السلام عليكم
ازيكم كلكم
رمضان كريم
انا كنت ناوية مدخلش المدونات في رمضان بس بصراحة مقدرتش
هاقول لكم على حاجة حصلت لي في شهر يوليو اللي فات
وفي الاخر هابقى اقول انا لية حكيت الحكاية دي
اكتشفت اخيرا اني بعرف اصوت
ايوة اصوت مش في الانتخابات لا سمح الله لأ
الصويت اللي هو الصوت الحياني
اصل انا كنت زعلانة قوي اني مش بعرف اصوت
وفي اوقات كنت ببقى محتاجة اني اصوت ولكني كنت بفشل
زي مثلا اثناء ولادة الرايقة يا سلام
رايقة بتتولد تخيلوا كمية العذاب
ولما قلت للدكتورة خلصوني بقى
قالت: لما تصوتي الاول
دة اية الذل دة
المهم احكي لكم ازاي عرفت اصوت
العيال كانوا بيلعبوا في الجنينة وبعدين سمعت الشينيور بيعيط
والشينيور ابني ماشاء الله علية صوت اوبرالي قوي جدا
ببص من البلكونة علشان اشوفة يمكن وقع والا حد ضربة
لقيت اية ؟ خير اللهم اجعلة خير
الواد نصف وشة وايدة الاتنين غرقانين دم ـ بدون مبالغة ـ
وحولية حوالي 20 طفل مش عارفة جم منين وهو واقف مش بيتحرك
وعمال يعيط ويقول الحقني يا مؤمن ـ مؤمن دة ابن اختي ـ
طبعا هاتقولوا ....رحتي مصوتة.........لأ
قلتلة اطلع
وطلع ومعاة ال20 طفل انا لقيت الشقة اتملت عيال
وهو من اول لما طلع وهو بيقول
مش انا يا ماما دي الجبارة هي اللي ضربتني
مش انا يا ماما دي الجبارة هي اللي ضربتني
وانا اقولة : طيب اسكت عاوزة اشوف التعويرة فين ؟
ـ في الغالب لو شفت جرح بقدر اعرف اذا كان هايحتاج خياطة والا لأ ـ
والواد مفيش مش بيسكت ومعلق على مش انا يا ماما ..............ولقيت
نفسي بقولة : اسسسسسسسسككككتتتتت بصرخة قوية
ودة كان اول صوت ليا
وبعد الصوت الحياني لقيت الشقة فاضية حتى اولادي التانين ومؤمن
نزلوا وسابوني تقريبا خافوا مني
المهم ان الحمد لله الجرح طلع بسيط والدم الكتير دة علشان الولد
كان بيلعب وجسمة ساخن ولما هدينا عرفت منة ان الجبارة حدفت على دماغة
طوبة وطبعا مش قدرت اعمل لها حاجة لانها كانت مخضوضة
وبصراحة انا كمان كنت خلصت وجالي هبوط
الغريب بقى ان مفيش حد من الجيران عبرني ولا سأل انتي بتصوتي لية
ولا في باب شقة اتفتح بعد الهيصة دي
مع ان باب شقتي كان مفتوح لما صوت
هو دة السبب اللي خلاني احكي الحكاية الطويلة دي
راحت فين العلاقات الحلوة بين الجيران ؟
انا مش قصدي التداخل الزائد
انا قصدي الوسط
يعني لو كان في جيران من بتوع زمان كنت ممكن اسيب معاهم العيال
واخد الشينيور على المستشفى
مش عارفة يمكن الناس بقت مشغولة زيادة والا خايفة من بعض
حقيقي نفسي الجيران ترجع زي زمان
هناك ٢٦ تعليقًا:
هذا يعتمد على تقديمك السبت علشان تلاقى الحد
يعنى هل انتى تشاركيهم
ثانيا هذه الامور مرتبطة بالاماكن للأسف ويختلف درجات التدخل الزائد على حد قولك من منطقة لأخرى
والف سلامة على ابنك
ومبروك الصويت
كل عام انت الى الله اقرب وعلى طاعته أدوم
ربنا يخلي لك الشنيور والرايقة وأخواتهم
ويحفظهم لك يا ستى
وأما عن الجيران فهو فعلا حاجة بقت مش كويسة
بس مين عارف
مش يمكن كنا نقول قلتهم أحسن؟؟ الناس اليومين دول غير زمان برضه
لو الجيران كويسين يبقى يستاهلوا انك انت اللى تبدأى أنا قصدى كويسين فى أخلاقهم طبعا
والسلام
الف سلامة على ابنك والصويت بس بصراحة انا كنت متخيل انك هتصوتي مش هنزعقي. وهو ابنك اسمه الشينيور ليه؟
سلام
اول تعليق بناتي انا يا شوشو شاهي انا مش مع الطائر الحزين في رايه لاني واثقة انك من الشخصيات المعطاة ومتاكدة من كده كمان ومش بتقدمي السبت بس ده انتي بتقدمي للجمعة المهم يا حبيبتي الدنيا والله صعبة قوي ياشوشو وكل و احد الدنيا شاغله على الاخر ربنا يكون في العون وبعدين هو الصحراء الي انتي فيها دي في جيران يا مؤمنة وسلامي للجبارة والرايقة والشنيور ورمضان كريم عليكي وعلى اهلبيتك يارب وربنا يسعد قلبك
عاوزنا نرجع زى زمااااااان قول للزمان ارجع يا زمان
يا بنتى اللى راح راح
خلالالالالالالالالالالالالاص
كل واحد عايش وبيقول يلا نفسى - ثم مين دلوقتى تقدرى تأتمنيه على أولادك
انا بصراحة مقدرشى - بس بجد بجد النفوس بقت ضعيفة قوى واهى دنيا وبنعيشها
سلالالالالالالالالالالالاموز
والف سلامة على دماغ حبيبى يانى
قولى للجبارة انى هعضها فى دراعها
يلا باى
بلاش تتعلمى الصويت صدقينى مش حاجة كويسة
الف سلامة على ابنك
و كل سنة وانتى طيبة وابنك بالف صحة وسلام
مشكرة على زيارتك لمدونتى
المهم جت سليمة
عزيزتى
ما اظنش ان الجيران فى اى مكان فى مصر لو سمعوا اى صويت مش هيشوفوا فيه ايه
وممكن ده ميكنش حب لصاحبة الصويت ولا خوف عليها
بس ده من باب حب الفضول والاستطلااع
واظن انهم عارفوا انتى بتصويتى ليه بطريقه ما انهم شوفوا وهو جاى مثلا
فحب الاستطلاع راح وضاع الفضول
وسبب تانى شكل صويتك مكنش بالصوت الحيانى
اصل فى صويت مش يلم الجيران بس ولا الشارع
ده يلم الحى كله
وانتى خبرتك فى الصويت ضعيفة
حولى تنميها بقه اعملى حسابك يمكن تحتاجى تصوتى فى يوم وتتمنى الناس تتلم
طبعا بعد الشر عليكى من اى صويت
بس الاحتياط واجب
كل سنه وانتى بخير
وكويس انك متعصبتيش على الجباره
لان الطفل فى الحاله دى بيكون دمه هرب اكتر من المصاب
تحياتى سلام
مش قدرت اعمل لها حاجة
لا اتفق معكى فى هذا الأسلوب
واتفق فى الاسلوب الطبيعى
مقدرتش اعمل لها حاجة
بس بخصوص موضوع الجيران
محدش بقى فاضى للتانى دلوقتى
يعنى اللى مشغول فى اعلانات ميلودى واللى مشغول فى لعبة الفيفا واللى مشغول فى النوم
قصة الجيران دى خلصت من زمان بصراحة
حمد الله على سلامة الشنيور
ومبروك على الصوت اللى اخيرا طلع
بالنسبة للعلاقات بين الناس
كويس انهم مش طلبوا لك النجدة وقالوا عملت لنا ازعاج واحنا صايمين
طبعا يا حبيبتى كل الحاجات دى مبلقهاش وجود
كان زمان لو ابنك بيعيط تلاقى جارتك خرجت تشوف ايه اللى جرى له قبلك
في الاول
اسفة على التأخير
مدارس ورمضان وكل سنة وانتم طيبين
............
الطائر الحزين
واللهي انا قدمت سبتات كتير قوي ومفيش فايدة
ايوة موضوع الاماكن دة صحيح واحنا هنا معندناش ريحة التداخل خالص
الله يسلمك ويبارك فيك
.....................
arabic id
الله يكرمك
الجيران دول المفروض انهم يكونوا اقرب الناس ليا يعني مثلا لو حصلي حاجة وحشة والا تعبت والا اي حاجة تانية المفروض انهم اكتر ناس قادرين على المساعدة بسرعة لاني لو هاكلم حد من اهلي هايبقى في وقت طويل لما حد منهم يوصل وفي ظروف بتبقى محتاجة السرعة
ربنا يسترها معانا
سعيدة بتشريفك مدونتي
....................
yahia
الله يسلمك
يادي الخيبة هو انا كدة ماصوتش بعد كل دة تقولي زعيق طيب اعمل اية تاني دة انا كنت فرحانة اني عرفت اصوت
معلش بقى مرة تانية
شوف يا استاذ
الشينيور انا سميتة كدة لانة زنان زي الشينيور بالضبط
ألف سلامة على الشنيور الحمد لله جت سليمة
بالنسبة للصويت انا متاكدة ان صويتك مكنش بالحياني اكيد صويتك كان رقيق شوية طالعالي
وبالنسبة للجيران في ناس كتير بتحب تتجنب جيرانها دلوقتي مبقاش في حاجة اسمها جيران يعني اخوات واصحاب وكده لالالالالا خلاص ده كان زمان وقول للزمان ارجع يازمان
عموما قولي للجبارة متعملش كده تاني هي في مصر مش فلسطين طوب ايه اللي بتحدف بيه ده
تحياتي
truelove
اهلا حبيبتي
ربنا يخليكي ليا ومايحرمنيش من دعواتك الحلوة
معلش يا سيتي اصل الطائر الحزين ميعرفنيش لكن انتي بقى عرفاني وفهماني يا قمر
ملها الصحرا اللي انا فيها دي حتى بقت زحمة دلوقت امال لو شفتيها من خمس سنين اول لما جيت كنتي تقولي عليها اية دة انا كنت لما بشوف قطة ماشية في الشارع كنت بفرح وبقول هية هية شفت قطة ههههههه
عموما انا هاستناكي تنوري الصحرا علشان تدعي معايا وتقولي
عاوزنها تبقى خضرا
.................
دوبة
الست ام كلثوم عندنا يادي الهنا
مين اقدر أئتمنة على اولادي؟
ههههههههههه هو دة سؤال برضة
طبعا ماما
ايوة ايوة خلاص تقصدي حد غريب
انتي عارفة انا بأتمن زوجة البواب
طبعا كلامي مش هايعجبك بس شوفي
انا في مرة كان ضغطي واطي جدا وقاعدة لوحدي مع العيال والدرويش في الشغل وكان لازم اروح للدكتور فبعت لزوجة البواب تقعد مع العيال ورحت المستشفى واتحجزت علشان لازم اعلق محاليل وكلمت ماما وفيييييييين بقى على بال لما جت لان الطريق بياخد ساعتين من عندي لعند ماما
طيب موقف زي دة كنت اتصرف ازاي؟
متخافيش على دماغ حبيبك سليمة الحمد لله
اعتبر دة وعد
انك لما تشوفي الجبارة تعضيها في درعها
لما نشوف
...............
عصفور بلا اجنحة
بلاش لية؟
هو انا هاقعد اصوت على الفاضي والمليان
الله يسلمك
وانتي طيبة
العفو دة انا سعيدة اني زرت مدونتك
.............
sahr
جت سليمة الحمد للة
احساس لسة حي
شكرا على كلامك يا حسام بس كدة تبقى الناس وحشة قوي
ايوة انا خبرتي ضعيفة جدا في الصويت
طيب قولي انميها ازاي اكيد عندك افكار
وانت بخير وصحة وسعادة
البت الجبارة دي جبارة بصحيح
بس عندك حق البت كانت مخضوضة قوي ومبتسمة ابتسامة رعب غريبة
.............
mirage
انت داخل حامي لية كدة
طيب قول سلامة ابنك في الاول وبعدين انقد ياسيدي زي مانت عاوز
طبعا انا احترم رأيك واختلافك معي بس في الحقيقة انا معرفتش اكتب
مقدرتش كدة والا ماقدرتش
فقلت على اية ادوخ نفسي انا هاكتب مش قدرت وخلاص
ادي كل الحكاية
اما بخصوص الجيران اللي قصتهم خلصت من زمان
دي حاجة مزعلاني
ميلودي اية وفيفا اية وهي دي تبقى عيشة
.................
desert cat
الله يسلمك
يا نهار ابيض تفتكري ممكن صحيح يطلبولي بوليس النجدة
دي تبقى خيبة بالويبة
طيب نرجع ايام زمان ازاي؟
انا تعبت ومهما بحاول بلاقي برود يجنن
الناس معظمها نسيت حديث النبي صلى الله علية وسلم
ظل جبريل يوصيني بالجار حتى ظننت انة يورثني
او كما قال صلى الله علية وسلم
ايامنا الحلوة
دمك شربات يا مضروبة
طيب ابقي افتكري لما اشوفك نقعد نتدرب سوا على الصوت الحياني مادام طلعنا رقيقين زي بعض
اما بقى حكاية الجيران
انا هاقعد ادعي ان ربنا يرجعهم زي زمان
الشنيور و الجبارة
هههههههههههههه
انت سكر
بصي للاسف موضوع الجيران ده بيرجع لحاجتين اولا التدين و معرفة حق الجار و ثانيا الاصل و الاصول و لان اغلب الناس مش ولاد اصل فمحدش بيهتم بس ربنا يهدي و يصلح الحال
سلامة الجميل الحمد لله ربنا ستر
اوروفوار
ازيك ياشاهي
كل سنة وانتي طيبة
تخيلي فعلا ان الناس بعدت عن بعض وبقي كل واحد مش شايف الا نفسة بقينا زي التروس في الالة ضخمة بتلف ربنا يرحمنا
بس يبدو ان اولادك بسم الله ماشاء الله منتخب ولا منتخب البرازيل مفيش حد يقف في وشه
طالما انك ام لتلاته و مش صوتي قبل كده تبقه انتي اللي رايقه بجد
كل سنه وانتي طيبه وسلامته الف سلامه ابنك
بالنسبه بقه للجيران بتختلف من منطقه لمنطقه بس كده احسن لحسن في ناس حشريه
هو المجتمع كله اتغير مش اخدين غير غيوب العادات الشرقيه و نسينا المميزات بتاعته
هو الصويت مش حلو اوي و تقريبيا الزعيق ده ميعتبرش صويت اوي هو حركه لا اراضيه بتطلع اما الجيران فهو يلا نفسي دلوقتي
مبدئيا الف سلامه على ابنك الشنيور
الايام اتغيرت وايام جدى تختلف عن ايامى وايامى تختلف عن ايام حفيدى
انا حاسس ان كل يوم بيجى بتقل البركه حتى شايفه رمضان عدى 13 يوم هوا
معدتش فيه بركه معدش فيه عشره معدش فيه جيران زى زمان
مع انى معرفش جيران زمان عرفتهم بس من المسلسلات فقط
بس نفسى يرجعوا نفسى اعيشه الجو ده
تصدق انا معرفش جيران ليا
يعنى ممكن واحد يكون طالع العماره معرفش ده ساكن ولا جاى زياره
اه والله من غير مبالغه
الحياه بقه تلاهى وملاهى
يلا رمضان كريم
تحياتى
شغال
طهقانة
اخيرا نورتي انتي فينك من زمااااان
بصي انا مقدرش احكم على الناس ان معندهمش اصل وانا مش طالبة اني اعاشرهم ليل ونهار انا عاوزة بس الطبيعي العادي يعني واللي بيحصل اليومين دول مش عادي خالص
دة انا عندي جار مابيقولش حتى السلام عليكم وهو معدي
ياساتر يارب
ربنا يرحمنا
انا سعيدة انك افتكرتيني بعد المدة دي كلها
...................
سندباد
ازيك انت ياسندباد العشق
وانت بخير وصحة وسعادة
عندك حق
بس كدة احنا بنبعد عن بعض وبعد شوية هتلاقي قلوب الناس بقت جامدة وقاسية وربنا يستر
حلو قوي تشبيهك
فريق البرازيل يا سلام انت جبت المفيد
.......................
spyfun
احمد باشا
اخبارك اية؟
ماهو انا ياابني مش بعرف اصوت
انت عارف انا لما بكون خلاص هافرقع من العيال بعمل اية؟
بدخل المطبخ واقفل عليا الباب واشغل الكاسيت بصوت عالي شوية واقعد اغني بصوت عالي برضة
هو صحيح دة ازعاج بس مش احسن ما ارتكب جريمة والا اعمل لحد من العيال عاهة مستديمة
يا عيني علينا وعلى التقاليد الحلوة اللي نسيناها
...............
mohamed-sobhy84
اولا اهلا بيك
ايوة الصويت حاجة وحشة بس في اوقات بتبقى محتاج انك تصوت فيها ولما بلاقي نفسي مش بعرف ببقى متغاظة قوي
انا تعبت من موضوع الجيران دة خالص
وهي يالا نفسي دي تبقى عيشة
ربنا يرحمنا
................
حسام مراد
الله يسلمك
مصدقاك انك متعرفش جيرانك
انت فكرتني بحكاية هاقولهالك
كان في واحد قاعد في المسجد وبيسمع الخطبة وكانت عن حقوق الجار وبعد الصلاة افتكر انة مقصر في حق جيرانة وقال لازم يحاول يتغير ولما وصل البيت لقى الناس اللي في الشقة اللي تحتة بينزلوا العفش فقال دي فرصة كويسة وانا لازم اساعدهم وفعلا نزل معاهم العفش
تاني يوم سمع دوشة وهيصة جامدة
سأل في اية؟ قالوالة اصل الشقة اللي تحتك اتسرقت امبارح
واكتشف انة مايعرفش شكل جارة وانة كان بيساعد الحرمية
وبس خلاص
الحق بقى واتعرف على جيرانك
الف سلامه عليك يا شنيور يا صديقي
ومعلش يا ابني اختك برده وبتحبك وعلى فكره دايما الأخت اللي تضربك وهي صغيره تطلع بتحبك قوي قوي لما تكبر صدقني عن تجربه واحد دراعه اتكسر مره وعضته مره ما علينا
الف سلامه
وانتي يا فالحه ياللي بتصوتي هو ده كده صويت ده انا قلت البنت خلاص اتنطقت وعرفت ترقع صوت حياني من بتوع زمان
بخصوص الجيران بقى يا ستي لازم تفتكري حاجه مهمه ان الموضوع مش موضوع زمان ودلوقتي الموضوع هو المكان يعني حسب الحي اللي انتي قاعده فيه يعني تعالي عندنا كده واتفرجي لو واحده صرخت كام واحده بتنط تخش عليها جوه وكام راجل على الباب بره بيسال هو فيه ايه وتلاقي كل راجل حدف مراته عليهم يقولها خشي يا وليه شوفي في ايه حصل
اما في المناطق الجديده اللي كل سكانها عايشين فب حالهم لأن هم مش عايزين حد يدخل في حياتهم فبقوا بعيد عن بعض خالص والنتيجه ان لما بيحتاجوا بعض بيكتشفوا انهم بعدوا عن بعض قوي لدرجه مينفعش حد يدور على التاني فيها وخصوصا بعد الموضه الهايله اللي بتدعوا ان احنا نبقى زي الغرب في كل حاجه
ولو حضرتك مثلا في حي شعبي واهله ناس يعرفوا الأصول تلاقي لو بنت بتتعاكس الكل يلحقها لكن في وسط البلد او في حي هاي شويه تلاقي البنت بتتعاكس وواحد ممكن يمد ايده عليها وحدش يعبرها ناهيكي عن اللي هيقولك اصلها مش محترمه اصلا وهي تستاهل والناس بقى دمها بارد كده في مصر وحاجه طين خالص
يا شيخه قلبتي علينا المواجع المهم سلامة الشنيور
طولت عليكي معلش
اعتذر عن التأخير
سلاااااااااااااااااااااااام
معلش انى جيت متأخر ومش عايز ضرب
انا جيت لوحدى محدش قالى
الأول ألف سلامة على الشنيور مدوننا الصديق
ثانيا مش عارف اقول ايه بالنسبة للجيران
هنا مثلا عندنا فى المنصورة لو حد صوت فى الشارع تلاقى ستين شباك اتفتحو والناس بتجرى واللى بيشوف فيه ايه و و و
انا بحمد ربنا انى من المنصورة ومش عايش فى القاهرة
يمكن عشان القاهرة كل واحد مع نفسيه ويقول مليش دعوه
الحمد الله
بس بجد انا ضحكت ضحك
ربنا يخليلك الشنيور والجبارة والرايقة
وأبو الدراويش عشان ميزعلش مننا
الحمد الله انها جيت على قد كده
الحمد الله
الشنكوتي الكبير
اخيرا شرفت
يالا حصل خير المهم انك جيت
شفت يا ايهاب البت ضربت اخوها بالطوبة
انت بتقول ان دة زبيب يعني حب ماشي ياريت بقى تقول لها كفاية حب لحد كدة ومتشكرين منها ياسيدي
الجيران واة من الجيران
انت عارف حماتي دايما بتقول : القلب على القلب رحمة
واحنا كدة معندناش ريحة الرحمة
بس انا هافضل وراهم لغاية لما يبقى عندهم شوية رحمة بس يارب مايقولوش عليا حشرية هههههههه
نورت يا باشا وطول براحتك يعني عاوز تبقى جاي متأخر كل دة وفي الاخر تقول كلمتين وبس وهو دة كلام برضة
سلام
...................
عبدة محتاس
من غير ضرب دة انت هاتنضرب حتة علقة
الله يسلمك ياسيدي
ماشية معاك عايش في المنصورة ومبسوط ربنا يسعدك
البنت كانت هاتعمل للواد عاهة وانت بتضحك اوكي لما نشوف اولادك هايعملوا اية
اوعى تتأخر تاني
ربنا يحمي الشنيور وتشوفيه ديما في احسن حال ... حلو الشنيور اسم جميل ههههههههههههههههههههههه
ويمكن الجيران اصبحوا كده من الهم اللي فيهم وعدم الصبر والحال اصبح لا يسر عدو ولا حبيب
فعلا حصل في تركيبة المجتمع نفسها وقيمه في السنين الاخيرة...
خالص تحياتي
إرسال تعليق