السلام عليكم
انا هاتكلم عن بعض المناقشات اللي بتدور بيني وبين اولادي
وهابدأ بأبني الكبير ابو الدراويش اللي هو زوجي برضة
ابو الدراويش : انتي عارفة ياشاهي
انتي احسن تاني حاجة حصلتلي في حياتي
انا بصراحة فرحت واستغربت وكنت هاموت واعرف اية هي اول حاجة
وفي نفس الوقت مش عاوزة اسألة بس الأفكار كان رايحة جاية في دماغي
وبعدين لقيتة بيقولي
اصل اول حاجة حلوة اني اهلاوي من غير زعل
انا : لا ابدا مفيش زعل ولا حاجة
ربنا يسامحني على الكذبة دي ماهو مش معقول اعمل مشكلة علشان زوجي بيحب الأهلي
................................
كنت في المطبخ مش بعمل حاجة بس هربانة من دوشة العيال
لقيت الشينيور داخل عليا ومبتسم
ياترى في اية خير اصلة دايما بيدخل عليا وهو متنرفز
يارب مايكونش عاوز يقولي نكتة والا فزورة من بتوعة دة انا لسة مافقتش من الساعة الثالثة عصرا
الشينيور : ماما هاسألك على حاجة
انا : اتفضل
هو : يعني اية موزة ؟
انا : ياسلام مش عارف يعني اية والا بتعملي امتحان
هو : بجد يا ماما قولي يعني اية؟
انا : يعني بنانا يافالح ياللي في سنة رابعة
هو : لأ يا ماما مش الموزة دي
انا : يعني اية مش الموزة دي هو في موزة تانية انا ماعرفش غير الموز اللي بناكلة
هو : اصل يا ماما عبد الرحمن بيقول على اية موزة حلوة
انا : ايوة ايوة انت تقصد مزة
ياسلام الواد عبد الرحمن دة بيفهم بصحيح دة انا نفسي معجبة بيها من وهي في كي جي وان
هو : يا مااااااامااا انتي بتقولي اية علي صوتك
انا : ايوة بقولك عبد الرحمن دة مش مؤدب
كلمة مزة بتتقال على البنت الحلوة بس هي كلمة مش حلوة يعني المفروض مانقولهاش
المفروض انك لما تشوف بنت حلوة او اي حاجة حلوة تقول ماشاء الله وسبحان الله
..........................................
كنا في يوم سبت
ويوم السبت بيبقى يوم الأستحمام العالمي
يعني بحمي التلات عيال
وبعد ماحميت الرايقة كنت باسرح لها شعرها
انا : ياحبيبتي بصي قدامك
هي : طيب بس انا عاوزة اكلمك
انا : كلميني من غير ماتبصيلي وانا سمعاكي
هي : ماما هو انتي لما تموتي مين اللي هايسرحلي شعري
انا : ياحبيبتي انتي قلقانة وخايفة عليا
هي : لأ يا ماما انا خايفة على نفسي مين اللي هايسرحلي شعري
انا : ماشي شوفي ياسيتي لو مت وانتي كبيرة هاتكوني اتعلمتي تسرحي نفسك
اما لو مت وانتي صغيرة يبقى بابا هايتجوز واحدة تانية علشان تخلي بالها منكم
وخلاص سكت
لقيت البنت فرحانة قوي من كلامي ومبسوطة من التغير اللي هايحصل
قمت قلتلها
بس ممكن تطلع مش كويسة وتعاملكم وحش
انا كنت فاكراها خايفة من الموت وخصوصا انها كانت بتتكلم كتير عن دورالأيتام
بس قلوب حائرة الله يسترها قالتلي انها ممكن تكون معجبة بدار الأيتام
وفعلا افتكرت ان المدرسة كانت عاملة رحلة لكام دار ايتام وهي راحت معاهم
............................
الجبارة بقى مواضيعها مش بتخلص
كنت في يوم بحاول انيمها لقيتها بتقولي
يا ماما انا عاوزة اتجوزك
انا : ماينفعش ياحبيبتي مفيش بنات بيتجوزوا بعض
هي : ماليش دعوة انا عاوزة اتجوزك علشان تشتغلي رقاصة
انا : نامي انتي باين عليكي بتخرفي
هي : لأ يا ماما انا عاوزاكي تلبسي اللبس بتاعهم
انا : طيب نامي والصبح نتكلم
...........................
هي : ماما انا عاوزة كلب حقيقي
انا : ماينفعش نربي كلب في البيت
هي : لية؟
انا :علشان حرام ومفيش مكان للكلب في البيت
هي : يقعد في البلكونة مع كوكي ـ السلحفاة ـ
انا : مش هاينفع يعني يعجبك لما يعمل بي بي على الأرض والسجادة
هي : لما يعمل نبقى نقول لطنط نورة تطلع تمسح ماهي بتمسح البي بي بتاع كوكي
انا : بس الكلب بيعمل بي بي كتير مش زي كوكي
هي : مش مهم ماهي طنط نورة مش بتخاف
انا : خلاص لما تطلع طنط نورة نبقى نسألها
وسألنا طنط نورة وطبعا ماوافقتش وطبعا برضة اخدت اللي فية النصيب من الجبارة
المهم اني طلعت نفسي من الموضوع
احب اوضح للي مايعرفش ان نورة دي تبقى البوابة بتاعتنا
كدة خلاص انا خلصت
اشوفكم على خير
هناك ٤٠ تعليقًا:
احييكى على انك دوما تحاولى نجدى ردود
وهذا يشجع الابناء على النقاش
طبعا هذا حمل عليك
بارك الله لك فيهم
تحياتى
اخنى العزيزة شاهى
عود حميد بعد غيبة طويلة
انا بصراحة مش عارف اعلق اقولك ايه
انا ضحكت واتفأجت فى نفس الوقت للاسئلة الغريبة والاجوبة الاغرب
بالنسبة لابو الدراويش انا كنت متخيل ان اول حاجة حلوة حصلتله فى حياته اعظم من كده بكتير مش يقولى الاهلى بجد مش مصدق ان فى حد بيحب الكورة اوى كده
وبالنسبة للشنيور اجابتك كانت معبرة ومنطقية وفيها تربية كمان
اما الرايقة فهى فعلا رايقة ايه الروقان ده كله اهم حاجة مين اللى هيسرح لها شعرها مش مهم اى حاجة تانية
والجبارة كمان زى العسل
ربنا يخليوهم ويحفظهم وتعيشى لما تشوفيهم عرايس وعرسان
على حب
شوشو
أنا غلطان إنى كنت صريح
يا بنتى و بعدين ماهو كله ليكى
بوسى إيدك دقن و شعر
يعنى لو لا قدر الله كنت زملكاوى ما أنا كنت هأفرح كل عشر سنين مره
و كنت هأكلم نفسى و ألسع و كله على دماغك
ده غير الكوابيس و أنا نايم و أقلق منامك و أنا بأحلم بأبو تريكه و متعب و فلافيو
ده غير الخناقات مع العيال لأنهم أكيد كانوا هايصعبوا عليا و كنت هاخليهم أهلاويه علشان مستقبلهم
و كنت هأفضل محبوس و حابسكم فى البيت من النكد
و كنت هألغى التليفون علشان أصحابى الأهلاويه الأندال مايتصلوش بعد كل ماتش يذلونى
و كنت هابيع التليفزيون علشان الأهلاويه ماليين القنوات
و أهم حاجه كنت هألغى الإنترنت علشان مراتى ما تفضحنيش على النت و تقول إنى سيكو
تصدقى
أنا و أنا بأكتب الرد ده إكتشفت إنى شمعه تحترق
هييييييييه دنيا
والله عيال ظريفه وأم اظرف
أساسا كفاية التسميات بتاعتهم دي
الشنيور
والجباره
والرايقه
بس المهم لما تعلمي الشنيور يقول سبحان الله
يتعلمها لحد وقت معين
احسن يسرح
ويتنيه يمشي في الشارع وهو كبير يقول سبحان الله
ويعاكس بالدين كده
:)
ربنا يخليكي لهم ويخليهم لكي ولأبو الدراويش
ولكي تحياتي
ربنا يخليهم ليكي ويخليكي ليهم دايماً يارب
صحييح !!! هو ليه دايماً الزوجه بتعتبر ان زوجها ابنها ؟!! :$ ماعلش اعتبريه سؤال من الاسئله اللي كل يوم بتسمعيها وتجاوبي عليها :)
هو ده على اساس نوع من الحب يعني انه يعتبر زوج وابن وصديق وكل حاجه في الدنيا ولا على اساس ان الأم بتشيل هم ابنها دايماً زي الزوجه اللي بتشيل هم زوجها وتحاول تخليه أحسن واحد في الدنيا ولا الزوج بيطلب من الزوجه انها تكون أم ليه-- بالاحساس يعني-- ولا الزوجه من حنيتها بتكون أم
ولا ايه بالظبط ؟!! بجد أنا بسأل بجد مش بهرج والله ولا بستظرف بس نفسي أعرف ليه
شكراً مقدماً :) ويارب يخليكي لينا احنا كمان وتكتبي لنا دايماً كده
كل لما اجى اكتبلك حاجة افطس على روحى من الضحك
انا مع ابو الدراوييش انه يشجع الأهلى مهو كل الرجالة بيشجعوه
وبالنسبة لحوده يلا يا حبيبى كل مزة وانت طيب وسلملى على عبد الرحمن وعاوزاه يكون صديق مشترك بيننا لو سمحت
وللرايقة حبيبتى الرايقة فعلا يلا موتى انتى بس ولا يهمك ان عندى عروسة حلوة لابو الدراوييش عارفاها انتى طبعا بس بلاش تسييح
وللجبارة فدى جبارة فعلا
هتشغلك رقاصة
رقاصة يا سوسو
يلا بالسلامة
واحلى سلام على طول الطريق لنورا طبعا
نتى فاهمة قوى انا عارفة
يلا باى
تحياتى
بيب بيب زمالك
مااجمل ان يكون لك بيت بهذا التناسق رائع وزادكم الله تفاهما ومودة (على فكرة انا مش بحسد انا بنأ بس )
تحياتى
عمرو
ههههههههه عاوزكي تكوني رقاصة هههههههه لا ياماماخدي بالك ياحبيبتي دي بداية مش مبشرة لما اكلمك هبقى اقولك تفسير دي ايه كمان والله فطسانة على نفسي من الضحك وحشاني ياماما قوي ووحشني الحكاوي معاكي وليه مقلتيش بنيت البكرية " قلوب حائرة " والله رجعتلك بعد ما رحت اكتب الرابط ماشي ياماما ماشي
بالنسبه للجباره
انا عندي اقتراح ليها حلو قوي
بما اني غتوي رقص في الأفراح وانتي مش مواقه انها تتجوز واحده ست
يبقى اتجوزها انا وتشغلني رقاصه زي ما هي عايزه بس المهم تشتغل هي البلطجيه بتاعتي
وقولي للبنت دوبه بدل ما تدور على عروسه لأبو الشنايير تاخد بالها من نفسها لحسن احنا اللي نجيب ليحي خمسميت موزه حلوه ينقي منهم عروسه
وختاما ليكم الف سلاااااااااااااااام
((كدة خلاص انا خلصت
اشوفكم على خير ))
لسة بدرى .. خليكى شوية ..
حوار جميل اوى
انا بحيى ذكائك والله
ولسه كل مايكبروا الاسئلة هاتكبر
استعدى بقا
ربنا يبارك لك فيهم يارب
ويكونوا من عباد الله الصالحين
ويكونوا سببا لدخولك الجنة
وحشتينى اوى كتير
مش تتآخرى .. انتى فى اجازة نص السنة اهو
يعنى مستنية منك حاجات كتير
وحشنى اوى كلامك
مع كل الحب
كاميليا
السلام عليكم ورحمةالله وبركاته
ههههههههههههههه
الله يكون في عونك يا شوشو والله يابنتي انتي عايشه في مرستان ...ههههههه
احسن موقف عاجبني بتاع الرايقه وانتي بتقوليلها بس ممكن تطلع مش كويسه وتعاملكم وحش
هههههههه بجد فطست من الضحك
ربنا يخليهملك ويفرحك بيهم ...آمين
ههههههههههههههههههههههه
ربنا يعينك
بس كلامهم يجن فعلاً
ربنا يخليهم لك
ماشاء الله عليهم
بجد عيال زى العسل
ربنا يخليهم لك ياااااااااااارب
وصدقنى كل ده هيكون ذكريات جميلة ليهم لما يكبروا ويعرفوا اللى هما كانوا بيقولوه ويعملوه
ربنا يخليكى ليهم يارب
:)
ده اول تعليق ليا وان شاء الله مش الاخير
دمت بخير
ولا حياه لمن تنادى
كالعادة يا ست شاهى ضحكتينا
مين آيه دى ها
يا ريت تعرفيلى هى مرتبطة ولا لآ
والله بجد الله يكون في عونك وربنا يباركلك في أولادك.
تحياتي
الطائر الحزين
والله انا بحاول على أد مابقدر
الله يبارك فيك ودايما منورني بتعليقاتك المشجعة
دمت لي عونا
................
علي
اخي الصغير علي
عامل اية في الامتحانات؟
ربنا معاك
بالنسبة لأبو الدراويش
هو بيحب الكورة جدا والاهلي جدا جدا جدا من هنا لبكرة الصبح
شفت العيال بيعملوا فيا اية
بس سبحان الله ربنا بيدي الواحدة صبر ايوب علشان تقدر تتعامل مع عقليتهم المختلفة
ربنا يسعدك ياعلي وتخلص الجامعة على خير
تحياتي
الحوار مع الاولاد ممتع و فرصة ذهبية للاباء و الامهات انهم يعرفوا افكار وانطباعاتهم ... ومن ثم تصحيح الخاطيء من هذه الافكار...و تعزيز الجيد منها.
المهم الا نستهين بافكارهم وان نعطيهم حقائق و في شكل مبسط.
تحياتي و تقديري
شاهى
اضيفى شات بوكس عندك
علشان لما توحشينى اكلمك عليه
ممكن تروحى تاخديه من عندى
لكى حبى
كاميليا
والله ابو الدراويش ده اهلاوي اصيل بجد
معلش يعني بس الاهلي فوق الجميع
-----
بنت اخويا كانت عندنا في البيت من كام يوم .. قامت اختها الاكبر منها اتصلت في البيت وبتقولها تطلع شقتهم عشان المدرسه الجديده بتاعة الماثيمتك جات وهتبدأ الدرس معاها
قامت حبيبه قايلالها ايه .. قالتلها هي المدرسه حلوة عشان نجوزها لعمو؟؟؟
حبيبه دي في تانيه ابتدائي على فكره
ولما مسكتها وبقولها وانتي بتدوريلي على عروسه ليه بقى ان شاء الله ؟؟
قالتلي عشان تيته الله يرحمها تبقى مرتاحه في قبرها انك اتجوزت
!!!!!!!
بذمتك احنا كنا عيال؟؟؟؟؟
سلامووووووووووووز
هههههههههههه
ولادك دول عسل ربنا يخليهوملك
الاطفال دايما بيكون اسالتهم عجيبه بس لذيذه اوي
بوست جميل
تحياتي
شاهى الجميله
ربنا يخلليلكى لهم ويخليهم لك ويبارك
فيهم دول زى السكر زى مامتهم وابو
الدارويش طبعاالاهلاوى
والشنيور بادى بدايه قويه مزز مره واحده . والرايقه شكلها حايكلم الاخصائيه الاجتماعيه وراثه بقى
اما الجباره فدى عسل عندها ميول
فنيه وبعد نظر ده انتى لو فكرتى فى الرقص
حاتعدى. طنط نورا طلعت جدعه
بوست زى العسل
تحياتى وسلامى
الدرويش المرووش
ياعمنا ماانا بحمد ربنا اهو ومش معترضة على حاجة بس يعني ماينفعش الاهلي دة يكون هو اللي تاني احلى حاجة
اة صحيح مش هاينفع علشان انت اهلاوي قبل لما تعرفني يبقى لازم هو اللي يبقى الاول
ياحرااااااااام طلعت شمعة
تصدق اة شمعة اهي صحيح
سلام ياشمعتي يامنورة حياتي
................
دكتور حر
ههههه ياخبر ابيض تفتكر ممكن يعمل كدة ويعاكس بالدين
لا يادكتور مش معقول اكيد هو هايكبر ويفهم ولو مافهمش هاضطر افهمة انا وامري لله
بارك الله فيك
..................
رحاب مصطفى
شوفي يارحاب سؤالك دة عاوز بوست لوحدة للأجابة علية بس اقدر اقولك كل الاسباب اللي قلتيها صحيحةوانا هاحكيلك من الاول
في اول الزواج كنت متفرغة جدا لزوجي وباعملة كل حاجة وكنت بعاملة فعلا زي مايكون ابني وكنت سعيدة بدة ولما ربنا رزقني بالشينيور كان لازم اكون عادلة ومااهملش في زوجي وبكدة بقى ابني رسمي
يارب اكون عرفت افهمك
ولو مافهمتيش قوليلي وانا احاول تاني
تحت امرك ياافندم اسألي براحتك
...............
دوبة
يامجرمة عاوزة تجوزي جوزي طيب انا هاوريكي وهاخبي النسكافية اللي في البلد كلة وابقي وريني بقى هاتعملي اية
رقاصة ياسوسو
ايوة رقاصة اية عندك مانع والا انتي غيرانة علشان يوسف مش عاوز يشغلك رقاصة
يالا انا هاعمل بأصلي وابقى اعزمك على اول شو ليا
.................
انسان بلا عنوان
ماشي يا عمرو نق براحتك انا مبخرة المدونة وهاعلق خرزة زرقة على الباب
قلوب حائرة
اهلا بدورة شفتي الجبارة عاوزة تعمل فيا اية البت اتهبلت
هابقى اكلمك ان شاء الله ياقطة
.............
الشنكوتي الكبير قوييييييييي
اية ياشنكت دة انت عاوز تشتغل رقاصة
ماشي انت حر بس بنتي الرقيقة الجميلة الجبارة هاتشتغل بلطجي ازاي هي صحيح جبارة بس مش لدرجة بلطجي
...............
كاميليا
المتألقة دائما حبيبتي
الله يطمنك
التقيل لسة جاي
اة ياخوفيييييييييييييي
ربنا يبارك فيكي ياكامي ويسعد ايامك
...............
خمسة فضفضة
ربنا يبارك فيكي يادكتورة
اصل البت غاظتني اوي وبجد مش عارفة اوصفلك السعادة اللي كانت فيها لما قلتلها ان بابا هايتجوز واحدة تانية
فقلت انكد عليها
تحياتي
مهندس مصري
الله يكرمك يابشمهندس وعقبال عندك
تحياتي
...................
am.zaid
اهلا وسهلا بيك في اول تعليق
وان شاء الله تكون متواجد على طول
هي فعلا هاتبقى ذكريات حلوة وانا بستمتع بيها بس لما بكون تعبانة مش بستمتع خالص
تحياتي
................
عبدة محتاس
اية يا استاذ عندها 9 سنين وماينفعش اعرفك عليها خالص كفاية انا اتعرف عليها لوحدي نيهااااااااا
...............
يحيى
اولا : ازيك يا اخ يحيى
ثانيا : لية التعليق صغير كدة انا كنت متوقعة انك هاتكتب تعليق اطول من كدة بكتيررررر بس واضح انك مش فاضي او مش ليك مزاج
معلش هاستنى منك تعليق تاني
مقبولة منك ياباشا الدعوة الحلوة دي
دمت بكل ود
...............
الربان
حضرة الربان منورني
انا بحاول اني افيدهم بس ساعات مش بلاقي كلام اقولة وربنا يستر
تحياتي
.................
كاميليا
انا ضيفت الشات بوكس علشان خاطر عيونك
............
سوووو
بقى الاهلي فوق الجميع مااااااااااااشي
محروم من المصروف
حبيبة دي سكر ماشاء الله عليها
يالا خليها تدورلك على عروسة علشان نفرح بيك
بصراحة لأ ماكناش عيال ابدا
..............
ايمي
عسل اوي بس لما بكون رايقة وفاضية لكن غير كدة بيبقى عسل برضة بس لون تاني
.............
كلمات
اميرة هانم
كلامك زي السكر
تصدقي انتي لفتي نظري لحكاية الاخصائية دي
يانهار ابيض هو اللي بنعملة في الناس هايطلع علينا والا اية
دمت بكل ود
بجد ماشاء الله اطفال زي العسل اهو
اكتر واحده عجبتني الرايقه مش هاممها ان مماتها حتموت وتسيبها لا المهم مين حيسرح لها شعرها
البنت خايفه على مستقبلها برضه لازم تكون دايما بنوته لطيفه كده ومروقه على نفسها امال حتمشي وهي منكوش شعرها يعني
انما الشنيور بقى متستعجبيش من جيل الاطفال بتاع الايام دي دول عارفين كل حاجه شويه وحتلاقيه هو اللي بيعلمك كل حاجه
ولا الجباره كمان .. حصلت تشغلك رقاصه ههههههههه
واحده تقولها تموتي والتانيه تقولها رقاصه
بجد ضحكتوني اوي
ما شاء الله على اولادك
اللي عنده اولاد مجرب هذه النوعية من الاسئلة ،
ولازم الاجوبة تكون حاضرة
ربنا يحميهم
بيفكروني بأولادي
انا مش عايز اكتب تعليق أكتر من كده عشان مصلحتك بس ما دام انت مصره لازم اقول رأي.
الحمد لله ان جوزك أهلاوي راجل اصيل وكريم وكمان طلعتي تاني أهم حاجة في حياته ده يبقى كتر خيره على الاخر وكمان طلع شمعه بتحترق من داخلها عشانكم وانت مش واخده بالك كل ده !!! بصراحة الله يكون في عونه وأخيرأ بيب بيب أهلي
سلام
همسات ساكنة
طيب ياسيتي الحمد لله ان احنا عرفنا نضحكك
ربنا يكرمك وسعيدة بزيارتك
...............
اكتب بالرصاص
الله يكرمك يافندم
ويخليلك اولادك
وتنورني على طول
تحياتي
...................
يحيى
ماشييييييييييييييييييييي يا عم يحيى
اتكلم براحتك يااستاذ
بس مين قالك بقى اني مش واخدة بالي دة انا واخدة بالي كويس قوي
وبيب بيب اهلي ماقلناش حاجة شوف يقى انا من كتر الكلام اللي كنت عاوزة اكتبهولك مش عارفة اكتب حاجة بس انت عارف احسن حاجة اكلم ام يوسف وافش غلي فيها وبالتأكيد هاينوبك من الحب جانب
سلام بقى علشان ورايا مكالمة مهمة
بقى الله يكون في عونة ......... طيب يا اخ يحيى طيييييييييييييب
انا مقصر معاكي جدا بس والله مع الكل صراحة معلش بقي ضغط الشغل ربنا يخليلك ويديكي الصحة والصبر دانتي من جبال والله
ههههههههه
حلو قوي البوست وحلوه قوي المدونة بتاعتك
لزيزة ودمها خفيف. ومعظم الكلام اللي بتحكيه عن اطفالك انا كمنا بعاصره لاني بدرس ل kg
وانا بعزمك علي المدونه المتواضعه بتاعتي ياريت نشرفيني فيها
هههههههه
طيب هى قالتلك عوزاكى تشتغلى رقاصه مجاش الطلب ده من حد تانى
احم احم
انا بهدى النفوس بس
والله موتينى من الضحك
ربنا يحميهم يا شاهى يارب ويباركلك فيهم
الطفل اللماح ده طفل ذكى ربنا يحميهم
يا بخت كوكى وطنط نورا بامانه قاعدين فى بيت مميز
اه من الجباره
ربنا يخليهالك
عايزه تشغلك رقاصه
علشان اللبس بتاعهم
قوليلها دورى على شغلانه تانيه احسن
وتحياتى للشنيور
والرايقه
يا نهار ابيض وليلة مش فايتة
انتى يا بت يا شاهى بتكتبى بوستات من ورايا
طب مش تقولى انك كتبتى بوست جديد
وانا قال ايه مش عايزة اعدى عليكى علشان فاكراكى بتأجزى عن مامتك
اتاريكى كاتبة بوست جديد من زمان ومصهينة
الهم عاجبنى اوى تشبيهك لجوزك انه ابنك برضه
بس قوليلى عملتى ايه لما الجبارة قالتلك عايزاكى تلبسى لبس الرقصات
دى طلعت جبارة بجد
ربنا يخليلك ولادك الاربعة ويخليكى ليهم
تحياتى
اختك خيخة
3la fekra bgd ana kol post leeeky y7sally 7aga mn el de7k
el moshkela el marrady belzat enny felshoghl w 23dt ad7ak kteeer awy welnas gat tes2alny hwa fe eh ?? eh elly byd7akek
fy 15 mowazzaf kano by2ro ur post delw2ty w 23deen yd7ako :D :D
raheeeba fe3lan wallahy
rabena ykhally el nas kollaha leeky
w ykhalleeky leehom
w ykhalleeky leena w lel blogs kollaha
sorry 3shan mafeesh 3araby fy my comp
سندياد
يااهلا وسهلا بسندباد العشق والغرام
ولا يهمك الشغل للجدعان
نورتني
.....................
الاء
بتدرسي للكي جي
ياعيني يابنتي
مدونتك حلوة بجد ودافية مش عارفة ازاي بس هو دة اللي حسيتة لما دخلت عندك
ورسوماتك كمان جميلة ماشاء الله عليكي
...................
لماضة
تقصدي اية يالمضة انتي
الطفل اللماح ذكي ولمض صح
ياسلام تفتكري هاعيش واشوفهم زيك كدة
الله اعلم
تحياتي ياشقية
...............
صوت من مصر
الله يكرمك
بأمانة مش عارفة اقول حاجة
انت قلت كلمتين صغيرين بس تأثيرهم كبير اوي
تحياتي
فرنسا هانم
هاقولها
نورتيني ياهانم
..................
بنت خيخة واي كلام
انا كتبت البوست قبل لما اروح عند ماما علشان عارفة اني لما اروح هناك مش هاعرف اكتب حاجة
انا مااهتمتش بكلامها عن الرقاصة وقلت انها تخاريف نوم وفعلا الصبح كانت نسيت الحكاية خالص
ربنا يخليكي ياخيخة ويخليلك شريف وهاني
....................
كفاية طيبة
واللهي انا كمان تعليقك ضحكني لاني متخيلة شكلك وانتي عمالة تضحكي ومتخيلة كمان ال15 موظف وهما بيقروا البوست
تحياتي ليكي وليهم كلهم
و ولا يهمك علشان العربي المهم اني اعرف اقرا تعليقك والاهم انك تعلقي
تحياتي
هههههههههههههههه
بسم الله ما شاء الله عليهم....بجد ربنا يخليهملك زى العسل و احلى حاجة انك بتتعاملى مع اسئلتهم و بتستقبليها و بتعلميهم منها كمان
إرسال تعليق