ربع يوم من عمري

عاوزة اتكلم عن ربع يوم من عمري

ربع يوم حسيت فية بمشاعر كتير قوي قوي مش عارفة هاقدر اوصفها ازاي بس هاحاول

قامت المدعوة هبة قلوب حائرة بترتيب مقابلة بيننا وجابت معها شخصيتين رائعتين

اية العك دة هو الكلام غامض كدة لية ؟ هي فزورة

معلش اعزروني

المقابلة اللي بيننا اقصد بيها

دوبة وابنها الرقيق يوسف وشيرين ايامنا الحلوة

وهبة قلوب حائرة والعبد لله شاهي

اما عن الشخصيتين فهما

اوشة مكان في القلب ومها سكوت هنصوت

هتكلم في الاول عن اوشة

انسانة عسولة قوي ومرحة جدا وطول ماانت قاعد معاها متحسش انك غريب عنها

حقيقي انا كنت مستمتعة جدا بكلامها وهزارها

مها

بنوتة زي السكر وعليها افكار جامدة موت ولها شخصية متألقة ومحبوبة

وبعدين دي برج العقرب زيي تبقى ليست قوة واحدة ولا اثنين بل ثلاث قوات فعّالة

شيرين

كتكوتة هادية خالص بتفكرني بالرايقة بنتي

شيرين غاوية تصوير ماسابتش حاجة ماصورتهاش شكلها ناوية تفتح معرض

هبه

دي بقى انا بحس بجد اني امها هو انا كدة ابقى كبرت نفسي شوية

بس هو دة احساسي وانا بتكلم معاها

دوبة

الجميلة دي بقى انا بحس انها اختي بجد

يعني لما نزلت علشان اقابلها مكنتش حاسة اني رايحة اقابل حد غريب

حتى لما طلعنا البيت كنت حاسة فعلا انها اختي وواقفة معايا علشان نستقبل الضيوف

ولقتني باخد رأيها في كل حاجة حتى الكبيات اللي هاقدم فيها الشاي والنسكافية

انا عندي اختين وربنا رزقني بأخت تالتة هي صحيح مش عاوزة تقولي يا أبلة

بس مش مهم أهي برضة اختي

يارب اكون قدرت اوصل مشاعري ليهم

ويارب تدوم المحبة بيننا

ويارب نتقابل تاني كتيييييييييييير

لان فعلا الوقت مرّ بسرعة جدا جدا

ايوة صحيح علشان اكون صادقة في كل كلامي

في حاجة زعلتني في المقابلة دي

وهي اني نسيت اقدم لهم حمص الشام اللي كنت عملاة

معلش بقى مرة تانية

بحبكم أوي

مناسبة سعيدة

في الاول حتما ولابد اني اعتذرعن عدم ردي على تعليقاتكم في البوست اللي فات

ودة لاني كنت مشغولة خالص

وان شاء الله هاتكون اول واخر مرة ماردش فيها

ادخل بقى في الموضوع

بعد اسبوع من النهاردة عندي مناسبة سعيدة

بعد اسبوع يعني يوم 24 اكتوبر

دة يوم زواجي يعني عيد زواجي

لا ومش اي عيد دة العاشر

اييييييييوة العاشر

عشر سنين من عمري فاتوا كدة بسرعة ازاي انا مش عارفة

مش هاقول حلوين والا وحشين لان دوام الحال من المحال

طبعا كان فيهم حاجات وحشة وحاجات كتير حلوة

المهم اني بحاول اكون مستمتعة وراضية بكل حاجة

طبعا دلوقت كلكم مفتحين عنيكم على الاخر ومستنين اني اقول

كلمتين حلوين لأبو الدراويش

بعينكم مش هايحصل

انا كنت طالبة منكم طلب

ياريت كل واحد عندة اقتراح حلو للمناسبة دي يقولة

مع مراعاة اننا هنكون في اخر الشهر

ومش عاوزة تريقة عاوزة افكار جديدة وحلوة

اة نسيت اقول حاجة

ياريت كل البنات اللي لسة ماأتجوزوش مايغلطوش غلطتي

ياساتر على نيتكم الوحشة

انا قصدي مايغلطوش غلطتي في تحديد ميعاد الجواز

اصل انا عيد ميلادي بعد عيد جوازي بيومين بس

يعني طبعا ابو الدراويش بيضحك عليا وبيجيب هدية واحدة

يعني لو كان في مدة بينهم كان زمانة جاب هديتين

كل عيد جواز وانت طيب يا زوجي العزيز

وعقبال 70 عيد جواز

اية كتير

مش كتير ولا حاجة اديك شايف العشر سنين فاتوا بسرعة ازاي

سهلين خالص زي شكة الدبوس

حدث بالفعل

يوم جميل من ايام رمضان

مشهد خارجي ليلي

كافي شوب كبير ـ بالبلدي قهوة ـ

في احدى شوارع القاهرة المشهورة

القهوة كانت بتتجدد والافتتاح بعد ثلاث ايام

صاحب القهوة رجل خير و محترم

صاحب القهوة : تعالى يا حاج علشان تشوف التشطيبات وتقول رأيك

الحاج : استنى شوية لما اخلص حجر الشيشة

صاحب القهوة : يا حاج تعالى هو الحجر هايطيرنبقى نجيب غيرة

الحاج : طيب انا جاي

ودخلوا سوا يتفرجوا وكان في بعض العمال بيشتغلوا

الحاج : مممم كويس هايل لأ شغل جميل ونضيف تمام

احد العمال : البيت اللي جنب القهوة دة هايقع دلوقتي

يالا يا واد انت وهو اخرجوا من القهوة بسرعة

ـ بجوار القهوة بيت قديم مكون من دورين والارضي ـ

صاحب القهوة : بيت اية اللي هايقع ؟ ! وهو حتى لو وقع اية اللي هايوقعة علينا

دة هايقع مدكوك على بعضة

الحاج : بس البيت مايل علينا قوي

اية صوت الطقطقة دة

اجري بسرعة بسرعة

طاخ طاخ طاخ

وقع البيت على القهوة

بس الحمد لله مفيش اصابات ولا خسائر في الارواح

طبعا تراب كثيف يملأ المكان

صاحب القهوة : كح كح الحاج فين ؟ فين الحاج ؟

الحاج : قلتلك استنى لما اشرب الحجر مستعجل قوي على اية؟

صاحب القهوة : كنا هانروح أونطة

الحاج : الحمد لله

حمد لله على سلامتك يا حاج وربنا يديك الصحة ويخليك لينا

ربنا يعوض عليك يا صاحب القهوة وقدر الله وماشاء فعل والحمد لله انك بخير

كانت معكم شاهي ابو العافية قناة الخميرة

اخيرا عرفت اصوت

السلام عليكم

ازيكم كلكم

رمضان كريم

انا كنت ناوية مدخلش المدونات في رمضان بس بصراحة مقدرتش

هاقول لكم على حاجة حصلت لي في شهر يوليو اللي فات

وفي الاخر هابقى اقول انا لية حكيت الحكاية دي

اكتشفت اخيرا اني بعرف اصوت

ايوة اصوت مش في الانتخابات لا سمح الله لأ

الصويت اللي هو الصوت الحياني

اصل انا كنت زعلانة قوي اني مش بعرف اصوت

وفي اوقات كنت ببقى محتاجة اني اصوت ولكني كنت بفشل

زي مثلا اثناء ولادة الرايقة يا سلام

رايقة بتتولد تخيلوا كمية العذاب

ولما قلت للدكتورة خلصوني بقى

قالت: لما تصوتي الاول

دة اية الذل دة

المهم احكي لكم ازاي عرفت اصوت

العيال كانوا بيلعبوا في الجنينة وبعدين سمعت الشينيور بيعيط

والشينيور ابني ماشاء الله علية صوت اوبرالي قوي جدا

ببص من البلكونة علشان اشوفة يمكن وقع والا حد ضربة

لقيت اية ؟ خير اللهم اجعلة خير

الواد نصف وشة وايدة الاتنين غرقانين دم ـ بدون مبالغة ـ

وحولية حوالي 20 طفل مش عارفة جم منين وهو واقف مش بيتحرك

وعمال يعيط ويقول الحقني يا مؤمن ـ مؤمن دة ابن اختي ـ

طبعا هاتقولوا ....رحتي مصوتة.........لأ

قلتلة اطلع

وطلع ومعاة ال20 طفل انا لقيت الشقة اتملت عيال

وهو من اول لما طلع وهو بيقول

مش انا يا ماما دي الجبارة هي اللي ضربتني

مش انا يا ماما دي الجبارة هي اللي ضربتني

وانا اقولة : طيب اسكت عاوزة اشوف التعويرة فين ؟

ـ في الغالب لو شفت جرح بقدر اعرف اذا كان هايحتاج خياطة والا لأ ـ

والواد مفيش مش بيسكت ومعلق على مش انا يا ماما ..............ولقيت

نفسي بقولة : اسسسسسسسسككككتتتتت بصرخة قوية

ودة كان اول صوت ليا

وبعد الصوت الحياني لقيت الشقة فاضية حتى اولادي التانين ومؤمن

نزلوا وسابوني تقريبا خافوا مني

المهم ان الحمد لله الجرح طلع بسيط والدم الكتير دة علشان الولد

كان بيلعب وجسمة ساخن ولما هدينا عرفت منة ان الجبارة حدفت على دماغة

طوبة وطبعا مش قدرت اعمل لها حاجة لانها كانت مخضوضة

وبصراحة انا كمان كنت خلصت وجالي هبوط

الغريب بقى ان مفيش حد من الجيران عبرني ولا سأل انتي بتصوتي لية

ولا في باب شقة اتفتح بعد الهيصة دي

مع ان باب شقتي كان مفتوح لما صوت

هو دة السبب اللي خلاني احكي الحكاية الطويلة دي

راحت فين العلاقات الحلوة بين الجيران ؟

انا مش قصدي التداخل الزائد

انا قصدي الوسط

يعني لو كان في جيران من بتوع زمان كنت ممكن اسيب معاهم العيال

واخد الشينيور على المستشفى

مش عارفة يمكن الناس بقت مشغولة زيادة والا خايفة من بعض

حقيقي نفسي الجيران ترجع زي زمان

شكر وتقدير

السلام عليكم

بما ان معظم الناس فهمت البوست اللي فات غلط

واولهم الدرويش المرووش زوجي العزيز

قررت اني اكتب بوست تاني

واللي شجعني على كدة الحديث التالي اللي دار بيني وبين

ابو الدراويش لما كان لسة جاي من الشغل

انا : عامل اية ياحبيبي

هو :الحمد لله

انا : كيف كان يومك ؟ ـ شوفتوا اللغة العربية !لغتنا الجميلة ـ

هو :كويس الحمد لله والناس مبسوطين وبيشكروا فيا

انا : طبعا يا حبيبي اصل انت مفيش حد يعرفك وما يشكرش فيك ابدا

ـ على فكرة دي الحقيقة انا مش بجاملة هو فعلاانسان محبوب جدا ـ

هو : ايوة في

انا : ومين دة بقى ان شاء الله ؟

هو : انتي

ان ان اااااان دي موسيقى تصويرية

انا : يا نهار ملون انا بذمتك انا مش بشكر فيك

طيب ليك عليا ياسيدي ارزعك بوست كلة شكر

وبناء على ذلك قررت اني اكتب لكم

انا بحب الدرويش وبشكرة جدا على الحاجات الحلوة اللي بيعملها علشاني

واشكرة كمان علشان بيفتكرني في كل مرة بيسافر فيها وبيجيب لي

الشيكولاتة البيضاء اللي بحبها

هما صحيح العيال بيشاركوني فيها بس انا بخبي اللي بقدرعلية

وربنا يسامحني بقى اصلهم بياكلوا الشيكولاتة التانية عادي

وانا مش باكل غير البيضاء

يوة خرجنا عن موضوع الشكر

لأ بجد يا جماعة انا هازعل قوي لو كان دة احساسة فعلا

بس هو اكيد كان بيهزر صح

وبعدين شكري لة بيبقى في تصرفاتي يعني اهتمامي بية

حرصي على انة يكون دايما مرتاح ....يعني وحاجات تاني كتير قوي

مش لازم اقعد اقولة ياسبعي يا مستتني يا مهنيني والكلام دة

والا انتم رأيكم اية ؟

اختلافات

هو : بيحب ينام بدري

هي : بتحب السهر

...............

هو : اكيد بيصحى بدري قوي

هي : بتصحى بدري برضة بس مش قوي

......................

هو : بيصحى من النوم فايق و رايق على الأخر

هي : بتصحى مضروبة 100 .....مفيش داعي

......................

هو : بيحب يفطر بدري جدا

هي : مش بتفطر اصلا

.................

هو : بيحب الاكل بدون ملح

هي : بتموت في الحادق

....................

هو : بيحب قاعدة البيت

هي : بتحب الخروج والانطلاق

....................

هو : بيحب الهدوء

هي : بتحب الهيصة

.......................

هو : بيحب الكورة والنادي الاهلي بجنون

هي : بتحب الاهلي علشان خاطرة

.....................

هو : بيحب الحلويات جدا

هي : مش بتحبها قوي

...................

هو : عنيد وعصبي وكسلان

هي :؟؟؟؟ بتحب هو

......................

حاجات بسيطة وهايفة بس في الاخر برضة

اختلافات

احضرونا يا مدونين

انتم عارفين انا بحب ادخل في الموضوع على طول

الموضوع بقى

انا خلاص دماغي وقفت عن التفكير في الاكل

ـ الاكل بس ـ

وحاسة اني خلصت الاكلات اللي في الدنيا

حاجة مملة قوي انك تقعدي تفكري في الاكل

ومين بيحب اية ومين مش بيحب اية

ـ طبعا الكلام دة للسيدات فقط والرجالة خالعين اديهم ـ

المهم كنت بكلم البنوتة شيرين ايامنا الحلوة وقالت لي اعملي بامية

عملت البامية وتقدروا تقولوا انها كانت كويسة

وجة ميعاد الغدا وحطيت البامية لأبو الدراويش ولقيتة بيقولي

فين البتنجان المخلل؟

انا : مفيش بتنجان فيّ ليمون و زيتون

هو : يعني هو فيّ حد يعمل بامية من غير بتنجان مخلل

انا: معلهش المرة الجاية هاعمل مع البامية بتنجان حاضر

بيني وبينكم المرة الجاية اللي هاعمل فيها بامية مش هاعمل بتنجان برضة

لية بقى ؟ اقول لكم

في مرة من المرات طلب مني ابو الدراويش بتنجان مخلل

عملت البتنجان ...قالي

لأ مش هو دة البتنجان المخلل بيبقى مسلوق

اتاري هما عند ماماتة بيعملوا المخلل مسلوق

احنا بقى عند ماما بنعملة مقلي

ومن هنا ظهر الاختلاف

خلاص مفيش مشكلة اتصلت بطنط وسألتها بتعمل ازاي البتنجان مسلوق

علشان ابقى اعملة زيها بالضبط

وفعلا عملتة ولقيتة بيقول

لأ يعني مش اوي طعمة غير اللي ماما بتعملة

وفي مرة كانت طنط عندنا وقعد يقول لها اعملي بتنجان مخلل وخلي شاهي

تشوفك بتعملية ازاي علشان تتعلم منك

ـ اوكي بيجامل ماماتة هاعديها ـ دة طبعا في سري

وقفت مع طنط في المطبخ ولقيتها عملت زي ما انا عملت بالضبط لا حاجة

زادت ولا حاجة نقصت

وبعد فترة عملت اعادة للتجربة ولقيت الكلام نفس اللي فات

من وقتها اتفقت مع نفسي اني ما ادخلش البتنجان المخلل بيتنا تاني

سواء مقلي او مسلوق

ـ لان بصراحة حتى المقلي مش بيطلع زي اللي امي بتعملة ـ

واكتفيت بأني اكل البتنجان عند ماما

وهو لما طنط تيجي تبقى تعمل لة المسلوق

مش كدة احسن.........والا انا غلطانة ؟

اما صحيح دي بقت حاجة بتنجان خالص

اخيرا..........جالي تاج

السلام عليكم بصراحة انا كان نفسي قوي حد يعبرني ويبعتلي تاج

وقد تحققت امنيتي وجالي تلاتة مرة واحدة اول واحد من الصديق

http://3abdo-me7tas عبدة محتاس

والتاني من الرقيقة هبة بتاعة قلوب حائرة http://kloob-truelove/

والتالت من عند الجميلة دوبة اللي وزعتة على الحبايب كلهم http://www-doba/

شوفوا بقى دي اول مرة احط لينكات يعني معرفش كدة صح والا غلط

كان نفسي احط صورة تاج بس ما باليد حيلة اختكم خيبة في الحاجات دي فممكن تتخيلوا

ان في صور تاج جميل بيلمع

بسم الله نبدا الاجابة

......................

اسم مدونتك؟

مفيش حاجة

لماذا اخترته.. وماهي نيتك من وراء اختياره؟

اخترتة لاني ماكانش عندي حاجة اكتبها

انا عملت مدونة علشان اعرف ابعت تعليقات لطهقانة

نية اية دة اسم وكمان الشاعرة ايمان البكري عندها

شعر بيعجبني اسمة مفيش حاجة

هل فكرت في إغلاق مدونتك؟ والسبب؟

لغاية دلوقت لسة

صورتك في المدونة ورمزيتها ؟؟

كان على عيني

انا مش بعرف انزل صوربس لو اتعلمت هانزل صورة

لوردة بلدي جميلة وتكون لونها ابيض او روز

لما دخلت عالم التدوين من الاساس؟

ابو الدراويش خلاني قريت بعض المواضيع في المدونات

وانا عجبتني قوي الحكاية دي وبقيت مرتبطة بيها

جمله قيلت لك فى وصف مدونتك؟

مفيش جملة محددة

كل الكلام اللي اتكتب لحد دلوقت جميل

التعليقات بالنسبه لك ,اهميتها؟

طبعا حاجة مهمة جدا

وكسبت منها صداقات جميلة

احلى بوست كتبته ...ضع اللينك , ثم اذكر لماذا؟

اية الكلام دة

انا كل اللي بكتبة فلة

بس احلى واحد تقدروا تقولوا

رحلة سعيدة

ومعرفش احط اللينك بتاعة

لماذا لاني كنت عايشة مشاعر جميلة في الوقت دة

مع ابو الدراويش اوعوا مخكم يروح لبعيد

أفضل بوست قرأته؟ وضع لينكه؟

لأ كتير هاقول اية والا اية

أفضل مدونة قرأتها؟

برضة كتير وممكن تقولوا كل المدونات اللي بعلق عندهم

حد قل ادبه فى التعليق إيه رد فعلك؟

قل ادبة ازاي يعني؟

شتم مثلا

هامسح التعليق بمنتهى البساطة

بس اكيد هاكون زعلت

أسوأ مدونة؟

معرفش

ما قابلتهاش

أسوأ بوست أسوأ مدون؟

برضة ما قابلتهوش

هيحصل ايه لإيميلك لما تموتى ؟؟

انا عارفة بقى انا هاكون خلاص في عالم تاني

بس اعتقد انة هايتلغي

اديتى الباسوورد لحد قبل كده؟

لأ لية

كانت إيه طبيعة علاقتك بيه؟

هو مين دة

انتم هاتجيبولي مصيبة

اسمك ؟

لية الاحراج دة

شاهي

حلو كدة لدواعي امنية

اسم مشهور ببيه وسط اصحابك؟

شاهي وشوشو

وحاليا

ام الشينيور

عمرك؟؟

في اكتوبر هابقى

32 سنة

برجك ؟؟

احترس

برج العقرب

دراستك؟؟ مجالك؟؟

انا من الشعب

ودخلت كلية الشعب

تجارة عين شمس

شخصيتك نوعها إيه؟

دي حاجة صعبة خالص مش عارفة اقول اية

بس ممكن اقول اني خيبة قوية

السفر بالنسبة لك؟

لو فسحة يبقى جميل

لكن لو اقامة هايبقى صعب عليا قوي

بس لو مضطرين يبقى خلاص نستحمل

وقت فراغك بتعملى فيه إيه؟

بمارس سلطتي على الواد الشينيور واقومة من على الكمبيوتر

واقعد انا

او

كباية شاي خفيف بالنعناع واقعد في البلكونة اتفرج على مخاليق ربنا

واشوف العيال اللي بتلعب تحت

المود بتاعك؟

مش ثابت

حسب الاوضاع

الاكلة المفضلة؟

كل الاكل اللي بتعملة ماما

والبامية والملوخية

اما باقي انواع الطبيخ انا وهما مش اصحاب خالص

الصفات اللي أخدتها من بابا؟

اة عم الحاج

صبورـ مايسيبش فرصة فيها ضحك وتريقة

واهم حاجة الدكترة هو مش دكتور بس معلوماتة كبيرة في المجال دة

الصفات التي أخدتها من ماما ؟

الطيبة

بس انا اخدتها بعبط شوية

الكرم ـ المعاملة الحلوة للجيران والناس الغلابة

واهم حاجة احترام الزوج ووضعة في مكانة مخصوصة لوحدة

اكتر ست حاجات بكرهها؟

الكذب ـ النفاق ـ الخيانة

الاستغلال

القسوة

احساسي اني مظلومة وحقي ضايع

اكتر ست حاجات بحبها؟

ستة بس

كل حاجة ربنا وهبهالي في الدنيا

الحنية ـ الحنية ـ الحنية

الشغل بالنسبة لك؟

مش بشتغل

انت سعيد؟

مفيش سعادة مطلقة

بس الرضا بكل اللي ربنا قسمة هي دي قمة السعادة

وانا الحمد لله سعيدة

لو اجتمعت انت وحسني مبارك في غرفة واحده؟

لية سايب الناس الوحشة في البلد من غير عقاب؟

لو معاك مليون ونص جنيه......تعمل بيهم ايه؟

النصف هاساعد بية ناس كتير قوي محتاجة

اما المليون

هاجيب شقة لاخويا واجهزها

ومش عارفة اية تاني

بس اللي انا عرفاة كويس ان لما الفلوس بتزيد في حاجات تانية بتروح

وانا كدة مبسوطة الحمد لله

بتحب مصر؟

جدا

وياريت الناس ضميرها يصحى شوية علشان نقدر نقول

مصر ياامة يا بهية ياام طرحة وجلابية

وتفضل مصر ام الدنيا

بتحبى البنات؟

قوي قوي

طول عمري كان نفسي يبقى عندي بنتين و ولد

والحمد للة

مسلم؟

الحمد لله على نعمة الاسلام وكفى بها نعمة

مين اكتر شخصية ما تقدرش تستغنى عنها في حياتك؟وليه؟

مفيش

ودي نعمة كبيرة الحمد لله

ايه اكتر موقف محرج اتعرضت ليه في حياتك؟واتصرفت ازاي؟

بعد زواجي بستة اشهر تقريبا كنا في دولة اجنبية

وحضرنا حفلة تبع شغل ابو الدراويش

قوم اية واحد خواجة ساب الناس كلها وجية عاوز يرقص معايا

طب اقولة اية والنبي

اقولة مش بعرف ارقص

هايقول علينا جاهلة

اقولة يعني الراجل اللي زي القمر اللي قاعد معايا دة مش مالي عينك

هايقول علينا متخلفين

تدخل ابو الدراويش وقالة مش هاينفع اصلها حامل

طبعا الراجل قعد يضحك وافتكرة بيهزر بس الحمد لله مشي

ايه الأمنية اللي بتدعي ربنا دايما انه يحققها لك؟

نفسي قوي اني ادخل الجنة من غير حساب

اصل حكاية اني اقف قدام ربنا ويقولي انتي عملتي كذا وكذا

دي صعبة قوي

وكمان نفسي يبقى عندي خشوع حقيقي في الصلاة

وبعدين باقي الحاجات بتاعة الدنيا العادية

التاج امرره لمين ؟

لكل الناس اللي اعرفهم ومش عندهم تاج يجاوبوا علية

اخيرا خلصت دي حاجة متعبة قوي

يعلم الله اني جاوبت من غير كذب ولا تزويق

نسيت اقول حاجة

البنوتة شيرين بتاعة ايامنا الحلوة هي كمان بعتتلي تاج

شوية تخاريف

ورجعت تاني...........على رأي الرخمة ماريا
رجعت من عند ماما وهاقول لكم شوية حاجات حصلت معايا

البية البواب مشكورا اتصل بيا وكان فاكرني غضبانة عند امي
طيب لوكنت غضبانة بصحيح تفتكروا كان هايعمل اية؟
على العموم الراجل كان عاوز يخدم بس مفيش نصيب المرة دي

..............................

الواد الشينيور اللي عندة 9 سنوات شعرة طول وهو اصلا دماغة كبيرة
يعني لما شعرة بيطول بيبقى شبة البطيخة اللي لابسة باروكة وانا مش ممكن
اسيبة كدة ابدا فقلتلة
يالا يا حبيبي علشان تروح تحلق
الشينيور:لأ يا ماما انا مش عاوز احلق
انا: لية؟.............بمنتهى الهدوء
هو:انا عاوز اطول شعري
انا:ناااااعم..........بمنتهى الردح
هو: عاوز اطولة ذي دلبيارو ـ طبعا انا مش عارفة الاسم بينكتب ازاي
انا: ودة يطلع مين ان شاء الله
هو:دة لاعب كورة في ايطاليا
حاولت اتمالك اعصابي وقلت لة
مش مفروض اننا نقلد اي حد مش يمكن شكلك يبقى وحش وانت مطول شعرك
احنا نروح للحلاق وتقولة وتاخد رأية ولازم هو اللي يظبط الحكاية دي
والحمد للة ربنا هداة ونزل معايا بس بشرط اني اشتري لة جل لزوم النيو لوك الجديد

....................
البت الجبارة اللي عندها 3 سنوات شافت اخوها بعد الحلاقة وجالها هس هس في دماغها
الجبارة: انا عاوزة احلق شعري واعمل سبيكا واحط جل
انا: يا بنتي اسمة سبايكي ومفيش بنات بتحلق وتحط جل
وطبعا بما انها جبارة يعني رأيي مالهوش اي لازمة واللي هي عاوزاة لازم يمشي
وبعد مباحثات طويلة وفشل القمة اللي حاولت اعقدها معاها اخدتها ونزلت على الكوافير
وقصت شعرها ألاـ جارسون ومش عاوزة اقول لكم على شكلها دلوقت قمر 14

......................
لما باكون عند ماما بيكون في حرية شوية
مش معنى كدة ان ابو الدراويش حابسني لأ ـ خلي نيتكم حلوة
انا قصدي اني بأرمي العيال هناك وانزل ازور اصحابي...جيراني...قرايبي
والمجاملات العادية.....نجاح...جواز...زيارة مريض... الحاجات دي
المشاوير دي كلها يعني ركوب مواصلات قلت اسرع حاجة مترو الانفاق
لقيت الناس بتتفتش قبل الدخول وخصوصا اللي معاهم شنط
ومالة افتح الشنطة للأستاذ المحترم اللي بيفتش
شنطتي فيها محفظة ومناديل وموبايل ومفاتيح واكيد فلوس طيب حاجات عادية
الاقي الظريف بيقولي اية..........؟
افتحي المحفظة
انا : نعم وهي المحفظة هايكون فيها اية؟ ـ وفتحتها طبعا
الظريف: دي اجراءات امنية يا مدام اتفضلي
الراجل حسسني انة وزير الداخلية وانا مش واخدة بالي
اعوذ بالله هي الناس جرى لها اية؟
والغريب بقى اني لما نزلت في محطة انور السادات لقيتهم مش بيفتشوا اللي هايركب من هناك
يعني هي الاجراءات الامنية ماشية على سطر وسايبة سطر

.......................

كان يوم جميل من الايام اللي كانت حرّ موت وكان عندي ميعاد في التحرير
وطبعا قلت لنفسي بلا مترو بلا كلام فاضي انا هاروح اركب الاتوبيس المكيف من الموقف
ويارب بس يكون التكيف مش عطلان ـ متفائلة قوي
وفعلا رحت الموقف والاتوبيسات كانت موجودة بس الابواب مغلقة
سألت كمسري كان قاعد على المحطة
انا: لوسمحت فين الاتوبيس اللي بيروح التحرير؟
الكمسري: اي واحد من دول هايروح هناك
انا : طيب الباب مقفول هو هايطلع امتى؟
الكمسري: اسألي الناظر اللي قاعد في الكشك دة
انا : السلام عليكم هو الاتوبيس هايطلع امتى
الناظر: قريب ان شاء الله
انا: ايوة حضرتك يعني امتى؟
الناظر: ربنا يسهل.....لما السواق يجي
انا: يعني هو في ميعاد الاتوبيس هايطلع فية والسواق عارف كدة والا من غير مواعيد
طبعا الناظر اكبر من انة يرد عليا تاني فرد عليا واحد كان قاعد معاة
هاهاهاها ربع ساعة كدة يا مدام هاهاهاها مفيش مشكلةهاهاهاهاالعجل موجود
هاهاهاها بس فين السواق هاهاهاها فين السواق هاهاهاها
كان نفسي اقولة بتضحك على اية يا عبيط بس انا مؤدبة ومشيت وسيبتة وطبعا ركبت تاكسي

بس عاوزة اعرف بجد هو كان بيضحك فرحان يعني والا بيتريق عليا
اوعوا تقولوا بيتريق هو انا سألت على حاجة غريبة والا اية؟

التلاجة تاني مرة

وحشتوني......وحشتوني........وحشتوني.......اهلا..اهلا

دة كان جزء من اغنية وردة حبيت ابدأ بية

عبدة محتاس اللي بيعلق عندي بيقول ان العنكبوت عشش في المدونة ماشي مقبولة منك يا عم عبدة

انا سافرت اسبوع واحد كان المفروض اقول اني مسافرة زي ما دوبة عملت بس ماكانش عندي

وقت خالص ولما سافرت حاولت ادخل على الموقع من اي كافي نت ولقيت واحد فعلا بس

كان عندهم فيروس بيخرج من على النت

ملحوظة مهمة جدا

ابو الدراويش ماكانش معانا

الملحوظة دي علشان النق كفاية اللي حصل لدوبة

نكمل بقى موضوع التلاجة

هاتقولوا في اية تاني التلاجة اتصلحت والراجل ماعرفش ينصب عليكي...............ابدا

الراجل صلح التلاجة يوم الثلاثاء وانا سافرت يوم الجمعة

اتصل بيا ابو الدراويش يوم الاحد وقالي التلاجة باظت

انا:لية اية اللي حصل؟

الدرويش:معرفش انا جيت افتحها لقيت النور مش بينور والموتور مش شغال

انا:يادي النيلة طيب سيبها لغاية الصبح وبعدين نشوف هانعمل اية

اتصلت الصبح وقالي

ايوة اشتغلت بس تقريبا اللمبة محروقة

انا:منة لله المندوب النصاب اخد اللمبة الاصلية بتاعة التلاجة وساب لي اللمبة الوحشة

طبعا هاتقولوا عرفتي منين انة غير اللمبة ولما هي لمبتك سليمة سيبتية يغيرها لية؟

اقول لكم

بصراحة انا ما شوفتهوش وهو بيغير اللمبة بس لما نزل وفتحت التلاجة لقيت

النور قوي جدا مش زي النور العادي بتاع التلاجة

فعرفت انة غير اللمبة مش عارفة ويمكن نيتي هي اللي وحشة بس اللي انا متأكدة منة

ان مش دة نور اللمبة بتاعتي

المهم وصلت القاهرة يوم الجمعة وقلت لازم اعمل شكوى في الراجل ابو طويلة دة

اتصلت فعلا يوم السبت بالشركة وبعد كلام كتير مع اللي رد على التليفون

قالي:شوفي يا مدام المندوب كاتب في التقريران تلاجتك بايظة ومحتاجة900 جنية

علشان نجيبها الشركة تتصلح وهو قالك الكلام دة صح

انا:يا نهار اسود ماحصلش دة صلحها وقالي كلة تمام دة حتى قالي لو مش عاوزة تمضي على التقرير

مش مهم

هو:ازاي يعني التلاجة عندك شغالة

انا:ايوة

هو:مش ممكن

انا: يا عم وانا هاكذب عليك لية..واللهي شغالة انا كنت متصلة علشان اقول لكم على اللمبة اللي هو

غيرها واتحرقت بعد اربع ايام

هو:لأ المندوب ماغيرش حاجة

انا:لأ غير اللمبة والمندوب دة مش كويس ما تبعتهوليش تاني

هو:مش ممكن يعني يغير اللمبة ويدفع لك خمسة جنية من جيبة وبعدين المندوب دة كويس جدا

دي الناس بتطلبة بالأسم

انا:لية نانسي عجرم

هو:افندم

انا:لأ مفيش ممكن تبعتلي واحد غيرة

هو:خلاص هابعتلك واحد بلمبة جديدة يوم الاثنين

اوف اعوذ بالله الراجل اتقلب مرة واحدة لمحامي للمندوب ومش عاوز يفهم اي حاجة

حاولت افهمة ان اللمبة بتاعتي كانت سليمة وهو اخدها يعني مش هايدفع حاجة من جيبة

وهو ابدا مصمم ان المندوب كويس جدا وشاطر ومطلوب

وأديني اهو في انتظار البلوة الجديدة قصدي المندوب الجديد

سلام مؤقت لما نشوف اية اللي هايحصل تاني

طلعت نصحة المرة دي

التلاجة بتاعتي عمرها من عمر الشينيور

يعني تمت من يومين 9 سنوات وتقريبا كان مش عجبها

ف قررت انها تشتغل من غير ضمير

قوم انا كمان اتصلت بصيانة كريازي وبلغت عن العطل

كان المفروض المندوب يجي امبارح وطبعا مجاش في الميعاد

انا قلت يمكن كان بيعمل استعدادات لمباراة الاهلي والزمالك

بيني وبينكم بعد الماتش قلت يارب يكون المندوب زملكاوي علشان اخد بتاري

لأني فضلت مستنياة طول اليوم

المهم شرف المندوب النهاردة وكان حاجة كدة ما شاء الله متر في مترين

البت نورةـ زوجة البواب ـ خافت منة وطلعت معاة ودخل البية وشرحت لة العيب

وبعد الفك والتركيب قالي

الترموستات مش مظبوطة ودي لوحدها ب 50 جنية

قلت لة: مافيش مشكلة يعني هي معاك

قال: ايوة كل حاجة موجودة

قلت: خلاص اوكي

قال: بس مش هي دي المشكلة وبس غالبا انتو عندكم الكهرباء كانت وحشة

ومازالت فعلشان كدة نظام التسخين اللي بيعمل........مش عارفة اية حصل فية

..........مش عارفة اية........

وكلام كبير يصعب على امثالي فهمة بس طبعا قعدت اهز في دماغي

وابربش بعنيا وكأني فهمة هو بيقول اية وكنت بقول في سري تسخين اية المجنون دة

هي ثلاجة والا سخان

وخلص المحاضرة وقفل التلاجة وقالي كلة تمام قلت شكرا ورحت اجيب لة الفلوس

وبعدين الفار لعب في دماغي وقلت لنفسي الراجل دة ماغيرش حاجة

لو كان غير الترموستات طيب فين البايظة؟ وافتكرت انهم بيبقى معاهم ورقة مكتوب فيها

اللي عملوة واتكلف كام وانا بامضي عليها

رجعتلة تاني وقلت لة هات امضي لك على الورقة وبصيت في الورقة لقيتها فاضية

قالي: لو مش عاوزة تمضي بلاش

ولم امضي وسألتة انت قلت الترموستات بكام؟

قال: لأ انا ماغيرتهاش دة انا بقول لك لو كانت هاتتغير كانت هاتبقى ب50 جنية

الراجل كان هاينصب عليا

بس الحمد لله طلعت نصحة المرة دي

ولكن في سؤال محيرني جدا

وياريت لو حد عارف اجابة يقول لي

يعني اية الكهربا عندنا وحشة

هو انا اللي باروح اشتريها

طيب المرة الجاية انقي الكهربا عاملة ازاي يعني الحلوة بتبقى خضرا والا حمرا

واجيبها مستوية والا نية شوية

الرحمة يا رب

حكايتي مع الضيفة

آة يا ركبي...........آة يا رجلي
آة يا ظهري
انا اتبهدلت آخر بهدلة
البنت ماشاء الله عليها ما بتتعبش طول اليوم لفّ على المحلات والمولات
لمّا خلاص كنت هابوس اديها واقول لها ارحميني في فرق 16 سنة بيني
وبينك يعني السن لة حكم برضة وبعد كل اللف دة شافت اعلان فيلم عمر
وسلمى جالها هلع وعاوزة تدخل الفيلم
انا:يابنتي الساعة12 باليل هاندخل امتى بس
هي: ندخل الحفلة الجاية
انا:يعني الساعة واحدة وتخلص تلاتة
هي:يعني اية؟
انا:يعني ماينفعش كدة متأخر قوي بكرة اوديكي بدري شوية
هي:بس انا بحب ادخل الساعة11 باليل

ودخلنا
فعلا تاني يوم من 10 الي 12 ومابطلتش كلام عن الفيلم لغاية الساعة
تلاتة ونصف الفجر والحمد لله انها حسيت اني بنام وهي بتتكلم ف سابتني ادخل انام
احنا طول المدة كنا بناكل برة وبعدين قلت اسألها بتحب تاكل اية؟ يمكن تكون نفسها
في اكل بيتي والأ حاجة

انا:انتي بتحبي تاكلي اية؟
هي:مجدرة
انا:نعم م اية؟
هي:مجدرة مجدرة
طبعا ظهر على وشي علامات الغباء والتعجب وكنت محتاجة لوالدة طهقانة
علشان تفهمني اية الكلام الغريب دة
انا:ايوة سمعت بس المجدرة دي يعني عبارة عن اية؟
هي:ارز وشو بتسموة ....اة عدس
انا:عدس بني والأ اصفر
هي:بني بني
انا:يعني كشري مش تقولي كدة من الصبح
واخدتها ونزلنا على كشري التحرير وهناك قعدنا على الترابيزة وجة المتر
قالت لة عندكم اية؟
انا:اية يا بنتي دول ماعندهمش غير كشري انتي مش قولتي عاوزة تاكلي مجدرة
شوف يا متر هات اتنين كشري وسط وتقلية وحمص زيادة
هي:اية الزجاجات دي؟
انا:دي شطة ودي دقة
هي:انتم مش بتاكلوا معاها سلطة
انا:لأ
هي:ولا لبن
انا:لبن اية؟انتي عاوزة تشربي لبن مع الكشري
هي:لأ مو اشرب .. اللبن بيكون في صحن لحالة واخد هيك واحط هيك على المجدرة
انا :اة انتي تقصدي لبن رايب احنا الكشري عندنا بيكون ارز ومكرونة وعدس ومش
بناكل معاة غير صلصة ودقة او شطة على العموم انا هانزل اشوف اي سوبر ماركت
واشتري لك لبن رايب
هي:شو مكرونة؟كيف يعني؟ انا مابديش مكرونة
انا:طيب لما اقوم الحق الراجل علشان يجيب لك بدون مكرونة واشوف حكاية اللبن
نزلت ادور على اي سوبر ماركت..ابدا مفيش ببص كدة لقيت محل كباب دخلت
بكل فخر وقلت للكاشير لوسمحت عاوزة واحد سلطة خضراء
قالي:واية كمان؟
قلت:وو..سلطة زبادي وبس
وفضلت اتفرج على المحل بمنتهى البراءة وتجاهلت نظرات الناس

واخدت السلطة وجريت على الكشري قبل لما يبرد

وعدى الموضوع على خير بس كانت مرارتي في حالة مش ولابد

وادي كمان يوم خلص ياترى هاعمل اية بعد كدة؟

سألتها عاوزة تروحي فين؟قالت

مصر الجديدة واهو فرصة نتمشى على البحر شوية ولو في وقت نروح مارينا

يخرب..........يلعن............يحرق...............طبعا في سري

انا:مصر الجديدة مش على البحر ومارينا دي بعيد جدا يعني سفر

هي:مش الكوبري اللي عدينا علية كان على البحر

انا:لأ دة النيل.البحر مش في القاهرة

وطبعا علشان تفهم الفرق بين البحر والنيل خدت لها بتاع نصف ساعة

مصر الجديدة...انا معرفش فيها غير روكسي

ولو لفينا روكسي رايح جاي مش هاناخد غير ساعة والأ اتنين طيب اعمل اية

في باقي اليوم...........ايوة

شديت تليفون لاحمد اخويا وقلتلة الحقني

بصراحة جة على طول وتكفل باليوم من اولة

المهم بقى انها كانت سعيدة جدا وقالت لوالدها على كل المغامرات اللي عملناها

وكان هو كمان مبسوط وعلشان كدة قرروا انهم ينزلوا مصر تاني الاسبوع

القادم ويجيبوا معاهم مامتها واخواتها الخمسة

ادي اخرة اللي يكرم ضيفة هايفضل يكرم كمان وكمان وكمان

وكمان وكمان.....................وكمان

آة والف آة

البوست دة نكد
يعني اللي فرحان ومالهوش نفسّ يتنكد بلاش يكمل قراية

الموضوع بأختصار
ان الدرويش قالي ان زميلة من الكويت هايجي مصر مع ابنتة
زميلة دة كان مغزوم عندي من اسبوعين تقريبا وبصراحة الراجل محترم جدا
المهم
تحفني وقالي انة قال لحضرتة هات بنتك تنزل عندنا بدل لما تسيبها في الفندق لوحدها
ونروح احنا نشتغل واهو كدة تكون مطمن عليها والمدام هاتخلي بالها منها
عادي.........بتحصل............ومالة
اشيلها على دماغي من فوق ـ الحمد لله انا عندي شعر يعني البنت مش هاتتزحلق ـ
انا كنت فاكرة ان الكلام دة هايحصل لما الدرويش يرجع من السفر يعني يوم 20
لأ البنت هاتيجي بكرة
وانا كنت سايبة العيال عند ماما على اساس ان الدرويش هايسافر واروح لهم
طبعا كدة هاتزرع في البيت هاسيب العيال عند ماما علشان اكون فاضية افسح الضيقة
يعني مش معقول افسحها وانا مجرجرة تلات عيال ورايا

اللي مزعلني بقى انة بيتفق مع الناس الاول وبعدين يبقى يقولي دة لو افتكر
وغالبا قصدي ودائما باكون آخر من يعلم

انا بتصعب عليا نفسي قوي لما بافكر التفكير دة
شوية اقول دة انتي مش في بالة خالص ومش بيفكر فيكي وكل اللي همة مصلحتة وشغلة وبس
وشوية تاني اقول لأ دة هو عارف انك كويسة وهاتوافقي على طول
وبافضل بين التفكير دة ودة لغاية لمّا دماغي تصدع وعنيا تورم من كتر العياط ودة طبعا من غير
ما حد يحس بيا
وكل مرة كدة ....ازعل شوية وبعدين ارضا بالأمر الواقع

انا عارفة ممكن ناس كتير تقول عليا خايبة وماعنديش شخصية مع زوجي
بس انا في رأيي ان هي دي الحياة الزوجية..........تضحية
وبعدين امي علمتني اني ما اكبرش المشاكل
يعني اهو كلة بيعدي

انا مش هاسأل اعمل اية؟ لاني عارفة انا هاعمل اية
هاقعد في البيت زي الشاطرة استنى الضيفة وارحب بيها..بس تفتكروا اعمل لها اكل اية؟
وهل هايعجبها طبيخي...طيب هي بتحب اية؟
هانشوف كل شئ هاينكشف ويبان

هناك فارق كبير في حالتي النفسية بعد كتابة هذا البوست

الغاز وصل

صحينا من النوم الساعة8 صباحا على صوت حفر وناس كتير بيكلموا بعض
يالا يا رجالة......هيلا هوب ...هيلا هوب
بصيت من البلكونة لقيت عمّال لابسين سالوبيت(عفريتة) ازرق ومكتوب عليه بتروجاز
عرفت ان الحفر دة علشان مواسير الغاز الطبيعي قلت حلو قوي جميل ربنا هايرحمنا من الانابيب
ومن بتوع الانابيب
اصل احنا عندنا سعر الانبوبة(هي بالنون والأ بالميم..مش عارفة.......ماعلينا)بقى موحد 10جنية
وللاخوة العرب 15جنية
دة غير اني اصلا بخاف من الانابيب وعلشان كدة مش عندي استبن يعني لما الانبوبة بتخلص
خد عندك بقى...............تليفونات للبواب..........وتفضل وداني في الشارع علشان اسمع اي
خبطة تدل على ان في بتاع انابيب معدي ودة لانها دايما بتخلص وانا بأعمل الاكل(آل يعني البت
طباخة اوي.........ماشي....ماشي)
بصراحة انا فرحت بالخبر السعيد وقلت مافيش مشكلة شوية خبط ودوشة وناس صوتها عالي
كلها كام يوم والموضوع هايخلص وكلنا نرتاح

الساعة بقت 5 مساء
قلنا ننزل انا وابو الدراويش نشتري شوية حاجات
وبكل ثقة ذهبنا الي السيارة
لأ في الاول لازم تعرفوا العربية كانت راكنة فين؟
تحت العمارة في جراج لة مدخلين او مدخل ومخرج اي حاجة
احنا بنركن تحت العمارة

قوم اية نلاقيهم حفرين قدام المدخلين يعني اتحبسنا ومش عارفين نخرج
طبعا شوفت المنظر وفضلت اضحك اضحك
بصينا لقينا العمال واقفين
قلنا نطلب منهم حد يجي يردم حفرة واحدة نعدي منها وخصوصا انهم كانو حطوا فيها المواسير
ذهب ابو الدراويش بكل ادب(وطبعا انا وراة)علشان يكلم احد العمال
ودار بينهم الحديث الاتي
ابو الدراويش:لو سمحت حد يجي يسد الحفرة علشان عاوز اطلع بالعربية
العامل:يا بية اللودر هايجي يردمها بكرة ان شاء الله احنا مش ممكن نسبها كدة
ابو الدراويش:حضرتك بقولك عاوز اطلع دلوقت
العامل:والله احنا مابنعملش فيكوا حاجة وحشة احنا بندخلكم الغاز
انا: يا عم ما احنا عارفين شوف حد يسد الحفرة دي خلينا نمشي
وببص كدة لقيت ابو الدراويش دماغة طلعت دخان ومشي وساب العامل وطبعا العامل ماسألش فينا
وقعد يشيل الجاروف والعدة اللي معاة وكمل طريقة عادي ولا كأن في ناس كانت بتكلمة
وبعدين لقيت ابو الدراويش ماسك خشبة وقعد يردم الحفرة بكل انفعال والدخان كان لسة طالع من دماغة برضة
جريت بسرعة لنورة زوجة البواب قلتلها هاتي يا بنتي الفاس اللي عندك وتعالي مع الراجل وسدوا المدعوقة
الحفرة دي......وتمت العملية بنجاح

خرّجنا العربية وطول الطريق بندور على مسئول والأ كبيرللعمال دول ..ابدا مفيش
تقولش العامل الغلبان دة متبرمج...هو يحفر واللودر يردم وياعين امة مايعرفش غير كدة
لأ والمصيبة انة فاهم انة بيعطف وبيتكرم علينا وهايدخلنا الغاز من جيب الست الوالدة
بس اكيد كان في حل يعني مثلا
الحفرة اللي تتحفر وتنزل فيها الماسورة تتردم على طول
او كانوا قالوا
يا ناس احنا هنحفر وها نردم بكرة اللي عاوز يطلع عربيتة من الجراج يطلعها قبل لما نحفر
اكيد الكلام الحلو دة مش بيحصل غير في ارض المحروسة

وفي النهاية احب ان اشكر شركة بتروجاز والسيد المحافظ والسيد الوزير وكل الناس الحلوة اللي ساهمت
في دخول الغاز وطلوع روحنا
وسمعني احلى سلام للعامل اللي مابيعملش فينا حاجة وحشة وهايدخلنا الغاز على حسابة
ويا رب الصبر من عندك
وادعو اني ما اتحبسش بعد البوست دة

رحلة سعيدة

كان عندي عزومة من يومين هابقى احكلكم عليها بعدين
المهم دي كانت حجة كويسة علشات ابعت العيال التلاتة عند ماما
ايوة التلاتة (يا عيني يا ماما يا ترى عاملة اية دلوقت؟!و
ويا ترى العيال عاملين اية في بابا)معلش ربنا يخليكوا

الدرويش كان اجازة امبارح فقررنا نخرج
رحنا السينيما وبعدين قلنا نتغدا برة ودخلنا فعلا المطعم
يا سلام قاعدة انا وهو لوحدنا ومفيش حد بيقولي:
قومي ركبيني المرجيحة وزقيني
ـ ماما انا عاوزة اتزحلق
ـ ماما انا عاوزة اعمل بي بي
ـ ماما قومي العبي معايا
ـ ماما الشينيور زقني جامد
ـ ماما الرايقة مشيت وسابتني لوحدي
هدوء تام
طبعا كان في ناس كتير في المطعم بس برضة كنت حاسة بهدوء وتفرغت للفرجة على الناس
ونظراتي كلها كانت للشباب والشابات اللي موجودين وكأني اول مرة اشوف ناس
خير اللهم اجعلة خير
اية اللي انا شيفاة دة؟
شاب محترم مربي دقنة وعامل سكسوكة...ماشي عادي
لكن مطول شعرة تقريبا اطول من شعري دة بقى مش عادي يعني الدقن مش ماشية مع الشعر الطويل
خالص حاجة غريبة........اية ..اة....حرية شخصية...طيب
واحد تاني رفيع و وشة صغير وعامل شعرة كانيش فظيع لدرجة يا عيني الواد مش قادر يسيطر على دماغة
يجي شوية هوا يمين..دماغة تروح يمين..شوية شمال ..تروح مميلة ناحية الشمال...طيب اية دة كمان؟....موضة
اة..حاضر...

لألألأ دي بقى مصيبة.........م
انا:الحق يا ابو الدراويش الواد دة قاعد وهدومة الداخلية باينة.....روح قلة يرفع البنطلون شوية يا حرام دة مش
واخد بالة خالص
ابو الدراويش:اسكتي
انا:ينوبك ثواب انت مكسوف والا اية؟
ابو الدراويش:يا بنتي اسكتي ماهو اللي قاصد يعمل كدة دي الموضة يا جاهلة
انا:انت اكيد بتهزر الموضة دي عندنا هنا في مصر؟ ودة من امتى ان شاء الله؟
ابو الدراويش:من بدري بس انت اللي نايمة على ودانك
انا:خليني نايمة وجاهلة احسن..بكرة تبقى الموضة انهم يلبسوا البوكسر فوق البنطلون واللي يعيش ياما يشوف

وتلاقي الواد قاعد عادي خالص كأنة في بيتهم..قاعد على كرسي ورجلة على كرسي ومرحرح على الاخر
يعني اللي اعرفة انة في مكان عام ولازم يكون في احترام شوية للمكان وللناس الموجودة
والا دة كمان يبقى جهل وتخلف

البنات بقى ويا سلام على البنات
كانوا بنتين
الاولى
عارفين لما واحدة تكون لابسة مايوة وتلبس فوقة تي شيرت كت وتلف على وسطها حتة قماشة
تقريبا بيسموها كاش مايوة
اهي البنت دي كانت لابسة كدة وكأنها على البحر لأ واية تقريبا حست انها سقعانة راحت مطلعة
طرحة من شنطتها وحطتها على كتفها ال يعني كدة دفيت خلاص...ياشيخة بلا قرف
الثانية
بدي كت معفن ومقطع وزوقة منيل(يعني لو عندي هامسح بية السيراميك)وبنطلون جينز من ابو وسط ساقط
وكل شوية ترفع فية طيب يا بنتي عليكي من دة بأية ما تلبسي حاجة مريحة علشان تبقي قاعدة براحتك
في شعر جميل للشاعرة ايمان البكري عن الموضوع دة هابقى اكتبة في الأخر

رحلة العودة
بعد ما ضغطي ارتفع قلت اسمع حاجة واحنا في العربية تهدي اعصابي شوية
جيت اشغل الكاسيت لقيت الدرويش بيطفية وبيقولي انا هاغني..طيب كويس
رجعت ظهر الكرسي لورا شوية وغمضت عنيا وقلت استمتع بأغاني الحب والغرام
وفجأة بدأ يغي.......................كام عام ومواسم عدوا وشجر اللمون دبلان على ارضة
قلت معلش هو بيحب محمد منير ودي افتتاحية والرومانسي هايجي بعد كدة
خلص دي ودخل على التانية وقال.......بعد ما ادى وبعد ما خد.............شد لحاف الشتا م البرد
قلت اة بانت مفيش رومانسي.......مفيش عاطفي...هي طالبة معاة وطني خلاص النوم افيد...خ خ خ خ
وصحيت على.......عم بطاطا لذيذ ومعسل عمرة ما طاطا لغير الله.........والغريب والعجيب انة بقى
مستغرب انة مش عاجبني وقالي اية دة هو في حد مابيحبش محمد منير
انا:ايوة بحبة بس هو كمان غنى اغاني تانية حلوة..مالها..لما النسيم بيعدي.........والا حتى سو يا سو
اي حاجة غير اللي انت قلتة دة انت كان ناقص تغنيلي خلي السلاح صاحي
الدرويش:ضحك مع شوية تريقة
بس انا بقى ماسكتش ورحت مغنية....شيد قصورك على المزارع من كدّنا وعمل ادينا..................م
ودي كانت نهاية الرحلة السعيدة
...............................
شوفوا شعر ايمان البكري
عذرا على اي اخطاء املائية
.............................
يابنت بلدي عيب....لمّا اللجام هايسيب....يسترخصوكي الناس
ف بنطلون مزنوق.....وبلوزة شبر لفوق...ولا حتى في الجمباز
عاريتي تحت وفوق...ولا عادش عندك زوق....ولا حتى في احساس
لحم الخروف مدبوح...بنجيبة بعد الروح...ماتحصل الانفاس
ولحمتك بالكوم...دكان وطول اليوم...مفتوح لأرخص ناس
يخرب زمنا زمان...كأن عمر ماكان...لنا اصل ولا اساس
.............................
الواحد مش عارف هو عجّز والا بقى دقة قديمة والا اية الحكاية؟

الاجازة جت

انتهى العام الدراسي والاجازة جت..اهئ اهئ
ايوة دة انا باعيط
انتو عارفين يعني اية الاجازة جت؟
يعني قنبلة هاتضرب في البيت وفي دماغي!!!!
صحيح الدراسة كان فيها صحيان بدري ومذاكرة
بس دة اهون من اللي بيحصل في الاجازة
نبدأ من الاول:
انا عندي ثلاث اطفال
الشينيور 9 سنوات *لما بيكون عاوز حاجة بيفضل يزن ويخرم دماغي *
الرايقة 6 سنوات *بطيئة وكسلانة شوية*
الجبارة 3 سنوات *قوية ومفترية*
تخيلوا يوم طويل عريض مع الشينيور والرايقة والجبارة ومش هاجيب سيرة
الزغلول الكبير(باباهم )منعا للمشاكل (اصلة ديمقراطي ذي حكومتنا)م
انا عارفة ان الاولاد دول نعمة وبأحمد ربنا عليها
وعارفة ان في ناس مش طايلة ظفر عيل وربنا يخليهم ليا
بس في الاخر انا انسانة من لحم ودم يعني بيجي عليا وقت بأكون مش طايقة نفسي حتى
ومن حقي اني اقعد شوية في هدوء وماحدش يطلب مني اي حاجة ولو ساعة في اليوم
ليا زوجة عمّ كانت عاملة يوم في الاسبوع لنفسها وبس
يعني تروح النادي وماتعملش اي حاجة لاي حد ولا حتى الاكل
كنت زمان بقول دة طمع يعني اية يوم لنفسها؟!بس دلوقت بقى ليا رأي تاني.
دة حتى القاعدة على الكمبيوتر
بخناقة مع الشينيور اللى عاوز يلعب
وزعيق مع الرايقة اللي الدور عليها في اللعب
وعياط من الجبارة اللي عاوزة تتفرج على سي دي عالم سمسم
لأ وكمان بيت الراحة اللي هو اسمة بيت الراحة مابيبقاش في راحة
لو دخلتة وقفلت الباب (عادي يعني كل الناس لازم تقفل الباب)م
تيجي الجبارة وتخبط
الجبارة:ماما افتحي انا عاوزة اعمل بي بيّ
انا:روحي الحمام التاني
الجبارة:لأ انا عاوزة اعمل في الحمام دة
وطبعا لو مافتحتش في اسرع وقت يبقى غرقنا والحمد لله
بقول اية
كفاية كدة اهو فضفضت شوية وخلاص