السلام عليكم
في الاول هاقولكم باب البحر دي تبقى فين وبعدين احكي حكاية الرحلة
باب البحر دة اسم شارع متفرع من ميدان رمسيس
يعني قريب من الفجالة وباب الشعرية
ودي كل معلوماتي عنة واللي عاوز تفاصيل اكتر
يقدر يسأل الاستاذ احمد ـ يوميات عيل مصري ـ
ابو الدراويش وانا لينا بعض الاقارب اللي ساكنين هناك
وفي يوم من الايام اللي هي بعد الأوبن داي بتاع المدرسة
فكرت فكرة خبيثة اني اخد العيال واوديهم هناك لسببين
الاول : زيارة الاقارب وصلة الرحم
والتاني : انهم يشوفوا عيشة تانية وعالم تاني
ويحمدوا ربنا على النعم اللي هما فيه
وسألتهم
اية رأيكم ياولاد نروح باب البحر
طبعا رحبوا بالفكرة لان ابو الدراويش كان مسافر وانا كنت قاعدة على قلبهم
وماخرجتهمش
وكنت ناوية اني اخدهم في المواصلات بس بصراحة صعبوا عليا
وكان الجو حر فكلمت عربية مكيفة واخدتنا من باب البيت
وقلت خلي المواصلات باليل اهو يكون الجو بقى احسن
وصلنا ميدان رمسيس وقلت للسواق اننا هاننزل في الفجالة
ونزلنا فعلا ووقفت في الشارع وحاولت افتكر امشي ازاي ومافتكرتش
مشيت خطوتين وانا بحاول اني مابينش حاجة للعيال وقربت من محل من بتوع
السيراميك اللي هناك وقبل لما اسأل الراجل لقيتة بيقولي: انتي عاوزة تروحي فين؟
قلتلة ووصفلي وشكرتة ومشيت
وصلنا للشارع والحمد لله
انا : خلي بالك يامحمود من العربيات والعجل والفزبة
محمود : يعني اية؟
انا : هو اية اللي يعني اية بقولك خلي بالك علشان العربيات
محمود : ياماما الشارع دة صغير مفيش فية عربيات
ـ طبعا احنا كنا دخلنا في الشوارع والحارات اللي متفرعة من الشارع الرئيسي ـ
انا : لأ العربيات بتدخل هنا والموتوسيكلات والفزبات
محمود : يعني اية فزبة
انا : يوة
ولسة بفكر علشان اقولة يعني اية لقيت فزبة معدية
قلتلة : اهي هي دي الفزبة خلاص
والعيال كانوا ماشين يتفرجوا على كل حاجة كأنهم سواح وعشرين سؤال
من كل واحد فيهم غير بقى اني كل خطوتين الاقي حاجة مسكت في رجلي
وكانت هاتقلبني على بوزي كام مرة
ببص كدة لقيتها الجبارة كل لما تشوف قطة
تقف وتمسك في رجلي
انا : اية يابنتي في اية دي قطة عادي هو انتي اول مرة تشوفي قطة
الجبارة : لأ دي مش قطة دي كبيرة اوي
انا : معلش هي القطط كبيرة هنا مش مسلوعة زي قطط اكتوبر
وبعدين دخلنا حارة وكان في اتنين ستات بيكلموا بعض
كل واحدة قاعدة قدام بيتها وبتتكلم مع التانية وطبعا انا مش عارفة
هما كانوا بيقولوا اية واول لما عدينا بينهم راحت واحدة قايلة
يقطع العيال وخلفتهم بلا نيلة
انا مسكت نفسي من الضحك بالعافية من منظر الشنيور لما سمع الكلام دة
ولقيتة باصص لي بنظرة كلها رعب وغضب في نفس الوقت وبيقولي
هي الست دي شتمتنا لية ياماما هو احنا عملنا لها حاجة
انا: لأ ياحبيبي هي مش بتتكلم عننا خالص
الجبارة : ماما الحقي طنط دي قاعدة جنب الغزالة ومش خايفة منها
انا : يافضحتي ياني غزالة دي معزة مش عارفة المعزة
رحلة العودة
انا قلت بقى خلاص احنا قعدنا اليوم كلة والعيال اخدو على الجو الشعبي
يبقى نرجع في الميكروباص
وفعلا توجهنا الي موقف احمد حلمي علشان نركب عربيات اكتوبر
وعلشان يبقى الدرس كامل قعدنا في الكنبة اللي ورا لوحدنا
السواق : يامدام كدة تلات انفار
انا : ايوة عارفة
الشنيور: هو بيزعق لية؟
انا : هو مش بيزعق هو صوتة كدة وياريت تقعد تتفرج على الطريق وماتتكلمش كتير
ومشي الميكروباص والرايقة والجبارة ناموا واخدوا راحتهم على الاخر وكأنهم على السرير
وبعد شوية بدأ الشنيور في الزن
الشنيور : اية دة ياماما انا مش عارف انام واية اللي تحت رجلي دة
انا : مش لازم تنام انت خلاص بقيت كبير وبعدين اللي تحت رجلك دة
الكاوتش بتاع العربية العجل يعني
الشنيور: شيلية ماليش دعوة انا مش عارف احط رجلي منة
انا : طيب اسكت خالص مش انت اللي قلت عاوز تقعد جنب الشباك استحمل بقى
الشنيور: ماليش دعوة انا عاوز اقوم من المكان دة
انا : بص ياواد انت انا مابحبش الدلع انا لو كانت ايدي فاضية كنت ضربتك وخلصت
الراجل اللي قاعد قدامنا : في اية بس ياحبيبي بتعيط لية تيجي تقعد مكاني
بصيت للواد حتة بصة وقلت للراجل شكرا هو دلوقتي هايبقى كويس
الراجل راح قايل لمحمود: انت باين عليك باباك عندة عربية هههههه
وطبعا الشنيور مارضش علية
بس انا احرجت خالص وقلت للراجل ايوة
وفضلت مكتومة طول الطريق وكل لما الشنيور يتكلم ماردش علية
وصلنا البيت وصحيت الجبارة علشان ننزل واول لما فاقت ولقت نفسها في البيت
قالتلي: ياماما انتي كذابة وضحكتي علينا
انا : لية؟
الجبارة: علشان مفيش بحر وانا كنت عاوزة انزل البحر
انا : ادخلي نامي وبكرة ابقى افهمك
الحمد لله خلص اليوم وخلصت انا كمان
اشوفكم على خير
ملحوظة للناس اللي ماتعرفنيش
محمود هو الشنيور اللي هو ابني
الرايقة والجبارة بناتي برضة
هناك ٣٢ تعليقًا:
بجد مغامرات ولا احلى وكله كوم والغزالة دي كووم تاني خالص بجد مش باقدر امسك نفسي من الضحك الواحد متشوق انه يتجوز ويخلف علشان العيال بس
ربنا يخليهملك
بتشوشرى على أصولى الأرستقراطيه
أخش الإنتخابات إزاى دلوقت
و بعدين مش كنتى تصورى الغزاله علشان أشوفها
ههههههههههه
ههههههههههه
انتنى تشوفيلك صرفه فى اسلوبك ده
انا بطنى بتوجعنى كل لما اقرالك بوست
ههههههههههههههه
المفروض يا شاهى كنتى بعد الرحله ديه دخلتى العيال تاخد حمام سريييع ههههههههه
كويس انهم مفضلوش يوقولو يييييييعععع
إخييييييييييي.....إيه القرف ده
كانوا فضحوكى قدام الناس.....هههههه
المهم عودا سالما للمحافظه
ههههههههه عارفه ليه هموت من الضحك اصلى ساعات بكون زيهم كده فى الاماكن اللى معرفهاش بجد انتى عاقبتيهم وكرهتيهم فى المعزة قصدى الرحله
ههههههههه
لا ثقفيهم شويه يا شاهر مينفعش كده
وبعدين لازم تسيحى لاقريبك كده الا والله اول مرة اسمع عن باب باب البحر ده ههههههههه
وافتركت الاول انك رايحه البحر يعنى البنت مكدبتش هههههههه
مشيت خطوتين وانا بحاول اني مابينش حاجة للعيال وقربت من محل من بتوع
السيراميك اللي هناك وقبل لما اسأل الراجل لقيتة بيقولي: انتي عاوزة تروحي فين؟
قلتلة ووصفلي وشكرتة ومشيت
............
ههههههههههههههه
للدرجة دى كان باين انك مش عارفة الطريق؟
ههههههههههه
كل رحلة وانتى طيبة
تحياتى وحبى
ايه الثقافة المضمحلة دى دول عايزين دورة مكثفة دى فضيحة فيه حد ميعرفش المعزة ولا الفزبه انا انصحك تكررى الزيارة دى وزيارات تانية فى اماكن مختلفة وبجد حكاوى لذيذه انصحك تدونيها فى كتاب عشان لما يكبروا يفتكروها عشان متضمنيش بتوع البلوجر دول اللى مستضيفنا ممكن فى يوم يقولولنا خلاص شطبنا ابو بلاش وساعتها كل ده هيروح
أول مرة أزور مدونتك اللى زى العسل دى
كويس إن الشنيور والجبارة ما شاوروش على حاجة وقالوا وهم فى منتهى السعادة ..الله .. جاموسة بيضاء
وهى أصلا حمار زى ولادى .. لأنهم يعيشون فى مدينة لاترى الحمير ..
اعتذر لكن الشئ بالشئ يذكر
جميلة مدونتك .. وممتعة
هههههههههههههههه
يقطع العيال وخلفتهم بلا نيلة ؟؟؟؟
اكيد الست ديه تعرفنى
ههههههههههههههههههههه
بجد يا شاهى سيبك من اى حاجة
عجبتنى فكرة انك تعودى ولادك على المناظر اللى بقت عادى فى مصر
اهو كده يكبروا يبقوا عيال مية مية زى ابائهم
بجد ربنا معاكى
والمرة الجاية ركبى الشنيور ميكروباص من غير كاوشت
تحياتى لعائلتك الكريمة
إنجي هانم .... طبعا متعرفيش مين إنجي ...طب فكري شوية ... إنجي يا شيخة حد ميعرفش إنجي ... اللي اتجوزت ابن الجنايني .. فيلم رد قلبي
المهم انتي كنتي طبعا بتأدبي العيال .. عايزة بقي تعرفيهم مصر بجد انصحك بتريب صغيرة للدويقة .. ياي مقولكيش مش هتلاقي غزلان بس هناك فيه كلاب بول دوج .. ده طبعا من وجهة نظر ولادك بس هم حاجة تانية اسيبك تشوفيها بنفسك
بعيدا عن التهريج بقي بجد اسلوبك دمه خفيف جدا .. تحفة وتعليقاتك ثرية ومش مفتعلة
ايه ده يا شاهى
يا خبر ...ايه العيال الدليكا دول
دول عاوزين كورس مكثف عندنا فى اسكندريه علشان يتودكوا كده واوى لما تروحى اسكندريه توديهم سيدى جابر والحتت دى . انتى يا بنت الحلال تتصلى بيه وانا اعملهم كورس مكثف فى حوارى بحرى واماكن اخرى كتيره ومش حيشوفوا الغزاله وبس دول حيشوفوا الفيل كمان ماشى فى الشارع
ثم توديهم فى عربيه مكيفه . ليه يا بنتى كده امال المشاريع ( يعنى الميكروباص عندكم بس ده لفظ اسكندرانى طحن ) عملوها ليه
على العموم ربنا يخليهملك ويخليلك خفه دمهم يا رب
السلام عليكم ورحمة الله وبركاته
هههههههههههههه
حرام عليكِ يا شاهي فطستيني من الضحك ،الولاد شكلهم محبوسين ومش بيتحركوا برا مجتمع محدد بين المدرسة والبيت عشان كده حلصلهم اسبهلال لما طلعوا براه
حاولي تبقي تكرريلهم الزيارات دي عشان ياخدوا علي الجو ويبقوا ولاد بلد (علي راي ابو فداء ) بحق وحقيق
سلام
هههههههههههههههههه
جميل
شاهى يا شاهى
حلو اوى العنوان رحلة الى باب البحر
ينفع اسم كتاب
بس عيالك من الواضخ ان هما مش بيخرجوا كتير او مش بيخرجوا خالص
ربنا يقويكى عليهم
تحياتى ليكى
على حب
وادى جازاة اللى مسمعشى كلمة ماما تقولها
ذهب الليل طلع الفجر والعصفور نهق
ايه يا بنتى المأساة دى كلها
لازم
لازم
لازم
لازم علمى ولادك الكحرتة
لازم من وقت للتانى تخليهم يعملوا حاجة بتاعت
والله يا زمن لا بايدينا زرعنا الشوقك ولا جنيييييينا يا زمن
فاهمة
ايه المياصة دى
احنا مطلعين عيال فافى باين ولا ايه
تساهلى
وش ومططلع لسانه
نيهاهاهاهاع
ازيك يا شاهى وازى كل اللى عندك
معلش انا مش هقدر ارد دلوقتى اصل لسه راجع من الاسكندرية وتفكيرى كله فى الخطوبة
نفسي اليوم ده يرجع تانى اوى
عقبال محمود يا رب
هرجعلك تانى وارد
هههههههههههههههههه والله يامامتي انتي عثل بس ليه قافلة على الاودد كده ده خليهم يحتكوا بالناس اكتر علشان المجتمع ده الي هيطلعوا فيه يامامتي والقفلة دي مش صح بس تعرفي وحشااااااااااااااني قوي انتي والجبارة والرايقة سلامي يا احلى ام في الدنيا
انا : اية يابنتي في اية دي قطة عادي هو انتي اول مرة تشوفي قطة
الجبارة : لأ دي مش قطة دي كبيرة اوي
انا : معلش هي القطط كبيرة هنا مش مسلوعة زي قطط اكتوبر
هههههههههههههههههههههههههه
ههههههههههههههههههههههههههههه
ربنا يحمي اخواتي ويباركلك فيهم ويباركلهم فيكم يارب
بس صحيح .. ازاي باب البحر ومافيهاش بحر؟؟
هم قافلين الباب ولا ايه؟؟؟؟
سلاموووووووووووز
بوستاتك كلها احلي من بعض
بتموتني من الضحك
ربنا يخليهوملك
الحكاية حلوة اوى
ربنا ميحرمكوش من بعض
اسلوبك فى منتهى الجمال و خفة الدم
تحياتى واحترامى
هانى يس
نتشرف بزيارتكم مدونتى
hanyyassinblog.blogspot.com
هههههههههههههههههههههههههههههه
هههههههههههههههههههههههه
علشان يطلعوا عضمهم ناشف والعيال يطلعوا رجاله
انتي فزيعه يا شاهي واخدهم من الدار للنار كده انا معاكي ان الفكره في حد ذاتها هايله جدا علشان ميتفاجؤش في مره بالدنيا فيها ايه ويبقوا برده عارفين انهم احسن حالا من ناس تانيه بس قبل ما كنتي تعملي كده كنتي تمهدي تحكيلهم توديهم مكان ابسط شويه توديهم مع باباهم بعربيتهم علشان ميتخضوش من اولها كده
لاحظي انهم كان ممكن يكرهوا المكان ويرتبط عندهم الناس دول بالقرف والمجهود وتبقى كرهتيهم في الناس دي بدون داعي
لكن هي خطوه جريئه منك
ربنا يسعدكم ويبارك فيهم
سلاااااااااااااااااااااااام
شاهى
لماذا لاتشرفينى بزيارتك؟
أرجو ألا تعتذرى بذوق
ياااااااااه يا شاهى
غايبة عننا بقالك كتير
منورة
بس انا كنت عايزة اعرف ايه العربية المكيفة دى
ليموزين يعنى ولا سيتى كاب ولا ايه بالظبط؟
وبعدين انا مش متفقة معاكى ان قطط اكتوبر مسلوعين
لما تجيلى هاوريكى اكبر قطة ممكن تشوفها عنيكى
قطة انا بخاف منها
وشريف هو اللى بيخوفها
مرة القطة دى كانت بتحفر فى الرمل وبتعمل كاكا فى امان الله
شريف خضها
القطة قطعت الكاكا وقطعت الخلف كمان
عايزين نشوفك
اختك خيخة
هههههههههههه
اضحك الله ثغرك...
اول زيارة وعجبتنى المدونة جداا
واسلوب كتابتك جميل كمان...
تحياتى ...والعود احمد
ربنا يخليهم يارب ليكى وتقومى ليهم برحلات زى دى كتير
اتبرع ولو بجنيه تعاطفك لوحده مش كفايه
تعالي علقي عندي بقى
يخبر انتي مشكله ..
ربنا يخليهم .. وتاني مره ابقى خديهم البحر
مغامرة بتحصل كتير فى مصر
فى انتظار المزيد
ـــــــــــــــــــــــــ
neo
فينك يابنتى
وحشتيني بقي :(
في البداية اعتزر عن التأخير في الرد
صحيح الأمتحانات خلصت والنتيجة طلعت كمان والعيال الحمد لله نجحوا بس كان في احتلال للكمبيوتر وماكنتش بقدر اقعد قدامة غير شوية صغيرين وسرقة من ورا العيال
.....................
هيرو
ربنا يكرمك وتتجوز وتخلف ويرزقك بعيال لمضة علشان تنبسط
تحياتي
.....................
الدرويش المرووش
ياعم ادخل الانتخابات بقلب جامد ولا يهمك
غزالة اية اللي اصورهالك دول اولادك هما اللي كانوا عاوزين عشرين صورة
واللهي ياابو الدراويش كان شكلهم تحفة
سلام يازوجي الغالي
....................
واحدة مفروسة
الحمد لله اني بقدر اضحكك اوي كدة ودة بعض ماعندكم يافندم
حصل يامفروسة يااختي واخدوا حمام اول لما وصلنا بس الحمد لله انهم ماقالوش يع ولا حاجة دي كانت هاتبقى حاجة تكسف خالص
تحياتي وان شاء الله نقدر نتقابل قريب بقى نبقى من نفس المحافظة ومانعرفش بعض
.................
اّبي
لا يارحاب الحمد لله العيال ماكرهوش الرحلة اصلي حاولت ابسطهم واحنا هناك على اد ماقدرت وسبتهم براحتهم خالص
معلش بقى اصلك مش من هنا يعني مش عارفة فين باب البحر دي يابنتي مشهورة جدا هابقى اعرفك عليها
تحياتي
.......................
كاميليا
اية دة تفتكري كان باين عليا اوي كدة
انا ولا اخدت بالي انا قلت ماشاء الله الراجل دة ذكي اوي وعرف لوحدة اني تايهه هما دول اولاد البلد بصحيح
وانتي اطيب وارق
تحياتي وقبلاتي
....................
محمد
ياخبر ابيض كل دة ممكن يروح طيب وبعدين
كدة انا افكر ابقى اطبع كل بوست واحتفظ بية
شرفت ونورت المدونة
تحياتي
شريف
واللهي المدونة ليها شرف وجود حضرتك
مفيش داعي للأعتزار هي حصلت معايا برضة بس شاوروا على الحمار وقالوا قطة
بس لما كانوا اصغر من كدة شوية
تحياتي وبجد سعيدة بزيارة حضرتك
..................
اية
ههههههههههههه
ايوة يبقى كانت تقصدك انتي
لما اروح بقى اطمن الشنيور
واللهي يااية انا نفسي ولادي يطلعوا اولاد بلد وجادعين مش بسكويت كدة
ماشي بتتريقي وتقولي ميكروباص من غير كاوتش وانا اجيبة من فين ان شاء الله
بكرة اتفرج عليكي مع اولادك هاتكوني عاملة ازاي
ههههههههههه
تحياتي
...............
ميس سوسة
اية الاسم العجيب دة سوسة طيب لية؟
اقولك لما ازور مدونتك هاعرف
ايوة ايوة ابن الجنايني بقى ظابط ياانجي
لأ قوليلي اية هي الحاجات التانية ؟
انا عمري ماروحت هناك ومااعتقدش اني هاروح لاني ماعرفش حد هناك
تحياتي ياسوسة هههههههه
.....................
أم رقية
حبيبتي نورتيني
هي مدونتك راحت فين ؟ انا بدوس على اسمك مش بيجيب لي حاجة
دة انا اللي نفسي اروح بحري دي
تتصوري احنا كنا طول عمرنا بنصيف في الاسكندرية وعمري ماروحتها ابدا
ان شاء الله لما تقومي بالسلامة هاجيلك تفسحيني وسيبك من العيال ركزي معايا انا
تحياتي وحبي
.......................
خمسة فضفضة
وعليكم السلام ورحمة الله وبركاتة
ياااااااه يادكتورة ياما نفسي يطلعوا ولاد بلد بحق وحقيقي والا حتى ربع ابو فداء
ربنا يكرمة يارب ويخليلة فداء وسلمى ومامتهم وكل حبايبة
تحياتي
...................
رئيسة حزب الاحلام
الله يكرمك
تحياتي
..................
علي
علي ياعلي انت فين ياعلي؟ وعامل اية في الأمتحانات ياعلي؟
هما بيخرجوا بس داخل محافظة 6 اكتوبر
ربنا يكرمك وابقى طمني على الامتحانات
تحياتي
....................
دوبة
دة انتي هاتضربي ضرب بس لما اشوفك ابقي فكريني انتي عارفة اني بنسى بسرعة
بقى ولادي فافي
اسم الله على يوسف ياحبيبتي دة كفاية صوتة الرقيق مش عارفة الولد دة جايب الرقة دي منين ايوة ايوة اكيد من باباه
وش مطلع لسانة ومبرق عنية
سلام ياغلباوية
اية رأيك في شوية الردح دول مش انفع بذمتك
.................
عبدة محتاس
مبروك ياباشا على الخطوبة وعقبال الزفاف
.................
قلوب حائرة
واللهي يابدورة انا مش قافلة عليهم ولا حاجة دة انا ابيعهم في اقرب فرصة بس باباهم هو اللي قلبة ضعيف
ربنا يقدرني واقدر اظبطهم
انتي وحشتيني اكتر ياشقية
تحياتي
....................
سوووو
مش معقول هو انت كمان ماتعرفش باب البحر لألألأ انا مش مصدقة
ياسووو يابني اخواتك خلاص طلعوا عيني تعالى خدهم شوية ينوبك ثواب
يالا هاستناك بقى
سلام
..................
الاء
ربنا يخليكي يالولو ويارب تضحكي كدة على طول
تحياتي
...................
هاني يس
ربنا يكرمك
حاضر هاروح ازورها في اقرب وقت
تحياتي
..................
الشنكوتي الكبير
انا ماجاش في بالي خالص انهم ممكن يكرهوا المكان
دة طبعا كان امر وارد بس انا خليتهم مبسوطين على الاخر هناك يعني مثلا
الجبارة والرايقة خرجوا الشارع بالفانلة الداخلية والشورت مش الاندر دة شورت بيلبسوة تحت الفساتين
المهم انها كانت حاجة غريبة عليهم واول مرة يعملوها وكانوا مبسوطين جدا
اما الشنيور فقعد يلعب في الشارع بلاي ستيشن وغلب كل العيال اللي كانوا موجودين
وبس خلاص مش فاكرة حاجة تاني
الحمد لله عدت على خير وهاكرر التجربة تاني بس كمان شوية كتير
تحياتي
................
شريف
تشرفت يافندم بزيارة مدونتك واعجبت بها كثيرا
......................
بنت خيخة واي كلام
العربية المكيفة دي ياخيخة مش ليموزين ولا كايرو بتاع دة
دي ياسيدتي عربية ملاكي بيسوقها صاحبها يعني زي التاكسي كدة بس الراجل اللي بتعامل معاة يقرب للبوابة بتعاتي يعني مضمون فبكلمة في الموبايل واقولة انا عاوزة اروح المكان الفلاني في الوقت الفلاني برضة وهو بيجيلي ويوصلني وبيحاسبني زي التاكسي
فهمتي
انا مش بحب القطط انا بحب الكلاب وبس وبلاش تخلي شريف يخض القطة تاني دي حاجة وحشة
تحياتي
....................
الغزالي
اضحك الله ثغرك...
عجبتني اوي الجملة دي
ولك مثل ذلك يااستاذ
سعدت بكلماتك كثيرا
تحياتي
....................
رئيس جمهورية نفسي
ربنا يكرمك
ويقدرني على رحلاتهم
تحياتي
.................
الشنكوتي الكبير
روحت عندك من قبل ماتعملي النداء وماعرفتش اعلق على اسألتك وهابقى اقولك على السبب هناك عندك بأذن الله
تحياتي
.......................
احمد مبارك
انا مشكلة دة انا غلبانة
حاضر يافندم هارتب واخدهم البحر
نورت البلوج
تحياتي
...................
nostor azzuro
ربنا يسهل ان شاء الله
تحياتي
....................
كفاية طيبة
انا هنا يافندم اهو وبحضر لبوست جديد ان شاء الله
تحياتي وبوسات كتير
إرسال تعليق