بس انا الحمد لله مش منهم وان شاء الله هافضل على طول كدة
تحياتي واعتبرينا اصحاب من دلوقتي اهو
...................
حمامة
كويس انك مش مكاني ههههههه
شكرا كتير
تحياتي
.................
ملك
وعليكم السلام
اكيد هاتقبل مرورك
نورتي
تحياتي
..................
اعترافات انثى جامحة
انا ماقلتش اني اودي اولادي علشان يتشتمو
انا بقول ان المدرسة انسانة وممكن جدا تغلط مرة وتشتم والاحاجة وانا بتكلم على الناس اللي بيهتموا ان المدرسة شتمت ومش بيهمهم ابنهم عمل اية
وانا وضحت وجه نظري اكتر في ردي على عبدة محتاس
تحياتي
....................
قلوب حائرة
بنتي المشغولة على طول
انا زعلانة منك وانتي عارفة لية
حقيقي انا مقصرة اليومين دول في الدعاء لكي ولكل المدونين اللي متعودة اني ادعي لهم بس هاعوض كل دة ان شاء الله
تحياتي
الشنكوتي الكبير
هههههههههه
احنا بقر يابابا
ههههههههه
حلوة حكاية الفندق دي بس تصدق كلامك مظبوط
شكرا ياايهاب على الدعوة الجميلة وعقبال مانفرح بيك ونشوف اولادك
تحياتي وسلامي لبنت شبرا
...................
بنت خيخة واي كلام
يانهارك ابيض هو انتي منهم
وقعتك زي الفل
اشوفك في الاجتماع القادم
سلام
إرسال تعليق