السلام عليكم
احب اشكر كل واحد و واحدة علقوا على بوست نورة صحبتي
واحب اطمنكم واقولكم ان ربنا هداها وعقلت والحمد للة
وهي كمان بتشكركم كلكم
........................
اسمحولي ادخل في الموضوع على طول وبدون مقدمات
الحلفان بالطلاق
هو دة الموضوع اللي غايظني وعاوزة اتكلم فية
انا كنت فاهمة ان الحلفان بالطلاق بيبقى منتشر في طبقة معينة من الناس
واللي هي الناس اللي مش متعلمة وبس
لكني صدمت لما لقيت ناس متعلمة ومثقفة وبتحلف بالطلاق عادي جدا
يعني مثلا واحدة قريبتي مدرسة فرنسي وزوجها مدرس انجليزي
كنت بسألها على حاجة كدة وقالتلي : لأ ماروحتش
اصل جوزي حلف عليا يمين طلاق اني ماروحش!
انا : نعم جوزك اللي هو جوزك اللي انا اعرفة؟!
هي : ايوة
وغيرة وغيرة وغيرة
اليومين دول الموضوع دة كتير اوي من حواليا
اللي غايب بقى عن السادة الرجال بتوع الحلفان دول
ان الست ممكن في وقت تعند ومايبقاش فارق معاها
وبيبقى صعبان عليها نفسها وان ازاي زوجها ممكن يضحي
ببيتة واسرتة مقابل حاجة هايفة
فيدخل الشيطان
وهو يعند وهي تعند ويتهد البيت ويفرح الشيطان
ونرجع نجري ونعيط ونقول اسألوا الشيوخ
اصل انا كنت متنرفز
اصل انا ماكنتش اقصد
اصل انا كنت بهدد
اللي اعرفة ان الحلفان بالطلاق بيتهزلة عرش ربنا - والله اعلم -
ياريت ياريت نحاول نمسك نفسنا شوية
ومانعودش نفسنا على الحلفان دة
عاوز تخوف مراتك والأ تهددها في مليون طريقة غير كدة
ربنا يهدينا جميعا
اشوفكم على خير
هناك ١٣ تعليقًا:
أول تعليق
هقرا واجى
اة عندك حق والله زى مايكون الحلفان بليمين ده حاجة سهلة كدة
ههههههههه
ربنا يهدينا يارب وكل واحد يتحكم فى نفسو لسانوشوية
اولا ازيك ياممامتي شوفي بقى هتنتيني محصراكي لحد اما اشوفك واقعد معاكي واشبع منك ، ثانيا انا ليا تفسير للموضوع ده ان الراجل الي بيحلف بالطلاق ده بيكون مش واثق في نفسه ومش قادر يمشي كلامه على مراته فبيدور على شي ميبقاش فيه راجعة وهو انه يحلف بالطلاق ده اولا اما ثانيا هو يعني البني ادمة دي شايف انه لو مسمعتش الكلام من غير طلاق هتسمعه بالطلاق لاالعفو يبقى بيحلم الي بيقى عاوز يعمل حاجة بيعملها ويجي الاستاذ في الاخر يعيط ويلف ويدور على الشيوخ علشان يلاقوا ليه حكم على مزاجه في يمين الطلاق هقول ايه بس ربنا يهدي
ما أعرفه أن الأزهر أفتى بعدم وقوع الطلاق في ممثل هذه الحالات .. تماما كما الغضب ..
بل اشترط أن يكون الرجل هادئا في كامل وعيه ومصرا على أبغض الحلال ..
تماما كما عند الشيعة ..
والله أعلم ..
يا شاهى يا جميلة
دايما مواضيعك قوية
بصى يا ستى
متهيألى الرجالة المصريين ( مش كلهم يعنى ) بيعتبروا الحلفان دا نوع من الضرورة لإظهار قوتهم و فرض نفوذهم
زى تمام ما بيستخدموا الشتايم فى الهزار و التعبير عن أرائهم بأعتبار الشتيمة مظهر من مظاهر الرجولة و الخشونة
الحلفان بالطلاق كمان وسيلة دفاعية و نوع من الإستعراض و إجبار الزوجة على الطاعة و أهو بدل ما يمد إيده عليها و لا حاجة ...
من الىخر بيرمى الكورة فى ملعبها
أهو حلف و خلاص
و هيا بقى المفروض تبقى العاقلة و تلم الليلة
بس متفقة معاكى ألف فى المية إن كلمة الطلاق بيتهزلها العرش و بالتالى مينفعش تبقى لبانة فى بوق أى حد
حبى و حضوناتى يا حبيبتى
حبيبتى شاهي
احنا فى زمن كل حاجة فيه ملخبطة و الصور كلها مش واضحة و المفاهيم كمان و السلوكيات
الحلفان بالطلاق ده بقى عند البعض زيه زي الحلفان بالنعمة و المصحف و رحمة الاموات
و كلها حلفانات مش مفروض انها تتقال
و ربنا سبحانه و تعالى قال"و ان حلفت فاحلف بلله"
بس الناس بتقلد بعضها للاسف بدون تفكير
و مش شرط ان الراجل يكون عاوز يخوف مراتة
بس هوه قال يعنى عاوز كلامه يمشي و خلاص بدون تحاور و لا اقناع
فالراجل لقى ان الحلفان بالطلاق اقصر طريق لتنفيذ رغباتة اللى ممكن ماتكونش ليها اي معنى
زي صحبتك اللى كانت حتروح مكان علشان هو مش عاوز و اكيد ما كانش عنده سبب مقنع لتبرير عدم رغبتة فحلف اليمين
موضة
الدنيا متلخبطة يا شاهي
و الراجل المثقف المتعلم بتاع اليومين دول يفتقد لحاجات كتيره كان يتميز بها غيره من المثقفين المتعلمين ولاد الناس بتوع زمان
و لسة حنشوف يا بنتى
المشكلة بقا ان الست اللى تعند بيكون اليمين وقع فعلا
و حتلاقى ولاد الحلال اللى حيفتوا بفتاوي ممكن توديها فى داهية
ربك يستر علينا فى الزمن ده
ازيك يا أستاذة ....
طبعاً معاكي حق ولازم الرجاله متحلفش بالطلاق من باب التهديد والضغط عشان في أساليب تانيه كتتتتير ممكن تجيب نتائج بدل الحلف بالطلاق ، كمان لازم نعرف ان الموضوع ده ليه طرفين زوج بيحلف بالطلاق وزوجه هتتطلق يعني برده لازم الست تلم الدور شويه وتعرف ان الراجل ممكن يكون متنرفز. وحكاية وسط وطبقة وتعليم والمفروض انه ميحلفش بالطلاق أرجع وأقولك حاجتين مهمين أولاً التنشئه الإجتماعية وثانياً الحالة النفسية للراجل وثالثاً الست .... معلش طلعه تلات حاجات
سلام
يا خر ده انا بقالي زمان مقرتلكيش حاجه يا دكتوره
بس الحق عليكي بتنامي كتير قوي قبل ما تنزلي ببوست جديد
المهم انك بخير
اول هام بقى حكاية الوسط دي انا شايف ان مالهاش دعوه خالص يعني كل الأوساط فيها ناس مبتفهمش يعني ايه مسؤليه
فيها ناس عنيده جدا وهايفين
علشان كده كل الأوساط هتلاقي فيها ناس بتهدد بالطلاق عادي جدا وكأنهم بيلعبوا بلعبه عبيطه مش بأسره وعيله كامله
علشان من صغرهم معرفوش يعني ايه مسؤلية القرار
وطبعا ده بيبان من الأول يعني هتلاقيه طول الخطوبه او الأرتباط يعني كل حلوله الجاهزه هي احنا نسيب بعض احسن
لو مسمعتيش كلامي هسيبك
وحاجات من النوع ده كده
النقطه التانيه بقى الست مش بس زي ما يحي قال في ان عليها دور تمتص الموقف وتلايمها لما يكون جوزها متنرفز
لا في برده ستات بتلعب على نقطة طلقني دي
متحسبيش كل الستات بتخاف من فكرة الطلاق لا انا شفت ستات بتبقى هي اللي بتهدد بيه
ما علينا يعني
ربنا يهدي الجميع
سلامات كتير لمحمود حبيبي
سلاااااااااااااااااااااااااام
اخوكي ايهاب
السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية
الحجاب حقيقة ثابتة أم مجال للتفكير
من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
ومن هنا تبنت الرابطة أن تكون هي حجة علي من يدور بينهم النقاش علي صفحاتها.
نفجر الجديد دائما حوارنا اليوم
الحجاب حقيقة ثابتة أم مجال للتفكير
وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
ندعوكم للمشاركة في هذا الحوار المفيد
تقبلوا دعوتنا ننتظركم لنستفاد منكم
رابطة هويتي إسلامية
السلام عليكم ورحمة الله وبركاته
أظن ان الحلفان بالطلاق نوعين
نوع حلفان بكفارة وده عليا الطلاق لو رحتى ولا جيتى
ده حلفان له كفارة
اما اللى يوقع الطلاق فعلا إذا قال لها لو رحتى لأهلك تبقى طالق ..لو فلان دخل تبقى طالق
وده سمعته من مشايخ
نيجى للمهم...هو الناس بتعيش مع بعضها تحت تهديد السلاح ..اقصد يمين الطلاق
اظن لو فى تفاهم أبعد شئ هيكون الطلاق
وكمان بلاش الستات يبقى استفزازيين
يعنى لو اتقينا الله الدنيا هتتعدل
وربنا يحفظ نساء ورجال المسلمين
شركة تنظيف فلل بالقطيف
شركة تنظيف شقق بالقطيف
شركة تنظيف مجالس بالقطيف
شركة تنظيف موكيت بالقطيف
شركة تنظيف سجاد بالقطيف
شركة عزل اسطح بالقطيف
شركة مكافحة حشرات بالقطيف
شركة تسليك مجاري بالقطيف
إرسال تعليق