السلام عليكم
الي كل اللي يعرفوني
احب اقولكم اني انسانة عادية
زي باقي الناس كلها
ممكن جدا ابقى مضايقة وزعلانة
لدرجة الأنهيار عادي بتحصل
والمفاجأة بقى
اني ممكن اتعب يعني اكون مريضة
اة والله
ماهو انا من بني البشر برضة
مش علشان بستحمل شويتين
يبقى خلاص مش بتألم
انا برضة بحس
ياريت لما تلاقوني كدة
تسيبوني انهار شوية
تدوني فرصتي في الانهيار
مش عاوزة اشوف نظرات الأستغراب
النظرات دي بتخليني اسكت
واجمد من تاني
علشان افضل في عنيكم القوية
كلمة اخيرة لخيخة
ممكن تسلفيني
شوية خيخنة من عندك
بحبكم كلكم
اشوفكم على خير
هناك ١٤ تعليقًا:
احنا كمان بنحبك
يا شوشى
و الإنهيار حق لكل بنى آدم
و اللى ينكره عليكى
يبقى ملوش حق
و لو بصلك بإستغراب
ودى وشك الناحية التانية
و متبصلوش انتى من أساسه
و من غير ما تستلفى خيخنة
من عند خوخة ولا حاجة
يا حبيبتى
احنا بنحبك
فى كل حال
الف بوسة و حضونة
عشانك
شااااااهي
مالك يا قمرة؟
عادى يا حبيبتى لو احنا مش استحملناكي مين يعنى اللى حيستحملك
و بعدين يا عقروبة انتى سمات برجك انك تستحملى تستحملى
و لما تقولى الآآآآآآه يبقى هيه الآآه
يعنى خلاص وصلتي للقمة
نفسيا ولا جسمانيا
انهاري يا حبيبتى معانا......و سلامتك من المرض
والانهيار ده تفرييييييييييييغ
و بيكون مؤقت
و حترجع ريما لعادتها القديمة
أسأليني انا
انا لما بتعب ولا ضهري بيوجعنى بانهار
بحس من اللى حواليا و مش حقولك مين ههههههه
انى مش مفروض اتعب
تصدقى السؤال اللى يفرسك بقا
انتى تعبانة ليه؟
بزمتك مش اتفرس؟؟؟؟؟
ولا لو مقريفة شوية
يا خرااااابي الدنيا بتتهد
لازم اكون مبتسمة على طول
و زي الثور اللى فى الساقيه على طول دون تعب
و على فكرة مش حتعرفي تكوني خيخة ابدااااا
هيه خيخة و احدة فى وسطينا و فارسانا
كفاية و النبي
هههههههه
خليكي مفروسة زيي
تحياتي ليكي
مممممممممممممم
اه ممكن تاخدى شوية خيخنة من عندى
لكن
المشكلة مش فى الخيخنة يا شهشوهة
المشكلة انك عودتى الناس على انك تكونى انتى الملجأ بتاعهم
عودتى الناس على انك تكونى انتى الأكرم
وانتى الاعقل وانتى الاجدع وانتى الأجمد
مش الاجمد فى المشاعر
انا اقصد الاجمد فى تحمل المسؤلية
عودتى الناس تكونى انتى الأمأم
يعنى ايه الأمأم وايه الهبل اللى انا كاتباه ده
الأمأم جاية من الأمومة
يعنى عودتى الناس انك تكونى أكثر أمومة من أمومتهم
انا بتكلم طبعا عن علاقتك بعيالنا كلنا
اذا كان شريف ولا حمزة ولا عمر ابن دوبا
عودتى الناس تكونى حيطتهم اللى يتسندوا عليها
فبالتالى لو فكرتى تقولى للى حواليكى انا حيطة مايلة
هيبصولك باندهاش ويستغربوكى ويقولولك يعنى ايه حيطة مايلة
لما انتى اللى تميلى امال احنا هنتستند على ايه
ماينفعش تميلى لازم تفضلى قوية ولازم تفضلي حيطتنا اللى نقدر نتسند عليها لما نتعب
ونتحامى فيها من حر الشمس والايام السودا
مش بقول انك غلطانة
لكن اللوم لا يقع على الناس اللى حواليكى فقط
جزء من اللوم يقع عليكى انتى كمان
كان لازم تعملى وقفات مع الغير
لكن لانك كنتى بتيجى على نفسك فبالتالى الكل استمرأ فيها
والكل بيقول فى عقل باله يا عم روح لشاهى
يا عم قول لشاهى
يا عم خد من شاهى
يا عم مافيش غير شاهى
وانتى كنتى بتفرحى بده
بتفرحى بتحمل المسؤلية وبتفرح بانك قادرة تعملي اللى غيرك مايقدرش يعمله
بتفرحى بثقة الناس فيكى وانهم مايقدروش يوكلوا حد عنهم غير شاهى
فبالتالى كنتى بتيجى على نفسك اكتر واكتر
غصب عنك حاجة بتقولك من جواكى ماينفعش اكسر بخاطر الناس اللى محتاجانى
ماينفعش حد يقولى عايز خدمة واقوله لأ تعبانة
انتى ماكنتيش بتتصرفى بطبيعية مع البشر
كنتى دايما فوق الطبيعى
كنتى دايما الاكثر عطاءأ فى كل حاجة
اذا كانت حاجة مادية او معنوية
فصعب علينا
على الناس اللى حواليكى
يشفوكى تعبانة
لاننا مش هانفهم يعنى ايه تعبانة
مش هانستوعبها
مش هانقدرها
احنا اتعودنا ان شاهى هى اللى موقفانا على رجلينا
فلما شاهى تقول انها تعبانة
ده معناه ان حياتنا وقفت
حياتنا هتنهار
احنا بنخاف يا شاهى انك تحطينا فى الموقف ده
كل اللى بيتعاملوا معاكى
لو قلتليهم تعبانة
نظرات استغرابهم مابتبقاش استغراب على اد ما هى حيرة
على اد ما بنبقى عايزينك تضحكي وتقوليلنا
بخخخخخخخخخ... انا بهرج معاكم انا مش تعبانة ولا حاجة
لان تعبك معناه كركبة فى نظامنا
تعبك معناه وقف الحال
وهو الارسال بس اللى واقف
ده حالنا كله واقف
نيهاهاهاهاهاهاهاع
معلش القافية حكمت
نرجع للكلام الكبير اللى فوق
بصى يا بنت الحلال
لكى كل الحق فى انك تاخدى وقتك وتنهارى براحتك
لكى كل الحق فى انك تفصلى شحن
ورصيدك يخلص
لكى كل الحق فى انك تصرخى باعلى صوتك
جااااااااااااااى
انا تعبت يا غجر
لكى كل الحق فى انك ترفضى وتقول بعلو صوتك لأ
لكل كل الحق فى انك تستلفي منى شوية خيخنة
لكن بسرعة
بسرعى انهارى وارجعى تانى اقوى من الاول
بسرعة اتعبى وخفي
بسرعة اشحنى رصيدك
بسرعة صرخى وبعد كدة خدى نفسك
بسرعة ارفضى وبعد كدة لما تهدى وافقى
بسرعة علشان حياة ناس كتير متوقفة على وجودك قوية
ولو ضعفتى او تعبتى او وقعتى
ناس كتير هتقع معاكى
لانك محور حياتهم
حتى ولو كنتى محور مش باين فى الصورة
لكن هما عارفين كويس اوى انك محور حياتهم
فلو وقعتى او تعبتى او رفضتى ده معناه ان حياتهم توقفت تماااااااما
انتى الملاذ والملجأ
فلو ذهب ملاذنا و ملجأنا انهار
لذهبنا جميعا فى ستين داهية
خدى بالك من نفسك اوى
واشوفك على خير دايما
سلام
اختك خيخة
مالك يا بت انتي مين اللي زعلك _؟
انتي يمكن محتاجة تروح6ى فحتة فاضية وترقعيلك كام صوت وممكن برضه تكسريلك شوية حاجات ولا اقولك .. ما تيجي نتقابل انا وانتي ونقعد ندردش وط-ظ فالباقي هعهعهع
روقي يا حبيبتي او ما تروقيش وخليكي براحتك
انا عايزة اشوفك بجد
وهجيبلك اكل معايا يمكن تتخني شوية ههه
ولا اقولك ايه رايك اجيبلك البتاع اللي كنت قلتلك عليه _؟ وش بيغمز
و الله ما عارفة اقولك ايه بعد كلام خيخة
بس كل اللى اقدر اقولهولك ان ساعات انشغالنا بالناس اللى حوالينا بيساعدنا اننا منشوفش مشاكلنا فننهار
حاولى ترتاحى لكن مش تنهارى
عاجبنى قوى
كلام خيخة
منطقى و مرتب
و تسلسل صح
بس يا خوختى
هناك معضلة
اللى اتعود يبقى سند
و يبقى فوق الطبيعى
ميعرفش يستخيخ بمزاجه
بيحص إنه مقصر
و انه بيعمل حاجة
ضد طبيعته
و مشاعره
حتى لو كان عارف
كويس قوى
إنه بييجى على نفسه
و بيظلمها
و ان الكل بيحمل عليه المتاعب
دى طبيعة انسانية
اسمها الإيثار
و لو وجدت ف الشخص
صعب تنزعيها منه
غير بصدمة او كارثة
تهز كيانه و تزلزله
و تبدله
تخليه حد تانى
و لا قدر الله
و الف مليون بعد الشر على شوشى
إن شاء الله ميحصلهاش ابداااا
اللى هيا فيه دا
زى منتى قولتى يا خوخة
لازم يحصل
و من حقها تفصل
بس بسرعة
عشان مش بس اللى حواليها
معتمدين عليها فى سعادتهم
لأ
هيا كمان سعادتها الحقيقة
فى إحتياج الناس دى ليها
و عطائها ليهم
رغم كل التمن
اللى بندفع مقابل ذلك
على فكرة بقى
انا بحب صفحة تعليقات شاهى قوى
بحس انها حميمية جدا
زى اللقاءات الحريمى بتاعتنا
دى قرفة شاهى
و كل حاجة تيجى من ناحيتها
بحبكم يا غجررررررر
عندك حق يا طمطم
التعليقات هنا تحسيها بين ناس بتحب بعض
لا بتجامل ولا بتلم اكتر زوار لها
و على فكرة مش قرفة شاهى بس اللى حلوة
لا كمان و خروبها ههههههههههه
احنا اتحسدنا ولا ايه يا بنات
كل كام يوم حد منا يدخل فى مود الاكتئاب ده
تعالو نتلم مرة سوا و ناخد بعضنا فى حضن بعض
احنا محتاجين بعض اوى ..و القوى منا قبل الضعيف
ايو و الله
يا دوللى
ألا خروب شاهى
دا شفا
و ماركة مسجلة
و دوا للعالم الغلابة
فى اللقاءات الحريمى
آه
و بخصوص اللمة
قولولى هنتلم فين
و الساعة كام
و انا حاضرة
إن شاء الله
انا اخدت بالي يا بنات انكم بقالكم فترة فعلا مش مظبوطين صحيح صحيح يعني انا عندي اكتئاب بقالي فترة طويلة بس اخدت علي كده .
انما انتوا مالكم فاتيما بتدور عالوجع بتنكش عليه كأنك بقيتي مدمنة مع انك المفروض تنكشي عالراحة شوية دا حقك انك ترتاحي ومسير الحاضر الغايب يرجع لحضنك .
خيخة حساها تايهة ومش لقياها او دافسة نفسها فمية حاجة بس برضه فيه حاجة غلط .
داليا مش مظبوطة بالمرة .. حتي صوتها حزين !
شاهي مع اني مش علي صلة بيكي الا ان اللي باين برضه انك مقريفة
شوفوا انتوا عايزين ايه تحديدا يخرجكم من الحالة السودة دي بدال ما اجي اضربكم انتوا الاربعة .
وبعدين انا عندي مشكلة .. ما بحبش الخروب !
فاتيما
صباح الفل يا طمطم
بصي ياجميلة مش هعرف اودي وشي الناحية التانية اصلك مش بتشوفي النظرات والتبريق وفتح البق والأستعجاب
حاجة كدة تخليكي تفكري الف مرة قبل لما تقولي لحد انك تعبانة
انا كمان بحبكوا اووووووووي
....................
واحدة مفروسة
صديقتي من نفس البرج العجيب
كل اللي كتبتية وكل اللي قولتيهولي في التليفون حقيقي وكأنك معايا
وزي مافي واحدة خيخية بس وسطينا مطلعة روح اهلينا يبقى كمان كفاية علينا واحدة بس مفروسة
..................
بت خيخة واي كلام
مش عارفة ارد عليكي خالص ياجبارة بس انتي عارفة انا مبسوطة انك ماستخسرتيش فيا شوية خيخنة من عندك اصلي انا بصراحة كنت متوقعة انك هترفضي بما انك خيخة طبعا فمفيش حاجة بعيدة عليكي
ربنا يخليكي ليا يا اجمل خيخة
بس يالا امشي بقى
دريم
انا كمان عاوزة اشوفك جدا ولسة كنا بنتكلم عليكي انا وخيخة وبنقول امتى بقى الأمتحانات اللعينة تخلص علشان نتقابل
لا لا لأ بلاش اللي قلتيلي علية دة
خلينا في الطبيعي وانتي عارفة طبعا ان الطبيعي يكسب
انا صحيح ماشوفتكيش غير مرة واحدة بس انتي تدخلي القلب على طول وان شاء الله نتقابل قريب
...............
قوس قزح
هتيجي من فين الراحة ياداليا
والا اقولك هحاول ولما اقنع نفسي اني هعرف ارتاح يبقى فعلا هعرف ان شاء الله
بس لية مش عاوزاني انهار؟
ماهو الواحد ساعات بيبقى عاوز يحس انة ضعيف مش عارفة لية
يمكن علشان يشوف اهتمام الناس بية وهو ضعيف هيبقى عامل ازاي او علشان حبهم يبان من تصرفاتهم في الوقت دة والأ علشان الحنان اللي بقى الواحد يدور علية اليومين دول بملقاط
مش عارفة
يالا اشوفك على خير
..................
فاتيما
تصدقي ياطمطم كل كلمة قولتيها صح
ومفيش كلام تاني يتقال
انا مبسوط اوي انكم حاسين بالحميمية دي
يارب دايما على طول
ان شاء الله نخلص الأمتحانات ونتقابل على طول
................
قوس قزح
ان شاء الله في اول لقاء هجيب معايا ازازة خروب نفرقعها مع بعض ونسكر بقى ولا هيهمنا حد
وانتي يا استاذة دريم ياللي مش بتحبي الخروب قوليلي بتحبي اية وانا اجيبهولك ان شاء الله
هههههه حلوة استاذة دريم دي
ربنا ييسرلك امورك يا رب كتير قوى فعلا بنحتاج اننا ناخد فرصه اننا نزعل نعيط نتعب بس يمكن هم مبيدوناش فرصه عشان بيحبونا
الله الله الله..
ما تجمدي أومال..
وإحنا اللي بنقول ورانا رجالة
على ايه دا كله ... دا مافيش حاجة
على رأيك
إرسال تعليق