طبعا كلكم عارفين المثل دة
قليل البخت يلاقي العظم في الكرشة
اذ فجأة اكتشفت ان المثل دة بينطبق عليا
ف اية؟
هاقول اهو
انا عارفة ان حظي وحش مع الجوافة
ايوة الجوافة
يعني خلال ال32 سنة اللي عشتهم لغاية دلوقت
كان نادرا جدا لما تطلعلي جوفاية مسكرة
وقالولي اختاري الجوافة الصغيرة والمدورة والبيضاء
ومفيش فايدة كلة زي بعضة
دة غير الدود اللي بيحبني قوي
مهما اجيب جوافة غالية او مش في الموسم بتاعها
لازم الاقي الدود صديقي موجود
والفكهاني يقولي : مش ممكن يا مدام دة مفيش حد اشتكى منها خالص
كدة خلاص عرفت حظي مع الجوافة وبقيت اشتري نصف كيلو بس
واعملة عصير ودة طبعا بعد الكشف علية
............
المانجو
دي بقى ام الدود كلة
بس عرفت انة مش بيكون موجود فيها الا في نهاية الموسم
ومبقتش اشتريها في نهاية الموسم
بس برضة لو طلعلي دود في المانجو يبقى عادي وامر طبيعي
لكن لما اشتري خساية كابوتشي ام اتنين جنية والاقي فيها
دودة كبير وتخينة يبقى هو دة اللي مش طبيعي
امال لو كنت جبت خس بلدي كان هايطلعلي فية اية؟ ثعبان
المهم انا بصراحة اتخضيت لما شفتها في الاول وبعدين
ندهت على العيال قلت افرجهم عليها واسيبهم يلعبوا معاها شوية
لقيتهم خايفين منها ومارضيوش ياكلوا من الخساية مع اني رميت الجزء اللي كان فية الدودة
اخر حاجة بجد عمري في حياتي ما شوفت كدة
اكيد كلكم عارفين الكاكا
واللي مش عارفين اقولهم
هي حاجة كدة شبة الطماطم اللي مش حمرا قوي
ياجماعة
انا طلعلي دودة في الكاكا
حقيقي انا عمري ماسمعت ولاشفت ان الكاكا بيبقى فيها دود
انا لما شفتها قلت مش ممكن اكيد انا مش شايفة كويس
وبعد فحص دقيق طلعت فعلا دودة وصاحية كمان
علشان كدة انا
قليلة البخت ودايما بلاقي العظم في الكرشة
عندي اضافة صغنونة
البت ام يوسف الشهيرة بدوبة
هزقتني وقالتلي يييييع انتي مقرفة
بس انا مصممة على موقفي لان كل دة بيحصل معايا فعلا
وانا من موقعي هذا احب ان اشكر دوبة على رأيها الصريح
..........................
في حاجة تانية ملهاش علاقة بالبوست
هاقولكم عليها بس مش عاوزة حسد ولا قر ولا نق اوكي
ابو الدراويش عملي مفاجأة لذيذة
ادخلوا على الموقع دة وانزلوا اخر الصفحة وشوفوا في اية
ويا سلام لو دوستم بالماوس على الكلام
هذا هو الموقع
هناك ٣٨ تعليقًا:
اقول عليكي ايه يامفترية شككتيني في كل انواع الفاكهة مانجو فيها دود يالهووووووي وايه اخبار المانجو اللي شربتهالنا لما جينالك ؟!!!!!!!
على العموم ياشوشو الدود مش وحش ده صديق الانسان مش مؤذي خالص وابقى جربي المش مش هتلاقي فيه اي حاجة صدقيني
تحياتي
قشعرتيلى جسمى كله الله يسامحك
انا اكتر حاجة بتجيبلى ارتكاريا الدود والنمل الصغير
بيخولنى عاوزة اقف تحت الدش مع طنطيت مستمر بالاضافة لهرش وكأنى جالى جرب
روحى الله يسامحك
يلا باى
هبة
شوشو انتي عارفة انا كده موسوسة فتلاقيني اي حاجة بفتحها حتي الخيار والقتة وبرضه القيهم مدودين كنت فاكرة انا لوحدي الي كده بس من الواضح ان مامتي كده برضه ههههههههه ولعلمك الدود برضه مفيد والدليل كيلوز المش الي وصل لسبعة جنيه تفتكري ليه علشان مزود ببروتين حيواني
السلام عليكم
الاخت الجميلة شاهى ايه الكلام الجميل اللى يوجع البطن ده هو صحيح انت ست بيت بس الله يخليك بلاش تشريكنا فى التفاصيل الدقيقة دى انت ممكن تشركينا فى اكلة حلوة عملتيها فى طبق بسبوسة بالمخسرات بس الله يخليكى بلاش جو الدود والحاجات الحلوة دى وشكرا
شاطرة ياابلة شاهى بس برده يعععععع
ماشية معاك يا عم انت وابو الدراوييش
اه بنق
عاوزة حاجة
ليكى شوق فحاجة
قولى متتكسفيش
كل سنة وكل عيد وكل يوم وساعة وانتو بكل خير وسعادة وحب
يلا خلى النق علينا بقى
اتنين ببس هنا للبهوات يا ولد لزوم الدماغ العالية والاحتفالات
باااايبايولا
هبة
اولا ازيك عاملة ايه ودي اول زياردة ليا وبصراحة اللى قالي على المدونة بتاعتك الصديق احساس لسة حي وانا سعيدة جدا انه عرفني بمدونة جميلة زي بتاعتك بجد انا سعيدة الحظ
على فكرة انتي مش حظك وحش وقليلة البخت انااكتشفت حاجة من اللىقريته فى البوست ده انتي طلعتي صديقة الدود بقى هههههههههه الظاهر انه دود عشري شوية ومش عايز يسيبك خالص
ويمكن لو فتحتي الحنفية تلاقي دود نازل كمان ويبقى ده حصريا عندك ولااول مرة فى دود فى الحنفية هههههههههههه
لا بجد الحمدالله انا بقى تقريبا بعمل زي النكتة لمااكل منجا وافتح واحدة الافي فيها دود اجيب واحدة تانية الاقي فيها برضه اطفي النور واكل التالتة بقى هههههههههههه
لا بجد انا ماما ربنا يخليها ليا هيا بتقوم بمهمة الكشف والبحث عن الدود بصراحة وتديني الفاكهة جاهزة على الاكل
حلو البوست وفكرة جديد ده الدود بقى مشهور اهو اتعلمه بوست بحاله ههههه
تحياتي ليكي ياجميل
بصراحة موضوع محير ومش عارف تفسير منطقي ليه !!!! بس من الكلام اللي انت قايلها معناه انه بيتكرر كتتتتتتيرررررر. وده اللي انت شوفتيه ما بالك باللي مشفتوهش، وعلى فكرة الطماطم تعتبر فاكهة برده .. أخبارك معاها ايه ؟؟
تحياتي
يا ستى يا بختك
دود وبتاع وشاى بالنعناع
بس عادى والله الدود ده مفيد جدا بالصحة
طيب هقولك انا فى يوم من الأيام كنت قاعد ولقيت ايميل وصلنى
بفتح الايميل ألاقى صور لناس جايبين 3 كيلو دود وضربوه فى الخلاط وشربوه
عادى يعنى
طيب بما انى بقى رايح الجيش انا كنت بشوف الصراصير جمع صرصور بتمشى على العيش اللى بناكله وكمان فى الكوبايات بتاعت الشاى
وكنا لبناكل برضه وبنشرب شاى
غير بقى اللى كان بيحصل فى المطبخ
انا رايح عاشن أسلم عليهم الأسبوع الجاى
:D
فعادى يا شاهى بكرة باذن الله وبعد مرور 33 سنه ان شاء الله فى موسم الجوافة الجديد هتاكلى الجوافياية اللى انتى كنتى بتسمعى عليها وهتكون مسكرة وأكيد مش فيها دود
سلميلى على أبو الدراويش وحوده والرايقة والجبارة
جزاك الله كل خير باذن الله
ههههههههههههههه
هو ايه موضوع الدود ده معاكى
معلشى بقا
نفسك حلوة
عزيزتى
انتى اللى غلطانه سكوتك على الجوافه طمع فيكى الفاكهه والخضار
وكله بيقول مش معنا الجوافه يعنى
على العموم الفاكهه سواء بدوده او من غير مبقاش ليه طعم
والبركه فى...... بلاش نجيب سيرت الناس
وزى ما قولتى اعملى الفاكهه عصير
بس بعد الكشف بقه
سلااااااااااااااام
خلاص بلاها الفاكهة خالص
خليكى فى الخضار
لو انى خايفة تقشرى جزرة يطلعلك منها تنين
بصراحة انا ماشفتش فقر كدة
بس يلا ولا يهمك
اهى حتى الفاكهة مرشوشة ومبئاش ليها طعم اليومين دول
ازيك ياشوشو
يعنى ياجميله تروحى تشترى الفاكهه
مش فى موسمهاوعايزاهامن غير دود
انت حظك حلو
ان شاء الله
بس غيرى الفاكهانى
تحياتى لك
تحياتي
حقيقي...أضحكتيني...لكن حاولي تغيري المحل الذي تشتري منه الفاكهة.
و انتقي الحبة السليمة التي ليس بها ثقوب و يكون الحبه بعنقها.
حاولي تفتحي حبه جوافة و انتي بتشتري...و تأكدي من خلوها من الديدان.
تحياتي...و الحمد لله ان البخت غير السار كان في الفاكهة.
اكيد المؤامره دي مدبرينها حد من ولاد ابو اسماعيل
مستحيل كل ده يكون صدفه
لازم نتحقق ونفتش كويس
هاع مين هناك
راقبي الفكهاني وانا هاراقب بتاع الخس
-----------
يا سلام هو يعني علشان شوية دود يبقى حظك قليل
انا ابويا قرب يخلص عليا كل ما يقولي اشتري فاكهه تطلع حمضانه
يقولي يا ابني هو انت مبتفهمش تشوف الفاكهه قبل ما تشتري
اقوله والله كان شكلها كويس
ونقيت اغلى حاجه
ما علينا
بس الحمد لله بشتري لماما الخضار حاجه فللي
انا شاطر جدا في سوق الخضار
بس الفاكهه معانده معايا شويه
ما علينا
سلااااااااااااااااااااام
اروح اشوف ايه المفاجأه اللي بتقولي عليها دي
ايامنا الحلوة
عيب عليكي
اهي المانجو دي بالزات كانت مليانة وانا قلت هي في العصير مش هتبان ههههه
انتي عارفة انا السنة دي ماأشتريتش مشمش خالص اصل بابا قالي ان فية ديدان لا ترى بالعين المجردة فعلى طول قلت بلاها مشمش
................
دوبة
يا اختي كميلة
بقى النمل الصغير بيجبلك ارتيكاريا يا مفترية حرام عليكي هو أدك انتي مش بتشوفي هو صغنون أد اية
...................
قلوب حائرة
بجد يا هبة كيلو المش وصل لسبعة جنية
كدة يبقى لازم احافظ على شوية المش اللي عندي ومش اي حد ياكل منهم دة انا حاطة علية قشطة وبواقي الجبنة الرومي
ماتخافيش من الخيار والقتة دول مفيهمش حاجة اطمني
................
علي
الاخ العزيز علي
مقدرش اشرككم في الحاجات الحلوة اللي بعملها اصلكم مش هاتستحملوا وهاتصعبوا عليا خالص ههههههه ودة طبعا من كتر حلاوة وطعامة اكلي
عموما انا عاملة كيكة وبسيسة تعالى خد حتة
................
دوبة
دوبة تاني بعد التعديل
شاطرة بعد اية
بعد ماقلتيلي مالذ وطاب من كلامك السكر
وانتي طيبة يا جميلة وعقبال عندك
كلام من القلب
اهلا وسهلا بيكي وشكرا لحسام
حماتي دايما بتقولي اني صديقة الشدة
لكن صديقة الدود دي جديدة عليا بس حلوة
حرام عليكي عوزاني الاقي دود في الحنفية كمان دة يبقى فقر دكر
انا بقى مقدرش اعمل زي النكتة دي خالص
بقى مامتك هي اللي بتجيبلك الحاجة مغسولة ربنا يخليهالك وبكرة تتجوزي وتقومي بالدور بتاع مامتك وتشوفي
العجب
..............
يحيى
يعني اية دة اللي شفتة ياسنة سوخة هو ممكن يكون في حاجة ماشفتهاش لألألأ مش ممكن اوعى تقول كدة وعلى رأي ام يوسف:ييييييييييع
انا عارفة ان الطماطم فاكهة بس الحمد لله حظي كويس معاها اصلي مش بحبها فمش بجبها كتير
سلام
..................
عبدة محتاس
منك لله ياعبدة
انا هاقوم ارجع واجي اكمل الرد
انا بقرف من الصراصير جدا ومن النمل الكبير كمان لكن النمل الصغير عادي
الله يخرب بيت الجيش اللي عمل فيك كل دة
انا عاوزة اعرف هما بيدخلوا الشباب الجيش علشان يقرفوهم وهي يعني دي الطريقة اللي هاتخليهم رجالة وطول عمر اولادك يابلدنا رجالة
ربنا يسمع منك واكل جوفاية مسكرة
يوصل سلامك ان شاء الله
قطة الصحراء
مياو مياو
نفسي حلوة صحيح بس مش لدرجة الدود
على طول كدة
..................
احساس لسة حي
تفتكر كدة
طيب كنت اعملها اية؟
قلت مش هدخلها البيت تاني بس العيال بيحبوها وبصراحة انا كمان بحبها عصير
عندك حق الفاكهة مبقاش ليها طعم زي الاول بس نعمل اية الموجود بقى
هو العصير حلو بس في فاكهة مينفعش تتعصر
..................
بغض النظر عن الدود ربنا يخليلك ابو الدراويش ربنا يسعدكم كمان وكمان
تحياتي
simple girl.. ..simple dream
اولا اهلا بيكي
صحيح الفاكهة مرشوشة وملهاش اي طعم انا عاوزة اعرف بقى لو ماكانتش مرشوشة كنت هلاقي فيها اية؟
.................
كلمات
اميرة هانم
ازيك
واللهي الفكهاني بيختارلي احسن حاجة عندة وخايفة اجرب واحد تاني بصراحة
................
الربان
اهلانات وسهلانات
انت فين من زمااااااااااااااااااان
حكاية تغير الفكهاني يمكن مقدرش اعملها اصلة احسن واحد في المنطقة هو مفيش غيرة اساسا لأ ياربي في واحد تاني بس انا برتاح في التعامل معاة وبصراحة اخر نصف كيلو جوافة اشتريتة من عندة كان سليم من برة بس رميتة كلة لانة كان في دود برضة وانا حتى كنت مستغربة جدا وكنت عاوزة اعرف الدود دخل منين
شكرا على المعلومات وهحاول اعمل كدة
...................
الشنكوتي الكبير
تفتكر فعلا يا ايهاب انها مؤامرة
يالهوي ومين اللي معزبني كدة
بس انا اعتقد ان ولاد ابو اسماعيل مايعملوهاش اكيد هاصعب عليهم
انا كنت عاوزة اخبي عليك بس خلاص مش هاقدر
انا اشتريت الخس من الفكهاني برضة مش من بتاع الخس
ماشية معاك ياسيدي بتفهم في الخضار ماشاءالله
انا والحمد لله خيبة بقف واقول للبياع نقي الحاجة كويسة علشان لو طلعت وحشة هادعي عليك وطبعا هو بيخاف على طول اصل انا سري باتع هههههههه
هابقى اكلملك باباك علشان يروح هو يشتري الفاكهة بدل البهدلة كل شوية
وحاول تخلي غادة تاخد قرصات في اختيار الفاكهة علشان لما تتجوزو ان شاء الله ماحدش يضحك عليكم من الاخوة الفكهانية
سلام
سندباد
ربنا يخليك ويسعد ايامك
ماله الدود بقى
انتم هتتبطروا ولا ايه
انتى لما تيجى تشترى ابقى اسألى البياع
عندك طماطم من غير دود
هو هيبقى عارف ويجاوب
بلاش بطر
شاهي انا قلوب حائرة المقهورة نظرا لان شكرتنا حفظها الله قفلت علينا المسنجر فانا عملت ميل على الجميل وميل عليه هو badwra2006@gamail.com
انا لو منك اقول دودة دودة بفلوسى وهاكلها سمي و غمضي عينك وربنا يستر
مدونتك لذيذة جدا و سعدت بزيارتي ليها جدا جدا
و مفيش و لا قرف و لاحاجة لكل الحطاية ان الدود عنده نظر فبيجي يزورك من فترة لفترة و بيفاجك من خلال الفاكهة و الخضار
تحياتي لكي
انتظر زيارتك يا جميلة
و ادام قلمك الرائع و اسمحيلي بالزيارة
همسه
واضح ان بتاع الفكهه الى عندكوا هايل
كمان واضح انك بتعرفى تنقى الحجات جدا
دانا هعمل تمثال لامى
تحياتى
يا عينى على البخت ده
والله صعبتى على خالص
بس مهما قولت برده مش هكره المانجه
هههههههههههههههههههه
الطائر الحزين
واللهي انا راضية بكل حاجة
بس كدة كتير قوي
اهي الطماطم بقى مش بلاقي فيها دود مع ان معرف عنها انها في الصيف بتكون مليانة
بصراحة هي كويسة معايا
..........................
قلوب حائرة
معرفتش يا بنتي اعمل ميل على الجميل بتاعك دة
انتي عارفة اني شاطرة ولهلوبة بس ياريت لو شوية مساعدة ويبقى كتر خيرك
............................
همسة
اية الكلام الجميل دة كلة
ميرسي ياهمسة
وطبعا تيجي في اي وقت البيت بيتك قصدي يعني المدونة مدونتك
بعد كلامك دة انا بقيت بحب الدود خلاص
.............................
ممكن
لأ حضرتك انا مش بنقي خالص
انا بسيب الفكهاني هو اللي ينقي
طبعا لازم تعمل تمثال لأمك
اي ام في الدنيا لازم يتعمل لها تمثال مش علشان اختيار الفاكهة بس
لأ علشان كل حاجة حلوة بتعملها مع زوجها واولادها
سلملي عليها وبلغها تحياتي
.......................
محمد علي ..هي كدة
بجد صعبت عليك
الحمد لله
ابقى تعالى كل يوم
ههههههههه
انا مقصدش اكرهك في المانجة انا قلت انها في اخر الموسم بتكون وحشة وغير كدة بتكون كويسة
على فكرة انا بشيل المانجة في الفريزر وعندي كتير ابقى تعالى خد كيس مادمت طلعت بتحب المانجة اوي كدة ومتخافش دي بدون دود
مامتي ياحبيبتي هعملك ميل حالا واتصل بيكي هعلى التليفون واقولك الباس ورد
دودو ايه بس وبتاع ايه ده كلام برده
في ناس هنا قلبها حساس ممكن تموت منك وبعدين يرفعوا عليكي قضيه وتعويض وكلام كبير.
ويجيلك الحج ابوالدراويش يندم علي 50 ملطوش الي دافعهم في الاعلان ويقول يا ريت كنت وفرتهم علشان ادفعلها الكفاله.
بس انتي كشفتي علي ال 3 بغبغانات دول ولا يكون عندهم الفنوسا الطيور ويجعله عامر. ههههههههههههههههه
الددود شعارنا
والله يا قمر من غير مبالغه كل الي بيحصلك دا حصلنا كلنا
وضيفي كمان ان مره رحت اشتري فول من عند الشبراوي
وطبعا نار علي علم اكيد
بفتح العلبه استعداد للافطار
واذا بي افاجئ ان الدود مرصوص علي السطح بتاع الفول
في الاول قولت دا سمسم يمكن بيزينه بيه الفول ولا حاجه
ولكن بقي دققت النظر زجبت العدسه
وفي الناهايه الاقيه دود
دعيت عليهم وعلي اليوم الي رحتلهم فيه
وحلرمت اكل فول اول خس او مانجو او جوافه او كاكا
فاضل ايه تاني يتاكل والنبي قوليلي كدا؟
تسلم ايدك يا قمر
وربنا يخليلك ابو الدراويش يارب
ويهنيكوا جدا مع بعض
تحياتي اوي يا قمر
حقيقي ربنا يكون في عونك
بس مضطرة اقول كلمة لازم تتقال في مناسبة زي دي
يعععععععععععع
بس انا عندي حل كويس
ما تشتريش انت الحاجة بنفسك وما تفتحيهاش بنفسك
جربي كده
ضحكتيني
تحياتي
ملحوظة انا دخلت الموقع لقيته مش شغال
نوت فاوند؟؟؟؟
انا جريت افتح كيس الجوافة الليجوة
وباكل جوافاية دلوقت
ربنا يرزقك من طيبات ما خلق
ويحليلك زادك يارب
دي دعوه ماما بتقولهالي لما كنت اقولها على اكل هي عاملاه انه حلو
بصي
غيروا الفكهاني
تحياتي
خلاص يا حياتى و لا يهمك
الفطار الجاى عندك لكى من شويه جوافه على شويه مانجه ميه ميه
بس يا بختهم بالعصير ألى من صنع أيدك يا قمر
انا خلاص, مش هشترى فاكهة ولا أكلها
واذا اشتريت عصير هاصفيه وامسك عدسة مكبرة افحص بيها الكوباية
وفى الاخر مش هاشربه برضو
تحياتى على البوست الصرخة ده
وممكن نستخدم نفس الاسلوب اذا حبينا نخلى حد يبطل ياكل حاجه او حتى يبطل تدخين
تحياتى لك
كاميليا
جاي اطمن واسال
تحياتي
realman
معلش مكنتش اعرف ان في ناس حساسة قوي كدة
يانهار ابيض هو الاعلان ب50 ملطوش بس دة ابو الدراويش قالي انة ب200 طيب لما يجي هاشوف اية الحكاية
سلام
جهينة
الشاعرة الرقيقة جهينة
الدود في الفاكهة عادي لكن في الفول المستوي ييعع الشبراوي اصلا مقرف جدا
جربي التابعي الدمياطي دول ناس محترمة ونظيفة
ماتحرميش تاكلي الحاجات دي بس ابقي بصي فيها كويس
ربنا يسعدك ويجمعك انتي وسندباد على خير
......................
سها
زميلتي العزيزة
اسمحيلي اقول زميلتي لاني لما دخلت مدونتك لقيت حياتنا شبة بعض شوية يعني احنا الاتنين في سن متقارب ومتزوجين وقاعدين منورين في البيت وكدة
فكرة جميلة بس ياتري مين اللي ممكن ينفذها
الاولاد مش هايرضوا ومش هايعرفوا وابو الدراويش مش فاضي
مفيش غير نورة البوابة هي اللي ممكن توافق هاعرض عليها الامر
الله دعوة مامتك جميلة خالص ربنا يخليها ليكي
ممكن تقوليلها تدعيلي انا كمان
تحياتي
.......................
في القلب
اوششششششششششششششة
وحشاني
حددي ميعاد الفطار وانا هاستناكي وماتشغليش بالك بالمانجو انا لسة عندي ركزي انتي بس على الجوافة نفسي اكل جوفاية مسكرة ياناس
كاميليا
اهلا كاميليا ام كلام بيهجم على القلب ويدخل ويقعد ويربع بدون استأذان
انا مش قصدي اقرفك من الفاكهة انا بس كنت بقول على اللي بيحصلي ومع ذلك مش ببطل اكل فاكهة ماعدا الجوافة علشان حظي الجميل
كلي فاكهة براحتك بس ابقي بصي فيها كويس
كل سنة وانت كيبى يا شاهي
بس انا نلزت لاخر الصفحة
ومالاقيتش حاجة؟
هوا كان فيه ايه؟؟؟؟
اوعي يكون كان
فيه دودة برضه
إرسال تعليق